ᑐᓴᕋᑦᓴᓕᕆᔩᑦ

ᓄᓇᕗᑦ ᑐᙵᕕᒃ ᑎᒥᖓ ᑐᖓᓱᒃᑎᑦᓄᑦ ᐊᑐᓕᖁᔨᔾᔪᑎᖏᓐᓂᑦ ᐅᑯᐊ ᑲᑎᒪᔨᕋᓛᑦ ᐅᓇᑕᖅᑐᒃᓴᓕᕆᓂᕐᒧᑦ

ᓄᓇᕗᑦ ᑐᙵᕕᒃ ᑎᒥᖓᑦᑕ ᓯᕗᓪᓕᖅ ᐊᖓᔪᖅᖄᑉ ᑐᖏᓕᐊ ᔭᐃᒻᔅ ᐃᑦᑐᓗᒃ ᐅᑉᓗᒥ ᐅᖃᖅᑐᖅ ᐃᑲᔪᖅᑐᐃᓂᕐᒥᓂᑦ ᒪᑯᓄᖓ ᐊᑐᓕᖁᔨᔾᔪᑎᓄᑦ ᐅᑯᐊ ᑲᑎᒪᔨᕋᓛᑦ ᐅᓇᑕᖅᑐᒃᓴᓕᕆᓂᕐᒧᑦ ᐅᓂᑉᑳᖏᓐᓂᑦ, ᑲᓇᑕᒥ ᐅᑭᐅᖅᑕᖅᑐᒥ ᐱᖃᕐᓂᕋᕐᓂᖅ. ᐅᓂᑉᑳᖅ, ᓴᖅᑭᑎᑕᐅᔪᖅ ᐅᑯᓄᖓ ᑲᑎᒪᔨᕋᓛᓄᑦ ᐱᓇᓱᐊᕈᓯᐅᓚᐅᖅᑐᒥ, ᐃᓗᓕᐊᖅᑐᖅ 17-ᓂᑦ ᐊᑐᓕᖁᔨᔾᔪᑎᓂᑦ ᐅᑯᓄᖓ ᑲᓇᑕᐅᑉ ᒐᕙᒪᑉᑯᖏᓐᓄᑦ. ᐃᑦᑐᓗᒃ ᐅᖃᖅᑐᖅ ᑕᒪᕐᒥᒃ ᐊᑐᓕᖁᔨᔾᔪᑎᑦ ᐱᒻᒪᕆᐅᕗᑦ, ᑭᓯᐊᓂ ᓇᓗᓇᐃᖅᓯᔪᖅ ᐅᑯᐊ ᐃᓕᖓᔪᑦ ᐊᑖᓂ ᐱᓗᐊᖅᑐᒥᑦ ᐱᒻᒪᕆᐅᓂᖏᓐᓂᑦ ᐃᓄᒻᒪᕆᖕᓄᑦ:

· ᐅᑯᐊ ᒥᓂᔅᑕᐅᑎᑦ ᑲᑎᒪᔨᕋᓛᑦ ᐋᖅᑭᒃᑕᐅᖁᑉᓗᒋᑦ ᐅᑭᐅᖅᑕᖅᑐᓕᕆᓂᕐᒧᑦ ᑲᒪᓂᐊᖅᑐᓂᑦ;

· ᒥᓂᔅᑕᐅᑎᑦ ᑲᑎᒪᔨᕋᓛᑦ ᐊᒃᑐᐊᓂᖃᕐᓗᑎᒃ ᓄᓇᖃᖅᑳᖅᓯᒪᔪᑦ ᐃᓄᖏᓐᓄᑦ ᐱᕙᓪᓕᐊᑎᓪᓗᒋᑦ ᓯᕗᓂᒃᓴᖓᓂᑦ ᐅᑭᐅᖅᑕᑐᒧᑦ ᐊᑐᐊᒐᒃᓴᑦ;

· ᐅᑯᐊ ᓄᓇᖃᖅᑳᖅᓯᒪᔪᑦ ᐃᓄᖏᑦ ᐃᓚᐅᑎᑕᐅᓗᑎᒃ ᖃᐅᔨᒪᔨᕐᔪᐊᖑᓂᕋᖅᑕᐅᔪᑦ ᖃᐅᔨᓴᐃᓂᖏᓐᓄᑦ ᐱᓕᕆᐊᓂ ᐊᒃᑐᐊᑎᓪᓗᒋᑦ ᐅᑭᐅᖅᑕᖅᑑᑉ ᐊᕙᑎᐊᓂ;

· ᐅᑯᐊ ᑲᓇᑕᐅᑉ ᒐᕙᒪᑉᑯᖏᑦ ᐱᓕᕆᓂᖅᓴᐅᓗᑎᒃ ᐃᓕᑕᖅᓯᓂᕐᒥᑦ ᑕᐃᓱᒪᓂᑕᓄᑦ ᑐᓂᓯᓂᐅᓯᒪᔪᑦ ᐅᑯᓄᖓ ᓄᓇᖃᖅᑳᖅᓯᒪᔪᑦ ᐃᓄᖏᑦᑕ ᑲᓇᑕᐅᑉ ᐅᑭᐅᖅᑕᖅᑐᐊᓂ ᐱᖃᕐᓂᕋᕐᓂᕐᒧᑦ;

· ᐅᑯᐊ ᑲᓇᑕᐅᑉ ᒐᕙᒪᑉᑯᖏᑦ ᓇᓗᓇᐃᖅᓯᓯᒪᑦᑎᐊᕐᓗᑎᒃ, ᓯᕗᓪᓕᐅᑎᑕᐅᔭᕆᐊᖃᖅᑐᑦ ᐃᓕᖓᓗᑎᒃ, ᐱᕙᓪᓕᐊᓂᖏᓐᓂᑦ ᐊᔪᖏᑦᑎᐊᖅᑐᑦ ᑲᔪᓯiᖏᓐᓄᑦ ᓄᓇᖃᖅᑳᖅᓯᒪᔪᑦ ᓄᓇᓕᖁᑎᖏᑦ ᐅᑭᐅᖅᑕᖅᑐᒥ.

“ᓄᓇᕗᑦ ᑐᙵᕕᒃ ᑎᒥᖓᑦ ᓴᖅᑭᓯᒪᓚᐅᖅᑎᓪᓗᒋᑦ ᑲᑎᒪᔨᕋᓛᓄᑦ, ᐅᓂᑉᑳᓚᐅᖅᑐᒍᑦ ᐅᑯᐊ ᑲᓇᑕᐅᑉ ᒐᕙᒪᑉᑯᖏᑦ ᐱᐊᓂᒃᓯᓯᒪᖏᒻᒪᑕ ᐃᓗᐃᑦᑐᒥᑦ ᐊᑐᓕᖅᑐᑦᑎᓂᕐᒥᑦ ᐅᑯᐊ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓂᑦ, ᐊᑎᓕᐅᖅᑕᐅᓚᐅᖅᓯᒪᔪᑦ 1993-ᒥ. ᐅᑯᐊ ᐊᑐᓕᖁᔨᔾᔪᑎᑦ ᐅᑯᐊ ᑲᓇᑕᐅᑉ ᒐᕙᒪᑉᑯᖏᑦ ᓅᒋᐊᕐᓗᑎᒃ ᐊᑕᐅᑦᑎᒃᑯᑦ ᒪᒃᑯᐊ ᐱᔪᓐᓇᑦᑎᐊᖁᑉᓗᒋᑦ ᐱᔪᓐᓇᖅᑐᑦ ᓄᓇᓕᑦ ᐅᑭᐅᖅᑕᖅᑐᒥᑦ ᑕᑯᒃᓴᐅᑎᑦᑎᔪᖅ ᑕᒪᒃᑯᐊ ᐅᖃᐅᓯᕗᑦ ᑐᑭᓯᐅᒪᔭᐅᓂᖏᓐᓂᑦ.” ᐅᖃᖅᑐᖅ ᐃᑦᑐᓗᒃ.

ᐃᑦᑐᓗᒃ ᐃᓚᓯᔪᖅ ᐅᖃᐅᓯᓂᑦ ᑕᒪᒃᑯᐊ ᐊᑐᓕᖁᔨᔾᔪᑎᑦ ᑲᑎᒪᔨᕋᓛᒧᑦ, ᐊᑕᐅᑦᑎᒃᑯᑦ ᐃᓚᒋᓗᒋᑦ ᐅᑯᓇᖓᑦ ᐃᑦᑐᐃᑦ ᑲᑎᒪᔨᕋᓛᖏᑦ ᐅᑯᓄᖓ ᐃᓕᖓᔪᑦ ᓄᓇᖃᖅᑳᖅᓯᒪᔪᑦ ᐃᓄᖏᓐᓄᑦ 2008-ᒥ ᐅᓂᑉᑳᖏᓐᓂ ᐅᐱᒋᑉᓗᒋᑦ ᑐᑭᖏᑦ ᐅᑉᓗᒥᒧᑦ ᐃᓕᖓᔪᑦ ᐊᖏᕈᑎᑦ: ᒪᑐᕙᓪᓕᐊᓪᓗᒋᑦ ᐊᖕᒪᓂᖃᖅᑐᑦ, ᑕᑯᒃᓴᐅᑎᑦᑎᔪᑦ ᐱᑕᖃᕐᓂᐊᓂᒃ ᑐᑭᓯᐅᒪᓂᕐᒥᑦ ᐃᓕᖓᔪᓂᑦ ᒐᕙᒪᓕᕆᓂᕐᒥ ᐱᑕᖃᕆᐊᖃᕐᓂᐊᓂᒃ ᒐᕙᒪᑉᑯᑦ ᐊᖏᖅᓯᓗᑎᒃ ᐱᔭᒃᓴᖏᓐᓂᑦ ᐊᒻᒪᓗ ᐱᓕᕆᖃᑎᖃᕐᓗᑎᒃ ᑲᑐᔾᔨᓂᒃᑯᑦ ᐃᓚᒋᓗᒋᑦ ᐃᓄᒻᒪᕇᑦ.

“ᒫᓐᓇ, ᐅᕙᒍᑦ ᓅᑦᑕᕆᐊᖃᓕᖅᑐᒍᑦ ᑐᒃᓯᐅᒪᓂᐅᔪᓂᑦ ᐱᒋᐊᒻᒪᕆᖕᓂᐅᔪᓄᑦ,” ᐃᑦᑐᓗᒃ ᐅᖃᖅᑐᖅ. “ᓇᖕᒥᓂᖅ ᐃᖅᑲᖅᑐᐃᕕᖕᒨᖅᓯᓯᒪᓂᕗᑦ ᐱᔾᔪᑎᖃᖅᑐᖅ ᑕᒪᐃᓐᓂᒃ ᐊᑐᓕᖅᑎᑦᑎᕙᓪᓕᐊᔪᓕᕆᓂᕐᒧᑦ. ᐃᖏᕐᕋᔭᕆᐊᖃᓕᖅᑐᒍᑦ ᐅᖃᓪᓚᑐᐃᓐᓇᕐᓂᐅᔪᓂᑦ ᐱᒋᐊᓪᓚ*ᑕᕐᓂᐅᔪᓄᑦ.”

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: