(ᓯᑉᑎᒻᐱᕆ 6, 2022 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᓄᑦ (ᑐᙵᕕᒃ) ᐊᖓᔪᖅᑳᖓ ᐊᓗᑭ ᑰᑦᑎᖅ ᐊᒻᒪᓗ ᓄᓇᕗᒻᒦᙶᖅᑐᑦ ᐃᓄᐃᑦ ᐅᐃᕖᕐᔪᐊᒃᑯᑦ ᓄᓇᖓᓐᓄᙵᐅᓛᖅᑐᑦ ᕗᕌᓐᔅ, ᓯᑉᑎᒻᐱᕆ 12−ᒥᒃ 15−ᒧᑦ, ᑎᒍᔭᐅᑎᑦᓯᓇᓱᐊᕆᐊᖅᑐᕐᓗᑎᒃ ᐊᑖᑕ ᔪᐊᓇᔅ ᕆᕕᐊᓪᒥᒃ
“ᐊᔪᐃᓐᓇᕈᑎᒋᔭᕗᑦ ᐊᖓᔪᖅᑳᖅ ᒪᑯᕌᓐ, ᓄᓇᖓᑕ ᐊᖓᔪᖅᑳᕐᔪᐊᖓ ᕗᐊᓐ ᐊᒻᒪᓗ ᐃᖅᑲᖅᑐᐃᕕᓕᕆᓂᕐᒧᑦ ᒥᓂᔅᑕ ᑐᐹᓐ−ᒧᕆᑦᑎ ᐅᑎᖅᑎᑕᐅᖁᓪᓗᒍ ᔪᐊᓇᔅ ᕆᕕᐊᓪ. 22-ᓂᒃ ᑖᒃᑯᓇᙵᑦ 26-ᓂᒃ ᐊᕐᕌᒍᓂ, ᕆᕕᐊᓪ ᕿᒫᓯᒪᔪᖅ ᑎᒍᔭᐅᓇᓱᐊᖅᓯᒪᓂᕐᒥᓂᒃ ᑲᓇᑕᒥ ᐃᖅᑲᑐᖅᑕᐅᒍᑎᒃᓴᖓᓄᑦ. ᑕᐃᒪᐃᑎᓪᓗᒍ, ᕆᕕᐊᓪ ᒥᐊᓂᕆᔭᐅᔪᖅ ᓴᐳᔾᔭᐅᓯᒪᓪᓗᓂᓗ ᓴᓐᓂᖓᔪᓕᐅᖅᑎᖏᓐᓄᑦ ᕗᕌᓐᔅ ᓈᖕᒪᖏᑦᑐᒥᒃ ᐅᓂᒃᑳᖑᖁᔭᐅᓇᓂ ᑐᓴᕋᑦᓴᓕᕆᓂᒃᑯᑦ ᐊᒻᒪᓗ ᓴᐳᔾᔭᐅᓯᒪᖁᓪᓗᒋᑦ ᖃᐅᔨᒪᔮᖑᓂᖏᑦ ᐃᑦᓯᕋᕐᔪᐊᕐᒥᐅᑦ. ᑐᑦᓯᐊᕐᕕᒃ ᐊᒻᒪᓗ ᐃᑦᓯᕋᕐᔪᐊᖏᑦ ᖁᕝᕙᓯᓐᓂᖅᓴᐅᖏᑦᑐᑦ ᒪᓕᒐᕐᓂᒃ,” ᐅᖃᖅᑐᖅ ᐊᖓᔪᖅᑳᖅ ᐊᓗᑭ ᑰᑦᑎᖅ.
ᓄᓇᕗᒻᒦᙶᖅᑐᑦ ᐅᐃᕖᕐᔪᐊᒃᑯᑦ ᓄᓇᖓᓐᓄᙵᐅᖃᑕᐅᓂᐊᖅᑐᑦ ᐱᐅᕆᔅ ᐊᒻᒪᓗ ᓕᐊᓐ ᓯᑏᕝ ᒪᑉᓴᓛᖅ, ᕆᕕᐅᓪ ᐱᓂᕐᓗᑦᓯᒪᔭᖏᓐᓄᑦ ᐃᓚᒋᔭᐅᔪᖅ, ᐊᒻᒪᓗ ᑖᓐᔭ ᐊᒻᒪᓗ ᔨᐊᓯ ᑐᖏᓕᒃ, ᕿᑐᕐᖓᖏᒃ ᒪᕆᐅᓯ ᑐᖏᓕᐅᓚᐅᖅᑑᑉ.
“ᕆᕕᐊᓪ ᑲᑉᐱᐊᓱᐊᑎᑦᓯᓂᕆᖃᑦᑕᓚᐅᖅᑕᖏᑦ ᓯᖁᒻᒫᕆᓯᒪᓚᐅᖅᑐᖅ ᐊᑖᑕᒋᓚᐅᖅᑕᓐᓂᒃ ᒪᕆᐅᓯᒥᒃ. ᖃᓄᐃᓕᐅᖃᑦᑕᕐᓂᕆᓚᐅᖅᑕᖏᑦ, ᕆᕕᐊᓪ ᖃᓄᐃᒍᑎᒋᓂᐊᓕᖅᑕᕗᑦ ᐃᓅᓯᓕᒫᑦᑎᓐᓂ ᑲᑉᐱᐊᓱᐊᖃᑦᑕᕐᓗᑕ. ᑲᓇᑕᒨᖅᑎᑕᐅᒋᐊᓕᒃ ᐃᖅᑲᑐᖅᑕᐅᒋᐊᖃᕐᓂᖓᓄᑦ,” ᐅᖃᖅᑐᖅ ᑖᓐᔭ ᑐᖏᓕᒃ.
ᐊᐅᓪᓚᑎᑦᓯᓂᕐᒧᑦ ᐊᖏᕈᑎᓕᐅᖅᓯᒪᔪᑦ ᑲᓇᑕ ᐊᒻᒪᓗ ᕗᕌᓐᔅ. ᑭᓯᐊᓂ ᕗᕌᓐᔅ ᐅᑎᖅᑎᑦᓯᒍᒪᙱᑦᑐᑦ ᐅᐃᕖᕐᔪᐊᑦ ᓄᓇᖓᓂᒥᐅᓂᒃ ᐊᓯᖏᓐᓄᑦ ᓄᓇᓕᕐᔪᐊᓄᑦ ᐃᖅᑲᑐᖅᑕᐅᒋᐊᓕᓐᓂᒃ, ᑲᓇᑕ−ᕗᕌᓐᔅ ᐊᐅᓪᓚᑎᑦᓯᓂᕐᒧᑦ ᐊᖏᕈᑎᖓ ᐊᔪᖅᑎᑦᓯᒍᑕᐅᙱᑦᑐᖅ ᕆᕕᐊᓪ ᑎᑭᑎᑕᐅᒋᐊᖃᕐᓂᖓᓂᒃ. ᑎᑭᑎᑕᐅᒍᓐᓇᓯᐊᖅᑐᖅ ᐊᒻᒪᓗ ᕿᓚᒥᐊᓘᕈᓐᓇᖅᑐᖅ.
- -30-
ᑐᓴᕋᑦᓴᓕᕆᔩᑦ ᑐᑭᓯᑎᑕᐅᒋᐊᕐᓂᖃᕐᓂᐊᖅᑐᑦ ᓯᑉᑎᒻᐱᕆ 7, 2022 ᖃᐅᔨᓴᐅᑦ 10−ᒥ ᐅᓪᓛᒃᑯᑦ ᑲᓇᓐᓇᕐᒥ. ᐃᓚᒋᔭᐅᔪᒪᒍᕕᑦ ᑐᓴᐅᒪᖃᑕᐅᒍᒪᒍᕕᓪᓗ, ᖃᐅᔨᒋᐊᕐᕕᑦᓴᖅ:
ᓵᓐ ᕗᐊᑦᓯᔅᕼᐅᐊᓐ
ᑐᓴᐅᒪᔾᔪᑎᓕᕆᔨᒃᑯᑦ ᑐᑭᒧᐊᒃᑎᑦᑎᔨᖓᓄᑦ ᐃᑲᔪᖅᑎ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006
ᓄᓇᕗᑦ ᐃᓄᐃᑦ ᐅᐃᕖᕐᔪᐊᒃᑯᑦ ᓄᓇᖓᓐᓄᙵᐅᓂᐊᖅᑐᑦ ᕗᕌᓐᔅ ᑭᒃᑰᓂᖏᑦ
ᐊᓗᑭ ᑰᑦᑎᖅᐊᓗᑭ ᑰᑦᑎᖅ ᓂᕈᐊᖅᑕᐅᑲᓐᓂᓚᐅᖅᑐᖅ ᐊᖓᔪᖅᑳᖓᓄᑦ ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᕕᕝᕗᐊᓕ 9, 2021. ᖁᕕᐊᒋᔭᓕᒃ ᓴᕐᖓᑎᑦᓯᒋᐊᒃᑲᓂᕐᓂᕐᒥᒃ ᒪᑭᒋᐊᖅᑎᑦᓯᓂᕐᒥᓪᓗ ᐃᓄᐃᑦ ᐃᓅᓯᖏᓐᓂᒃ ᐊᒻᒪᓗ ᐱᔪᒐᕆᔭᖃᑦᓯᐊᖅᑐᖅ ᐃᓄᐃᑦ ᐃᓕᖅᑯᓯᖓ ᐅᖃᐅᓯᖓᓗ ᐃᓚᓕᐅᔾᔭᐅᓯᒪᖁᓪᓗᒋᑦ ᐱᓕᕆᐊᑦᓴᑦ ᐱᔨᑦᓯᕈᑏᓪᓗ ᐊᐅᓚᓂᖏᓐᓄᑦ. ᓇᓗᓇᐃᒃᑯᑕᒻᒪᕆᑦᑖᓚᐅᖅᓱᓂ ᐃᓕᓴᕆᔭᐅᓯᒪᔾᔪᑎᒥᓪᓗ ᑐᕆᓐᑦ ᐃᓕᓐᓂᐊᕕᔾᔪᐊᖓᓂᒃ, ᑰᑦᑎᖅ ᐱᓕᕆᖃᑦᑕᓕᓚᐅᖅᑐᖅ ᐊᒥᓱᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ ᐃᓚᒋᔭᐅᓪᓗᑎᒃ ᐸᐅᒃᑑᑏᑦ ᐃᓄᐃᑦ ᐊᕐᓇᐃᑦ ᑲᓇᑕᒥ, ᐃᓄᐃᑦ ᑕᐱᕇᑦᓴᑦ ᑲᓇᑕᒥ (ᑕᐃᔭᐅᓕᖅᑐᓂ ᐃᓄᐃᑦ ᑕᐱᕇᑦ ᑲᓇᑕᒥ) ᐊᒻᒪᓗ ᓄᓇᕗᑦ ᓯᕗᓂᒃᓴᕗᑦ. ᑰᑦᑎᖅ ᐅᑎᓚᐅᖅᑐᖅ ᓄᓇᕗᒻᒧᑦ ᐊᖓᔪᖅᑳᐅᑎᓃᖃᑕᐅᓕᖅᓱᓂ ᓄᓇᕗᑦ ᒐᕙᒪᒃᑯᖏᓐᓂ ᐊᒻᒪᓗ ᐅᖃᐅᓯᓕᕆᓂᕐᒧᑦ ᑲᒥᓯᓇᐅᑉ ᐊᓪᓚᕝᕕᖓᓂ. ᓂᕈᐊᖅᑕᐅᓚᐅᕋᓂ ᐃᓂᒋᔭᒥᓄᑦ ᐊᖓᔪᖅᑳᒧᑦ, ᑰᑦᑎᖅ ᑐᑭᒧᐊᒃᑎᑦᑎᔨᒋᔭᐅᓚᐅᖅᑐᖅ ᐃᓄᐃᑦ ᐃᖅᑲᓇᐃᔮᖏᓐᓄᑦ ᐱᓕᖕᒪᒃᓴᐅᑎᓄᓪᓗ ᑐᙵᕕᒃᑯᓐᓂ. ᐃᒡᓗᓕᒻᒦᙶᖅᓯᒪᓪᓗᓂ, ᒫᓐᓇ ᐃᖃᓗᒻᒥᐅᑕᐅᓕᖅᑐᑦ ᐃᓚᒌᑦ. |
ᓯᑏᕝ ᒪᑉᓴᓛᖅᓯᑏᕝ ᒪᑉᓴᓛᖅ ᑲᑎᒪᔨᐅᖃᑕᐅᔪᖅ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ, ᑎᒥᙳᖅᑎᑕᐅᓯᒪᔪᒥᒃ ᓄᓇᕗᑦ ᐊᖏᕈᑎᖏᑎᒍᑦ, ᑐᙵᕕᔾᔪᐊᖓᒍᑦ ᑲᓇᑕᒥ ᓴᐳᔾᔭᐅᓯᒪᔪᖅ ᐊᖏᕈᑦ. ᒪᕐᕈᐃᖅᓱᓂ ᓂᕈᐊᖅᑕᐅᖃᑦᑕᖅᓯᒪᔪᖅ ᒪᓕᒐᓕᐅᖅᑎᐅᖃᑕᐅᓯᒪᓪᓗᓂ (MLA) ᓄᓇᕗᑦ ᒪᓕᒐᓕᐅᕐᕕᖓᓂ. ᓂᕈᐊᖅᑕᐅᒋᐊᙵᓚᐅᖅᑐᖅ ᐊᑯᓪᓕᕐᒧᑦ ᓂᕈᐊᖅᑕᐅᓪᓗᓂ 2004-ᒥ. 2013-ᒥ, ᒪᓕᒐᓕᐅᖅᑎᒧᑦ ᓂᕈᐊᖅᑕᐅᑲᓐᓂᓚᐅᖅᑐᖅ ᓄᑖᒧᑦ ᐊᕕᑦᑐᖅᓯᒪᓂᕐᒧᑦ ᓂᕈᐊᖅᑕᐅᓯᒪᕕᖕᒧᑦ, ᐊᐃᕕᓕᒃ. ᒪᑉᓴᓛᖅ ᓯᕗᓂᖓᓂ ᓇᐅᔮᓄᑦ ᒪᐃᔭᐅᓚᐅᖅᑐᖅ, ᐃᒃᓯᕙᐅᑕᕆᔭᐅᓪᓗᓂ ᑲᑎᒪᔨᖏᓐᓄᑦ ᓄᓇᕗᒻᒥ ᓯᓚᑦᑐᓴᕐᕕᖕᒧᑦ, ᑮᓇᐅᔭᓕᕆᔨᐅᓯᒪᔪᖅ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑎᓄᑦ, ᐊᒻᒪᓗ ᐊᓪᓚᑎᒻᒪᕆᐅᓯᒪᔪᖅ ᓇᐅᔮᑦ ᕼᐊᒻᓚᖓᓄᑦ. ᒪᑉᓴᓛᖅ ᒫᓐᓇ ᓇᐅᔮᒥᐅᖅ, ᓄᓇᕗᒻᒥ. |
ᑖᓐᔭ ᑐᖏᓕᒃᑖᓐᔭ ᑐᖏᓕᒃ ᐃᖅᑲᑐᖅᑕᐅᑎᑦᓯᓇᓱᐊᕈᑎᓕᒃ ᐊᑖᑕᓚᐅᖓᓄᑦ, ᒪᕆᐅᓯ ᑐᖏᓕᒃ. ᔪᓚᐃ 29, 2022-ᒥ, ᐃᖃᓗᓐᓂ, ᑖᓐᔭ ᐅᓂᒃᑳᓚᐅᖅᑐᖅ ᐃᑦᓯᕋᕐᔪᐊᕌᐱᖕᒧᑦ ᕗᕌᓐᓯᔅ ᒪᕆᐅᓯᐅᑉ ᒥᑦᓵᓄᑦ ᐊᒻᒪᓗ ᑭᖑᕚᖑᓪᓗᑎᒃ ᐊᑦᓱᕉᓐᓂᖓᓇᖅᑐᒃᑰᖃᑦᑕᖅᓯᒪᓂᕐᒥᓂᒃ ᐃᓚᒌᑦ ᐃᓅᓯᖏᓐᓂ. ᒪᕆᐅᓯ ᐅᖃᖃᑦᑕᓚᐅᖅᑐᖅ ᖁᓄᔪᕐᓂᐊᖅᑕᐅᖃᑦᑕᖅᓯᒪᒋᐊᑦᓴᖅ ᐃᑦᓯᕋᕐᔪᐊᒥᐅᑕᕐᓄᑦ ᓘᓯᐊ ᐱᐅᕋᓐᑦ ᐃᓕᓐᓂᐊᑎᓪᓗᒍ ᓲ ᔫᓯᕝ ᐴᓂᐊᓪ ᐊᒻᒪᓗ ᑐᑯᑎᐅ ᕼᐊᓪ, ᐃᑦᓯᕋᕐᔪᐊᕐᒥᐅᑕᕐᓄᑦ ᐊᐅᓚᑕᐅᓚᐅᖅᑐᖅ ᐃᓪᓗᓕᒑᕐᔪᒥ, ᓄᓇᕗᑦ ᐃᓕᓐᓂᐊᕆᐊᕐᕕᐅᖃᑦᑕᓚᐅᖅᑐᖅ. ᒪᕆᐅᓯ ᐅᖃᖃᑦᑕᓚᐅᖅᑐᖅ ᓄᓕᐊᕐᓂᒃᑯᑦ ᖁᓄᔪᕐᓂᐊᖅᑕᐅᖃᑦᑕᓚᐅᕆᐊᒃᓴᖅ ᐊᑖᑕ ᔪᐊᓇᔅ ᕆᕕᐊᓪ ᓇᐅᔮᓂ ᓄᓇᓖᑦ ᓂᐅᕕᕐᕕᖓᓂ. ᑕᒪᒃᑯᐊ ᐅᖃᐅᓯᕆᖃᑦᑕᖅᓯᒪᔭᖏᑦ ᑎᑭᐅᑎᒍᑕᐅᓯᒪᔪᑦ ᐃᖅᑲᑐᖅᑕᐅᓂᕐᒧᑦ ᐊᒻᒪᓗ ᑎᒍᔭᐅᔪᓐᓇᕈᑎᒃᓴᖓᓄᑦ ᕆᕕᐊᓪ ᕿᒫᓚᐅᖅᑐᖅ 1998-ᒥ ᐅᐃᕖᕐᔪᐊᑦ ᓄᓇᖓᓄᑦ ᕗᕌᓐᔅ ᓄᓇᖃᓕᖅᑐᓂ ᓴᐳᔾᔭᐅᓯᒪᓪᓗᓂ ᐃᑦᓯᕋᕐᔪᐊᒥᐅᑕᕐᓄᑦ ᒫᕆ ᐃᔾᔪᓇᐃᑦᑐᖅ, ᑳᑐᓕᒃᒥᐅᑕᐃᑦ ᐅᑉᐱᖅᑑᖃᑎᒌᑦ ᑎᓕᔭᐅᓯᒪᓂᖏᑎᒍᑦ. ᑐᖏᓕᒃ ᐊᑯᓂᐊᓗᒃ ᐃᖅᑲᓇᐃᔮᖃᖅᓯᒪᔪᖅ ᐃᖅᑲᓇᐃᔭᖅᑐᓕᕆᓂᕐᒥᒃ, ᐊᑖᑕᓚᐅᒥᑐᑦ. ᑲᖏᕐᖠᓂᕐᒥᐅᑕᖅ, ᓄᓇᕗᒻᒥ ᐊᒻᒪᓗ ᐊᓈᓇᒋᔭᐅᔪᖅ ᒪᐃᑯᒧᑦ. |
ᔨᐊᓯ ᑐᖏᓕᒃᔨᐊᓯ ᑐᖏᓕᒃ ᐊᔾᔨᒌᙱᑦᑐᓂᒃ ᓴᓇᐅᒐᖅᑎ ᐃᖃᓗᓐᓂ, ᓄᓇᕗᑦ. ᓴᓇᙳᐊᖅᓯᒪᔪᖅ ᑕᕐᓂᖓ ᑭᖑᕚᕆᔭᐅᔪᑦ ᑲᑉᐱᐊᓱᐊᑎᑕᐅᓂᒃᑯᑦ ᖁᐊᖅᓵᓇᖅᑐᒃᑰᖅᓯᒪᔪᓄᑦ ᐊᑦᑐᖅᑕᐅᓯᒪᔪᑦ, ᑭᑦᑐᕆᐊᕐᔫᔮᖅᑐᖅ ᐆᒪᔪᕐᓗᒃ ᐱᐅᙱᑦᑑᑉ ᑕᕐᓂᖓ ᑲᑉᐱᐊᓇᖅᑐᑰᖅᓯᒪᓂᕐᒧᑦ, ᑕᖅᓴᖃᖅᑐᓂ ᑐᓄᐊᓕ ᐃᓗᒻᒥᖅᑕᐅᓯᒪᒍᑕᐅᔪᒥᒃ. ᑎᑎᕋᖅᓯᒪᓪᓗᓂ ᔨᐊᓯᐅᑉ ᓇᓗᓕᖅᓯᒪᓂᖓ ᑲᑎᖕᒪᑦᓯᒋᐊᑦᓴᖅ ᐊᑖᑕᓚᐅᒥᓂᒃ, ᒪᕆᐅᓯ ᑐᖏᓕᐅᓚᐅᖅᑐᒥᒃ. ᓴᓇᐅᒐᖓ ᑐᑭᓕᒃ ᔨᐊᓯᐅᑉ ᒪᒥᓴᕐᓂᖓᓂᒃ ᑭᖑᕚᓄᑦ ᑎᑭᐅᑎᓯᒪᓂᖓᓂᒃ ᑲᑉᐱᐊᓱᐊᑎᑕᐅᖃᑦᑕᖅᓯᒪᓂᖓ. ᐃᖃᓗᒻᒥᐅᑕᖅ, ᓄᓇᕗᒻᒥ. |
ᑭᓕᒃᕙᒃ ᑲᑉᓘᓇᑭᓕᒃᕙᒃ ᑲᑉᓘᓇ ᐊᐅᓚᑦᓯᔨᒻᒪᕆᒋᔭᐅᔪᖅ ᓄᓇᕗᑦ ᑐᙵᕕᒃ ᑎᒥᖓᓂ (ᑐᙵᕕᒃ) ᐊᒻᒪᓗ ᑎᒥᖁᑎᖏᓐᓄᑦ ᑲᒻᐸᓂᐅᔪᓄᑦ ᐃᓚᒋᔭᐅᓪᓗᑎᒃ ᒪᑭᒋᐊᖅᑕ ᐃᓄᐃᑦ ᐱᓕᒻᒪᓴᕐᓂᕐᒧᑦ ᑯᐊᐳᕇᓴᓐ ᐊᒻᒪᓗ ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ. ᑲᑉᓘᓇ ᐱᓕᕆᐊᓕᒃ ᓯᕗᒧᐊᒃᑎᑦᓯᕙᓪᓕᐊᓂᕐᒥᒃ ᐃᓄᐃᑦ ᑮᓇᐅᔭᓕᐅᕈᑎᒃᓴᖏᓐᓂᒃ, ᐱᕚᓪᓕᕈᑎᒃᓴᓂᒃ ᐃᓅᓯᖏᓐᓄᑦ ᐃᓕᖅᑯᓯᖏᓐᓄᓪᓗ ᖃᓄᐃᙱᑦᓯᐊᑲᓐᓂᕈᑎᒃᓴᖏᓐᓄᑦ ᐃᓘᓐᓈᒍᑦ ᐊᑐᓕᖅᑎᑕᐅᓂᖓᒍᑦ ᓄᓇᕗᑦ ᐊᖏᕈᑎᖓ. ᑐᙵᕕᒃᑯᓐᓄᑦ ᐃᖅᑲᓇᐃᔭᕆᐊᓚᐅᖅᑳᕋᓂ, ᒥᓂᔅᑕᒧᑦ ᑐᒡᓕᑲᓐᓂᕆᔭᐅᓚᐅᖅᑐᖅ ᓄᓇᕗᑦ ᒐᕙᒪᒃᑯᖏᓐᓂ ᐊᒻᒪᓗ ᑲᒪᒋᔭᖃᖅᑐᓂ ᐋᖅᑭᑦᓱᐃᓂᕐᒥᒃ ᐊᐅᓚᔾᔭᐃᒋᐊᕈᑎᒃᓴᓂᒃ ᐸᕐᓇᐅᑎᓄᑦ ᐃᑯᓪᓚᕈᑎᒃᓴᐅᔪᓐᓇᖅᑐᓂᒃ ᐃᓅᓯᕐᒥᓂᒃ ᑭᐱᓯᖃᑦᑕᖅᑐᑦ ᓄᓇᕗᒻᒥ ᐃᓄᐃᑦ. ᐱᔾᔪᑎᓪᓗᐊᑕᖅ ᐃᓅᓯᕐᒥᒃ ᑭᐱᓯᖃᑦᑕᕐᓂᖏᓐᓄᑦ ᓄᓇᕗᒻᒥ ᓄᑕᖅᑲᑦ/ᓱᕈᓰᑦ ᓄᓕᐊᓂᕐᓗᑦᑕᐅᖃᑦᑕᖅᓯᒪᓂᖏᓐᓄᑦ. ᑲᑉᓘᓇ ᐃᓕᓐᓂᐊᖅᓯᒪᔪᖅ ᐊᐅᓚᑦᓯᔨᐅᓂᕐᒧᑦ ᐱᓕᕆᔪᓐᓇᐅᑎᒋᔭᐅᒋᐊᓕᖕᓂᒃ ᑲᐅᒍᕆ ᐃᓕᓐᓂᐊᕕᔾᔪᐊᖓᓂᒃ ᐃᓕᓴᕆᔭᐅᔾᔪᑎᑖᖅᓯᒪᓪᓗᓂ, ᐊᐅᓚᑦᓯᔨᐅᓂᕐᒧᑦ ᓇᓗᓇᐃᒃᑯᑕᒻᒪᕆᑦᑖᖅᓯᒪᓪᓗᓂ ᑖᒻᓴᓐ ᕆᕙᔅ ᐃᓕᓐᓂᐊᕕᔾᔪᐊᖓᓂ ᐊᒻᒪᓗ ᓇᓗᓇᐃᒃᑯᑕᖅᑖᖅᓯᒪᔪᖅ ᓄᓇᖃᖅᑳᖅᓯᒪᔪᓄᑦ ᐅᖃᐅᓰᑦ ᕕᒃᑐᕆᐊ ᐃᓕᓐᓂᐊᕕᔾᔪᐊᖓᓂᒃ ᐊᒻᒪᓗ ᐱᕈᕐᕕᖕᒥᒃ. ᖃᒪᓂ’ᑐᐊᒦᙶᖅᓯᒪᔪᖅ, ᐃᓚᓂᓗ ᐃᖃᓗᒻᒥᐅᑕᐅᓕᖅᑐᑦ, ᓄᓇᕗᒻᒥ. |
ᑕᐃᕕᑦ ᐊᒡᓘᒃᑲᖅᑕᐃᕕᑦ ᐊᒡᓘᒃᑲᖅ ᓄᑲᖅᑎᖅ ᐱᓕᕆᐊᒃᓴᓕᕆᔨ, ᑭᙳᖅᑕᐅᓯᒪᔪᑦ ᓱᕈᓰᑦ ᐃᓕᓐᓂᐊᕆᐊᖅᑎᑕᐅᓯᒪᕕᐅᓚᐅᖅᑐᓂ ᐱᓕᕆᐊᖓ ᓄᓇᕗᑦ ᑐᙵᕕᒃ ᑎᒥᖓᓂ (ᑐᙵᕕᒃ). ᐱᓕᕆᐊᒥᒍᑦ, ᑲᑎᖅᓱᖅᑕᐅᓯᒪᔪᓂᒃ ᓄᐊᑦᓯᖃᑦᑕᖅᑐᖅ ᐃᓄᐃᑦ ᓱᕈᓰᑦ ᑐᖁᖃᑦᑕᖅᓯᒪᔪᑦ ᐃᓕᓐᓂᐊᕆᐊᖅᑎᑕᐅᓯᒪᓪᓗᑎᒃ ᐅᑎᓚᐅᙱᑦᑐᑦ, ᐊᒻᒪᓗ ᐃᓄᐃᑦ ᕿᑐᕐᖓᑖᒥᓃᑦ ᐃᕐᓂᐊᒥᓃᑦ ᐃᓕᓐᓂᐊᖅᑎᓄᑦ ᐃᓕᓐᓂᐊᕆᐊᖅᑎᑕᐅᓯᒪᔪᓄᑦ ᑭᙳᖅᑕᐅᓯᒪᔪᑦ. ᐊᒡᓘᒃᑲᖅ ᐱᓕᕆᐊᒥᓂᒃ ᐃᓱᓕᑦᓯᓚᐅᖅᑐᖅ 2021−ᒥ ᐸᓖᓯᒃᑯᓐᓂ RCMP 25-ᓂᒃ ᐊᕐᕌᒍᓂᒃ ᐱᓕᕆᕕᒋᓚᐅᖅᑕᒥᓂ ᓴᓇᓪᓗᓂ ᐊᒻᒪᓗ ᐃᓕᓐᓂᐊᕌᓂᑦᓯᒪᔪᖅ ᓄᓇᕗᑦ ᓯᕗᓂᒃᓴᕗᒻᒥ. ᐊᕐᕕᐊᒦᙶᖅᓯᒪᔪᖅ ᐃᓚᒌᑦ ᒫᓐᓇ ᐃᖃᓗᒻᒥᐅᑕᐅᓕᖅᑐᑦ, ᓄᓇᕗᒻᒥ. |
