ᑐᓴᕋᑦᓴᓕᕆᔩᑦ

ᓄᓇᕗᑦ ᑐᙵᕕᒃᑯᑦ ᓱᓕ ᓈᖕᒪᓴᖏᑉᐳᒃ ᑕᕆᐅᑉ ᐊᑭᐊᓂᒃ ᔫᕋᑉᒥ ᑲᑎᒪᔨᕐᔪᐊᖏᑦ ᕿᓯᓐᓂᒃ ᓂᐅᕕᖁᔨᑦᑕᐃᓕᓂᖏᓐᓂᒃ

ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓᑦᑕ ᑐᖏᓕᖓ ᔭᐃᒥᓯ ᐃᑦᑐᓗᒃ ᐅᖃᐅᓯᖃᒃᑲᓐᓂᓕᓚᐅᕆᕗᑦ ᓈᖕᒪᒋᓂᕋᓐᓇᒋᑦ ᑕᕆᐅᑉ ᐊᑭᐊᓂ ᔫᕋᑉᒥ ᑲᑎᒪᔨᕐᔪᐊᖏᑦ ᑲᓇᑕᒥᐅᑕᓂᒃ ᕿᓯᓐᓂᒃ ᓂᐅᕕᖁᔨᑦᑕᐃᓕᓂᖏᓐᓂᒃ. ᐃᑦᑐᓗᒃ ᐅᖃᓚᐅᕐᑐᖅ ᑐᓴᕐᑎᑦᑎᓚᐅᕐᑎᓪᓗᒋᑦ ᑕᕆᐅᑉ ᐊᑭᐊᓂ ᔫᕋᑉᒥ ᑲᑎᒪᔨᕐᔪᐊᖏᑦ ᓈᖕᒪᒋᔭᖃᓚᐅᕐᓂᖏᓐᓂᒃ ᓄᓇᕗᑦ ᒐᕙᒪᒃᑯᖏᑕ ᓇᓗᓇᐃᒃᑯᓰᖃᑦᑕᓂᐊᕐᓂᖏᓐᓂᒃ ᕿᓯᓐᓂᒃ ᐅᕘᓇ ᓄᓇᖃᖅᑳᖅᓯᒪᔪᑦ ᓄᓇᕐᔪᐊᕐᒥ ᓱᖁᑎᒋᔭᐅᖏᓐᓂᑎᒍᑦ ᑕᕆᐅᑉ ᐊᑭᐊᓂ ᔫᕋᑉᒥ ᑲᑎᒪᔨᕐᔪᐊᖏᑕ ᑲᒪᒋᔭᖏᑎᒍᑦ.

“ᑭᓇᒃᑯᑐᐃᓐᓇᕐᓄ ᖃᐅᔨᒪᔭᐅᖁᓪᓗᒍ, ᓄᓇᕗᑦ ᑐᙵᕕᒃᑯᑦ ᑎᒥᖓ ᓱᓕ ᓈᖕᒪᓴᙱᒻᒪᑕ ᑕᕆᐅᑉ ᐊᑭᐊᓂ ᔫᕋᑉᒥ ᑲᑎᒪᔨᕐᔪᐊᖏᑕ ᓂᐅᕕᖅᑕᐃᓕᒪᓂᖏᓐᓂᒃ ᕿᓯᓐᓂᒃ. ᑲᓇᑕᒥ ᓇᑦᑎᕋᓱᒃᑎᐅᕙᒃᑐᑦ ᓇᓪᓕᓵᖅᑎᑦᑎᓇᑎᒃ ᐊᒻᒪᓗ ᓄᖑᓗᐊᖅᑕᐃᓕᒪᑎᑦᑎᓪᓗᑎᒃ ᓇᑦᑎᕋᓱᓲᖑᒻᒪᑕ. ᑕᕆᐅᑉ ᐊᑭᐊᓂ ᔫᕋᑉᒥ ᑲᑎᒪᔨᕐᔪᐊᖏᑦ ᕿᓯᓐᓂᒃ ᓂᐅᕕᖅᑕᐃᓕᒪᑎᑦᑎᒻᒪᑕ ᑐᑭᓯᑲᒻᒪᑎᑦᑎᓯᒪᓪᓗᑎᒃ ᐊᒻᒪᓗ ᑕᐃᒫᖑᙱᑦᑐᖅ ᐃᓄᖁᑎᒥᓂᒃ ᑐᓴᐅᒪᑎᑦᑎᓪᓗᑎᒃ, ᓄᖑᓗᐊᖅᑕᐃᓕᒪᑎᑦᑎᓂᕐᒨᖏᑦᑐᖅ. ᓇᑦᑏᑦ ᓄᖑᒃᐸᓪᓕᐊᖏᒻᒪᑕ ᐊᑦᓛᓐᑎᒃᒥ ᐊᒻᒪᓗ ᐅᑭᐅᖅᑕᖅᑑᑉ ᐃᒪᖓᓂ. ᐃᒪᓐᓇᒃᐳᖅ, ᑕᕆᐅᑉ ᐊᑭᐊᓂ ᔫᕋᑉᒥ ᑲᑎᒪᔨᕐᔪᐊᖏᑦ ᒫᓐᓇᕋᑖᖑᔪᔪᖅ ᓇᑦᑎᕐᓂᒃ ᑐᖁᕋᐃᔭᕆᐊᖃᔪᕗᑦ ᐊᑦᑕᖅᑯᑕᐅᓪᓗᑎᒃ ᐃᖃᓗᒃᑐᓗᐊᕐᓇᓱᒋᔭᐅᓕᕐᑐᑎᒃ,” ᐅᖃᖅᑐᖅ ᐃᑦᑐᓗᒃ.

ᐃᒪᕐᒥᐅᑕᓕᕆᔨᒃᑯᒃ ᑲᑎᒪᖃᑎᖃᔪᒻᒪᑕ ᓄᓇᕗᑦ ᑐᙵᕕᒃᑯᓐᓂᒃ ᐊᒻᒪᓗ ᓄᓇᕗᑉ ᒐᕙᒪᒃᑯᖏᓐᓂᒃ ᐅᖃᐅᓯᖃᓐᓂᐊᕐᓗᑎᒃ ᓴᖅᑮᓂᐊᕐᓂᕐᒥᒃ ᓇᓗᓇᐃᒃᑯᑖᕐᒥᒃ ᒪᓕᓪᓗᒋᑦ ᖃᐅᔨᒪᒍᑎᐅᕙᒃᑐᑦ ᕿᓰᑦ ᓂᐅᕕᖅᑕᐅᔪᑦ ᑭᒃᑯᓐᓄᑦ ᓂᐅᕕᖅᑕᐅᕙᒻᒪᖔᑖ. ᓄᓇᕗᑦ ᒐᕙᒪᒃᑯᖏᑦ ᐊᒥᕐᓄᑦ ᕿᓯᓐᓄᓪᓗ ᐱᓕᕆᔾᔪᑎᖏᑦ ᐋᖅᑭᒃᓯᒪᒻᒪᑕ ᑭᓇᒃᑯᓐᓄᑦ ᓂᐅᕕᕐᒪᖔᑖ ᐊᒦᑦ ᕿᓯᓪᓗ.
ᓄᓇᕗᑦ ᒐᕙᒪᒃᑯᖏᑦ ᐊᒥᕐᓂᒃ ᕿᓯᓐᓂᓪᓗ ᐱᓕᕆᔾᔪᑎᖏᑦ ᖃᐅᔨᒪᒍᑕᐅᕙᒃᑐ ᐊᑐᓂᑦ ᐃᓛᒃᑯᑦ ᕿᓰᑦ ᓇᓗᓇᐃᒃᑯᑕᖃᖅᑐᑎᒃ ᓂᐅᕕᖅᑕᐅᑎᓪᓗᒋᑦ ᖃᐅᔨᒪᔭᐅᒍᑎᖏᓐᓂᒃ . ᓇᓗᓇᐃᒃᑯᓯᕐᓱᐃᒍᑎᖓᓕ ᐋᖅᑭᒃᑕᐅᓚᐅᕐᓯᒪᒻᒪᑦ ᑕᕆᐅᑉ ᐊᑭᐊᓂ ᔫᕋᑉᒥ ᑲᑎᒪᔨᕐᔪᐊᖏᑕ ᓱᖁᑎᒃᓴᖏᒍᑎᒋᕙᒃᑕᖏᑦ ᒪᓕᒃᑕᐅᓇᓱᐊᕐᑐᑎᒃ ᓇᓗᓇᖃᑦᑕᓂᐊᖏᒻᒪᑕ ᕿᓰᑦ ᓇᑦᑎᕐᑕᒥᓃᐅᔭᕆᐊᖏᑕ ᓂᕿᒃᓴᕆᐅᓗᑎᒃ ᓄᓇᖃᖅᑳᖅᓯᒪᔪᑦ ᓄᓇᖏᓐᓂ. ᑕᕆᐅᑉ ᐊᑭᐊᓂ ᔫᕋᑉᒥ ᑲᑎᒪᔨᕐᔪᐊᖏᑦ ᐅᖃᓚᐅᕐᑐᑦ ᑕᒪᑐᒪᓂ ᐱᓇᓱᐊᕈᓯᕐᒥ ᓈᖕᒪᓴᕐᓂᕋᖅᑐᑎᒃ ᓄᓇᕘᑉ ᒐᕙᒪᒃᑯᖏᑕ ᓇᓗᓇᐃᒃᑯᓰᓂᒃᑯ ᖃᐅᔨᒪᒍᑎᒋᔭᖏᓐᓂᒃ ᕿᓰᑦ ᑕᕆᐅᑉ ᐊᑭᐊᓄ ᔫᕋᑉᒧ ᑎᑭᑎᑕᐅᔪᓐᓇᕐᓂᐊᓕᕐᓗᑎᒃ. ᐃᑦᑐᓗᒃ ᐅᖃᕐᒥᔪᖅ ᓄᓇᕗᑦ ᑐᙵᕕᒃᑯᑦ ᐅᔾᔨᑦᑐᖅᑎᐊᓂᐊᕐᑐᑦ ᑕᒪᓐᓇ ᓱᖁᑎᒃᓴᕈᓐᓂᕈᑎᖓᑦ ᐊᐅᓪᓛᑦᑎᐊᓐᓂᖃᒻᒪᖔᑦ.

ᓱᖁᑎᒃᓴᕈᓐᓃᕐᓂᖏᑦ ᑐᑭᖃᖅᐳᑦ ᓄᓇᕗᑦ ᒐᕙᒪᒃᑯᖏᑦ ᓇᓗᓇᐃᒃᑯᓰᔪᓐᓇᕐᓂᐊᓕᕐᓂᖏᓐᓂᒃ ᕿᓯᓐᓂᒃ ᓇᑦᑎᕐᑕᐅᓯᒪᒻᒪᑕ ᒪᓕᓪᓗᒋᑦ ᒪᓕᒃᑕᐅᔭᕆᐊᖃᖅᑐᑦ ᓱᖁᑎᒃᓴᕈᓐᓃᕈᑎᓄᑦ, ᑕᒪᓐᓇᓕ ᓄᓇᕘᒥ ᓇᑦᑎᕋᓱᒃᐸᒃᑐᓄᒃ ᓂᐅᕕᐅᑎᖃᕈᓐᓇᕈᑕᐅᓂᐊᓕᕐᑐᖅ ᕿᓯᓐᓂᒃ ᐊᒻᒪᓗ ᓴᓇᓯᒪᔪᓂᒃ ᑭᓯᒐᔭᓂᒃ ᑕᕆᐅᑉ ᐊᑭᐊᓂ ᔫᕋᑉ ᓄᓇᓕᖏᓐᓂ. ᓛᐱᑐᐊ ᐊᒻᒪ ᓄᓇᕕᒃ ᐊᒻᒪᓗ ᓄᓇᑦᓯᐊᖅ ᕿᓯᓐᓄᑦ ᓇᓗᓇᐃᒃᑯᓯᔾᔪᑎᓂᒃ ᖃᐅᔨᒪᔾᔪᑎᒋᓂᐊᕐᑕᒥᓂᒃ ᐱᖃᙱᒻᒪᑕ ᑕᐃᒪᐃᓐᓂᖓᓄᑦ ᓱᖁᑎᒋᔭᐅᔫᓐᓂᖃᑕᐅᔪᓐᓇᖏᑦᑐᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: