ᑐᓴᕋᑦᓴᓕᕆᔩᑦ

ᑐᓐᖓᕕᒃᑯᑦ ᐃᑲᔪᖅᓱᐃᕗᑦ ᐃᓘᓐᓈᒍᑦ ᓄᓇᕗᒻᒥ ᐃᖕᒥᓂᒃ ᑐᖁᑎᓐᖏᔾᔪᑎᒃᓴᓕᐊᖑᔪᓂᒃ ᑐᑭᒧᐊᒍᑎᒃᓴᓂᒃ

ᓄᓇᕗᑦ ᑐᓐᖓᕕᒃ ᑎᒥᖓᓂ ᐊᖏᔪᖅᑳᒧᑦ ᑭᖑᕝᕕᐅᑎᓯᒪᔪᖅ ᔭᐃᒥᓯ ᐃᑦᑐᓗᒃ ᖁᕕᐊᒋᔭᖃᖅᐳᖅ ᓴᖅᑭᑦᓯᓂᕐᒥᒃ ᓄᓇᕗᒻᒥ ᐃᖕᒥᓂᒃ ᑐᖁᑎᓐᖏᔾᔪᑎᒃᓴᓕᐊᖑᔪᓂᒃ ᑐᑭᒧᐊᒍᑎᒃᓴᓂᒃ, ᐊᒻᒪᓗ ᖁᔭᓕᓪᓗᓂ ᐱᓕᕆᓚᐅᖅᑐᓕᒫᓂᒃ ᑐᑭᒧᐊᒍᑎᒃᓴᓕᕆᓂᕐᒥᒃ ᑲᒪᖃᑕᐅᔪᓕᒫᓂᒃ, ᐃᓚᒋᔭᐅᓪᓗᑎᒃ ᑐᓐᖓᕕᒃᑯᑦ, ᓄᓇᕗᑦ ᒐᕙᒪᖓ, ᐃᓴᒃᓯᒪᒋᑦ ᐃᓅᓯᕐᒥᒃ ᑲᑎᒪᔨᖏᑦ, ᐊᒻᒪᓗ ᐸᓖᓯᒃᑯᓐᓂᒃ. ᑲᑐᔾᔨᖃᑎᒌᓐᓂᐊᖅᑐᑦ ᐋᖅᑭᑦᑕᐅᓚᐅᖅᑐᑦ ᐊᐅᔭᖓᓂ 2008. ᑕᒪᕐᒥᒃ ᐃᖅᑲᓇᐃᔭᖃᑎᒌᑦᑐᑦ ᐱᓕᕆᑦᓯᐊᖅᓯᒪᔪᒻᒪᕆᐅᕗᑦ ᐱᐅᓂᖅᐹᓂᒃ ᑐᑭᒧᐊᒍᑎᒃᓴᖅᑕᖃᖁᓪᓗᒍ.

“ᐃᖕᒥᓂᒃ ᑐᖁᑎᖃᑦᑕᖅᑐᓂᒃ ᐅᖃᐅᓯᖃᕋᓱᐊᕐᓂᖅ ᐊᑦᓱᕈᕐᓇᑐᒻᒪᕆᐊᓗᒃ ᑲᒪᒋᓇᓱᐊᕐᓗᒍ ᐊᒻᒪᓗ ᑕᒪᑉᑕ ᐊᒃᑐᖅᑕᐅᓯᒪᔪᐃᓐᓇᐅᒐᑦᑕ ᑕᒪᑦᓱᒧᖓ. ᐃᖕᒥᓂᒃ ᑐᖁᑎᖃᑦᑕᖏᔾᔪᑎᒃᓴᑦ ᐅᖑᒪᑦᓯᔾᔪᑏᑦ ᑲᔪᓯᑎᑦᓯᒍᑎᒃᓴᑦ ᐱᔭᕆᐊᑭᑦᑐᑯᓗᒃᑯᓘᓐᖏᑦᑐᖅ ᐱᔭᕐᓂᖅᑐᑯᓘᒐᓂᓗ ᑲᒪᒋᔭᐅᓇᓱᐊᕐᓂᖓ,” ᐅᖃᓚᐅᖅᑐᖅ ᐃᑦᑐᓗᒃ. “ᐆᒪᒍᑎᖓ ᑐᑭᒧᐊᒍᑎᒃᓴᐅᑉ ᐅᑉᐱᕆᔭᕗᑦ ᐃᓄᐃᑦ ᐃᖕᒥᓃᕋᔭᕐᓂᕐᒧᑦ ᖁᑦᓯᓂᖅᓴᐅᖏᓐᓂᖏᓐᓂᒃ ᐊᑐᕐᓗᑎᒃ ᐃᓕᖅᑯᓯᕐᒥᓂᒃ. ᑕᐃᒪᐃᒻᒪᑦ, ᖁᕝᕙᑲᓐᓂᓂᐊᕐᓂᖏᑦ ᐃᖕᒥᓂᒃ ᑐᖁᑎᖃᑦᑕᖅᑐᑦ ᓇᓗᓇᐃᖅᑕᐅᓯᒪᓂᖏᑎᒍᑦ ᓈᓴᐃᔾᔪᑎᒃᑯᑦ ᐅᐹᕆᓐᖏᑕᕗᑦ ᐊᒻᒪᓗ ᑭᓪᓗᒧᖔᖅ ᐃᖏᕐᕋᓯᔪᓐᓇᕐᓂᖏᓐᓂᒃ. ᖃᐅᔨᒪᔪᒍᑦ ᐊᑯᓂ ᑕᒪᓐᓇ ᐋᖅᑭᒐᓱᐊᕐᓂᐊᕐᓂᖓᓂᒃ, ᐊᒻᒪᓗ ᐊᑕᐅᓯᕐᒥᒃ ᐊᐅᓚᔾᔭᐃᒋᐊᕈᑎᒃᓴᒥᒃ ᐊᑐᕐᓗᑕ ᑭᓯᐊᓂᐅᓂᐊᓐᖏᑦᑐᖅ ᐊᑉᐸᐹᓪᓕᕈᑕᐅᓂᐊᖅᑐᒥᒃ ᐃᖕᒥᓂᒃ ᑐᖁᑎᖃᑦᑕᖅᑐᓂᒃ ᓇᓗᓇᐃᖅᑕᐅᓯᒪᓂᐅᔪᓂᒃ ᓈᓴᖅᑕᐅᓯᒪᓂᒃᑯᑦ ᐃᕐᖐᓐᓇ, ᑭᓯᐊᓂ ᐊᑐᐃᓐᓇᓕᖅᑐᒍᑦ ᐋᖅᑭᑦᑕᐅᕙᓪᓕᐊᒍᑎᒃᓴᖓᓄᑦ ᐱᔭᕐᓂᖏᒃᑲᓗᐊᖅᑎᓪᓗᒍ.”

ᑐᑭᒧᐊᒍᑎᒃᓴᖅ ᐃᓗᓕᓕᒃ ᓯᑕᒪᐅᔪᖅᑐᓂᒃ ᐊᖏᕈᑕᐅᓯᒪᔪᓂᒃ, ᐃᒫᒃ, ᐊᑐᖅᑕᐅᓕᖅᐸᑦ, ᓴᖅᑮᓂᐊᖅᑐᖅ ᑲᑎᑕᐅᓯᒪᔪᓂᒃ ᐋᖅᑭᑦᑕᐅᓯᒪᓪᓗᑎᒃ ᐅᖑᒪᑦᓯᔾᔪᑎᒃᓴᓂᒃ ᐃᑲᔫᑎᖃᕐᓂᐊᖅᑐᓂᒃ ᑭᒃᑯᓕᒫᓂᒃ ᐊᒃᑐᖅᑕᐅᓂᖃᖅᓯᒪᔪᓂᒃ ᐃᖕᒥᓂᒃ ᑐᖁᑎᖃᑦᑕᖅᑐᓄᑦ. ᓯᑕᒪᐅᔪᖅᑐᑦ ᐊᖏᕈᑕᐅᓯᒪᔪᑦ ᖁᕝᕙᑲᓐᓂᕈᑕᐅᓂᐊᖅᑐᑦ ᐱᖕᒪᕆᐅᓂᖓᓂᒃ ᐃᖕᒥᓂᒃ ᑐᖁᑎᖃᑦᑕᖏᔾᔪᑎᒃᓴᓄᑦ ᐅᖑᒪᑦᓯᔾᔪᑎᒃᓴᑦ, ᐱᕚᓪᓕᕈᑕᐅᓗᓂ ᐃᓱᒪᒃᑯᑦ ᖃᓄᐃᒍᑎᖃᓕᖃᑦᑕᖅᑐᓄᑦ ᐱᔨᑦᓯᕋᐅᑎᓄᑦ, ᐱᖁᑎᑖᖅᑎᑕᐅᒋᐊᕐᓗᑎᒃ ᒪᒃᑯᑦᑐᑦ ᐋᖅᑭᑦᓯᒪᒍᑎᒃᓴᕆᓂᐊᖅᑕᖏᓐᓂᒃ ᓈᖕᒪᖏᑦᑐᓂᒃ ᐃᑉᐱᓐᓂᐊᖁᓇᒋᑦ, ᐃᓕᓐᓂᐊᓂᕐᒥᒃ ᓴᖅᑭᐅᒪᕕᐅᓗᑎᒃ ᓄᓇᕗᒻᒥᐅᑦ ᖃᐅᔨᒍᑎᒃᓴᕆᔪᓐᓇᖅᑕᖏᓐᓂᒃ ᐃᖕᒥᓂᒃ ᐃᓱᒪᒋᓂᒃᑯᑦ ᐅᓗᕆᐊᓇᖅᑐᒦᑦᑐᓂᒃ ᐊᒻᒪᓗ ᐃᑲᔪᖅᑕᐅᔪᓐᓇᕐᕕᒋᔪᓐᓇᖅᑕᖏᓐᓅᑎᓪᓗᒋᑦ, ᐊᒻᒪᓗ ᐱᐅᓯᒋᐊᕐᓗᒋᑦ ᓄᑕᖅᑲᑦ ᒥᑭᔫᓂᖏᓐᓂᒃ ᐱᕈᖅᓴᑦᓯᐊᕈᑎᒃᓴᖏᓐᓂᒃ ᐊᐅᓚᑕᐅᔪᑦ ᐱᔨᑦᓯᕋᐅᑏᓪᓗ ᓄᓇᕗᒻᒥ.

ᑲᑐᔾᔨᖃᑎᒌᑦᑐᑦ ᐊᖏᕈᑎᖃᖅᓯᒪᕗᑦ ᑎᑎᕋᕆᐊᓐᖓᐅᑎᓕᐅᕐᓂᕐᒥᒃ ᑐᑭᒧᐊᒍᑎᒃᓴᓄᑦ ᐊᑐᓕᖅᑎᑕᐅᒍᑎᒃᓴᓂᒃ ᐸᕐᓇᐅᑎᓂᒃ 90 ᐅᓪᓗᐃᑦ ᐃᓗᐊᓐᓂ ᑐᓴᒐᑦᓴᖅ ᓴᖅᑭᖅᑕᐅᓚᐅᖅᑎᓪᓗᒍ ᑕᕝᕙᓂ ᐱᓇᓱᐊᕈᓯᕐᒥ.