(ᕕᕗᐊᕆ 3, 2011 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖏᔪᖅᑳᖓ ᑳᑎ ᑕᐅᑐᖏᑦ ᐅᓪᓗᒥ ᓇᓗᓇᐃᖅᓯᔪᖅ ᑐᙵᕕᒃᑯᑦ ᐸᕐᓇᐸᓪᓕᐊᓂᖏᓐᓂᒃ ᐃᖅᑲᐅᒪᔭᐅᔾᔪᑎᒃᓴᒥᒃ ᓇᒡᓕᐅᓂᖅᓯᐅᓕᖅᐸᑕ ᑲᔪᓯᑎᑦᑎᓯᒪᓂᖏᓐᓂᒃ ᐃᓄᐃᑦ ᐊᔩᖃᑎᒌᑦᑎᐅᓚᐅᖅᑐᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᒥᒃ.
“ᔪᓚᐃ 9, 2013-ᒥ, ᓄᓇᕗᒻᒥᐅᑦ ᓇᒡᓕᐅᓂᖅᓯᐅᓛᖅᑐᑦ 20-ᒃ ᐊᕐᕌᒍᑖᕐᓂᖓᓂᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎ. ᐃᓕᑕᕆᔪᒪᓪᓗᒍ ᑖᓐᓇ ᐊᒡᓗᕆᐊᕈᑕᐅᓯᒪᔪᖅ ᓄᓇᕗᒻᒥ ᐊᒻᒪ ᑲᓇᑕᒥ, ᑐᙵᕕᒃᑯᑦ ᑮᓇᐅᔭᖃᖅᑎᑦᓯᓂᐊᖅᐳᑦ ᐃᖅᑲᐅᒪᔾᔪᑎᒃᓴᓕᐅᕐᓂᕐᒧᑦ ᐃᖅᑲᐅᒪᔭᐅᖁᓪᓗᒋᑦ ᐊᕐᕌᒍᒐᓴᓐᓂᒃ ᑕᖃᔪᓐᓇᖏᑦᑐᑎᒃ ᐱᓕᕆᔾᔪᔾᔨᓯᒪᓂᖏᑦ ᐋᔩᖃᑎᒌᓐᓂᒃᑯᑦ, ᐊᒻᒪ ᐊᑐᓕᖅᑎᑕᐅᕙᓪᓕᐊᓂᖏᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᐅᑉ,” ᐅᖃᖅᑐᖅ ᑕᐅᑐᙱ.
ᑐᙵᕕᒃᑯᑦ ᓂᕈᐊᕐᓂᐊᖅᑐᑦ ᐊᑕᐅᓯᕐᒥ ᓴᓇᓐᖑᐊᖅᑎᒥᒃ ᓄᓇᕗᑦ ᐊᕕᒃᑐᖅᓯᒪᓂᖓᓂ ᓴᓇᖃᑕᐅᓂᐊᖅᑐᒥᒃ ᐃᖅᑲᐅᒪᔾᔪᑎᒃᓴᒥᒃ. ᓴᓇᓐᖑᐊᖅᑏᑦ ᐃᓚᐅᒍᒪᒐᔭᖅᑐᑦ ᑕᑕᑎᕆᔪᓐᓇᖅᑐᑦ ᑎᑭᒐᓱᐊᕐᓂᖓᓂ ᒫᑦᓯ 31, 2011. ᑐᙵᕕᒃᑯᑦ ᓂᕈᐊᕐᓂᐊᖅᑐᓂᒃ ᑲᑎᒪᔨᕋᓛᖃᕐᓂᐊᖅᑐᑦ ᕿᒥᕐᕈᔨᐅᓗᑎᒃ ᑐᒃᓯᕋᐅᑎᐅᔪᓂᒃ ᐊᒻᒪ ᓂᕈᐊᕐᓗᑎᒃ ᐱᖓᓱᓂᒃ ᓴᓇᓐᖑᐊᖅᑎᓂᒃ ᐱᓕᕆᖃᑎᖃᕐᓂᐊᖅᑐᓂᒃ ᑐᑭᒧᐊᑦᑎᑦᓯᔨᒥ ᐸᕐᓇᑕᐅᔪᒧᑦ ᐊᒻᒪ ᖃᓄᐃᓕᖓᓂᖓᓄᑦ ᐃᖅᑲᐅᒪᔾᔪᑎᒃᓴᐅᑉ. ᓴᓇᓐᖑᐊᖅᑏᑦ ᓴᓇᓂᐊᖅᑐᑦ ᓇᖕᒥᓂᖅ ᓄᓇᓕᒋᔭᖏᓐᓂ, ᐊᒻᒪ ᓯᕗᓂᐊᒍᑦ ᓴᖅᑭᑕᐅᓂᒃᓴᖓᑕ ᔪᓚᐃ 9, 2013, ᐋᖅᑭᖅᓱᐃᓗᑎᒃ ᑐᙵᕕᒃᑯᑦ ᐊᒡᓚᕕᖓᑕ ᓯᕗᕌᓂ ᐃᖃᓗᓐᓂ. ᐃᓛᒃᑯᑦ ᓴᓇᓐᖑᐊᖅᑏᑦ ᓂᕈᐊᕐᓂᐊᖅᑐᑦ ᒪᒃᑯᑦᑐᒥᒃ ᓴᓇᓐᖑᐊᖅᑎᒥᒃ ᐃᑲᔪᖃᑕᐅᓂᐊᖅᑐᒥᒃ ᐃᖅᑲᐅᒪᔾᔪᑎᒃᓴᒧᑦ.
ᑐᙵᕕᒃᑯᑦ ᓂᕈᐊᕐᓂᐊᖅᑐᑦ ᓴᓇᓐᖑᐊᖅᑎᒥᒃ ᒪᓕᒡᓗᑎᒃ ᐱᓕᕆᖃᑦᑕᖅᓯᒪᓂᖏᓐᓂᒃ, ᐃᓱᒪᒋᔭᖏᓐᓂᓪᓗ ᐱᓕᕆᐊᖑᓂᐅᓴᔪᒧᑦ.
“”ᑖᓐᓇ ᓴᓇᐅᒐᖅ ᓴᖅᑭᔮᖅᑎᑦᓯᓂᐊᑐᖅ ᓯᓚᕐᔪᐊᕐᒥᐅᓄᑦ ᐃᓄᐃᑦ ᐊᔪᖏᓐᓂᖏᓐᓂᒃ.” ᐅᖃᖅᑐᖅ ᑕᐅᑐᙱ.
ᑕᑕᑎᕆᐊᓖᑦ ᐊᑐᐃᓐᓇᐅᔪᑦ ᓄᓇᕗᑦ ᑐᙵᕕᒃᑯᑦ ᖃᕆᓴᐅᔭᒃᑯᑦ ᐃᑭᐊᕐᕆᕕᐊᓂ ᐅᕝᕙᓘᓐᓃᑦ ᑐᑭᓯᒋᐊᕐᓗᑎᑦ ᑐᙵᕕᒃᑯᓐᓄᑦ.
| ᔮᓐᓄᐊᕆ – ᒫᑦᓯ, 2011 | ᑐᒃᓯᕋᕐᕕᒃᓴᖅ |
| ᐄᐳᕈ 1, 2011 – ᒫᑦᓯ 31, 2012 | ᐸᕐᓇᓐᓂᖅ ᐊᒻᒪ ᖃᓄᐃᓕᖓᓂᒃᓴᖓ |
| ᐄᐳᕈ 1, 2012 – ᒫᑦᓯ 31, 2013 | ᓴᓇᓐᖑᐊᕐᓂᖅ |
| ᐄᐳᕈ 1, 2013 – ᔫᓂ 2013 | ᐃᖃᓗᓐᓅᕐᓂᖅ |
| ᔫᓂ, 2013 – ᔪᓚᐃ 9, 2013 | ᐋᖅᑭᒃᓱᐃᓂᖅ |
