ᑐᓴᕋᑦᓴᓕᕆᔩᑦ

ᓄᓇᕗᑦ ᑐᙵᕕᒃᑯᑦ ᑲᑎᒪᖃᑎᖃᖅᑐᑦ ᐃᒪᕐᒥᐅᑕᓕᕆᔨᒃᑯᓐᓂ ᐱᔾᔪᑎᒋᓪᓗᒋᑦ ᐊᓪᓚᓐᖑᐊᑦ

ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓᑕ ᑐᒡᓕᐊ ᔭᐃᒥᓯ ᐃᑦᑐᓗᒃ ᐅᓪᓗᒥ ᐅᖃᖅᑐᖅ ᑐᙵᕕᒃᑯᑦ ᑲᑎᒪᖃᑎᖃᓚᐅᕐᒪᑕ ᐃᒪᕐᒥᐅᑕᓕᕆᔨᒃᑯᓐᓂᒃ ᐱᓇᓱᐊᕈᓯᐅᓚᐅᖅᑐᒥ ᐅᖃᐅᓯᖃᖅᖢᑎᒃ ᐊᐅᓚᑦᓯᖃᑎᒌᓐᓂᕐᒥᒃ ᐊᓪᓚᓐᖑᐊᓂᒃ ᑲᑐᔾᔨᖃᑎᒌᓪᓗᑎᒃ, ᐃᓚᒋᔭᐅᓗᑎᒃ ᓄᓇᕗᑦ ᑐᙵᕕᒃᑯᑦ, ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ, ᓄᓇᕗᑦ ᒐᕙᒪᒃᑯᑦ ᐊᒻᒪ ᐃᒪᕐᒥᐅᑕᓕᕆᔨᒃᑯᑦ.

ᑲᑎᒪᓂᖅ ᓯᕗᓪᓕᖅᐹᖑᓚᐅᑐᖅ ᒪᕐᕈᐊᑎᕐᓗᑎᒃ ᑲᑎᒪᔪᒫᕐᓂᐊᖅᑐᑦ ᐃᓚᒋᓪᓗᓂᐅᒃ ᐊᓯᐊᒍᖔᖅ ᐋᖅᑮᖃᑎᒌᒍᒪᓂᖏᑦ ᐃᖅᑲᖅᑐᐃᕕᓕᐊᕈᔾᔨᓂᐊᓚᐅᖅᑎᓪᓗᒋᑦ ᓄᓇᕗᑦ ᑐᙵᕕᒃᑯᑦ ᐃᒪᕐᒥᐅᑕᓕᕆᔨᒃᑯᓐᓂ ᐊᕐᕌᒍ ᐱᒋᐊᓕᓵᖅᑎᓪᓗᒍ ᐃᒪᕐᒥᐅᑕᓕᕆᔨᒃᑯᑦ ᓄᖅᑲᑎᑦᓯᓚᐅᖅᑎᓪᓗᒋᑦ ᓯᓚᕐᔪᐊᒥ ᑕᐅᖅᓰᒍᑕᐅᔪᓐᓇᕐᓂᖏᓐᓄᑦ ᐊᓪᓚᓐᖑᐊᑦ ᑐᒑᖏᑦ ᖃᐅᔨᒃᑲᐃᓚᐅᖏᑦᑐᑎᒃ ᐃᓄᓐᓂᒃ ᐅᕝᕙᓘᓐᓃᑦ ᓇᓗᓇᐃᖅᓯᓚᐅᕐᓇᑎᒃ ᐱᔾᔪᑎᒋᔭᖓᓂᒃ ᐃᓱᒪᓕᐊᖏᓐᓄᑦ. ᑐᙵᕕᒃᑯᑦ ᐊᖏᓚᐅᖅᑐᑦ ᓄᖅᑲᑎᑦᓯᓂᐊᕐᓗᑎᒃ ᐃᖅᑲᖅᑐᐃᕕᒃᑰᑎᑦᓯᓂᕐᒥ ᔫᓂ 2011-ᒥ, ᐃᒪᕐᒥᐅᑕᓕᕆᔨᒃᑯᑦ ᐊᖏᖅᓯᒪᓕᕐᒪᑕ ᐃᓚᐅᖃᑦᑕᓂᕐᒥᒃ ᐱᔾᔪᑎᖃᑦᓯᐊᕐᓗᑎᒃ, ᐱᕕᒃᓴᖃᑦᑎᐊᖅᑐᒃᑯᑦ ᐃᓄᓐᓂᒃ ᖃᐅᔨᒃᑲᐃᖃᑦᑕᓂᕐᒥᒃ ᐃᓱᒪᓕᐅᕈᑎᒋᔭᖏᓐᓄᑦ ᐊᓪᓚᓐᖑᐊ ᐱᑕᖅᑕᐅᔪᓐᓇᕐᓂᖏᓐᓄᑦ ᐊᒻᒪ ᑕᐅᖅᓰᒍᑕᐅᔪᓐᓇᕐᓂᖏᓐᓄᑦ. ᐊᐅᓚᑦᓯᖃᑎᒌᓐᓂᐊᑐᑦ ᑲᑎᒪᓂᕐᒥ ᐅᖃᐅᓯᖃᓚᐅᖅᑐᑦ ᐊᑐᖅᑕᐅᔭᕆᐊᓕᓐᓂᒃ ᐱᓕᕆᐊᒃᓴᐅᔪᓂᓪᓗ ᐊᓪᓚᓐᖑᐊᑦ ᐊᐅᓚᑕᐅᓂᖏᓐᓄᑦ.

ᐊᖏᖅᓯᒪᓂᒃᑯᑦ ᑲᑎᒪᖃᑎᖃᖃᑦᑕᓂᐊᕐᓗᑎᒃ ᐃᓄᓐᓂᒃ ᑕᒪᒃᓱᒧᖓ, ᐃᒪᕐᒥᐅᑕᓕᕆᔨᒃᑯᑦ ᑕᑯᔅᓴᐅᑎᑦᑎᓯᒪᕗᑦ ᐃᒃᐱᒍᓱᑦᑎᐊᓂᐊᕐᓂᕋᖅᖢᑎᒃ ᒪᓕᒐᑎᒍᑦ ᓴᐳᔾᔭᐅᓯᒪᔪᓂᒃ ᐃᓄᐃᑦ ᐊᖑᓇᓱᒍᓐᓇᓂᕐᒧᑦ ᐱᔪᓐᓇᐅᑎᖏᓐᓂᒃ ᑖᒃᑯᐊ ᓇᓗᓇᐃᖅᓯᒪᑦᑎᐊᖅᑐᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᒥ,” ᐅᖃᖅᑐᖅ ᐃᑦᑐᓗᒃ.

ᑲᑎᒪᓂᖃᖅᑎᓪᓗᒋᑦ, ᑐᙵᕕᒃᑯᑦ ᓇᓗᓇᐃᖅᓯᓚᐅᖅᑐᑦ ᐃᓱᒫᓗᑎᖏᓐᓂᒃ ᐃᒪᕐᒥᐅᑕᓕᕆᔨᒃᑯᑦ ᖃᐅᔨᓴᕈᑎᖏᑦ ᓈᒻᒪᓈᖅᓯᒪᑦᓯᐊᖃᑦᑕᕆᐊᖃᕐᓂᖏᓐᓄᑦ ᐃᓱᒪᓕᐅᕈᑕᐅᕙᒃᑐᓄᑦ ᐊᐅᓚᑦᓯᓂᕐᒧᑦ. ᐊᐅᓚᑦᓯᖃᑎᒌᑦᑐᑦ ᐅᖃᐅᓯᖃᓚᐅᖅᑐᑦ ᑖᒃᑯᓂᖓ ᐃᓱᒫᓘᑎᐅᔪᓂᒃ.

ᐃᒪᕐᒥᐅᑕᓕᕆᔨᒃᑯᑦ ᐅᓂᒃᑳᓚᐅᕐᒥᔪᑦ ᓯᓚᕐᔪᐊᒥ ᑕᐅᖅᓰᖃᑦᑕᓂᕐᒧᑦ, ᑲᑎᒪᖃᑎᒌᑦᑐᓪᓗ ᐸᕐᓇᐸᓪᓕᐊᓕᖅᖢᑎᒃ ᑭᖑᓪᓕᕐᒥ CITES ᑲᑎᒪᓂᕆᓛᖅᑕᖓᓄᑦ 2013-ᒥ. ᐃᑦᑐᓗᒃ ᐅᖃᖅᑐᖅ ᑐᙵᕕᒃᑯᑦ ᐃᒪᕐᒥᐅᑕᓕᕆᔨᒃᑯᓪᓗ ᐊᖏᖃᑎᒌᓯᒪᔪᑦ ᑲᑐᔾᔨᖃᑎᒌᓐᓂᐊᓂᕐᒥᒃ CITES-ᑯᓐᓄᑦ ᑲᔪᓰᓐᓇᖁᓪᓗᒋᑦ ᓂᕐᔪᑎᓃᓐᖔᖅᑐᑦ ᑕᐅᖅᓰᔪᑕᐅᖃᑦᑕᕐᓂᖏᓐᓄᑦ ᒪᓕᒃᓯᐊᕐᓗᑎᒃ ᑲᒪᑦᓯᐊᓂᕐᒥᒃ ᐊᒻᒪ ᐃᑲᔫᑎᖃᕐᓂᕆᔭᖏᑦ ᐃᓄᓐᓄᑦ.

ᑭᖑᓪᓕᖅ ᑲᑎᒪᓂᖃᓛᖅᑐᑦ ᐊᓪᓚᓐᖑᐊᓂᒃ ᐊᐅᓚᑦᓯᖃᑎᒌᑦᑐᓄᑦ ᐃᖃᓗᓐᓂ ᐊᒡᒌᓯ 10-11-ᖑᓕᖅᐸᑦ, ᐊᒻᒪ ᑲᑎᑎᑦᓯᓂᐊᖅᖢᑎᒃ ᑭᒡᒐᑐᖅᑎᖏᓐᓂ ᑐᙵᕕᒃᑯᑦ, ᐃᓄᐃᑦ ᐆᒪᔪᓕᕆᔨᒃᑯᖏᑦ ᐊᒻᒪ ᐊᕙᑎᓕᕆᓂᕐᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᖏᑦ, ᐊᕕᒃᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ, ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᒻᒪ ᐃᒪᕐᒥᐅᑕᓕᕆᔨᒃᑯᑦ. ᑭᖑᓪᓕᕐᒥ ᑲᑎᒪᓂᖃᓕᖅᐸᑕ ᐅᖃᐅᓯᖃᓗᐊᓛᖅᑐᑦ ᐊᓪᓚᓐᖑᐊᓂ ᐊᐅᓚᑦᓯᖃᑎᒌᓐᓂᕐᒥᒃ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: