ᖁᕕᐊᓲᑎᖃᕐᓗᑎᒃ 20ᓂᑦ ᐊᕐᕌᒍᓂᑦ ᓇᓪᓕᐅᓂᕐᓯᐅᕐᓂᖃᕐᓂᖏᓐᓂᒃ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑏᑦ ᔪᓚᐃ 9, 2013ᒥ, ᓄᓇᕗᑦ ᑐᙵᕕᒃᑯᑦ ᑎᒥᖓᑦᑕ ᐊᖏᔪᖅᑳᖓᑦ ᑳᑎ ᑕᐅᑐᙱ ᐅᓪᓗᒥ ᐱᒋᐊᖅᑎᑦᑎᕗᖅ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ ᐊᖏᔪᖅᑳᖑᑲᐃᓐᓇᕋᔭᖅᑐᒥᒃ ᐅᓪᓗᐃᓐᓇᖅ ᐊᑭᑦᑐᕋᐅᑎᑎᑦᑎᓂᕐᒥᒃ ᐃᓄᓐᓄᑦ ᐃᓅᓱᑦᑐᓄᑦ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᖅᑐᓄᑦ.
ᐃᓄᐃᑦ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᖅᑐᑦ ᐱᓇᓱᐊᕈᒪᔪᑦ ᐊᑭᑦᑐᕋᐅᑎᑎᑦᑎᒍᑕᐅᔪᒧᑦ ᑎᑎᕋᕆᐊᓖᑦ 500ᓂᑦ ᐅᖃᐅᓯᓕᒻᒥᒃ ᐅᖃᐅᓯᕆᒐᔭᖅᑕᖏᓐᓂᒃ ᓄᓇᕗᑦ ᒥᔅᓵᓄᑦ ᐊᒻᒪᓗ 20ᓂᑦ ᐊᕐᕌᒍᓂᑦ ᓇᓪᓕᐅᓂᕐᓯᐅᕐᓂᖃᕐᓂᖏᑕ ᒥᔅᓵᓄᑦ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑏᑦ. ᓵᓚᔅᓴᖅᑐᖅ ᐊᑭᑦᑐᕋᐅᑎᒍᑕᐅᔪᒥᒃ ᐅᖃᐅᓯᔅᓴᖏᓐᓂᒃ ᐅᖃᐅᓯᖃᕋᔭᖅᑐᖅ ᓴᖅᑭᖅᑎᑕᐅᓕᖅᑲᑦ 20ᓂᑦ ᐊᕐᕌᒍᓂᑦ ᓇᓪᓕᐅᓐᓂᕐᓯᐅᕐᓂᖏᓐᓂ ᓇᓗᓇᐃᒃᑯᑕᖅ ᐃᖃᓗᓐᓂ ᓄᓇᕗᑦ ᐅᓪᓗᖓᓂ, ᔪᓚᐃ 9, 2013. ᓵᓚᔅᓴᖅᑐᖅ ᑐᙵᓱᑦᑎᑦᑎᖃᑎᖃᕋᔭᖅᑐᖅ ᓄᓇᕗᑦ ᐅᓪᓗᖓᓂ ᖃᓄᐃᓕᐅᕐᓂᐅᔪᓂᑦ ᐊᖏᔪᖅᑳᕐᒥᒃ ᑕᐅᑐᙱᒥᒃ ᐊᒻᒪᓗ ᐊᓯᖏᓐᓂᒃ ᑲᒪᒋᔭᔅᓴᒫᖏᓐᓂᒃ ᑲᒪᖃᑎᒋᓗᒍ ᑕᐃᒫᒃ ᐱᔭᕆᐊᖃᕐᓯᒪᓂᖏᑦ ᒪᓕᓪᓗᒋᑦ.
“ᐊᐃᕙᔾᔪᑎᖃᕐᓃᑦ ᐊᒻᒪᓗ ᐊᑎᓕᐅᕐᓃᑦ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᒻᒥ ᐱᒻᒪᕆᐊᓘᓚᐅᕐᓯᒪᒻᒪᑕ, ᐃᖅᑲᐅᒪᓇᑦᑎᐊᖅᑐᑎᓪᓗ ᓇᓗᓇᐃᒃᑯᑕᐅᓂᖏᓐᓄᑦ ᐊᑐᕐᓯᒪᔭᖏᓐᓂ ᐃᓄᐃᑦ ᑲᓇᑕᒥᐅᓪᓗ, ᓂᕆᐅᑦᑐᖓᓗ ᐃᖅᑲᓇᐃᔭᖃᑎᖃᓛᕆᐊᔅᓴᖅ ᓵᓚᔅᓴᓛᖅᑐᒥᒃ ᐊᑭᑦᑐᕋᐅᑎᑎᑦᑎᒍᑕᐅᔪᒥ ᓄᓇᕗᑦ ᐅᓪᓗᖓᓂ. ᑖᓐᓇ ᐱᐅᔪᐊᓗᒃ ᐸᕐᓇᑕᐅᓯᒪᔪᖅ ᐊᒻᒪᓗ ᐱᕕᖃᕈᑕᐅᓛᖅᑐᓂ ᓴᖅᑭᔮᖅᑎᑦᑎᓂᕐᒥᒃ ᐊᔪᙱᑎᐊᖅᑐᓂᒃ ᐃᓅᓱᑦᑐᓂᒃ ᐃᓄᓐᓂᒃ, ᐅᖃᖅᑐᖅ ᑕᐅᑐᙱ.
ᓵᓚᔅᓴᖅᑐᖅ ᐃᖃᓗᒻᒥᐅᑕᐅᑉᐸᑦ, ᑐᓂᓯᔭᐅᒐᔭᖅᑐᖅ $1,500ᓂᑦ ᓵᓚᔅᓴᐅᓯᐊᖏᓐᓂᒃ.
. ᓇᓗᓇᐃᔭᕐᓯᒪᑦᑎᐊᖅᑐᑦ ᐊᑭᑦᑐᕋᐅᑎᑎᑦᑎᒍᑕᐅᔫᑉ ᒥᔅᓵᓅᖓᔪᑦ ᐅᖃᓕᒫᕋᔅᓴᐅᕗᑦ ᑐᙵᕕᒃᑯᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓐᓂ.
