ᐃᖃᓗᐃᑦ, ᓄᓇᕗᑦ (ᓯᑎᐱᕆ 21, 2011) – ᐅᓂᒃᑳᓕᐊᖅ ᑐᙵᕕᖃᖅᑎᑕᐅᓪᓗᓂ ᖃᐅᔨᔭᐅᓯᒪᓕᖅᑐᓂᒃ ᐃᓄᐃᑦ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᖃᐅᔨᓴᕐᓂᕐᒥᑦ ᑕᑯᑎᑦᑎᕗᖅ ᐃᓄᐃᑦ ᐱᔪᒪᕙᖕᓂᖏᓐᓂᒃ ᐱᐅᔪᓂᒃ ᖃᓄᐃᙱᑦᑎᐊᕈᓐᓇᕐᓂᕐᒧᑦ ᑐᓴᖅᑕᐅᔪᒃᓴᓂᒃ ᑐᓴᐅᒪᑦᑎᐊᕐᓗᑎᒃ ᐋᖅᑭᒃᓯᒪᓕᖅᑎᑦᑎᖃᑦᑕᕈᒪᓂᕐᒧᑦ ᓇᖕᒥᓂᖅ, ᐃᓱᒪᒃᑯᓪᓗ ᖃᓄᐃᙱᑦᑎᐊᕈᓐᓇᕐᓂᕐᒧᑦ.
ᐃᓄᐃᑦ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᖃᐅᔨᓴᕐᓂᐅᓚᐅᖅᑐᖅ 2007-2008-ᒥ ᓄᓇᕗᒻᒥ ᓄᓇᓕᖕᓂ ᓇᖕᒥᓂᕐᓗ ᖃᓄᙱᑦᑎᐊᕈᓐᓇᕐᓂᕐᒧᑦ ᐅᓂᒃᑳᓕᐊᖅ ᐱᔭᕇᖅᑕᐅᓚᐅᖅᐳᖅ ᐱᓕᕆᖃᑎᖃᖅᖢᓂ ᓄᓇᕗᑦ ᒐᕙᒪᒃᑯᖏᓐᓂᒃ, ᓄᓇᕗᑦ ᑐᙵᕕᒃᑯᓐᓂᒃ, ᖃᐅᔨᓴᖅᑎᓂᓪᓗ ᑕᒪᐃᖕᓂᑦ ᒪᒋᐅᓪ ᓯᓚᑦᑐᖅᓴᕐᕕᒡᔪᐊᖓᓂᑦ ᓯᓚᑦᑐᖅᓴᕐᕕᒡᔪᐊᕆᔭᐅᔪᒧᓪᓗ ᑐᕌᓐᑐᒥᐅᓄᑦ. ᖃᐅᔨᓴᖅᑏᑦ ᒪᕐᕉᖕᓂᒃ ᐊᕐᕌᒍᖕᓂᒃ ᐱᓕᕆᓚᐅᖅᑐᑦ ᖃᐅᔨᓴᖅᖢᑎᒃ ᓄᓇᕗᒻᒥᐅᓂᒃ. ᓄᓇᓕᖕᓄᑦ ᐃᓄᖕᓄᓪᓗ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᖃᐅᔨᓴᕐᓂᑦ ᐃᓚᖃᓚᐅᖅᐳᖅ ᐊᐱᖅᓱᖅᓯᒪᔪᓂᒃ 7-ᓂᒃ ᐅᑯᓂᖓ ᐱᔾᔪᑎᖃᖅᖢᑎᒃ: ᓄᓇᓕᖕᒥᐅᑦ ᖁᐊᖅᓵᕐᓇᖅᑐᒦᙱᑉᐸᖕᓂᖏᓐᓄᑦ; ᐃᓕᖅᑯᓯᑐᖃᒃᑯᑦ ᐱᓕᕆᐊᖑᕙᒃᑐᓂᒃ; ᐃᓅᖃᑎᒌᖕᓂᕐᒧᑦ ᐊᑐᖅᑕᐅᕙᒃᑐᓂᒃ; ᐃᓄᑐᐃᓐᓇᐃᑦ ᐊᑐᓂᑦ ᐃᓱᒪᒃᑯᑦ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ; ᐃᓅᖃᑎᒌᓂ ᐋᓐᓂᖅᓯᕆᔪᖃᖅᐸᖕᓂᖓᓄᑦ; ᐃᒻᒥᓃᖅᑐᖃᖅᐸᖕᓂᖓᓄᑦ; ᐊᒻᒪᓗ ᐃᒥᐊᓗᖕᒥᒃ ᐋᖓᔮᕐᓇᖅᑐᓂᒡᓘᓐᓃᑦ ᐊᑐᖅᐸᖕᓂᕐᒧᑦ ᑮᓇᐅᔭᐃᔭᖅᐸᖕᓂᕐᒧᓪᓗ ᓵᓚᖃᕋᓱᒃᖢᑎᒃ.
“ᑕᒪᓐᓇ ᖃᐅᔨᓴᕐᓂᖅ ᐱᒻᒪᕆᐊᓘᕗᖅ ᐱᒋᐊᕐᕕᐅᔪᓐᓇᖅᖢᓂ ᑐᑭᓯᐅᒪᓕᕐᓂᕐᒧᑦ ᑐᙵᕕᒋᔭᐅᕙᒃᑐᓂᒃ ᖃᓄᐃᙱᑦᑎᐊᕈᓐᓇᕐᓂᕐᒧᑦ ᓄᓇᕗᒻᒥ. ᑖᓐᓇ ᐅᕙᑦᑎᓐᓂᒃ ᖃᓄᐃᓪᓚᕆᒍᑕᐅᔪᓂᒃ ᑕᑯᑎᑦᑎᕗᖅ ᐃᑲᔪᕈᓐᓇᖅᖢᓂᓗ ᑕᓯᐅᖅᓯᔾᔪᑕᐅᓗᓂ ᐱᓇᔪᒃᑕᐅᔪᓄᑦ ᐅᔾᔨᕐᓇᖅᓯᑎᑦᑎᔪᒪᓗᓂ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᐃᓅᓯᑦᑎᐊᕆᒍᓐᓇᕐᓂᖏᓐᓄᓪᓗ ᑕᒪᕐᒥᑦᑎᐊᖅ ᐃᓄᐃᑦ,” ᑕᐃᒪᓐᓇ ᓘᒃᑖᖅ ᓚᐅᕆᓐᔅ ᑰᒪᐃᔪ ᐅᖃᖅᖢᓂ, ᑖᓐᓇ ᑐᑭᒧᐊᖅᑎᑦᑎᔨᒋᔭᐅᓪᓗᓂ ᐱᓕᕆᕝᕕᒋᔭᐅᕙᒃᑐᒥ ᐃᓅᖃᑎᒌᖕᓂᕐᒧᑦ ᐃᓅᖃᑎᒌᙱᑦᑐᓄᓪᓗ ᐃᓱᒪᓕᕆᕙᖕᓂᕐᒧᑦ ᐱᓕᕆᕝᕕᒋᔭᐅᕙᒃᑐᒥ ᐃᓱᒪᓕᕆᓂᕐᒧᑦ ᐅᕙᓂ, ᒪᒋᐅᓪ ᓯᓚᑦᑐᖅᓴᕐᕕᒡᔪᐊᒥ. “ᐃᓄᐃᑦ ᓵᑦᑎᐊᕐᒥᐅᑕᖃᖃᑦᑕᖅᓯᒪᕗᑦ ᐊᒥᓱᓂᒃ ᐊᓂᒍᖅᑎᓐᓇᓱᒋᐊᖃᖅᐸᒃᑐᓂᒃ ᐊᕐᕌᒍᓵᖅᑐᓂ ᐊᑐᖃᑦᑕᓵᖅᑕᑦᑎᓐᓂ. ᖃᓄᐃᙱᑦᑎᐊᕈᓐᓇᕐᓂᕐᒧᑦ ᑐᓴᖅᑕᐅᔪᒃᓴᐃᑦ ᑕᐃᒪᐃᑦᑐᑦ ᐅᕙᑦᑎᓐᓂᒃ ᑕᑯᑎᑦᑎᕗᑦ ᖃᓄᐃᓕᖓᓪᓚᕆᖕᒪᖔᑦ ᒫᓐᓇ ᖃᓄᐃᓕᖓᓂᕆᔭᐅᔪᖅ ᑐᓴᖅᑎᑦᑎᔪᓐᓇᖅᖢᓂᓗ ᐊᑐᐊᒐᓄᑦ ᖃᓄᐃᓕᐅᕆᐊᖃᕐᓂᕐᒧᓪᓗ ᐱᓕᕆᐊᖑᔪᒃᓴᓂᒃ ᐃᓱᒪᒃᑯᑦ ᖃᓄᐃᙱᑦᑎᐊᕈᓐᓇᕐᓂᕐᒧᑦ ᐅᔾᔨᕐᓇᖅᓯᑎᑦᑎᓂᕐᒥᒃ ᐃᒻᒥᓃᖅᑎᑦᑎᑦᑕᐃᓕᒪᕙᖕᓂᕐᒧᓪᓗ.”
“ᐅᔾᔨᕐᓇᖅᓯᑎᑦᑎᓂᖅ ᓄᓇᓕᖕᓄᑦ ᐃᓄᖕᓄᓪᓗ ᐃᓱᒪᒃᑯᑦ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᓯᕗᓪᓕᖅᐸᐅᔾᔭᐅᓯᒪᕗᖅ ᐋᓐᓂᐊᖃᕐᓇᙱᑦᑐᓕᕆᔨᓄᑦ ᐃᓄᓕᕆᔨᒃᑯᓐᓄᓪᓗ. ᑐᓴᖅᑕᐅᔪᒃᓴᐃᑦ ᑕᕝᕙᓂ ᐅᓂᒃᑲᐅᓯᕐᓂ ᐅᕙᑦᑎᓐᓂᒃ ᐱᕕᖃᖅᑎᑦᑎᕗᑦ ᐱᓕᕆᐊᖃᕐᕕᖃᓪᓚᕆᒐᔭᕐᓂᕐᒥᒃ ᐱᔭᕆᐊᖃᕐᓂᖅᐹᕆᓂᖏᓐᓂᒃ ᐊᔾᔨᒌᙱᕈᓘᔭᖅᑐᓄᑦ ᐱᓕᕆᐊᒃᓴᓄᑦ ᐱᔨᑦᑎᕋᕐᓂᕆᔭᐅᕙᒃᑐᓄᓪᓗ,” ᑕᐃᒪᓐᓇ ᓘᒃᑖᖅ ᔨᕋᑏᓐ ᐋᔅᐳᐊᓐ, ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᖅ ᐋᓐᓂᐊᖃᕐᓇᙱᑦᑐᓕᕆᔨᓂ ᐃᓄᓕᕆᔨᓂᓗ ᐅᖃᖅᖢᓂ.
“ᑖᓐᓇ ᐅᓂᒃᑲᐅᓯᖅ ᓇᓗᓇᕈᓐᓃᖅᑎᑦᑎᒃᑲᓐᓂᖅᐳᖅ ᐱᔭᕆᐊᖃᖅᑐᖃᕐᓂᖓᓂᒃ ᐱᓕᕆᐊᖑᓯᑲᐅᑎᒋᓗᑎᒡᓗ ᐅᑯᓄᖓ, ᐃᒻᒥᓃᓖᖅᑎᑦᑎᑦᑕᐃᓕᒪᕙᓂᖅ ᐃᓱᒪᒃᑯᓪᓗ ᖃᓄᐃᑎᑦᑎᐊᕈᓐᓇᕐᓂᖅ. ᓄᓇᕗᑦ ᑐᙵᕕᒃᑯᑦ ᐱᓕᕆᐊᖃᐃᓐᓇᓪᓚᕆᒍᒪᕗᑦ ᐱᓕᕆᖃᑎᖃᕐᓂᕐᒥᒃ ᓄᓇᕗᑦ ᒐᕙᒪᒃᑯᖏᓐᓂᒃ ᐊᓯᖏᓐᓂᒡᓗ ᐊᑐᓕᖅᑎᑦᑎᕙᓪᓕᐊᓂᒃᑯᑦ ᑐᑭᖃᑦᑎᐊᖅᑐᓂᒃ ᐋᖅᑭᒃᓯᒪᓕᕈᑕᐅᔪᓐᓇᖅᑐᓂᒃ ᐱᓕᕆᔾᔪᑕᐅᔪᓂᒃ ᐃᓱᒪᒃᑯᑦ ᖃᓄᐃᙱᑦᑎᐊᕈᓐᓇᕐᓂᕐᒧᑦ ᐱᔭᐅᔭᕆᐊᓕᖕᓂᒃ ᐃᓄᖕᓄᑦ,” ᑕᐃᒪᓐᓇ ᑳᑎ ᑕᐅᑐᙱ, ᐊᒋᖅᑳᕆᔭᐅᔪᖅ ᓄᓇᕗᑦ ᑐᙵᕕᒃᑯᓐᓄᑦ ᐅᖃᖅᖢᓂ.
ᑖᓐᓇ ᐅᓂᒃᑲᐅᓯᖅ ᒪᓂᒪᑎᑕᐅᓕᕐᓂᐊᖅᑐᖅ ᖃᕆᑕᐅᔭᒃᑯᑦ ᐃᑭᐊᖅᑭᕕᒃᑯᑦ ᓄᓇᕗᑦ ᑐᙵᕕᒃᑯᑦ ᐃᑭᐊᖅᑭᕕᐊᓂ ᓄᓇᕗᑦ ᒐᕙᒪᒃᑯᖏᑕᓗ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᓄᓕᕆᔨᒃᑯᓪᓗ ᐃᑭᐊᖅᑭᕕᐊᓂ. ᑎᑎᕋᖅᓯᒪᓕᖅᑎᑕᐅᓯᒪᔪᖅ ᒪᓂᒪᓂᐊᕆᕗᑦ ᑕᒪᐃᓐᓂ ᓄᓇᓕᖕᓂ ᐋᓐᓂᐊᕕᓕᐊᕐᕕᖕᓂ.
ᑖᓐᓇ ᐱᓕᕆᐊᖑᔪᖅ ᑮᓇᐅᔭᖃᖅᑎᑕᐅᓚᐅᖅᐳᖅ ᑲᓇᑕᐅᑉ ᒐᕙᒪᖓᑕ ᐱᓕᕆᐊᕆᑎᑕᖓᓄᑦ ᓄᓇᕐᔪᐊᓕᒫᒥ ᐅᑭᐅᖅᑕᖅᑐᒥᐅᓄᑦ ᐊᕐᕌᒍᒋᔭᐅᔪᒧᑦ, ᑲᓇᑕᒥᐅᓄᑦ ᐃᓂᒋᔭᐅᔪᓄᑦ ᖃᓄᐃᙱᑦᑎᐊᕈᓐᓇᕐᓂᕐᒧᑦ ᖃᐅᔨᓴᕐᓂᕐᕕᖕᒥᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᓇᑕᒥᐅᓄᑦ, ᓯᓚᑦᑐᖅᓴᕐᕕᒡᔪᐊᒥᑦ ᑐᕌᓐᑐᒥᐅᓄᑦ, ᓄᓇᕗᑦ ᒐᕙᒪᖓᑕ, ᒐᕙᒪᑐᖃᓕᕆᔨᒃᑯᓐᓂᑦ (ᑖᒃᑯᐊ ᐃᖅᑭᓕᖕᓄᑦ ᐅᑭᐅᖅᑕᖅᑐᒥᐅᓄᓪᓗ ᐱᓕᕆᔨᒋᔭᐅᓚᐅᖅᓯᒪᒐᓗᐊᖅᖢᑎᒃ), ᐊᒻᒪᓗ ᐅᑯᓇᙵᑦ, ᐋᑎᒃᓂᐊᑦ.
ᐱᕙᓪᓕᐊᔪᓄᑦ ᖃᐅᔨᒋᐊᕐᕕᒃᓵᒃ:
|
ᕌᓐ ᐅᐊᓯᖕᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᓄᓕᕆᔨᒃᑯᓪᓗ ᓄᓇᕗᑦ ᒐᕙᒪᖓ ᐅᖄᓚᐅᑖ: (867) 975-5710 |
ᑭᐅᕆ ᒪᒃᓚᔅᑭ ᑐᑭᒧᐊᖅᑎᑦᑎᔨ ᑐᓴᐅᒪᑎᑦᑎᕙᖕᓂᕐᒧᑦ ᓄᓇᕗᑦ ᑐᙵᕕᒃᑯᑦ ᐅᖄᓚᐅᑖ: (867) 975-4914 |
