ᑐᓴᕋᑦᓴᓕᕆᔩᑦ

ᓄᓇᕗᑦ ᑐᙵᕕᒃ ᑎᒥᖓ ᐃᑲᔪᕐᓯᕗᑦ ᐊᑕᐅᓯᐅᖃᑎᖃᕐᖢᑎᒃ ᒍᐃᐊᑦ’ᓱᒍᐃᐊ’ᐃᓐ

(ᕕᕝᕗᐊᕆ 21, 2020, ᐃᖃᓗᐃᑦ) ᓄᓇᕗᑦ ᑐᙵᕕᒃ ᑎᒥᖓ ᐃᑲᔪᕐᓯᕗᑦ ᐊᑕᐅᓯᐅᖃᑎᖃᕐᖢᑎᒃ ᒍᐃᐊᑦ’ᓱᒍᐃᐊ’ᐃᓐ ᓄᓇᒥᓐᓂᒃ ᓴᐳᑎᓯᒪᔨᐅᔪᓂᒃ, ᐊᒻᒪ ᑕᒪᐃᓐᓂ ᓄᓇᖃᖅᑳᖅᓯᒪᔪᓂᒃ ᐃᑲᔪᕐᓯᖃᑕᐅᔪᓂᒃ ᓄᓇᖃᖅᑳᖅᓯᒪᓂᕐᒥᒍᑦ ᐱᔪᓐᓇᐅᑎᒥᓂᒃ ᐊᐅᓚᑦᓯᔪᓐᓇᓂᕐᒧᑦ ᓄᓇᒥᓂ ᐊᒻᒪ ᓴᐳᔾᔨᑎᓪᓗᒋᑦ ᓄᓇᒋᔭᑐᖃᕐᒥᓂᒃ. ᒍᐃᐊᑦ’ᓱᒍᐃᐊ’ᐃᓐ ᐱᖅᑯᓯᑐᖃᕐᒥᒍᑦ ᓯᕗᓕᕐᑎᖏᑦ, ᐱᔪᓐᓇᕐᓂᕋᐃᓯᒪᙱᒻᒪᑕ, ᓯᕗᓂᐊᒍᑦ, ᐊᒻᒪ ᐊᖏᖅᓯᒪᒍᑎᖃᕋᑎᒃ ᓴᓇᔭᐅᓂᒃᓴᖓᓂᒃ ᑲᓇᑕᐅᑉ ᓄᓇᓕᒫᖓᓅᖓᔪᒥᒃ ᓱᒡᓗᓕᐊᓗᖕᒥᒃ ᓯᔾᔭᒧᑦ ᑲᓱᕈᑕᐅᒐᔭᕐᑐᒥᒃ ᓄᓇᑐᖃᕐᒥᓂ. ᒍᐃᐊᑦ’ᓱᒍᐃᐊ’ᐃᓐ ᓯᕗᓕᕐᒥᓃᖔᖅᑐᓂᒃ ᐊᐅᓚᑦᓯᔾᔪᓯᖃᖅᑐᑐᖃᐅᖕᒪᑕ ᖃᓪᓗᓈᓄᑦ ᑎᑭᑕᐅᓚᐅᖅᑳᑎᓐᓇᒋᑦ ᐊᑐᓕᕐᓯᒪᔭᒥᓂᒃ, ᐊᐅᓚᑦᓯᒍᓯᖅ ᐅᓪᓗᒥᒧᑦ ᓱᓕ ᐊᑑᑎᖃᖅᑎᑕᐅᔪᖅ ᐊᒻᒪ ᐃᖅᑲᓲᑕᐅᔭᕆᐊᓕᒃ ᒪᓕᒃᑕᐅᓗᓂ.

ᓄᓇᖃᖅᑳᖅᓯᒪᔪᑦ ᓇᖕᒥᓂᖃᓐᓂᕐᒧᑦ ᓄᓇᓂᒃ ᐱᔪᓐᓇᐅᑎᖃᕐᒪᑕ ᑲᓇᑕᒥ ᑭᓪᓕᖃᕋᑎᓪᓗ ᐱᑕᖃᓐᓂᕋᕐᑕᐅᓗᑎᒃ ᐱᙱᑦᑑᒐᓗᐊᑦ ᐅᓪᓗᒥᐅᔪᖅ ᒐᕙᒪᑐᖃᒃᑯᑦ ᒪᓕᒐᖏᑦᑎᒍᑦ ᐊᒻᒪ ᐊᑐᐊᒐᖏᑦᑎᒍᑦ, ᐱᖃᓯᐅᑎᓪᓗᒋᑦ ᓄᓇᖃᖅᑳᖅᓯᒪᔪᑦ ᓇᖕᒥᓂᖃᓐᓂᖏᑦ ᓄᓇᓂᒃ ᐊᒻᒪ ᐱᔪᓐᓇᐅᑎᖏᑦ ᓄᓇᓄᑦ ᐊᑑᑎᖃᖅᑎᓯᒪᔭᕐᒥᓐᓄᑦ ᐊᒻᒪ ᓇᔪᖅᓯᒪᔭᕐᒥᑦ ᑎᑭᑕᐅᓚᐅᖅᑳᕋᑎᒃ ᑕᕆᐅᑉ ᐊᑭᐊᓂᑦ ᐊᒻᒪ ᑯᐃᑉ ᐃᓐᓄᐃᓯᒪᓂᕋᕈᑎᖃᓚᐅᕐᑎᓐᓇᒍ. ᓄᓇᖃᖅᑳᖅᓯᒪᔪᑦ ᓄᓇᓂᒃ ᓇᖕᒥᓂᖃᖅᓂᖏᑦ ᐊᒻᒪ ᐱᔪᓐᓇᐅᑎᖏᑦ ᐃᓕᓴᕆᔭᐅᓯᒪᕗᑦ ᐊᒻᒪ ᓴᐳᔾᔭᐅᓯᒪᒍᑎᖃᖅᑐᑎᒃ ᑲᓇᑕᐅᑉ ᑐᙵᕕᕐᔪᐊᖓᓂ ᖁᑦᑎᓂᕐᐹᖑᓪᓗᓂ ᒪᓕᒐᖅ ᐱᔪᓐᓇᐅᑎᓄᑦ ᐊᒻᒪ ᐃᓱᒪᕐᓱᕈᓐᓇᓂᕐᒧᑦ ᒪᓕᒐᙳᖅᑎᑕᐅᓚᐅᕐᓯᒪᔪᖅ, 1982 – ᖁᑦᑎᓂᖅᓂᐹ ᒪᓕᒐᖅ ᑲᓇᑕᐅᑉ ᒪᓕᒐᖃᕈᓯᖓ.

ᓄᓇᑖᕈᑕᐅᓯᒪᔪᓂ ᐊᒻᒪ ᐊᖏᕈᑎᓕᐊᖑᓯᒪᔪᓂ ᒪᓕᒃᑕᐅᔭᕆᐊᓖᐅᖕᒥᑎᓪᓗᒋᑦ, ᒫᓐᓇᐅᔪᒥ ᓴᐃᖕᒪᖃᑎᒌᖃᑕᐅᔪᒪᓯᒪᓂᖏᑦ ᓄᓇᖅᑲᖅᑳᓯᒪᔪᑦ ᖃᓄᖅᑑᕈᑕᐅᖁᔭᐅᓯᒪᓯᒪᕗᑦ ᑭᓪᓕᓯᓂᐊᕈᑎᑎᒍᑦ ᐊᒻᒪ ᓴᐃᖕᒪᖃᑎᒌᓐᓂᕐᒧᑦ ᑲᑎᒪᔨᖏᓐᓄᑦ, ᐊᒻᒪᓗ ᓱᓕ, ᐱᑦᑎᐊᕐᓯᒪᙱᑦᑐᑦ ᐊᓄᓪᓚᓯᕐᑕᐅᖁᓪᓗᒋᑦ ᑲᓇᑕᓕᒫᕐᒥ ᑭᓪᓕᓯᓂᐊᕈᑎᖃᖅᑎᓪᓗᒋᑦ ᐅᑎᙲᓇᕐᓯᒪᔪᑦ ᐊᒻᒪ ᐃᓄᐊᕐᑕᐅᓯᒪᔪᓂᒃ ᓄᓇᖃᖅᑳᖅᓯᒪᔪᓂᒃ ᐊᕐᓇᓂᒃ ᐊᒻᒪ ᓂᕕᐊᕐᓯᐊᓂᒃ. ᒍᐃᐊᑦ’ᓱᒍᐃᐊ’ᐃᓐ ᓄᓇᒋᓯᒪᔭᑐᖃᖓᓂ ᐊᒻᒪ ᒐᕙᒪᒃᑯᖏᑦ ᑲᓇᑕᐅᑉ ᓱᓇᖁᑎᖃᕋᑎᒃ ᐊᒻᒪ ᒪᓕᒃᑕᐅᖁᔭᒥᓂᒃ ᐊᑑᑎᖃᕐᑎᑎᓪᓗᑎᒃ ᓄᓇᒥᒃ ᐊᑐᕐᒪᑕ ᐅᐸᒍᑎᑦᑎᑕᐃᓕᓪᓗᑎᒃ ᓄᓇᒥᒃ, ᓄᓇᒥᒃ ᓴᐳᔾᔨᔨᓂᒃ ᑎᒍᔭᐅᒃᑲᐃᕙᒃᑐᑎᒃ, ᐊᒻᒪ ᐱᕙᓪᓕᐊᔪᓕᕆᔨᓂᒃ ᐃᓕᒪᓵᕆᕙᕐᑐᑎᒃ. ᑕᒪᒃᑯᐊ ᑕᒪᐃᑕ ᓱᓇᖁᑎᖃᕋᑎᒃ ᑲᒪᓂᕆᔭᖏᑦ ᐃᓱᒫᓗᓐᓇᑐᒻᒪᕆᐅᔪᑦ ᐊᒻᒪ ᓱᓕᔪᓐᓇᓗᐊᖏᓕᕈᑎᖓ ᓄᓇᖃᖅᑳᖅᒪᔪᓂᒃ ᐱᓕᕆᖃᑎᖃᕈᓐᓇᕐᓂᖏᑦ ᑲᓇᑕᐅᑉ.

ᑕᐃᒪᓐᓇ ᑲᓇᑕᐅᑉ ᒪᓕᒐᕐᔪᐊᖓᒍᑦ ᓴᐳᑎᔭᐅᒍᑎᖃᖅᓯᒪᒻᒪᑕ ᓄᓇᑖᕈᑎᑖᖅᓯᒪᔪᑎᒍᑦ ᐅᔾᔨᑐᑦᑎᐊᖅᐸᕗᑦ. ᑲᓇᑕᐅᑉ ᒐᕙᒪᒃᑯᖏᑦ ᐅᖃᖅᓯᒪᒻᒪᑕ “ᓴᐃᒻᒪᖃᑎᒌᖃᑎᖃᕈᒪᓪᓗᑎᒃ”, ᑭᓯᐊᓂᓗ ᐱᖃᓯᐅᓯᒪᔭᕆᐊᖃᓪᓚᕆᒃᑐᖅ ᑕᐃᒻᒪᖃᑎᒌᓐᓂᕐᒧᑦ ᐱᑦᑎᐊᕆᐊᖃᓐᓂᖅ ᐱᔪᓐᓇᐅᑎᖏᓐᓂᒃ ᓄᓇᖃᖅᑳᖅᓯᒪᔪᑦ. ᑲᓇᑕ ᐊᖏᕐᓯᒪᔭᕆᐊᓕᒃ ᒍᐃᐊᑦ’ᓱᒍᐃᐊ’ᐃᓐᑯᑦ ᒐᕙᒪᖃᕐᕕᖃᕐᒪᑕ! ᑲᓇᑕ ᑕᒪᑦᓱᒥᖓ ᐅᑉᐱᕆᔭᖃᕋᔭᓐᓂᖏᒃᐸᑦ, ᓄᓇᖃᖅᑳᖅᓯᒪᔫᓪᓗᑕ, ᐅᑉᐱᕈᓱᓗᐊᕈᓐᓇᐃᓕᓂᐊᕐᑐᒍᑦ ᐱᓕᕆᖃᑎᒌᓇᓱᒃᑲᓗᐊᕐᓗᒋᑦ ᑲᓇᑕᐅᑉ ᒐᕙᒪᒃᑯᖏᑦ.

-30-
ᑐᑭᓯᒋᐊᒃᑲᓂᕐᕕᒃᓴᖅ, ᖃᐅᔨᒋᐊᕐᕕᒋᓗᒍ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᒧᑦ ᐃᑲᔪᖅᑎ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᓐᖓᕕᒃ ᑎᒥᖓ
ᐅᖄᓚᐅᑖ: (867) 975-4900 ᐊᑭᖃᓐᖏᑦᑐᖅ: 1-888-646-0006

www.tunngavik.com

ᖃᔮᖅ ᐃᐊᔅᕗᐊᑦ,
ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᑕᖅ
ᐊᖓᔪᖅᑳᖅ ᐊᓗᑭ ᑰᑦᑎᖅ ᐊᓪᓚᑉᕕᖓᓂ
ᐅᖄᓚᐅᑖ: (867) 975-4900 ᐊᑭᖃᓐᖏᑦᑐᖅ: 1-888-646-0006

www.tunngavik.com