ᓄᓇᕗᑦ ᑐᓐᖓᕕᒃᑯᑦ ᐊᖏᔪᖅᑳᖓ ᑳᑎ ᑕᐅᑐᓐᖏ ᐅᓪᓗᒥ ᐅᖃᖅᑲᐅᔪᖅ ᒪᓕᒐᕐᓂᐊᖅᑎᖓ ᑲᑐᔾᔨᖃᑎᒌᑦ ᓴᖅᑭᓚᐅᕐᓂᖓᓂᒃ ᓄᓇᕗᑦ ᐃᖅᑲᖅᑐᐃᕕᔾᔪᐊᖓᓂ ᕕᑉᕗᐊᓕ 13-14 ᐊᐃᕙᔾᔪᑎᖃᖅᑐᓂ ᓇᐃᓈᖅᓯᒪᔪᒥᒃ ᐃᖅᑲᑐᖅᑕᐅᑎᑦᓯᔾᔪᑎᒧᑦ ᐋᖅᑭᒋᐊᕈᑎᒃᓴᒥᒃ ᑐᓂᔭᐅᖁᓪᓗᒋᑦ ᑐᓐᖓᕕᒃᑯᑦ ᐊᑕᐅᓯᕐᒨᖓᔪᒧᑦ ᐊᑐᓕᖅᑎᑕᐅᒋᐊᖃᖅᓯᒪᓂᖏᓐᓄᑦ ᓵᑦᓯᓯᒪᒍᑎᖃᕐᓂᖅ ᐃᖅᑲᖅᑐᐃᕕᖕᒥ ᑲᓇᑕᐅᑉ ᒐᕙᒪᒃᑯᖏᓐᓄᑦ. ᑐᓴᕋᓱᐊᓚᐅᖅᑎᓪᓗᖏᑦ ᐊᐃᕙᔾᔪᑕᐅᔪᒧᑦ, ᐃᖅᑲᖅᑐᐃᕕᒃ ᐃᓱᒪᒃᓴᖅᓯᐅᕈᑎᖃᓕᖅᑐᖅ ᒫᓐᓇ ᑐᓐᖓᕕᒃᑯᑦ ᑐᒃᓯᕋᐅᑎᖓᓂᒃ ᐊᒻᒪᓗ ᓂᕆᐅᓇᖅᑐᖅ ᓴᖅᑮᓚᕆᐊᖓ ᐃᓱᒪᓕᐅᕈᑎᒥᓂᒃ ᒫᓐᓇᒫᖑᓂᖅᓴᒃᑯᑦ.

ᓇᐃᓈᖅᓯᒪᔪᒥᒃ ᐃᖅᑲᑐᖅᑕᐅᔾᔪᑎᒧᑦ ᐋᖅᑭᒋᐊᕈᑎᒃᓴᒥᒃ ᑐᒃᓯᕋᐅᑎᖓ ᓇᓗᓇᐃᖅᑕᐅᓚᐅᖅᑐᖅ ᑲᓇᑕᐅᑉ ᒐᕙᒪᒃᑯᖏᑦ ᑲᔪᓯᑎᑦᓯᓚᐅᖅᓯᒪᓐᖏᓐᓂᖏᓐᓄᑦ ᐊᕐᕌᒎᓚᐅᖅᑐᓂᒃ 18-ᓂ ᓄᓇᕗᑦ ᖃᐅᔨᓴᕐᓂᕐᒧᑦ ᐸᕐᓇᐅᑎᖏᓐᓂᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᑎᒍᑦ ᐃᓛᒃᑯᑦ 12.7.6. ᑐᒃᓯᕋᐅᑎᖓ ᑖᒃᑯᓇᓐᖔᖅᑐᖅ ᑐᓐᖓᕕᒃᑯᑦ ᐃᖅᑲᖅᑐᐃᕕᒻᒦᑎᑦᓯᒍᑎᖏᓐᓂᒃ ᐊᖏᓂᖅᓴᐅᔪᒥᒃ ᑯᐃᓐ ᑭᒡᒐᑐᖅᑎᖏᓐᓂᒃ ᑲᔪᓯᑎᑦᓯᓯᒪᓐᖏᓐᓂᖏᓐᓄᑦ ᐱᓇᓱᐊᕆᐊᖃᖅᓯᒪᔭᒥᓂᒃ ᓄᓇᑖᕐᓂᕐᒧᑦ ᐊᖏᕈᑎᓂᒃ. ᓇᐃᓈᖅᓯᒪᔪᒥᒃ ᐃᖅᑲᑐᖅᑕᐅᔾᔪᑎᒧᑦ ᐋᖅᑭᒋᐊᕈᑎᒃᓴᓯᐅᕐᓂᖅ ᐱᓇᓱᐊᖃᑕᐅᔪᒧᑦ ᐋᖅᑭᒋᐊᕈᑎᒋᔭᐅᔪᓐᓇᓂᐊᖅᑐᒥᒃ ᖃᐅᔨᓇᓱᐊᕈᑕᐅᓲᖅ, ᐃᓚᒋᔭᐅᓪᓗᑎᒃ ᓱᕋᑦᓯᓂᕐᒧᑦ, ᐃᖅᑲᑐᖅᑕᐅᔾᔪᑕᐅᖃᑕᐅᓪᓗᑎᒃ. ᓇᐃᓈᖅᓯᒪᔪᒥᒃ ᐃᖅᑲᑐᖅᑕᐅᔾᔪᑎᒧᑦ ᐋᖅᑭᒋᐊᕈᑎᒃᓴᓕᐅᕈᓐᓇᓲᖑᔪᑦ ᐊᒻᒪᓗ ᐃᓱᒪᓕᐅᕈᑕᐅᓗᓂ ᐊᑕᖏᖅᑐᒥᒃ ᖃᐅᔨᔭᐅᓇᓱᐊᓚᐅᓐᖏᓐᓂᖓᓂ ᐃᖅᑲᖅᑐᐃᕕᒃᑯᑦ ᐃᓘᓐᓇᖏᓐᓅᖓᔪᓂᒃ.

ᑕᐅᑐᓐᖏ ᐅᖃᓚᐅᖅᑐᖅ ᑲᓇᑕᐅ ᒐᕙᒪᒃᑯᖏᑦ ᐱᖕᒪᕆᐅᑎᑦᓯᓚᐅᓐᖏᑦᑐᑦ ᐊᑐᓕᖅᑎᕙᓪᓕᐊᒋᐊᓕᒻᒥᓂᒃ ᖃᐅᔨᓴᕐᓂᕐᒧᑦ ᐸᕐᓇᐅᑎᓂᒃ ᐱᓇᓱᐊᕋᑦᓴᕆᔭᒥᓂᒃ ᑎᑭᑦᑐᒍ 2008, ᒪᕐᕉᒃ ᐊᕐᕌᒎᒃ ᑭᖑᓂᐊᓂ ᑐᓐᖓᕕᒃᑯᑦ ᐃᖅᑲᖅᑐᐃᕕᒃᑯᑦ ᓵᓐᖓᑦᓯᒍᑎᓕᐅᓚᐅᖅᑎᓪᓗᒋᑦ, ᐋᖅᑭᒋᐊᕆᑦᑕᓯᓐᓇᓕᓚᐅᖅᑐᑦ ᐱᓕᕆᐊᒃᓴᕆᔭᒥᓂᒃ ᖃᐅᔨᓴᕐᓂᕐᒧᑦ ᐸᕐᓇᐅᑎᓄᑦ. ᑮᓇᐅᔭᖅᑑᑎᒃᓴᓂᒃ ᐊᑐᐃᓐᓇᕈᐃᓚᐅᓐᖏᑦᑐᑦ ᑎᑭᑦᑐᒍ 2010.

“ᐊᖏᓐᖏᓂᕐᒥᒍᑦ ᓇᐃᓈᖅᓯᒪᔪᒥᒃ ᐃᖅᑲᑐᖅᑕᐅᔾᔪᑎᒧᑦ ᐋᖅᑭᒋᐊᕈᑎᒃᓴᒥᒃ, ᑲᓇᑕᐅ ᒐᕙᒪᖓ ᓱᓕ ᑭᖑᕙᖅᑎᑦᓯᓇᓱᐊᖅᑐᖅ ᐃᓄᐃᑦ ᑎᒍᓯᓇᓱᐊᕈᑎᖓᓂᒃ ᓱᑲᑦᑐᒃᑯᑦ ᐋᖅᑭᒋᐊᕈᑎᒃᓴᓕᐅᕋᓱᐊᕈᑎᖓᓂᒃ ᐊᑐᓕᖅᑎᑦᓯᔭᕆᐊᖃᕐᓂᕐᒧᑦ ᐊᐃᕙᔾᔪᑕᐅᔪᓂᒃ ᑯᐃᓐ ᑭᒡᒐᑐᖅᑎᖓᓄᑦ. ᑎᑭᐅᑎᕙᓪᓕᐊᒍᑕᐅᔪᖅ ᐃᖅᑲᖅᑐᐃᕕᖕᒦᑎᑦᓯᒍᑎᑦᑎᓐᓄᑦ, ᑲᓇᑕᐅᑉ ᒐᕙᒪᖓ ᐊᖏᖃᑦᑕᓚᐅᓐᖏᑦᑐᑦ ᐅᓄᖅᑐᓂᒃ ᑐᓐᖓᕕᒃᑯᑦ ᐋᖅᑭᒋᐊᕈᑎᒋᔪᒪᔭᖏᓐᓂᒃ,” ᐅᖃᓚᐅᖅᑐᖅ ᑕᐅᑐᓐᖏ. “ᑲᔪᓯᑎᑦᓯᓂᖅ ᐊᖏᕈᑕᐅᓯᒪᔪᓂ ᐱᓇᓱᐊᕋᑦᓴᒥᓂᒃ ᓂᕆᐅᒋᔭᖃᕋᑦᑕ ᐃᓄᖏᓐᓂᒃ ᐊᒻᒪᓗ ᑲᑐᔾᔨᖃᑎᒌᓂᒃ ᑲᓇᑕᒥ. ᑲᓇᑕᐅᑉ ᒐᕙᒪᖓ ᐊᖏᓂᖅᓴᒻᒪᕆᐊᓗᒻᒥᒃ ᐱᓇᓱᐊᕋᑦᓴᓕᒃ ᑲᔪᓯᑎᑦᓯᕙᓪᓕᐊᓂᕐᒥᒃ ᐅᑉᐱᓇᕐᓂᖓᓂᒃ ᑯᐃᓐ ᑭᒡᒐᑐᖅᑕᐅᓪᓗᓂ ᑭᓯᐊᓂ ᓱᓕ ᒥᑦᓯᑎᓐᓂ ᐊᑐᖅᑕᐅᖃᑦᑕᓲᑦ ᑕᐃᒪᐃᓕᖓᑐᐃᓐᓇᕋᓱᐊᖅᑐᖅ ᐊᒻᒪᓗ ᐊᖅᓵᖅᓯᓯᒪᒍᑎᖃᑐᐃᓐᓇᖅᑐᑦ ᐃᓄᐃᑦ ᐃᑲᔫᓯᐊᖅᑖᕆᓇᔭᓐᖑᐊᓚᐅᖅᑕᕋᓗᐊᖏᓐᓂᒃ ᐊᖏᕈᑎᒋᓚᐅᖅᑕᖏᓐᓂᒃ ᓄᓇᑖᕐᓂᕐᒧᑦ ᐊᖏᕈᑎᑎᒍᑦ.”