(ᔪᓚᐃ 26, 2022 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᓂ (ᑐᙵᕕᒃ) ᐊᖓᔪᖅᑳᖅ ᐊᓗᑭ ᑰᑦᑎᖅ ᐊᒻᒪᓗ ᖃᐃᖅᑯᔭᐅᓯᒪᔪᑦ 55 ᓄᓇᕗᒻᒥᐅᑕᐃᑦ ᐃᓄᐃᑦ ᐃᑦᓯᕋᕐᔪᐊᕌᐱᒃ ᕗᕌᓐᓯᔅ ᒪᒥᐊᓐᓂᖓᓃᓚᐅᖅᑐᑦ ᐃᑦᓯᕋᕐᔪᐊᒃᑯᑦ ᑐᒃᓯᐊᕐᕖᑦ ᐱᓕᕆᓂᕆᕙᓚᐅᖅᑕᖏᓐᓂᒃ ᐊᒻᒪᓗ ᐋᓐᓂᑎᖅᑕᐅᓂᒃᑯᑦ ᑲᑉᐱᐊᓱᐊᖃᑦᑕᓚᐅᕐᓂᖏᓐᓄᑦ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᓯᒪᔪᑦ ᐊᖏᕐᕋᒥᓂᒃ ᓅᑕᐅᓪᓗᑎᒃ.
“ᐃᓄᐃᑦ ᑐᓴᖅᑕᐅᑦᑕᓯᓐᓇᓕᖅᑐᑦ ᐊᒻᒪᓗ ᐊᑐᖅᓯᒪᔭᖏᑦ ᖃᐅᔨᕐᕙᓚᑦᑕᐅᓪᓗᑎᒃ. ᖁᔭᒋᔭᕗᑦ ᐊᓐᓇᓯᒪᔪᑦ ᐅᐸᑦᓯᒪᒍᓐᓇᓚᐅᕐᒪᑕ ᐊᒻᒪᓗ ᒪᑐᐃᖓᓪᓗᑎᒃ ᓇᖕᒥᓂᖅ ᐊᓂᒍᐃᕙᓪᓕᐊᓂᕐᒥᓂᒃ ᒪᒥᓴᕐᓂᒃᑯᑦ. ᐊᐅᓚᔾᔭᑦᑕᐅᕗᖓ ᓯᕘᕋᒐᑎᒃ, ᓇᒡᓕᒍᓱᑦᑐᑎᒃ ᐊᒻᒪᓗ ᑕᑯᓐᓇᒐᖃᑦᓯᐊᕐᓂᖏᓐᓂᒃ ᓯᕗᓂᑦᑎᓐᓄᑦ,” ᐅᖃᖅᑐᖅ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ.
ᐃᓄᐃᑦ ᒪᒥᐊᕝᕕᐅᒍᒪᓯᒪᔪᑦ ᐊᕐᕌᒍᕋᓵᓗᐃᑦ, ᑕᕝᕘᓈᓚᐅᕐᒥᔪᑦ ᓱᓕᔪᒥᒃ ᓴᐃᒻᒪᖃᑎᒌᓐᓂᒥᓪᓗ ᑲᒥᓴᒃᑯᑎᒍᑦ.
ᒪᒥᐊᕝᕕᐅᓂᖅ ᑕᑯᓐᓇᖅᑕᐅᒋᐊᓕᒃ ᐊᓪᓗᕆᐊᕐᓂᑐᐃᓐᓇᐅᓂᖓᓂᒃ ᓴᐃᒻᒪᖃᑎᒌᓐᓂᕐᒧᑦ. ᑐᙵᕕᒃᑯᑦ ᐱᓕᕆᖃᑎᖃᖃᑦᑕᖅᓯᒪᔪᑦ ᐊᓪᓚᕝᕕᖓᓂᒃ ᐃᑦᓯᕋᕐᔪᐊᕌᐱᒃ ᐳᓚᕆᐊᕐᓂᖓᓄᑦ ᐊᒻᒪᓗ ᑲᓇᑕᒥ ᑲᑎᒪᔨᕐᔪᐊᖏᑦ ᑳᑐᓕᒃᒥᐅᑦ ᐃᑦᕋᕐᔪᐊᖏᓐᓂᒃ ᐸᕐᓇᑕᐅᑎᓪᓗᒍ ᐃᑦᓯᕋᕐᔪᐊᖅ ᕗᕌᓐᓯᔅ ᑎᑭᓛᕐᓂᖓᓂᒃ ᐃᖃᓗᓐᓄᑦ. ᑐᙵᕕᒃᑯᑦ ᐊᐱᖅᑯᑎᒋᓕᖅᑭᑦᑖᓯᒪᔭᖏᑦ:
- ᐃᑦᓯᕋᕐᔪᐊᕌᐱᒃ ᕗᕌᓐᓯᔅ ᑎᓕᓯᖁᓪᓗᒍ ᔪᕼᐊᓂᔅ ᕆᕕᐊᓪ ᐅᑎᖅᑎᑕᐅᖁᓪᓗᒍ ᑲᓇᑕᒧᑦ ᐱᕋᔭᓯᒪᓂᖓᓄᑦ ᐃᖅᑲᑐᖅᑕᐅᒋᐊᖃᕐᓂᖓᓄᑦ ᐃᖅᑲᖅᑐᐃᕕᖕᒥ;
- ᓱᖅᑯᐃᖅᑕᐅᓯᒪᔪᑦ ᑐᓂᔭᐅᖁᓪᓗᒋᑦ, ᐃᓚᒋᔭᐅᓪᓗᑎᒃ ᐃᖕᒥᒨᖓᔪᑦ ᑎᑎᕋᖅᓯᒪᔪᑦ, ᓄᓇᕗᒻᒥ ᐃᓄᐃᑦ ᐊᑐᒃᑲᓐᓂᖁᓇᒋᑦ ᐊᑐᖅᑕᐅᒌᖅᓯᒪᔪᓂᒃ ᐊᒻᒪᓗ ᓱᓕᔪᒥᒃ ᐅᓂᒃᑳᕆᐊᓂᑦᓯᒪᔭᖏᑦ ᑭᒡᓕᓯᐅᖅᑕᐅᓂᒃᑯᑦ ᐊᑐᖅᑕᐅᒍᓐᓇᕐᒪᑕ ᐃᖅᑲᖅᑐᐃᕕᖕᒥ;
- ᔪᕼᐊᓂᔅ ᕆᕕᐊᓪ ᐊᒻᒪᓗ ᐄᕆᒃ ᑏᔭᒍ ᓴᒃᑯᑕᐅᖁᓪᓗᒋᒃ ᓴᐳᔾᔭᐅᓯᒪᒍᓐᓃᕐᓗᑎᒃ ᐃᑦᓯᕋᕐᔪᐊᒃᑯᑦ ᑐᒃᓯᐊᕐᕕᖏᑎᒍ; ᐊᒻᒪᓗ
- ᑲᓇᑕᒥ ᑲᑎᒪᔨᕐᔪᐊᑦ ᑳᑐᓕᒃ ᐃᑦᓯᕋᕐᔪᐊᖏᑦ ᐃᑲᔪᕐᓗᑎᒃ ᑮᓇᐅᔭᑎᒍᑦ ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᓐᓄᑦ ᐃᓕᖅᑯᓯᕐᒨᖓᔪᓂᒃ ᒪᒥᓴᕐᓂᒧᓪᓗ ᐱᓕᕆᐊᓄᑦ ᓄᓇᕗᒻᒥ ᐃᓄᓐᓄᑦ ᐊᑦᑐᖅᑕᐅᓯᒪᔪᓄᑦ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᑐᓄᑦ ᐊᖏᕐᕋᒥᓂᒃ ᓄᑕᐅᓪᓗᑎᒃ.
-30-
ᑐᑭᓯᒋᐊᒃᑲᓂᕐᕕᒃᓴᖅ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᑦ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006
