ᓄᓇᕗᑦ ᑐᓐᖓᕕᒃ ᑎᒥᖓᑕ ᐊᖏᔪᖅᑳᖓ ᑳᑎ ᑕᐅᑐᓐᖏ ᐅᓪᓗᒥ ᑐᓴᒐᑦᓴᓐᖑᖅᑎᑦᓯᖅᑲᐅᔪᖅ ᑐᓐᖓᕕᒃᑯᑦ ᐃᑲᔪᖅᓱᐃᓂᖏᓐᓂᒃ ᐃᓘᓐᓈᒍᑦ ᐃᒪᕐᒥᐅᑕᓕᕆᔨᒃᑯᑦ ᓇᑦᓯᕐᓄᑦ ᐅᓪᓗᖃᖅᑎᑦᓯᓂᖏᓐᓂᒃ ᐱᖁᔭᓕᐅᕐᕕᔾᔪᐊᖅ ᖃᖅᑲᖓᓂ, ᓴᖅᑭᐅᒪᑎᑕᐅᓂᐊᖅᑐᒥᒃ ᐅᓪᓗᒥ ᐋᑐᕚᒥ.
ᓇᓪᓕᐅᓂᖅᓯᐅᕐᓂᖅ ᐸᕐᓇᑕᐅᓯᒪᔪᖅ ᐃᒪᕐᒥᐅᑕᓕᕆᔨᒃᑯᓐᓂᒃ ᖃᐅᔨᔭᐅᑎᑦᓯᒋᐊᖅᑐᑎᒃ ᒐᕙᒪᑐᖃᒃᑯᑦ ᐃᑲᔪᓱᐃᖏᓐᓇᕐᓂᖏᓐᓂ ᑲᓇᑕᒥ ᓇᑦᓯᓕᕆᓂᕐᒨᖓᔪᓂᒃ ᓴᓇᕕᔾᔪᐊᓂ. ᐊᖏᔪᖅᑲᐅᑏᑦ ᑲᓇᑕᓕᒫᒥᒃ ᐱᓯᒪᔪᑦ, ᐃᓚᒋᔭᐅᓪᓗᓂ ᓄᓇᕗᑦ, ᓇᓪᓕᐅᓂᖅᓯᐅᓂᕐᒨᕈᒫᕐᓂᐊᖅᑐᑦ ᐃᓚᖃᕐᓗᑎᒃ ᐃᒪᕐᒥᐅᑕᓕᕆᔨᒃᑯᑦ ᒥᓂᔅᑕᖓᓂᒃ ᑮᑦ ᐋᔅᕕᐅᑦ ᐊᒻᒪᓗ ᓄᓇᕗᒻᒥ ᑭᒡᒐᖅᑐᐃᔪᒥᒃ ᓕᐅᓇ ᐊᒡᓘᒃᑲᖅ. ᒪᓕᒐᓕᐅᖅᑎᕐᔪᐊᓕᒫᑦ ᑲᓇᑕᒥ ᑲᑎᒪᕕᔾᔪᐊᒥ ᑐᓂᔭᐅᓂᐊᖅᑐᑦ ᕿᓯᒐᔭᕋᓛᒥᒃ ᑲᑭᖅᑯᐊᓕᐊᕆᓯᒪᔪᒥᒃ ᓄᓇᕗᒻᒦᖔᖅᑐᒥᒃ ᐅᓪᓗᒥ.
“ᐱᖕᒪᕆᐅᔪᑦ ᑕᒪᒃᑯᐊ ᓇᓪᓕᐅᓂᖅᓯᐅᕐᓂᐅᕙᑦᑐᑦ ᐃᑲᔫᑎᖃᖅᑐᑦ ᖃᐅᔨᑎᑦᓯᒋᐊᒃᑲᓐᓂᕈᑕᐅᓪᓗᑎᒃ ᐊᒻᒪᓗ ᐊᖏᓪᓕᕙᓪᓕᐊᒍᑕᐅᓪᓗᑎᒃ ᖃᐅᔨᒪᐅᒋᐊᒃᑲᓐᓂᕈᑎᒃᓴᖏᓐᓂᒃ ᑲᓇᑕᒥᐅᓕᒫᓄᑦ ᑲᓇᑕᒥ ᐱᖕᒪᕆᐅᓂᖓ ᓇᑦᓯᓕᕆᓂᕐᒨᖓᔪᓄᑦ ᓴᓇᕝᕕᔾᔪᐊᓄᑦ,” ᐅᖃᖅᑲᐅᔪᖅ ᑕᐅᑐᓐᖏ. “ᑲᓇᑕᒥᐅᓕᒫᑦ ᐅᐱᒍᓱᑦᓯᐊᕆᐊᓖᑦ ᒪᑭᒪᔾᔪᑎᒃᓴᑦᓯᐊᕙᖕᒥᒃ, ᓯᕐᓕᕿᑎᑦᓯᓇᑎᒃ ᓂᕿᑦᓴᖅᓯᐊᖑᕙᑦᑐᒥᒃ, ᐊᒻᒪᓗ ᒪᑭᒪᔾᔪᑎᓄᑦ ᐊᒻᒪᓗ ᐃᓕᖅᑯᓯᕐᒧᑦ ᐃᑲᔫᑎᖃᖃᑦᑕᕐᓂᖓᓂᒃ ᐅᓄᖅᑐᓄᑦ ᑲᓇᑕᒥᐅᓄᑦ.”
ᑐᑭᓯᑎᑦᓯᒋᐊᕈᑎᓕᐊᖑᓂᐊᖅᑐᖅ ᑕᕝᕗᓐᖓᖓᔪᓄᑦ ᑲᓇᑕᒥ ᑐᓴᒐᑦᓴᓕᕆᔨᖏᑎᒍᑦ ᐋᖅᑭᑦᑕᐅᓯᒪᒻᒥᔪᖅ ᑐᕌᒐᖃᖅᑐᓂ ᐅᔾᔨᕆᔭᐅᑎᑦᓯᒋᐊᕐᓂᕐᒥᒃ ᐊᐅᓚᑕᐅᑦᓯᐊᖃᑦᑕᕐᓂᖓᓂᒃ ᓇᑦᓯᖃᑦᑕᕐᓂᖅ ᑲᓇᑕᒥ.
ᑐᓐᖓᕕᒃᑯᑦ ᐃᑲᔪᐃᓐᓇᓂᐊᖅᑐᑦ ᐸᕐᓇᖃᐅᑕᖃᑦᑕᕐᓗᑎᒃ ᖁᕕᐊᓲᑎᖃᕐᓂᖅ ᓇᑦᓯᕐᒥᒃ ᓇᓪᓕᐅᓂᕐᓯᐅᓂᕐᒥᒃ, ᐃᖃᓗᓐᓂ ᐅᐱᕐᖔᑕᒫᑦ ᓇᓪᓕᐅᓂᖅᓯᐅᕈᑕᐅᖃᑦᑕᕐᓂᖓᓂᒃ..
