ᑐᓴᕋᑦᓴᓕᕆᔩᑦ

ᑐᓐᖓᕕᒃᑯᑦ ᖁᕕᐊᒋᔭᓕᒃ ᑐᓴᖅᑎᑦᓯᒋᐊᑦᓴᖅ ᑭᓕᒃᕙᒃ ᑭᐅᕆᓐ ᑲᑉᓗᓈ ᐃᓚᒋᔭᐅᓂᐊᓕᕐᓂᖓᓂ ᐊᐅᓚᑦᓯᔨᒻᒪᕆᒋᔭᐅᓗᓂ

(ᓅᕙᐃᒻᕙ 13, 2018 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃ ᑎᒥᖓᓄᑦ (ᑐᓐᖓᕕᒃ) ᐊᖓᔪᖅᑳᖅ ᐊᓗᑭ ᑰᑦᑎᖅ ᖁᕕᐊᒋᔭᓕᒃ ᑐᓴᖅᑎᑦᓯᒋᐊᑦᓴᖅ ᑭᓕᒃᕙᒃ ᑭᐅᕆᓐ ᑲᑉᓗᓈ ᐃᓚᒋᔭᐅᓂᐊᓕᕐᓂᖓᓂ ᑐᓐᖓᕕᒃᑯᓐᓂ ᐊᐅᓚᑦᓯᔨᒻᒪᕆᒋᔭᐅᓗᓂ (CEO) ᐱᒋᐊᕐᓂᐊᖅᑐᖅ ᑏᓰᒻᕙ 03, 2018.

 

ᑭᓕᒃᕙᒃ ᒥᓂᔅᑕᐅᑉ ᑐᒡᓕᑲᓐᓂᖓᓂ ᐃᖅᑲᓇᐃᔮᖃᓚᐅᖅᑐᖅ, ᐃᓅᓯᖃᑦᓯᐊᓂᕐᒧᑦ ᑐᖅᑲᑕᕐᕕᒻᒥ ᓄᓇᕗᑦ ᒐᕙᒪᒃᑯᖏᓐᓂ (GN), ᐃᖅᑲᓇᐃᔮᕆᓚᐅᖅᑕᖓ ᓴᖅᑭᓚᐅᖅᑐᖅ ᑭᒡᒍᑕᐅᓪᓗᓂ ᐃᓅᓯᕐᒥᒃ ᑭᐱᓯᖃᑦᑕᕐᓂᕐᒧᑦ ᖁᐊᖅᓵᓇᖅᑐᒦᓐᓂᕐᒧᑦ ᓄᓇᕗᒻᒥ. ᐱᓇᓱᐊᒐᕐᒥᓂ ᑕᑉᕙᓂ, ᐋᖅᑭᑦᓱᐃᓚᐅᖅᑐᖅ ᑮᓇᐅᔭᓕᑕᐅᓯᒪᔪᒥᒃ, ᑕᓪᓕᒪᓄᑦ ᐅᑭᐅᓄᑦ ᐊᐅᓚᔾᔪᑎᒃᓴᓄᑦ ᐸᕐᓇᐅᑎᓂᒃ. ᓄᓇᕗᑦ ᒐᕙᒪᒃᑯᖏᓐᓂ ᐃᖅᑲᓇᐃᔭᕐᓯᒪᔪᖅ 2004-ᒥᓂᒃ, ᐃᖅᑲᓇᐃᔮᕆᖃᓯᐅᑎᓯᒪᔭᖏᑦ ᑖᒃᑯᓇᓂ ᒐᕙᒪᓕᕆᓂᕐᒧᑦ ᖃᐅᔨᒪᔨᑕᐅᓪᓗᓂ ᒪᕐᕉᓐᓄᑦ ᒥᓂᔅᑕᐅᑏᑦ ᑲᑎᒪᔨᖏᓐᓂ ᐊᒻᒪᓗ ᒪᕐᕉᓐᓄᑦ ᓯᕗᓕᖅᑏᓐᓄᑦ.

 

ᑭᓕᒃᕙᒃ ᐃᓅᓂᑯ ᐱᕈᕐᓴᓯᒪᓪᓗᓂᓗ ᖃᒪᓂ’ᑐᐊᒥ. ᓇᓗᓇᐃᒃᑯᑕᒻᒪᕆᑦᑖᕐᓯᒪᔪᖅ ᑖᒻᓴᓐ ᐃᓕᓐᓂᐊᕕᔾᔪᐊᖓᓂᒃ ᑲᐅᒡᒍᕆᒥ. ᓴᖅᑮᓯᒪᔪᖅ ᖃᓇᒃ ᑲᑎᖅᓱᖅᑕᐅᓯᒪᔪᓂᒃ. ᑭᓕᒃᕙᒃ ᐊᖑᓇᓱᑦᑎᒻᒪᕆᐅᔪᖅ, ᓯᐊᕐᕆᔭᐅᑎᑯᑖᓐᓄᑦ ᓯᐊᕐᕆᔮᖃᑦᑕᓲᖅ ᐊᒻᒪᓗ ᖁᕕᐊᒋᔭᓕᒃ ᑕᕐᓂᕐᒧᑦ ᓂᕿᑦᓴᓕᐅᕐᓂᕐᒥᒃ ᓲᕐᓗ ᓇᑦᓯᖅ, ᐊᐃᕕᖅ, ᕿᓚᓗᒐᖅ ᐊᒻᒪᓗ ᑐᑦᑐ.

 

ᑐᑭᒧᐊᒃᑎᑕᐅᓪᓗᓂ ᑐᓐᖓᕕᒃᑯᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ ᐊᒻᒪᓗ ᓯᕗᓕᖅᑎᓄᑦ ᖃᐅᔨᓴᖅᑕᒻᒪᕆᐅᓚᐅᖅᑐᓂ ᓯᕗᓕᖅᑎᑕᐅᒧᒥᒃ ᐱᐅᒃᔅ ᑲᑐᔾᔨᖃᑎᒌᖏᓐᓂᒃ, ᓂᕈᐊᖅᑕᐅᓚᐅᖅᑐᖅ ᓯᕗᓪᓕᕐᐹᖑᓂᐊᖅᑐᖅ ᐊᕐᓇᐅᓪᓗᓂ ᐊᐅᓚᑦᓯᔨᒻᒪᕆᒋᔭᐅᓂᐊᓕᖅᑐᖅ ᑐᓐᖓᕕᒃᑯᓐᓂ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: