ᑐᓴᕋᑦᓴᓕᕆᔩᑦ

ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᑦ − ᑐᑦᓯᕋᐅᓯᐅᖁᔨᔾᔪᑎ

(ᔪᓚᐃ 18, 2022 – ᑲᖏᕐᖠᓂᖅ, ᓄᓇᕗᑦ) ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ (NTF) ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᓂᒃ ᑐᒃᓯᕋᐅᓯᐅᕐᕕᑦᓴᐅᓂᐊᓕᕐᒥᔪᑦ ᔪᓚᐃ 18-ᒥᓂᒃ ᐊᐅᒡᒍᓯ 31−ᒧᑦ, 2022 ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᒥᒃ ᐊᒻᒪᓗ ᐊᔪᕈᓐᓃᓴᕐᓂᕐᒧᑦ ᐃᖅᑲᓇᐃᔮᒧᓪᓗ ᖁᕝᕙᕆᐊᕈᑎᒃᓴᒧᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᓂᒃ.

ᐃᑲᔫᑎᒃᓴᓕᕆᔨᒃᑯᓐᓂᒃ NTF ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑏᑦ ᐊᑐᖅᑕᐅᒍᓐᓇᖅᑐᑦ ᐃᓕᓐᓂᐊᕈᑎᒧᑦ ᐊᑭᖓ, ᐊᒃᑐᐊᔪᓄᑦ ᐊᑭᖏᓐᓄᑦ, ᐅᖃᓕᒫᒐᕐᓄᑦ, ᐃᓕᓐᓂᐊᕈᑎᓅᖓᔪᓄᑦ ᐊᒻᒪᓗ ᐃᓕᓐᓂᐊᕈᑎᒃᓴᒨᖓᔪᓄᑦ, ᐃᖏᕐᕋᔾᔪᑎᓄᑦ ᑐᔪᕐᒥᔾᔪᑎᓄᓪᓗ, ᐃᓅᓇᓱᐊᕐᓂᕐᒧᑦ ᐊᑭᓕᖅᓲᑏᑦ, ᐃᓚᒋᔭᐅᓗᑎᒃ ᓄᑕᖅᑲᑦ ᐸᖅᑭᔭᐅᔾᔪᑎᖏᓐᓄᑦ ᐊᑭᓕᖅᓲᑎᓄᑦ ᐊᒻᒪᓗ ᓂᕆᔭᒃᓴᓄᑦ, ᐊᒻᒪᓗ ᐃᓕᓐᓂᐊᖅᑏᑦ ᐊᑭᓕᑦᓴᖏᓐᓄᑦ.

$1500 ᐊᔪᕈᓐᓃᐸᓪᓕᐊᓂᕐᒧᑦ ᐃᖅᑲᓇᐃᔮᒧᓪᓗ ᖁᕝᕙᕆᐊᕋᓱᐊᕐᓂᕐᒧᑦ: ᑐᓂᔭᐅᔪᑦ ᐊᑎᓕᐅᖅᓯᒪᔭᕆᐊᓖᑦ ᐃᓕᓴᕆᔭᐅᓯᒪᔪᒥᒃ ᐃᓕᓐᓂᐊᖅᑐᖅ ᐊᑦᑐᐊᔪᒥᒃ ᓴᓇᔭᕆᐅᖅᓴᓂᕐᒧᑦ/ᐃᖅᑲᓇᐃᔮᒧᑦ ᐊᔪᕈᓐᓃᖅᓴᐅᑎᒥᒃ ᓯᑕᒪᓂᒃ ᐱᓇᓱᐊᕈᓯᕐᓂᒃ ᓯᕕᑐᑎᒋᔪᒥᒃ ᐊᑯᓂᐅᓂᖅᓴᓘᓐᓃᑦ. ᐃᓚᒋᔭᐅᓪᓗᑎᒃ ᖃᐅᔨᓴᖅᑕᐅᒍᑎ ᓴᓇᔭᕆᐅᖅᓴᓂᕐᒧᑦ ᐃᓯᖅᐸᓪᓕᐊᓂᕐᒥᒃ, G.R.E.A.T. ᐊᒻᒪᓗ ᖁᕝᕙᕆᐊᖅᑎᑦᓯᔪᓂᒃ ᐃᓕᓐᓂᐊᖅᓯᒪᔭᒥᓂᒃ (A.B.E., P.A.S.S., G.E.D., ᐱᒋᐊᕐᕕᖓ ᐊᕐᕌᒍ, ᐊᓯᖏᓪᓗ).

$2500 ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑏᑦ: $2,500 ᑐᓂᔭᐅᔪᑦ ᐊᑎᓕᐅᖅᓯᒪᔭᕆᐊᓖᑦ ᐃᓕᓴᕆᔭᐅᓯᒪᔪᒥ ᐃᓕᓐᓂᐊᖅᑐᖅ ᓯᓚᑦᑐᓴᕐᕕᒻᒥ ᐅᕝᕙᓘᓐᓃᑦ ᐃᓕᓐᓂᐊᕕᔾᔪᐊᒥ ᐃᓕᓐᓂᐊᒐᑦᓴᒥᒃ ᒪᕐᕉᓐᓂᒃ ᐊᕐᕌᒎᓐᓂᒃ ᓯᕕᑐᑎᒋᔪᒥᒃ ᐊᑯᓂᐅᓂᖅᓴᓘᓐᓃᑦ ᐃᓕᓴᕆᔭᐅᔾᔪᑎᒻᒪᕆᑦᑖᕋᓱᐊᕐᓗᓂ ᐅᕝᕙᓘᓐᓃᑦ ᐸᕐᓇᓂᕐᒧᑦ ᐃᓕᓐᓂᐊᓂᕐᒧᑦ ᑎᑭᐅᑎᒍᑎᒃᓴᐅᓗᓂ ᐃᓕᓴᕆᔭᐅᔾᔪᑎᒻᒪᕆᑦᑖᕈᑎᒃᓴᒥᒃ.

ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᓂᒃ ᐱᓕᕆᐊᒧᑦ ᐊᑐᐊᒐᑦ, ᐊᑐᐊᖅᓯᔾᔪᑏᑦ ᑐᒃᓯᕋᐅᑏᓪᓗ ᐊᐃᔭᐅᔪᓐᓇᖅᑐᑦ ᓄᓇᑦᓯᓐᓂ ᑐᖅᑲᑕᕐᕕᒻᒥᒃ ᐅᕝᕙᓘᓐᓃᑦ ᐃᑭᐊᖅᑭᕕᑦᑎᓃᑦᑐᒥᒃ ᐅᕙᓂ “ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ ᐱᓕᕆᔾᔪᑎᖏᑦ – Nunavut Tunngavik Inc.

ᐃᓄᐃᑦ ᐊᑎᖃᖃᑕᐅᔪᑦ ᓄᓇᕗᑦ ᐊᖏᕈᑎᖏᓐᓂ ᑐᒃᓯᕋᐅᓯᐅᕈᓐᓇᖅᑐᑦ.

ᑕᑕᑎᐊᓂᒃᓯᒪᔪᑦ ᑐᒃᓯᕋᐅᑏᑦ ᐃᓚᓕᐅᑎᓯᒪᔭᕆᐊᓖᓪᓗ ᑐᓂᔭᐅᒍᓐᓇᖅᑐᑦ ᐊᐅᓪᓚᖅᑎᑕᐅᓗᑎᒃ ᑎᑎᖅᑲᓂᐊᕐᕕᒃᑯᑦ, ᐃᕐᖐᓐᓈᕈᑎᒃᑯᑦ, ᓱᒃᑲᔪᒃᑯᑦ, ᐅᕝᕙᓘᓐᓃᑦ ᑐᓂᔭᐅᔭᖅᑐᕐᓗᑎᒃ ᐱᓕᕆᐊᒃᓴᓕᕆᔨᖓᓄᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ ᑲᖏᕐᖠᓂᕐᒥ.

ᑐᑭᓯᒋᐊᒃᑲᓂᕐᕕᒃᓴᖅ, ᖃᐅᔨᒋᐊᕐᕕᒋᓗᒍ:

ᓘᓯ ᒪᐃᓈᑦ ᐱᓕᕆᐊᒃᓴᓕᕆᔨ ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ ᑎᑎᖅᑲᖃᐅᑖ 280 ᑲᖏᕐᖠᓂᖅ, ᓄᓇᕗᑦ X0C 0G0 ᐅᖄᓚᐅᑖ. (867) 645-5400 ᐊᑭᖃᙱᑦᑐᖅ: 1-888-236-5400 ᓱᒃᑲᔪᒃᑰᕈᑖ: (867)645-5414

Download (PDF, 145KB)