ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦᑕ ᐊᖓᔪᖅᑳᖓᑦ ᑳᑎ ᑕᐅᑐᓐᖏ ᐅᓪᓗᒥ ᐅᖃᖅᑲᐅᔪᖅ ᑐᓐᖓᓱᒃᑎᑦᓯᓂᕋᖅᑐᓂ ᑲᓇᑕᐅᑉ ᐊᖓᔪᖅᑳᒻᒪᕆᐊᑕ ᓯᑏᕙᓐ ᕼᐋᐸᐅᑉ ᑐᓴᖅᑎᑦᓯᔾᔪᑎᒋᔭᖓᓂᒃ ᐱᖓᓱᓄᑦ ᐊᕐᕌᒍᓄᑦ ᐆᒃᑑᑕᐅᓗᓂ ᐱᓕᕆᐊᖑᓂᐊᖅᑐᒥ ᓴᖅᑭᑎᑦᓯᔾᔪᑕᐅᓗᓂ ᐱᖃᑎᒌᒍᑎᖃᕐᓗᑎᒃ ᖁᒡᕙᕆᐊᖅᑕᐅᓂᖏᓐᓂᒃ ᓄᓇᑦᓯᐊᕐᒥ ᐊᒻᒪ ᓄᓇᕗᒥ ᐅᔭᕋᖕᓂᐊᕐᓂᕐᒧᑦ ᑲᑐᔾᔨᖃᑎᒌᑦ. ᑖᒃᑯᐊ ᐃᑲᔪᖅᑎᒌᖕᓂᐊᖅᑐᑦ, ᐃᓚᖃᕐᓂᐊᖅᑐᑦ $830,000 ᑮᓇᐅᔭᖅᑑᑎᒃᓴᑦ, ᐃᓚᐅᓗᑎᒃ ᓄᓇᕗᑦ ᒐᕙᒪᖏᑦ, ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᑎᑦᓯᓂᕐᒧᑦ ᑎᒥᐅᔪᑦ ᐊᒻᒪ ᓄᓇᑦᓯᐊᕐᒥ ᐊᒻᒪ ᓄᓇᕗᒥ ᐅᔭᕋᖕᓂᐊᕐᓂᕐᒧᑦ ᑲᑐᔾᔨᖃᑎᒌᑦ.
“ᐅᔭᕋᖕᓂᐊᕐᓂᖅ ᐃᒪᐃᒻᒪᑦ ᐊᒻᒪ ᑲᔪᓯᓯᒪᓂᐊᖅᑐᓂ, ᐱᓚᒋᒻᒪᕆᒃᑐᓂᐅᒡᓗ ᓄᓇᕗᑦ ᑮᓇᐅᔭᓕᐅᕐᓂᐊᑕ. ᒐᕙᒪᑐᖃᒃᑯᑦ ᑮᓇᐅᔭᐃᕈᑎᖏᑦ ᓄᓇᑦᓯᐊᕐᒥ ᐊᒻᒪ ᓄᓇᕗᒥ ᐅᔭᕋᖕᓂᐊᕐᓂᕐᒧᑦ ᑲᑐᔾᔨᖃᑎᒌᓄᑦ ᐃᑲᔫᑎᓂᐊᖅᑐᑦ ᑕᒪᒃᑯᐊ ᓄᓇᕗᒥᐅᑦ ᑐᓴᖅᑕᐅᒋᐊᖃᕐᓂᖏᑦ ᑕᒪᒃᑯᓄᖓ ᐅᖃᐅᓯᒃᓴᓄᑦ ᐃᓱᒫᓘᑎᖃᕐᕕᒋᔭᑦᑎᓐᓄᑦ, ᓲᕐᓗ ᓈᒻᒪᒃᑐᓂᒃ ᑮᓇᐅᔭᖅᑑᑎᒃᓴᖃᕆᐊᖃᕐᓂᖅ ᐊᕙᑎᓕᕆᓂᖅ ᕿᒥᕐᕈᔭᐅᑎᓪᓗᒍ ᐅᔭᕋᖕᓂᐊᕈᒪᔪᓄᑦ ᐱᓕᕆᐊᓂ,” ᐅᖃᖅᑐᑦ ᑕᐅᑐᓐᖏ.
ᑕᐅᑐᓐᖏ ᐅᖃᐅᓯᖃᓚᐅᕐᒥᔪᑦ ᑖᓐᓇ ᑲᓇᑕᐅᑉ ᐊᖓᔪᖅᑳᒻᒪᕆᐊ ᕼᐋᐸ ᓇᓗᓴᐃᖅᓯᓚᐅᕐᒪᑦ ᓄᓇᓐᖑᐊᓕᐅᕈᒪᓪᓗᓂ ᐆᒻᒪᖅᑯᑎᓕᕆᓂᕐᒧᑦ, ᐅᔭᕋᖕᓂᐊᕐᓂᕐᒧᓪᓗ ᐱᓕᕆᐊᖑᔪᓂᒃ.
“ᑕᒪᓐᓇ ᑮᓇᐅᔭᐃᕈᑎᖃᕐᓂᖅ ᓄᓇᓐᖑᐊᓕᐅᑐᐃᓐᓇᕐᓂᕐᒧᑦ ᓄᓇᕗᒥ, ᑯᖑᕙᖅᓯᒪᓂᖃᕐᒪᑦ ᓴᓂᖏᓐᓂᒃ ᐊᓯᖏᑦ ᑲᓇᑕᒥ ᐊᕕᒃᑐᖅᓯᒪᓂᐅᔪᑦ, ᐱᒻᒪᕆᐅᓂᐊᖅᑐᑦ ᓯᕗᓂᒃᓴᒧᑦ ᑮᓇᐅᔭᓕᐅᕈᑎᖃᕐᓂᖅ ᐱᕙᓪᓕᐊᑎᑕᐅᑎᓪᓗᒍ ᐊᕕᒃᑐᖅᓯᒪᓂᑦᑎᓐᓂ,” ᐅᖃᖅᑐᖅ ᑕᐅᑐᓐᖏ.
