ᓄᓇᕗᑦ ᑐᓐᖓᕕᒃᑯᑦ ᐊᕐᕌᒍᑕᒫᖅᓯᐅᒻᒥᒃ ᑲᑎᒪᕐᔪᐊᕐᓂᖃᖅᑎᓪᓗᒋᑦ ᑲᖏᖅᖠᓂᕐᒥ, ᓂᕆᕕᒡᔪᐊᖅᑎᓪᓗᒋᑦ ᐅᓐᓄᒃ ᐊᖓᔪᖅᑳᖓᑦ ᑳᑎ ᑕᐅᑐᓐᖏ ᑕᐃᓯᓚᐅᖅᐳᖅ ᑭᒃᑯᑦ ᓄᓇᕗᑦ ᑐᓐᖓᕕᒃᑯᑦ ᐊᖓᔪᖅᑳᖓᓐᓂᓐᖔᖅᑐᒥᒃ ᑐᓐᓂᖅᑯᓯᐊᖅᑖᕐᓂᐊᕐᒪᖔᖏᓐᓂᒃ.  ᓄᓇᕗᑦ ᑐᓐᖓᕕᒃᑯᓐᓄᑦ ᑲᑎᒪᕐᔪᐊᕆᐊᖅᑐᖅᓯᒪᔪᑦ ᑲᖏᖅᖠᓂᕐᒥ ᑕᒪᑐᒪᓂ ᐱᓇᓱᐊᕈᓯᕐᒥ.

ᐊᕐᕌᒍᑕᒪᖅ, ᐊᖓᔪᖅᑳᖓᓐᓂᓐᖔᖅᑐᖅ ᑐᓐᓂᖅᑯᓯᐊᒃᓴᖅ ᑐᓂᔭᐅᖃᑦᑕᖅᑐᖅ ᐱᖓᓱᓄᑦ ᐃᑲᔪᖅᓯᒪᓪᓚᕆᒃᑐᓄᑦ ᐃᓄᐃᑦ ᐱᖅᑯᓯᖏᑦ ᐸᐸᑕᐅᑦᑎᐊᕋᓱᖕᓂᕐᒥᒃ ᐊᒻᒪ ᓄᓇᓕᖕᓂ ᓯᕗᒃᑲᖅᑕᖅᑎᓪᓚᕆᐅᓯᒪᔪᓂᒃ.  ᑕᒪᑐᒪᓂ ᐊᕐᕌᒍᒥ ᑐᓐᓂᖅᑯᓯᐊᕐᓂᐊᖅᑐᑦ ᑕᐃᕕᑦ ᐅᓗᔪᒃ, ᕕᕈᓂᑲ ᐃᐅᓪ ᐊᒻᒪ ᐊᕼᐃᐊᕐᒥᐅᑦ ᑭᖑᕚᖏᑦ.

ᑕᐅᑐᓐᖏ ᖁᔭᓕᓚᐅᖅᑐᖅ ᐅᓗᔪᖕᒥᒃ ᕿᒧᒃᓯᐅᔾᔪᐅᖃᑕᐅᖃᑦᑕᑯᑖᒃᓯᒪᓂᖓᓄᑦ ᐊᒻᒪ ᐊᑯᓂᐊᓗᒃ ᕿᒧᒃᓯᕐᓂᕐᒥ ᐃᓚᐅᖃᑦᑕᖅᓯᒪᓂᖓᓄᑦ, ᐃᓕᓴᕆᔭᐅᓯᒪᓪᓗᓂᓗ ᒫᓂᑑᐸᒥᐅᓄᑦ ᐊᔪᓐᖏᑦᑐᓪᓚᕆᐅᓂᖓᓄᑦ.  ᐃᐅᓪ ᐅᐃᖏᓚᐅᖅᑲᒻᒥᓐᖏᑦᑐᖅ ᒪᒃᑯᓱᖓᖅᖢᓂ ᐊᒻᒪ ᐃᓚᔮᖏᑦ ᐊᒥᓱᐊᓘᒐᓗᐊᖅᑎᓪᓗᒋᑦ ᐸᖅᑮᓐᓇᕈᓐᓇᖅᓯᒪᔭᖏᑦ ᒥᖅᓱᔪᓂᕐᒥᒍᑦ.  ᐊᕼᐃᐊᕐᒥᐅᑦ ᑭᖑᕚᖏᑦ (ᓄᓇᕕᖕᒥᐅᑕᐃᑦ) ᐃᓕᓴᕆᔭᐅᓚᐅᖅᑐᑦ ᐅᖁᒪᐃᑦᑐᖅᓯᐅᕐᔪᐊᓚᐅᕐᓂᖏᓐᓄᑦ, ᐱᓗᐊᖅᖢᒋᑦ ᐱᖁᑎᓕᒫᖏᑦ ᓴᐅᔭᐅᓚᐅᖅᓯᒪᑎᓪᓗᒋᑦ ᓴᓕᒎᑎᓄᑦ ᐊᒻᒪ ᑭᓱᖃᔮᕈᓐᓃᕋᓗᐊᖅᑎᓪᓗᒋᑦ ᐊᓐᓇᓚᐅᖅᓯᒪᓂᖏᓐᓄᑦ.  ᖃᐅᔨᒪᔭᐅᑦᑎᐊᖅᑐᖅ ᕿᓚᐅᑎᓕᐅᖅᑎ ᐊᒻᒪ ᕿᓚᐅᔾᔭᖅᑎ ᑕᐃᕕᑦ ᓯᖁᐊᖅ ᑐᓐᓂᖅᑯᓯᐊᕐᒥᒃ ᑐᓂᔭᐅᓚᐅᖅᑐᖅ ᑭᒡᒐᖅᑐᐃᓪᓗᓂ ᐊᕼᐃᐊᕐᒥᐅᓂᒃ.  ᓯᖁᐊᖅ ᐃᓕᓴᕆᔭᐅᓚᐅᖅᑐᖅ ᐃᓄᒃᑎᑐᓪᓚᕆᒃ ᕿᓚᐅᔾᔭᕐᓂᕐᒥᒃ ᐸᐸᑦᑎᓂᖓᓄᑦ.

All recipients were awarded a plaque and a $500 prize.  ᑐᓐᓂᖅᑯᓯᐊᖅᑐᖅ ᑕᒪᕐᒥᒃ ᐊᑭᕐᖓᒥᐅᑕᒃᓴᖅᑖᓚᐅᖅᑐᑦ ᐊᒻᒪ $500.00-ᑖᖅᖢᑎᒃ.