(ᒫᑦᓯ 30, 2010-ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖏᔪᖅᑳᖓ ᐹᓪ ᖃᓗᔾᔭᖅ ᑎᓕᐅᕆᒋᐊᓪᓚᑐᖅ ᑲᓇᑕᐅᑉ ᒐᕙᒪᒃᑯᖏᓐᓂ ᑮᓇᐅᔭᖃᖅᑎᑦᓰᓐᓇᖁᓪᓗᒋᑦ ᓄᓇᖃᖅᑳᖅᓯᒪᔪᓄᑦ ᓴᒥᓴᕐᓂᕐᒧᑦ ᑐᙵᕕᒃᑯᓐᓂ (AHF).
ᑐᐊᕕᕐᓇᖅᑐᒥᒃ ᐅᖃᐅᓯᐅᓂᐊᖅᑐᖅ ᐅᓐᓄᒃ 7-ᒨᖅᑲᑦ ᑲᓇᑕᐅᑉ ᒪᓕᒐᓕᐅᕐᕕᕐᔪᐊᖓᓂ ᖃᓄᐃᓕᖓᓂᐊᕐᓂᖓ ᓄᓇᖃᖅᑳᖅᓯᒪᔪᓄᑦ ᒪᒥᓴᕐᓂᕐᒧᑦ ᑐᙵᕕᒃ.
“ᑐᙵᕕᒃᑯᑦ ᐃᓕᑕᖅᓯᓯᒪᔪᑦ ᐱᐅᔪᒥᒃ ᐊᒃᑐᐃᓯᒪᓂᖓ ᐃᑲᔫᑎᖃᕐᓂᖓᓗ ᑮᓇᐅᔭᖃᖅᑎᑕᐅᓂᒃᑯᑦ ᓄᓇᖃᖅᑳᖅᓯᒪᔪᑦ ᒪᒥᓴᕐᓂᕐᒧᑦ ᑐᙵᕕᒃᑯᑦ ᓴᖅᑭᓯᒪᔭᖏᑦ ᐃᓄᖏᓐᓄᑦ ᓄᓇᕗᒻᒥ ᐊᒻᒪ ᐊᒥᓱᑦ ᓄᓇᖃᖅᑳᖅᓯᒪᔪᑦ ᐊᓪᓚᖓᔪᓪᓗ ᑲᓇᑕᓕᒫᒥ. ᑮᓇᐅᔭᖃᖅᑎᑕᐅᓂᖓᒍᑦ ᓄᓇᕗᑦ ᑲᔪᓯᑎᑦᓯᔪᓐᓇᓚᐅᖅᑐᑦ 12-ᓂᒃ ᐱᓕᕆᐊᖑᔪᓂᒃ ᐊᐅᓚᔪᓐᓇᖁᓪᓗᒋᑦ ᐊᑐᐃᓐᓇᐅᑎᑦᓯᓪᓗᑎᓪᓗ ᐃᑲᔪᖅᑐᐃᓂᕐᒥᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᖃᑕᓐᖑᑎᖏᓐᓄᓪᓗ, ᐃᓚᖓᑦ ᐊᐅᓚᑕᐅᓯᒪᓪᓗᓂ ᑐᙵᕕᒃᑯᓐᓂ.” ᐅᖃᖅᑐᖅ ᖃᓗᔾᔭᖅ.
ᓄᓇᖃᖅᑳᖅᓯᒪᔪᓄᑦ ᒪᒥᓴᕐᓂᕐᒧᑦ ᑐᙵᕕᒃ ᑮᓇᐅᔭᖃᖅᑎᑦᓯᕙᒃᐳᖅ ᐃᑲᔫᑎᒃᓴᓂᓪᓗ 12-ᓄ ᐱᓕᕆᐊᖑᔪᓄᑦ ᓄᓇᕗᒻᒥ ᒪᒥᓴᕐᓂᖅ, ᑲᑎᑎᑦᓯᓂᖅ ᐊᒻᒪ ᑲᔪᖏᖅᓴᐃᓂᖅ ᐃᑲᔪᖅᑐᐃᓂᕐᓗ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐊᒻᒪ ᓄᓇᓕᖏᓐᓄᑦ ᒪᒥᓴᖅᐸᓪᓕᐊᖁᓪᓗᒋᑦ ᑎᒥᒃᑯᑦ, ᖁᓄᔪᕐᓂᐊᓂᒃᑯᑦ, ᐃᓱᒪᒃᑯᑦ, ᐃᓕᖅᑯᓯᒃᑯᑦ, ᐅᒃᐱᕐᓂᒃᑯᓪᓗ ᐱᑦᓯᐊᖅᑕᐅᕙᓚᐅᖏᑦᑐᑦ ᐃᓕᓐᓂᐊᕐᕕᒻᒥ, ᐃᓚᒋᓪᓗᒋᑦ ᑭᖑᕚᖏᓐᓄᑦ ᐊᒃᑐᐃᓯᒪᓂᖏᑦ.
ᑮᓇᐅᔭᖃᖅᑎᑕᐅᓂᖏᑦ ᓄᓇᖃᖅᑳᖅᓯᒪᔪᓄᑦ ᒪᒥᓴᕐᓂᕐᒧᑦ ᑐᙵᕕᒃᑯᑦ ᐃᓱᓕᒡᕕᒃᓴᖃᖅᑐᖅ ᒫᑦᓯ 31, 2010-ᒥ. ᐃᓱᓕᒃᑎᑕᐅᓂᐊᓕᖅᑐᑦ 131 ᓄᓇᓕᐅᔪᓂ ᐱᓕᕆᐊᖑᔪᑦ ᑲᓇᑕᐅᑉ ᐊᕕᒃᑐᖅᓯᒪᓂᖏᓐᓂ.
“ᐊᒥᓱᑦ ᐃᓄᐃᑦ, ᑖᒃᑯᐊᓗ 12 ᐱᓕᕆᐊᖑᔪᑦ ᓄᓇᕗᒻᒥ ᐊᑐᐃᓐᓇᐅᑎᑦᑎᓯᒪᕗᑦ ᒪᒥᓴᕐᓂᐅᑉ ᐱᒋᐊᖅᐸᓪᓕᐊᓂᖓᓂᒃ. ᐃᓛᒃᑰᖓᓂᖏᓐᓄᑦ ᓄᓇᖃᖅᑲᖅᓯᒪᔪᑦ ᒪᒥᓴᕐᓂᕐᒧᑦ ᑐᙵᕕᒃᑯᑦ ᑲᔪᓯᑦᑎᐊᕈᓐᓇᖅᓯᒪᕗᑦ ᑕᒪᒃᑯᐊ. ᓄᓇᓕᓐᓂ ᐱᓕᕆᐊᖑᔪᑎᒍᑦ ᖃᐅᔨᓇᖅᓯᒪᕗᑦ ᐱᐅᓂᖅᐹᒃᑯᑦ ᐃᑲᔫᑎᖃᕐᓂᖏᑦ. ᑲᔪᓯᑎᒋᐊᖃᖅᑕᕗᑦ ᓄᓇᓕᖁᑎᕗᑦ ᑲᔪᓯᑎᓪᓗᒋᑦ ᑕᐃᒫᒃ.”
-30-
