(ᔪᓚᐃ 16, 2009 ­­ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃᑯᑦ ᑎᒥᖓᑕ ᐊᖓᔪᖅᑳᖓ ᐹᓪ ᖃᓗᔾᔭᖅ ᐅᑉᓗᒥ ᑐᓴᖅᑎᑦᑎᔪᖅ ᓄᓇᓕᐅᔪᖅ ᖁᕕᐊᓲᑎᖃᕐᓂᐊᕐᓂᖓᓄᑦ ᑲᖏᖅᖢᒑᐱᒃ ᐊᒐᓯ 6, 2009-ᒥ. ᖁᕕᐊᓲᑕᐅᔪᖅ ᖁᕕᐊᓲᑕᐅᓂᐊᖅᑐᖅ ᐊᑕᐅᓯᕐᒥ ᐅᑭᐅᒥ ᑲᔪᓯᑎᑦᑎᑦᑎᐊᖅᓯᒪᓂᖏᓐᓄᑦ ᐊᑐᓕᖅᑎᕆᓂᕐᒧᑦ ᐃᓄᐃᑦ ᐊᒃᑐᖅᑕᐅᓂᖃᕐᓂᐊᖅᑎᓪᓗᒋᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᕐᒥ, ᓯᕗᓂᒃᓴᒥ ᓴᖅᑭᓐᓂᐊᖅᑐᒧᑦ ᓂᖏᖓᓂᖅ ᑲᓇᑕᒥ ᐆᒪᔪᖃᕐᕕᒃ.

ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓕᐊᖅ ᐱᓕᕆᐊᒃᓴᖃᖅᑎᑦᑎᖕᒪᑦ ᒐᕙᒪᑐᖃᒃᑯᓐᓂᒃ ᐋᔩᕈᑎᖃᖃᑦᑕᖁᑉᓗᒋᑦ ᐃᓄᐃᑦ ᐊᒃᑐᖅᑕᐅᓂᖃᕐᓂᐊᖅᑎᓪᓗᒋᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᕐᓂ ᓇᓗᓇᐃᖅᓯᓇᔭᕐᓂᕐᒧᑦ ᒥᕐᖑᐃᖅᓯᕐᕕᖕᓂ ᐅᕝᕙᓘᓐᓃᑦ ᓴᐳᓐᓂᐊᖅᑕᐅᓯᒪᓂᐊᖅᑐᓂᒃ ᓄᓇᓂᒃ ᓄᓇᕗᒻᒥ. ᓇᓗᓇᐃᖅᓯᒃᐸᑕ ᐊᒻᒪᓗ ᒪᓕᒐᑎᒍᑦ ᓴᐳᓐᓂᐊᕈᑎᒃᓴᑦ ᓂᖏᖓᓂᖅ ᑲᓇᑕᒥ ᐆᒪᔪᖃᕐᕕᖕᒧᑦ ᐱᐊᓂᒃᑕᐅᒃᐸᑕ, ᓂᕆᐅᒋᔭᐅᔪᖅ ᓯᕗᓪᓕᖅᐸᐅᓂᐊᕐᓂᖓᓄᑦ ᓄᓇᕐᔪᐊᕐᒥ ᐊᕐᕕᕐᓄᑦ ᐱᑕᖅᑕᐃᓕᕝᕕᐅᓇᔭᕐᓂᖓᓄᑦ.

“ᑕᒪᓐᓇ ᐱᒻᒪᕆᐊᓗᒃ ᑲᖏᖅᖢᒑᐱᖕᒥᐅᑕᓄᑦ, ᐊᔭᖅᑐᐃᖃᑦᑕᖅᓯᒪᑎᓪᓗᒋᑦ ᓴᐳᓐᓂᐊᖅᑕᐅᖁᑉᓗᒋᑦ ᐊᕐᕖᑦ ᓄᓇᖓᓐᓂ ᑕᐃᑉᓱᒪᓂ 1980 ᐊᑐᖅᑎᓪᓗᒋᑦ,” ᑕᐃᒪᓐᓇ ᐅᖃᖅᖢᓂ ᖃᓗᔾᔭᖅ. “ᐊᑐᓕᖅᑎᖅᑕᐅᑦᑎᐊᕐᓂᖓ ᐃᓄᐃᑦ ᐊᒃᑐᖅᑕᐅᓂᐊᕐᓂᐊᖅᑎᓪᓗᒋᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᑉ ᓇᓗᓇᐃᖅᓯᔪᖅ ᐃᓄᐃᑦ ᐃᓕᖅᑯᓯᑐᖃᖓᓂᒃ ᒥᐊᓂᖅᓯᑦᑎᐊᕆᐊᖃᕐᓂᑉᑎᓐᓄᑦ ᓄᓇᑉᑎᓐᓂᒃ, ᐃᒪᕐᓂᒃ ᐊᒻᒪᓗ ᐆᒪᔪᓂᒃ ᓯᕗᓂᒃᓴᑉᑎᓐᓄᑦ ᐊᑐᖅᑕᐅᔪᓐᓇᖁᑉᓗᒋᑦ.”

ᖁᕕᐊᓲᑎᖃᖅᑎᓪᓗᒋᑦ ᑲᖏᖅᑐᒑᐱᖕᒥ ᓄᓇᖅᑲᑎᒌᑦ ᓂᕆᕕᒡᔪᐊᕐᓂᖃᕈᒫᖅᑐᑦ, ᐃᒻᖏᕆᐊᖅᑐᖅᓯᒪᔪᖃᕐᓗᓂᓗ ᐊᒻᒪᓗ ᐱᓐᖑᐊᕐᓗᑎᒃ. ᑕᐃᒪᐃᓕᐅᖅᑎᓪᓗᒋᑦ ᓄᓇᖓ ᐅᐸᒃᑕᐅᕈᓘᔭᕈᒫᖅᑐᖅ, ᓯᕗᓕᖅᑎᓄᑦ ᐊᒻᒪᓗ ᑐᓴᒐᒃᓴᓕᕆᔨᓄᑦ ᑲᓇᑕᒥᖔᖅᑐᓄᑦ ᓇᓂᑐᐃᓐᓇᑦᑎᐊᖅ. ᐅᒥᐊᕐᔪᐊᖅ ᐅᓯᔪᖅ 100-ᓂᒃ ᐃᓕᓐᓂᐊᖅᑐᓂᒃ ᐊᒻᒪᓗ ᐃᓕᓐᓂᐊᖅᑎᑦᑎᔨᓂᒃ ᑲᑐᔾᔨᖃᑎᒌᒃᑯᓐᓂᖔᖅᑐᑦ ᑕᐃᔭᐅᔪᒥᒃ ᐃᒪᓐᓇ “ᐃᓕᓐᓂᐊᖅᑐᑦ ᓯᑯᒥ” ᑎᑭᓐᓂᐊᖅᑐᑦ ᑲᖏᖅᑐᒑᐱᖕᒧᑦ ᑕᐃᑲᓂ ᐅᑉᓗᕐᒥ, ᑎᑭᓯᒪᔪᖃᕐᓂᐊᕆᓪᓗᓂᓗ ᑭᒡᒐᖅᑐᐃᔨᓂᒃ ᓄᓇᕐᔪᐊᑉ ᐆᒪᔪᓕᕆᔨᒃᑯᖏᑦᑕ ᑮᓇᐅᔭᓕᕆᔨᖏᓐᓂᖔᖅᑐᒥᒃ ᑲᓇᑕᒥ.

ᓂᖏᖓᓂᖅ ᑲᓇᑕᒥ ᐆᒪᔪᖃᕐᕕᒃ ᐱᖃᑕᐅᔪᖅ ᐊᑕᐅᓯᐅᖏᑦᑐᒧᑦ ᐃᓄᐃᑦ ᐊᒃᑐᖅᑕᐅᓂᖃᕐᓂᐊᖅᑎᓪᓗᒋᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᕐᒧᑦ ᐊᖏᕈᑎᓕᐊᖑᓯᒪᔪᒧᑦ

ᐃᓄᖕᓄᑦ ᐊᒻᒪᓗ ᒐᕙᒪᑐᖃᒃᑯᓐᓄᑦ ᐱᖃᑕᐅᓪᓗᑎᒃ ᒪᕐᕉᒃᑲᓐᓃᒃ ᓄᑖᖑᔪᑦ ᑲᓇᑕᒥ ᐆᒪᔪᓕᕆᕝᕖᑦ, ᐊᒻᒪᓗ ᖁᓕᐅᔪᑦ ᓴᖅᑭᔮᓕᐊᓂᒃᑐᑦ ᐆᒪᔪᓄᑦ ᖁᐸᓄᐊᕋᓗᖕᓄᑦ ᐱᑕᖅᑕᐃᓕᕝᕕᐅᔪᓄᑦ. ᑭᒡᓕᖃᕐᕕᐅᔪᑦ ᑲᓇᑕᒥ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᒃᑯᓐᓄᑦ ᐃᓱᒪᒃᓴᖅᓯᐅᕈᑕᐅᔪᒫᖅᑐᑦ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᓴᑉᑕᒻᐸᕆᒥ.

ᑐᑭᓯᒋᐊᒃᑲᓐᓂᕈᒪᒍᑉᓯ, ᑕᑯᔭᐅᒋᐊᕈᓐᓇᖅᑐᖅ ᐃᓄᐃᑦ ᐊᒃᑐᖅᑕᐅᓂᖃᕐᓂᐊᖅᑎᓪᓗᒋᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᖅ ᐅᕙᓂ www.tunngavik.com

ᑐᑭᓯᒋᐊᒃᑲᓐᓂᕈᒪᒍᑉᓯ ᑐᑭᓯᒋᐊᕐᕕᐅᔪᓐᓇᖅᑐᖅ:

ᐱᔨ ᐸᐅᕐᓐᔅ ᑐᓴᐅᒪᖃᑦᑕᐅᑎᓕᕆᓂᕐᒧᑦ ᑐᑭᒧᐊᒃᑎᑦᑎᔨᐅᖃᑕᐅᔪᖅ ᓄᓇᕗᑦ ᑐᓐᖓᕕᒃᑯᑦ ᑎᒥᖓᓐᓂ ᐅᖃᓘᑖ: (867) 975-4905 ᐊᑭᖃᖏᑦᑐᖅ 1-888-645-0006