ᑐᓴᕋᑦᓴᓕᕆᔩᑦ

ᓄᓇᕗᑦ ᑐᙵᕕᒃᑯᑦ ᖁᔭᓈᖅᓯᔪᑦ ᐃᖅᑲᖅᑐᐃᕕᒃᑯᑦ ᕿᒥᕐᕈᔭᐅᖁᔨᓚᐅᕐᓂᖏᓐᓂᒃ ᐃᒪᕐᒥᐅᑕᓕᕆᔨᒃᑯᓐᓂᒃ ᐊᓪᓚᓐᖑᐊᑦ ᑐᒑᖏᓐᓄᑦ

 (ᔫᓂ 20, 2011 – ᐃᖃᓗᐃᑦ, ᓄᓇᕗᑦ)     ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᐅᓚᑦᓯᔨᒻᒪᕆᖓ ᑎᐅᕆ ᐊᐅᓪᓚ ᓇᓗᓇᐃᖅᓯᔪᖅ ᐅᓪᓗᒥ ᖁᔭᓈᖅᓯᓂᖏᓐᓂᒃ ᓄᓇᕗᑦ ᑐᙵᕕᒃᑯᑦ ᐃᖅᑲᖅᑐᐃᕕᑎᒍᑦ ᕿᒥᕐᕈᔭᐅᖁᔨᓚᐅᕐᓂᖏᓐᓂᒃ ᑲᓇᑕᒥ ᐃᒪᕐᒥᐅᑕᓕᕆᔨᒃᑯᑦ ᐃᓱᒪᓕᐅᕈᑎᒋᓚᐅᖅᑕᖓᓄᑦ 2010-ᒥ ᐱᔾᔪᑎᒋᓪᓗᒋᑦ ᑐᒑᓖᑦ.

 

ᐃᒪᕐᒥᐅᑕᓕᕆᔨᒃᑯᑦ ᐊᒻᒪ ᑐᙵᕕᒃᑯᑦ ᐊᖏᖃᑎᒌᒃᑐᑦ ᑐᑭᖃᑦᓯᐊᖅᑐᒥᒃ, ᐱᕕᒃᓴᖃᑦᑎᐊᕐᓗᑎᒃ ᖃᐅᔨᒋᐊᕐᕕᖃᖁᓪᓗᒋᑦ ᒐᕙᒪᒃᑯᑦ ᐃᓄᐃᑦ ᐃᓱᒫᓗᑎᒋᓯᒪᔭᖏᓐᓂᒃ ᐊᒃᑐᖅᑕᐅᓯᒪᓂᖏᓐᓄᑦ ᐃᓄᐃᑦ ᐱᔪᓐᓇᐅᑎᖏᑦ ᒪᓕᒃᖢᒋᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᑎᒍ ᐃᓚᒋᓪᓗᒋᑦ ᐃᓱᒪᓕᐅᕈᑕᐅᓯᒪᔪᑦ ᑐᒑᓖᑦ ᐱᑕᖅᑕᐅᖃᑦᑕᕐᓂᖏᓐᓄᑦ ᐊᒻᒪ ᑕᐅᖅᓰᒍᑕᐅᕙᓐᓂᖏᓐᓄᑦ,” ᐅᖃᖅᑐᖅ ᐊᐅᓪᓚ. “ᐃᒪᕐᒥᐅᑕᓕᕆᔨᒃᑯᑦ ᐊᖏᖅᓯᒪᔪᑦ ᐱᓕᕆᖃᑎᖃᕈᒪᓪᓗᑎᒃ ᓄᓇᕗᑦ ᑐᙵᕕᒃᑯᓐᓂ ᐊᐳᕈᑎᖃᑦᑕᕈᒪᓇᑎᒃ ᐃᓱᒪᓕᐅᕈᑎᖏᑦ ᐊᒃᑐᐃᓂᐊᖅᑎᓪᓗᒋᑦ ᐃᓄᓐᓂᒃ.”

 

ᐊᖏᕈᑎ ᐊᑎᓕᐅᖅᑕᐅᔪᖅ ᔫᓂ 17, 2011-ᒥ, ᑐᙵᕕᒃᑯᑦ ᐃᒪᕐᒥᐅᑕᓕᕆᔨᒃᑯᓪᓗ ᐃᓕᑕᖅᓯᕗᑦ ᐱᒻᒪᕆᐅᓂᖓᓂᒃ ᐊᐅᓚᑦᓯᑎᐊᓂᖅ ᓯᒪᕐᔪᐊᒥ ᑕᐅᖅᓰᒍᑕᐅᕙᓐᓂᖏᑦ ᓂᕐᔪᑎᓃᓐᖔᖅᑐᑦ ᐃᓚᒋᒻᒪᒍ ᐃᓕᖅᑯᓯᖓᑕ, ᐃᓅᓯᖓᑕ ᐊᒻᒪ ᑮᓇᐅᔭᓕᐅᕈᑎᖃᕋᓱᐊᕐᓂᖓᑕ ᐃᓄᐃᑦ. ᑕᒪᕐᒥᒃ ᐱᓕᕆᖃᑎᒌᓐᓂᐊᖅᐳᑦ ᓂᕐᔪᑏᑦ ᐊᒃᑕᓇᖅᑐᒦᓕᕐᓂᕋᖅᑕᐅᔪᑦ ᑲᑎᒪᔨᖏᓐᓄᑦ ᐊᑐᖅᑕᐅᔭᕆᐊᓕᒃ ᑲᔪᓯᓐᓇᖁᓪᓗᒍ ᓂᕐᔪᑎᓃᓐᖔᖅᑐᑦ ᑕᐅᖅᓰᒍᑕᐅᕙᓐᓂᒃ ᐊᐅᓚᑕᐅᖁᓪᓗᒍ ᒥᐊᓂᖅᓯᑎᐊᓂᒃᑯᑦ.

 

ᑐᙵᕕᒃᑯᑦ ᐊᒻᒪ ᐃᒪᕐᒥᐅᑕᓕᕆᔨᒃᑯᑦ ᐃᓚᐅᓂᐊᖅᐳᑦ ᐊᐅᒪᑦᓯᓂᕐᒧᑦ ᐃᓕᓐᓂᐊᖅᑎᑕᐅᑎᓪᓗᒋᑦ ᐊᓪᓚᓐᖑᐊᓂᒃ ᐊᐅᓚᑦᓯᓂᖃᒌᓐᓂᒃ ᐊᐅᔭᐅᔪᖅ. ᐃᓕᓐᓂᐊᖅᑎᑕᐅᓂᖅ ᐃᓱᒪᒋᐊᕐᓂᐊᖅᐳᑦ ᐱᓕᕆᐊᖑᔪᓂᒃ ᐱᓕᕆᐊᖅᓴᐅᔪᓂᒡᓗ ᐊᐅᓚᑦᓯᖃᑎᒌᓐᓂᕐᒧᑦ ᐊᓪᓚᓐᖑᐊᓂᒃ ᖃᐅᔨᓴᕐᓂᕐᒥᓪᓗ. ᑲᑐᔾᔨᖃᑎᖃᕐᓗᑎᒃ ᐱᓕᕆᐊᑎᖏᓐᓂᒃ, ᑐᙵᕕᒃᑯᑦ ᐃᒪᕐᒥᐅᑕᓕᕆᔨᒃᑯᓪᓗ ᕿᒥᕐᕈᓂᐊᖅᐳᑦ ᖃᐅᔨᓴᕈᑕᐅᓯᒪᔪᓄᑦ ᐊᒃᑐᐊᖏᓐᓂᖏᑦ Jones Sound-ᒥ ᐊᓪᓚᓐᖑᐊᑦ ᐊᒻᒪ ᓇᓗᓇᐃᔭᐃᓗᑎᒃ ᑕᒪᒃᑯᐊ ᐅᖓᓯᒌᓐᓂᖏᓐᓂᒃ ᐱᕕᒃᓴᖃᑦᑎᐊᕐᓗᑎᒃ.

 

ᑐᙵᕕᒃᑯᑦ ᐊᒻᒪ ᐃᒪᕐᒥᐅᑕᓕᕆᔨᒃᑯᑦ ᐃᓚᒋᔭᐅᓂᐊᖅᐳᑦ ᕿᒥᕐᕈᔭᐅᓕᖅᐸᑕ ᐊᐅᓪᓚᓯᓂᕐᒧᑦ ᖃᓄᖅᑑᕈᑎᒃᓴᐃᑦ, ᐱᑕᖅᑕᐅᔪᓐᓇᖅᑐᓄᑦ ᑐᒃᓯᕋᐅᑎᔪᑦ, ᑲᑐᔾᔭᐅᓂᖏᑦ ᐱᑕᖅᑕᐅᔪᓐᓇᖅᑐᑦ, ᑰᑕᖃᓐᖏᓪᓗᑎᒃ ᐃᓱᖃᕐᕕᖃᑦᑎᑦᓯᔪᓐᓇᕐᓃᑦ, ᐃᒪᕐᒥᐅᑕᓄᑦ ᐊᐅᓪᓚᓯᕐᓂᕐᒧᑦ ᐸᕐᓇᐅᑎᓄᑦ ᖃᓄᖅᑑᕈᑎᒃᓴᐃᑦ ᐊᒻᒪ ᖃᐅᔨᒋᐊᕐᕕᖃᕐᓂᕐᒧᑦ ᐸᕐᓇᐅᑏᑦ.

                                                        

ᔮᓐᓄᐊᕆ 2011-ᒥ, ᑐᙵᕕᒃᑯᑦ ᐃᖅᑲᖅᑐᐃᕕᑎᒍᑦ ᕿᒥᕐᕈᔭᐅᖁᔨᓚᐅᕐᒪᑕ ᐃᒪᕐᒥᐅᑕᓕᕆᔨᒃᑯᑦ ᐃᓱᒪᓕᐅᕈᑎᖓᓂᒃ ᓄᖅᑲᑎᑦᓯᓪᓗᑎᒃ ᓂᐅᕐᕈᑕᐅᔪᓐᓇᕐᓂᖏᑦ ᐊᓪᓚᓐᖑᐊᑦ ᑐᒑᖏᑦ ᐊᒻᒪᓗ ᐊᒃᑐᐊᔪᑦ 17-ᖑᔪᓄᑦ ᓄᓇᓕᖕᓄᑦ ᓄᓇᕗᒻᒥ.

 

 

-30-

 

ᑐᑭᓯᒋᐊᒃᑲᓐᓂᕈᒪᒍᕕᑦ:

 

ᐲᔭᐃ ᐊᕿᐊᕈᖅ

ᑐᑭᒧᐊᑦᑎᑦᓯᔨᐅᑲᐃᓐᓇᑐᖅ ᑐᓴᐅᒪᖃᑦᑕᐅᑎᓕᕆᔨᒃᑯᑦ

ᐅᖄᓚᐅᑎᖓ: (867) 975-4939 ᐊᑭᖃᙱᑦᑐᖅ: 1-888-646-0006

ᐅᖄᓚᐅᑎᕋᓛᖅ: 867-222-1821

www.tunngavik.com