ᓄᓇᕗᑦ ᑐᓐᖓᕕᒃ ᑎᒥᖓᑦ, ᑐᒡᓕᐊ ᐊᖓᔪᖅᑳᑉ ᔭᐃᒻᔅ ᐃᑦᑐᓗᒃ ᑲᑎᒪᑎᑦᓯᓂᕆᓚᐅᖅᑕᖓ ᐱᓇᓱᐊᕈᓯᐅᓚᐅᖅᑐᒥ ᐃᓄᒡᔪᐊᒥ, ᓄᓇᕕᒃ ᐱᐅᓚᐅᖅᑐᖅ ᐊᒻᒪ ᓯᕗᒻᒧᐊᑦᓯᐊᖅᑐᓂ.
ᑲᑎᒪᔪᓂ ᐃᓚᐅᓚᐅᖅᑐᑦ ᓄᓇᕗᑦ ᑐᓐᖓᕕᒃᑯᑦ, ᐊᒻᒪ ᒪᑭᕝᕕᒃ ᑯᐊᐳᕇᓴᓐ, ᐊᖓᔪᖅᑲᐅᑏᑦ, ᐃᓄᐃᑦ, ᐊᓪᓚᐃᑦ ᑯᕇ, ᐊᖑᓇᓱᐊᖅᑏᑦ, ᐆᒪᔪᓕᕆᓂᕐᒧᑦ ᑲᑎᒪᔩᑦ ᐊᒻᒪ ᐅᑭᐅᖅᑕᖅᑑᑉ, ᑲᓇᑕᐅᓪᓗ ᐊᕕᒃᑐᖅᓯᒪᓂᖏᑦ ᐊᒻᒪ ᒐᕙᒪᑐᖃᒃᑯᑦ ᑭᒡᖓᖅᑐᖅᑎᖏᑦ. ᐱᔾᔪᑎᒋᓚᐅᖅᑕᖓ ᑕᒪᑐᒪ ᑲᑎᒪᓂᐅᑉ ᐅᖃᐅᑐᖃᖅᑐᑎᒃ ᐊᐅᓚᑕᐅᓂᖏᓐᓂᒃ ᓇᓄᐃᑦ ᓂᒋᐊᓂ ᑕᓯᐅᔭᕐᔪᐊᑉ.
ᐃᓚᐅᔪᑦ ᑲᑎᒪᔪᓂ ᐊᖏᖃᑎᒌᓚᐅᖅᑐᑦ ᐊᑐᖅᑕᐅᑲᐃᓐᓇᕐᓂᐊᖅᑐᓂᒃ, ᓇᖕᒥᓂᖅ ᑰᑕᓕᐊᒥᓂᒃ 60-ᓄᑦ ᓇᓐᓄᒍᓐᓇᕐᓗᑎᒃ ᐊᕐᕌᒍᒥ. ᑐᖔᒍᑦ ᑕᒪᑐᒪ ᐃᓱᒪᓕᐅᕈᑕᐅᔫᑉ, ᓄᓇᕗᑦ ᐊᕕᒃᑐᖅᓯᒪᓂᐊ ᐊᒥᖅᑳᖃᑎᖃᖅᐸᑦᑐᑦ ᑖᒃᑯᓂᖓ ᓇᓄᕐᓂᒃ ᐋᖅᑭᒃᓯᓚᐅᖅᑐᑦ 25-ᓂᒃ ᓇᓐᓄᒍᓐᓇᕐᓗᑎᒃ ᑕᒡᕙᓂ ᐊᐅᓚᑦᓯᕝᕕᐅᔪᒥ.
ᐃᑦᑐᓗᒃ ᐅᖃᓚᐅᖅᑐᖅ ᓯᕕᑐᔪᒧᑦ ᑐᕌᒐᐅᔪᑦ ᐋᖅᑭᒃᓱᐃᒋᐊᖃᓚᐅᕐᒪᑕ ᐸᕐᓇᐅᑎᓂᒃ ᐃᓚᐅᑎᓪᓗᒋᑦ ᐃᓄᐃᑦ, ᐊᓪᓚᐃᑦ ᑯᕇ, ᐆᒪᔪᓕᕆᓂᕐᒧᑦ ᑲᑎᒪᔩᑦ ᐊᒻᒪ ᒐᕙᒪᐅᔪᑦ.
“ᑕᒪᓐᓇ ᓴᓐᖏᔫᓪᓗᓂ ᐊᒻᒪ ᓯᕗᒻᒧᐊᑦᑎᐊᖅᑐᓂ ᐆᒃᑑᑕᐅᔪᓐᓇᖅᑐᖅ ᐃᓄᐃᑦ ᓄᓇᕗᒥ ᐊᒻᒪ ᓄᓇᕕᖕᒥ ᐊᐅᓚᑦᓯᔪᓐᓴᕐᓂᖏᓐᓂᒃ ᐱᖃᑎᒌᒡᓗᑎᒃ ᓇᓄᕐᓂᒃ,” ᐅᖃᖅᑐᖅ ᐃᑦᑐᓗᒃ.
ᐃᓚᐅᔪᑦ ᐊᖏᖃᑎᒌᓚᐅᕐᒥᔪᑦ ᑲᔪᓯᓯᒪᔪᒪᓪᓗᑎᒃ ᒪᑐᐃᖓᔪᒥᒃ ᐅᖃᖃᑎᒌᒍᓐᓇᕐᓗᑎᒃ ᐊᒻᒪ ᐊᒥᖅᑳᕈᑎᖃᖃᑦᑕᕐᓗᑎᒃ ᐊᖑᓇᓱᐊᕐᓂᕐᒧᑦ ᑐᑭᓯᒋᐊᕈᑎᒃᓴᓂᒃ ᐊᒻᒪ ᖃᐅᔨᓴᕈᑕᐅᔪᓂᒃ ᐱᓪᓗᒋᑦ ᓇᓄᐃᑦ.
ᐊᖓᔪᖅᑲᐅᑏᑦ ᑲᑭᕝᕕᒃ ᑯᐊᐳᕇᓴᒃᑯᓐᓂᒃ ᐊᖏᕈᑎᖃᖅᑐᑦ ᑰᑕᓂᒃ ᑭᓯᐊᓂ ᒪᓕᖕᓂᐊᖅᑐᑦ ᐃᑲᔪᖅᓱᐃᓂᖏᓐᓂᒃ ᓄᓇᕕᖕᒥᐅᑦ ᐊᒃᑐᖅᑕᐅᔪᓂᒃ ᓄᓇᓕᖕᓂᑦ.
