ᓄᓇᕗᑦ ᑐᓐᖓᕕᒃᑯᑦ ᐊᖏᔪᖅᑳᖓᑕ ᑐᒡᓕᐊ ᔭᐃᒥᓯ ᐃᑦᑐᓗᒃ ᐅᓪᓗᒥ ᐅᖃᖅᑲᐅᔪᖅ ᑐᓐᖓᕕᒃᑯᑦ ᓄᓇᓕᖕᓂᒃ ᑐᓴᕆᐊᕐᕕᖃᖃᑎᖃᕐᓂᐊᓂᕐᒧᑦ ᐃᒪᕐᒥᐅᑕᓕᕆᔨᒃᑯᑦ ᐊᖏᔪᖅᑲᐅᑎᖏᓐᓂᒃ ᑐᓴᕆᐊᕈᑎᖃᕐᓗᑎᒃ ᑎᑎᕋᕆᐊᓐᖓᐅᑎᓕᐊᖑᓯᒪᔪᓂᒃ ᑲᑎᑕᐅᓯᒪᔪᓂᒃ ᐃᖃᓗᓕᕆᓂᕐᒧᑦ ᐸᕐᓇᐅᑎᓂᒃ ᐊᓪᓚᓐᖑᐊᓄᑦ, ᐅᖃᖃᑎᒌᒍᑎᖃᕐᓗᑎᒃ ᐊᓪᓚᖑᐊᖅᑕᐅᔪᓐᓇᖅᑐᓂᒃ.
ᑎᑎᕋᕆᐊᓐᖓᐅᑎᓕᐊᖑᓯᒪᔪᖅ ᐸᕐᓇᐅᑦ ᑖᒃᑯᓇᓐᖔᖅᓯᒪᔪᑦ ᐱᖓᓱᓂᒃ ᑲᑎᒪᓂᐅᖃᑦᑕᓚᐅᖅᑐᓂᒃ ᐊᕐᕌᓂ ᐊᐅᓚᑦᓯᔨᐅᔪᓂᒃ ᑲᑐᔾᔨᖃᑎᒌᑦᑐᓂᒃ ᖃᓄᖅᑑᑲᓐᓂᓂᕐᒧᑦ ᐋᖅᑭᒋᐊᖅᓯᓇᓱᐊᖅᑐᓂᒃ ᑐᓐᖓᕕᒃᑯᑦ ᐃᖅᑲᖅᑐᐃᕕᒃᑰᑎᑦᓯᓇᓱᐊᕐᓂᕆᓚᐅᖅᑕᖓᓄᑦ ᐃᒪᕐᒥᑕᐅᓕᕆᔨᒃᑯᓐᓂᒃ, ᐃᒪᕐᒥᐅᑕᓕᕆᔨᒃᑯᑦ ᓄᖅᑲᑎᑦᓯᓚᐅᖅᑎᓪᓗᒋᑦ ᓯᓚᕐᔪᐊᒥ ᓂᐅᕐᕈᑕᐅᒍᓐᓇᕐᓂᖏᓐᓄᑦ ᐊᓪᓚᓐᖑᐊᓄᑦ ᑑᒑᑦ ᑐᓴᕆᐊᕐᕕᖃᓚᐅᓐᖏᓯᐊᖅᑐᑎᒃ ᐃᓄᖕᓂᒃ. ᑐᓐᖓᕕᒃᑯᑦ ᓄᖅᑲᑎᑦᓯᓕᓚᐅᖅᑐᑦ ᐃᖅᑲᖅᑐᐃᕕᒻᒨᑎᑦᓯᓇᓱᐊᕈᑎᒥᓂᒃ ᔫᓂ, 2011, ᐃᒪᕐᒥᐅᑕᓕᕆᔨᒃᑯᑦ ᐊᖏᓚᐅᖅᑎᓪᓗᒋᑦ ᑐᓴᕆᐊᖃᑕᐅᓂᐊᕐᓂᕐᒧᑦ ᐃᓄᖕᓂᒃ ᐃᓱᒪᓕᐅᕈᑕᐅᔪᓄᑦ ᐊᓪᓚᓐᖑᐊᕈᓐᓇᓂᕐᒥᒃ ᓂᐅᕐᕈᑎᖃᕐᓂᕐᒧᓪᓗ.
ᐊᐅᓚᑦᓯᔾᔪᑎᓄᑦ ᐸᕐᓇᐅᑎᓂ, ᐃᒪᕐᒥᐅᑕᓕᕆᔨᒃᑯᑦ ᐸᕐᓇᓯᒪᔪᑦ ᓴᖅᑭᑎᑦᓯᓂᐊᕐᓂᕐᒥᒃ ᑐᑭᓯᑎᑦᓯᒋᐊᕈᑎᓂᒃ ᓄᑖᓂᒃ ᐊᐅᓚᑦᓯᔾᔪᑎᓄᑦ ᐋᖅᑭᐅᒪᔾᔪᑎᒃᓴᓂᒃ ᐱᓯᒪᔪᓂᒃ ᐊᐅᔭᖅᓯᐅᕆᐊᖅᑐᕐᕕᒋᕙᑦᑕᖏᓐᓂᒃ ᐊᓪᓚᓐᖑᐊᑦ. ᐊᐅᔭᖅᓯᐅᕆᐊᖅᑐᕐᕕᒋᕙᑦᑕᖏᓐᓂᒃ ᐊᓪᓚᓐᖑᐊᑦ ᐊᑐᖅᑕᐅᒍᑎᒋᓕᓚᐅᖅᑕᖓ ᓴᖅᑭᑎᑦᓯᒍᑎᒃᓴᐅᖁᓪᓗᒍ ᐊᓪᓚᖑᐊᖅᑕᐅᔪᓐᓇᖅᑐᓂᒃ ᓇᑭᓐᖔᖅᓯᒪᓂᖏᑎᒍᑦ. ᐊᓪᓚᖑᐊᖅᑕᐅᔪᓐᓇᖅᑐᑦ ᓇᑭᓐᖔᖅᓯᒪᓂᖏᑎᒍᑦ ᑐᓂᔭᐅᒍᑕᐅᓕᕐᓗᓂ ᓄᓇᓕᖕᓂ ᐊᖑᓇᓱᑦᑐᓕᕆᔨᒃᑯᑦ ᑲᑐᔾᔨᖃᑎᒌᖏᓐᓄᑦ ᐊᕕᑦᑐᖅᓯᒪᓂᐅᔪᓂᒃ ᐆᒪᔪᓕᕆᔨᒃᑯᑦ ᑲᑎᒪᔨᖏᓐᓂᒃ. ᐃᓚᖏᑦ ᓄᓇᓕᖕᓂ ᐊᖑᓇᓱᑦᑐᓕᕆᔨᖏᑦ ᐅᓄᖅᓯᒋᐊᕐᓂᐊᕋᓱᒋᔭᐅᔪᑦ ᐊᕐᕌᒍᒥ ᐊᓪᓚᓐᖑᐊᕈᓐᓇᐅᑎᑖᕆᕙᑦᑕᖏᓐᓂ. ᓄᓇᓕᖕᓂ ᐊᖑᓇᓱᑦᑐᓕᕆᔨᒃᑯᑦ ᐊᓱᐃᓛᒃ ᑐᓂᓯᓕᕐᓗᑎᒃ ᓂᕆᖓᑖᓂᒃ ᐃᓚᒋᔭᐅᔪᖁᑎᒋᔭᒥᓄᑦ.
ᐊᓪᓚᓐᖑᐊᓕᕆᓂᕐᒧᑦ ᐸᕐᓇᐅᑎᑕᕆᐊᖃᕈᑎᖓ ᓴᐳᔾᔭᐅᓯᒪᒍᑎᒃᓴᖏᓐᓂᒃ ᓯᓚᕐᔪᐊᒥ ᓂᐅᕐᕈᑎᖃᕐᓂᕐᒧᑦ ᐊᓪᓚᓐᖑᐊᑦ ᑑᒑᖏᓐᓂᒃ ᐊᒻᒪᓗ ᑎᑎᕋᖅᓯᒪᔪᖃᖅᑐᓂ ᐊᑐᓕᖁᔨᔾᔪᑎᓂᒃ ᓄᖑᐊᑎᑦᑕᐅᓕᒪᔾᔪᑎᒃᓴᖏᓐᓂᒃ ᐊᓪᓚᓐᖑᐊᑦ ᓄᓇᕗᒻᒥ. ᐸᕐᓇᐅᑎᓕᐊᖑᓯᒪᔫᑉ ᑐᕌᒐᖓ ᑕᒪᒃᑯᐊᓕᒫᑦ ᐊᓪᓚᖑᐊᓕᕆᓂᕐᒧᑦ ᐊᐅᓚᑦᓯᕙᑦᑐᑦ ᑲᑐᔾᔨᖃᑎᒌᑦᑐᑎᒃ ᑲᒪᒍᓐᓇᖁᓪᓗᒋᑦ ᑲᒪᒋᒋᐊᓕᖕᒥᓂᒃ ᓄᖑᐊᑎᕇᒃᑯᑎᒃᓴᓂᒃ ᐊᐅᓚᑦᓯᑦᓯᐊᕈᑎᑦᓴᓂᓪᓗ.
ᑎᑎᕋᕆᐊᓐᖓᐅᑎᓕᐊᖑᓯᒪᔪᖅ ᐸᕐᓇᐅᑦ ᒫᓐᓇ ᓄᓇᓕᖕᓂ ᐊᖑᓇᓱᑦᑐᓕᕆᔨᓄᑦ ᐊᒻᒪᓗ ᐃᓄᖕᓄᑦ ᐃᓱᒪᓕᐅᕈᑕᐅᒋᐊᖃᕐᓂᐊᓕᖅᑐᖅ ᐊᒻᒪᓗ ᐅᖃᕆᐊᕐᕕᐅᔪᓐᓇᕐᓗᓂ ᐊᐅᓚᑦᓯᔾᔪᑎᒃᓴᑦ ᐊᓪᓚᓐᖑᐊᓄᑦ. ᐊᕕᑦᑐᖅᓯᒪᓂᐅᔪᓂ ᐆᒪᔪᓕᕆᔨᒃᑯᑦ ᑲᑎᒪᔨᖏᑦ, ᓄᓇᓕᖕᓂ ᐊᖑᓇᓱᑦᑐᓕᕆᔨᒃᑯᑦ ᑲᑐᔾᔨᖃᑎᒌᖏᑦ, ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨ ᐊᒻᒪᓗ ᓄᓇᕗᑦ ᒐᕙᒪᖓ ᓄᓇᓕᖕᓂ ᑐᓴᕆᐊᖃᑕᐅᓂᐊᕐᒥᔪᑦ.
“ᑎᑎᕋᕆᐊᓐᖓᐅᑎ ᐊᕐᓇᐅᑎᓄᑦ ᑖᒃᑯᓇᓐᖔᖅᓯᒪᔪᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪᓗ ᖃᓪᓗᓈᑦ ᖃᐅᔨᓴᖅᑎᕐᔪᐊᖏᓐᓂᒃ ᖃᐅᔨᒪᓂᐅᔪᓂᒃ,” ᐅᖃᕆᐊᒃᑲᓐᓂᓚᐅᖅᑐᖅ ᐃᑦᑐᓗᒃ. “ᑭᓯᐊᓂ, ᐸᕐᓇᐅᓯᐊᖑᔪᑦ ᐃᓚᖏᓐᓂ ᐊᖏᖃᑎᒌᖏᓂᖃᕐᒪᑕ ᑐᓐᖓᕕᒃᑯᑦ ᐃᒪᕐᒥᐅᑕᓕᕆᔨᒃᑯᓪᓗ. ᑖᒃᑯᐊ ᓇᓗᓇᐃᖅᑕᐅᓂᐊᖅᑐᑦ ᐅᖃᐅᓯᕆᔭᐅᓗᑎᓪᓗ ᑐᓴᕋᓱᐊᕈᑕᐅᓕᖅᐸᑕ. ᐃᓄᐃᑦ ᐃᓚᒋᔭᐅᓪᓚᑦᑖᕆᐊᖃᕐᒪᑕ ᓄᓇᓕᖕᓂ ᑐᓴᕋᓱᐊᕐᓂᕐᓂ ᐊᐅᓚᑦᓯᔾᔪᑎᓄᑦ ᐸᕐᓇᐅᑏᑦ ᐊᓯᔾᔩᒻᒪᕆᓐᓂᐊᕐᓂᖏᓐᓄᑦ ᐊᓪᓚᓐᖑᐊᑦ ᐊᐅᓚᑕᐅᓂᖏᓐᓄᑦ” ᐅᖃᓚᐅᖅᑐᖅ.
ᐃᒪᕐᒥᐅᑕᓕᕆᔨᒃᑯᑦ ᖁᓕᐅᓐᖏᒐᖅᑐᓂᒃ (9) ᑐᓴᕆᐊᕐᓂᖃᕐᓂᐊᖅᑐᑦ ᐃᓚᒋᔭᐅᓗᑎᒃ ᐊᕕᑦᑐᖅᓯᒪᓂᐅᔪᓂ ᐆᒪᔪᓕᕆᔨᒃᑯᑦ ᑲᑎᒪᔨᖏᓐᓃᖔᖅᑐᑦ ᐊᒻᒪᓗ ᓄᓇᓕᖕᓂ ᐊᖑᓇᓱᑦᑐᓕᕆᔨᖏᓐᓂᒃ 23-ᓂᒃ ᓄᓇᓕᖕᓂᒃ ᐊᓪᓚᓐᖑᐊᕐᓂᐊᖃᑦᑕᖅᑐᓂ. ᐃᓐᓇᐃᑦ, ᐊᖑᓇᓱᑦᑏᑦ ᐊᒻᒪᓗ ᓄᓇᓖᑦ ᐃᓄᖏᑦ ᑐᓴᕆᐊᕐᓂᐅᔪᓄᑦ ᐅᐸᖃᑦᑕᕐᓂᐊᖁᔭᐅᔪᑦ ᐃᑲᔪᕆᐊᕐᓗᑎᒃ ᖃᐅᔨᒪᓂᕐᒥᒍᑦ ᐊᐅᓚᑦᓯᔾᔪᑎᒃᓴᓕᐊᖑᕙᓪᓕᐊᔪᒧᑦ ᐸᕐᓇᐅᒧᑦ.
ᐃᒪᕐᒥᐅᑕᓕᕆᔨᒃᑯᑦ ᐊᒻᒪᓗ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᐊᖏᕈᑎᖃᕆᐊᖃᕐᓂᐊᖅᑐᑦ ᐸᕐᓇᐅᒻᒥᒃ ᔮᓐᓄᐊᓕ, 2013, ᑲᓇᑕ ᑕᐃᓚᓐᒨᖏᓐᓂᖓᓂ ᐃᓚᒋᔭᐅᒋᐊᖅᑐᕐᓗᓂ ᑲᑎᒪᔨᕐᔪᐊᑦ ᓯᓚᕐᔪᐊᒥ ᑕᐅᖅᓰᖃᑦᑕᐅᑎᓂᕐᒧᑦ ᐅᓗᕆᐊᓇᖅᑐᒦᑦᑐᓄᑦ ᐆᒪᔪᓄᑦ ᑲᑎᒪᓂᕐᔪᐊᖓᓂ ᑲᒪᖃᑦᑕᖅᑐᓄᑦ ᒫᑦᓯ 2013-ᒥ.
ᓄᓇᓕᖕᓂᒃ ᑐᓴᕋᓱᐊᕐᓂᐅᖃᑦᑕᕈᒫᕐᓂᐊᖅᑐᑦ
ᕿᑭᖅᑖᓗᒃ
ᐸᓐᓂᖅᑑᖅ – ᒫᑦᓯ 19-20, 2012
ᕿᑭᖅᑕᕐᔪᐊᖅ – ᒫᑦᓯ 21-22, 2012
ᑲᖏᕐᖢᒑᐱᒃ – ᒫᑦᓯ 23-24, 2012
ᒥᑦᑎᒪᑕᓕᒃ – ᒫᑦᓯ 26-27, 2012
ᐃᑉᐱᐊᕐᔪᒃ – ᒫᑦᓯ 28-29, 2012
ᐊᐅᔪᐃᑦᑐᖅ – ᒫᑦᓯ 23-24, 2012
ᐃᖃᓗᐃᑦ – ᒫᑦᓯ 31, 2012
ᐃᖃᓗᓐᓂ ᑲᑎᒪᓂᐅᓂᐊᖅᑐᖅ ᒪᕐᕉᓐᓂᒃ ᑭᒡᒐᖅᑐᐃᔨᖃᖅᑐᐃᓐᓇᐅᓗᑎᒃ ᐃᖃᓗᐃᑦ, ᐸᓐᓂᖅᑑᖅ, ᕿᑭᖅᑕᕐᔪᐊᖅ, ᑲᖏᕐᖢᒑᐱᒃ, ᒥᑦᑎᒪᑕᓕᒃ ᐊᒻᒪᓗ ᐃᑉᐱᐊᕐᔪᒃ.
ᕿᑎᕐᒥᐅᑦ
ᑰᒑᕐᔪᒃ – ᒫᑦᓯ 19-20, 2012
ᑰᒑᕐᔪᒻᒥ ᑲᑎᒪᓂᐅᓂᐊᖅᑐᖅ ᒪᕐᕉᓐᓂᒃ ᑭᒡᒐᖅᑐᐃᔨᖃᖅᑐᐃᓐᓇᐅᓗᑎᒃ ᓴᓂᕋᔭᒃ, ᐃᒡᓗᓕᒃ, ᖃᐅᓱᐃᑦᑐᖅ, ᐅᖅᓱᖅᑑᖅ, ᑕᓗᕐᔪᐊᖅ ᐊᒻᒪᓗ ᐃᖃᓗᑦᑑᑦᑎᐊᖅ.
ᑭᕙᓪᓕᖅ
ᓇᐅᔮᑦ – ᒫᑦᓯ 21-22, 2012
ᓇᐅᔮᓂᒃ ᑲᑎᒪᓂᐅᓂᐊᖅᑐᖅ ᒪᕐᕉᒃᓂᒃ ᑭᒡᒐᖅᑐᐃᔨᖃᖅᑐᐃᓐᓇᐅᓗᑎᒃ ᑲᖏᕐᖠᓂᖅ, ᓴᓪᓖᑦ, ᐃᒡᓗᓕᒑᕐᔪᒃ, ᖃᒪᓂ’ᑐᐊᖅ, ᑎᑭᕋᕐᒧᐊᖅ, ᐊᕐᕕᐊᑦ, ᑭᓐᖓᐃᑦ, ᑭᒻᒥᕈᑦ, ᓴᓕᕋᔭᒃ, ᐃᒡᓗᓕᒃ.
