ᑐᓴᕋᑦᓴᓕᕆᔩᑦ

ᓄᓇᕗᑦ ᑐᓐᖓᕕᒃᑯᑦ ᑎᒥᖓ ᓴᖅᑭᑎᑦᑎᔪᖅ ᓄᑖᒥᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐱᔾᔪᑎᒋᑉᓗᒋᑦ ᖃᕆᑕᐅᔭᒃᑯᑦ ᑐᑭᓯᒋᐊᕐᕕᖕᒥ

(ᔪᓚᐃ 17, 2009 — ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃᑯᑦ ᑎᒥᖓᑕ ᐊᖓᔪᖅᑳᖓ ᐹᓪ ᖃᓗᔾᔭᖅ ᐅᑉᓗᒥ ᑐᓴᖅᑎᑦᑎᖅᑲᐅᔪᖅ ᓄᓇᕗᑦ ᑐᓐᖓᕕᒃᑯᑦ ᑎᒥᖓ ᓴᖅᑭᑎᑦᑎᖕᒪᑦ ᓄᑖᒥᒃ ᑐᑭᓯᒋᐊᕐᕕᒃᓴᒥᒃ ᖃᕆᑕᐅᔭᒃᑯᑦ ᑐᑭᓯᒋᐊᕐᕕᖓᒍᑦ ᓄᓇᕗᒥᐅᓄᑦ ᑐᕌᖓᔪᖅ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ.

“ᐃᓕᓐᓂᐊᕆᐊᖅᑎᑕᐅᕙᓚᐅᖅᑎᓪᓗᒋᑦ ᐃᓄᐃᑦ ᐊᒥᓱᒻᒪᕆᐊᓗᐃᑦ ᐊᒃᑐᖅᑕᐅᓂᖃᖅᓯᒪᖕᒪᑕ, ᐃᖕᒥᓄᑦ ᑐᕌᓪᓚᑦᑖᖅᑐᒃᑯᑦ ᐊᒻᒪᓗ ᐃᖕᒥᓄᑦ ᑐᕌᓪᓚᑦᑖᖏᑦᑐᒃᑯᑦ,” ᑕᐃᒪᓐᓇ ᐅᖃᖅᖢᓂ ᐊᖓᔪᖅᑳᖅ ᐹᓪ ᖃᓗᔾᔭᖅ. “ᓄᓇᕗᑦ ᑐᓐᖓᕕᒃ ᑎᒥᖓ ᖁᕕᐊᓱᒃᑐᖅ ᓴᖅᑭᑎᑦᑎᔪᓐᓇᕋᒥ ᑐᑭᓯᓇᑦᑎᐊᖅᑐᒥᒃ ᐊᑐᖅᑕᐅᔪᓐᓇᖅᑐᒥᒡᓗ ᖃᐅᔨᒋᐊᕐᕕᒃᓴᒥᒃ ᐃᓄᖕᓄᑦ ᑐᕌᖓᓗᐊᖅᑐᒥᒃ ᑐᑭᓯᒋᐊᕈᒪᔪᖃᖅᐸᑦ ᐊᒻᒪᓗ ᐃᑲᔪᖅᑕᐅᔪᒪᔪᖃᖅᐸᑦ ᑐᕌᖅᐸᓪᓕᐊᔪᓐᓇᕐᓂᕐᒧᑦ ᒪᒥᓴᕐᓂᕐᒧᑦ ᐃᖕᒥᓄᑦ ᖃᑕᓐᖑᑎᒥᓄᓪᓗ. ᑕᐃᒪᑐᖅ ᑕᒪᒃᑯᐊ ᐊᑐᖅᑕᐅᔪᓐᓇᖅᑐᑦ ᐊᒃᑐᖅᑕᐅᓯᒪᔪᓄᑦ ᐃᑲᔫᑕᐅᓂᐊᖅᐳᑦ ᐱᐊᓂᒍᑎᔪᓐᓇᑦᑎᐊᖁᑉᓗᒋᑦ,” ᑕᐃᒪᓐᓇ ᐅᖃᖅᖢᓂ ᖃᓗᔾᔭᖅ.

ᓄᓇᕗᑦ ᑐᓐᖓᕕᒃᑯᑦ ᑎᒥᖓᑕ ᖃᕆᑕᐅᔭᒃᑯᑦ ᖃᐅᔨᒋᐊᕐᕕᖓ ᐅᑯᓂᖓ ᑐᑭᓯᒋᐊᕈᑎᒃᓴᓂᒃ ᐊᑐᐃᓐᓇᐅᑎᑦᑎᓂᐊᖅᑐᖅ ᐃᓄᒃᑎᑐᑦ, ᖃᑉᓗᓈᑎᑐᑦ ᐊᒻᒪᓗ ᐃᓄᐃᓐᓇᖅᑐᓐ:

  • ᑐᑭᓯᓇᑦᑎᐊᖅᑐᒥᒃ ᑎᑎᕋᖅᓯᒪᔪᖃᕐᓗᓂ ᐊᓪᓚᖓᔪᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐊᖏᕈᑎᓕᐊᖓᓂᒃ.
  • ᓯᕕᑎᔪᒃᑯᑦ ᑐᑭᓯᒋᐊᕈᑏᑦ ᓇᓪᓕᐅᒃᑯᒫᖅᑖᕈᓐᓇᕐᓂᕐᒧᑦ, ᑕᒪᐃᓐᓄᓪᓗ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᑮᓇᐅᔭᖅᑖᖑᓚᐅᖅᑐᒧᑦ, ᐃᖕᒥᒃᑯᓪᓗ ᐃᑲᔪᕆᐊᖅᑕᐅᔪᓐᓇᕐᓂᕐᒨᖓᔪᖅ ᐊᒻᒪᓗ ᓱᓕᔪᖅᓯᐅᖅᑏᑦ ᐋᖅᑭᒍᑎᔪᒪᓂᕐᒧᓪᓗ ᑲᑎᒪᔩᑦ ᒥᒃᓵᓅᖓᔪᑦ ᐊᑐᐃᓐᓇᐅᓂᐊᖅᑐᑦ.
  • ᑕᑕᑎᕈᑏᓪᓗ ᓇᓪᓕᐅᒃᑯᒫᖅᑖᕈᑎᒃᓴᓄᑦ.
  • ᑎᑎᕋᖅᓯᒪᔪᓪᓗ ᐊᑏᑦ ᒪᓕᒐᕐᓂᐊᕐᕕᒃᑯᑦ ᐃᑲᔪᕆᐊᕈᓐᓇᖅᑐᑦ ᐊᑎᖏᑦ, ᐊᒻᒪᓗ ᑐᑭᓯᒋᐊᕈᑎᒃᓴᑦ ᖃᓄᖅ ᓇᓂᓯᔪᓐᓇᕐᒪᖔᑕ ᐊᑭᓖᔪᓐᓇᕐᒪᖔᑕᓗ ᒪᓕᒐᕐᓂᐊᖅᑎᓂᒃ.
  • ᑐᑭᓯᒋᐊᕈᑎᒃᓴᓪᓗ ᓄᓇᓕᖕᓂ ᑐᓴᐅᒪᖃᑦᑕᐅᑎᓕᕆᔨᒃᑯᑦ ᑭᒃᑰᓂᖏᓐᓄᑦ ᑐᖄᕈᑎᖏᑦ, ᐅᖃᓘᑎᖏᑦᑕ ᓈᓴᐅᑎᖏᑦ ᐊᑐᐃᓐᓇᐅᓪᓗᑎᒃ ᑭᐅᓯᔪᓐᓇᖁᑉᓗᒋᑦ ᐊᐱᖅᑯᑕᐅᓇᔭᖅᑐᓂᒃ ᑐᑭᓯᕋᐅᑎᑦ ᒥᒃᓵᓄᑦ.
  • ᐊᑏᓪᓗ ᐋᓐᓂᐊᖅᓯᐅᖅᑏᑦ ᐊᑎᖏᑦ ᐃᑲᔪᕆᐊᕈᓐᓇᖃᔭᖅᑐᑦ, ᐅᖃᐅᔾᔨᒋᐊᖅᑏᑦ, ᐃᓅᓯᓕᕆᔩᑦ ᐊᒻᒪᓗ ᐃᓕᖅᑯᓯᑐᖃᒃᑯᑦ ᐃᑲᔪᕆᐊᖅᑏᑦ ᐊᒻᒪᓗᑦᑕᐅᖅ ᐃᖏᕐᕋᔪᓕᕆᓂᕐᒨᖓᔪᑦ ᑐᑭᓯᒋᐊᕈᑎᒃᓴᑦ.
  • ᖃᕆᑕᐅᔭᒃᑯᓪᓗ ᖃᐅᔨᒋᐊᕐᕕᒃᓴᐃᑦ ᐊᓯᖏᓐᓄᑦ ᐃᑲᔪᕆᐊᕈᓐᓇᖅᑐᓄᑦ.

ᑐᕌᓪᓚᑦᑖᖅᑐᖅ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᑐᑭᓯᒋᐊᕐᕕᒃᓴᖅ ᐅᓇᐅᔪᖅ:

www.tunngavik.com/residential-school-section/

ᑐᑭᓯᒋᐊᒃᑲᓐᓂᕈᒪᒍᕕᑦ ᑐᑭᓯᐊᕐᕕᐅᔪᓐᓇᖅᑐᖅ:

ᐱᔨ ᐸᐅᕐᓐᔅ
ᑐᓴᐅᒪᖃᑦᑕᐅᑎᓕᕆᓂᕐᒧᑦ ᑐᑭᒧᐊᒃᑎᑦᑎᔨᐅᖃᑕᐅᔪᖅ
ᓄᓇᕗᑦ ᑐᓐᖓᕕᒃᑯᑦ ᑎᒥᖓᓐᓂ
ᐅᖃᓘᑖ: (867) 975-4905
ᐊᑭᖃᖏᑦᑐᖅ 1-888-645-0006