ᓄᓇᕗᑦ ᑐᓐᖓᕕᒃᑯᑦ ᐊᖏᔪᖅᑳᑉ-ᑐᒡᓕᐊ ᔭᐃᒥᓯ ᐃᑦᑐᓗᒃᐅᖃᐅᓯᖃᖅᑲᐅᔪᖅ ᕿᑭᖅᑖᓗᒻᒥ ᐃᓄᐃᑦ ᖃᐅᔨᒃᑲᐃᖁᓪᓗᒋᑦ ᓄᓇᓕᖕᓂ ᐊᖑᓇᓱᒃᑐᓕᕆᔨᖏᓐᓂᒃ ᐋᔩᕋᕈᑕᐅᔭᕆᐊᖃᕐᓂᖏᓐᓂᒃ ᓄᓇᖏᑎᒍᑦ ᑐᑦᑐᖏᓐᓂᒃ.
ᐃᑦᑐᓗᒃ ᐅᖃᖅᑲᐅᔪᖅ ᐃᓄᐃᑦ ᐋᔩᕋᕈᑎᖃᕆᐊᖃᕐᓂᐊᖅᑐᑦ ᕿᑭᖅᑖᓗᒻᒥ ᑐᑦᑐᓕᕆᓂᕐᒧᑦ ᑲᑎᓐᖓᓂᒃᑯᑦ ᐃᓕᓐᓂᐊᕐᓂᖃᓚᐅᓐᖏᓐᓂᖏᓐᓂ ᐃᖃᓗᓐᓂ ᐱᓇᓱᐊᕈᓯᐅᓚᖓᔪᒥ. ᓄᓇᕗᑦ ᒐᕙᒪᖓ ᐋᖅᑭᑦᓱᐃᔪᖅ ᐃᓕᓐᓂᐊᕐᓂᕆᔭᐅᓛᖅᑐᒥᒃ ᔪᓚᐃ 23-24 ᓄᓇᓕᓕᒫᓃᓐᖔᖅᑐᖃᕐᓂᐊᖅᑐᖅ ᕿᑭᖅᑖᓗᒻᒥ ᓄᓇᓖᑦ ᐊᖑᓇᓱᑦᑐᓕᕆᔨᖏᓐᓂᒃ ᑲᑎᒪᓂᐅᓂᐊᖅᑐᒥ ᐋᔩᕋᕈᑕᐅᓗᓂ ᑐᑦᑐᖃᕐᓂᖓ ᒫᓐᓇ.
“ᑐᓐᖓᕕᒃᑯᑦ ᑲᒪᒋᔭᒃᓴᖓ ᑕᕝᕙᓂ ᐃᓕᓐᓂᐊᓂᕐᒥᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓃᑦᑐᖅ ᐃᓛᒃᑯᑦ 5 ᐊᒻᒪᓗ ᐊᐅᓚᑦᓯᖃᑎᒌᓐᓂᒃᑯᑦ ᐱᓕᕆᐊᖑᒋᐊᖃᕐᓂᖓ. ᑐᓐᖓᕕᒃᑯᑦ, ᓄᓇᓕᖕᓂ ᐊᖑᓇᓱᑦᑐᓕᕆᔨᒃᑯᑦ, ᐃᓄᐃᑦ, ᓄᓇᕗᑦ ᒐᕙᒪᖓ, ᐊᒻᒪᓗ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᐅᓚᑦᓯᔨᐅᖃᑎᒌᑦᑐᑦ ᑲᑐᔾᔨᖃᑎᒌᓐᓂᕐᒥᒍᑦ ᑕᕝᕙᓂ ᐊᖑᓇᓱᖃᑦᑕᓂᕐᒧᑦ ᓂᕐᔪᑎᓂᒃ. ᐃᓕᓐᓂᐊᕐᓂᖅ ᑲᑐᔾᔨᖃᑎᒌᖑᓂᑦᑎᓐᓂᒃ ᐃᑲᔫᑎᖃᕐᓂᐊᖅᑐᖅ ᐅᖃᐅᓯᖃᕈᓐᓇᕐᕕᖃᕐᓂᑦᑎᒍᑦ ᑐᓴᐅᒪᖃᑎᒌᒍᑎᒋᓂᐊᖅᑕᑎᓐᓂᒃ ᖃᓪᓗᓈᑦ ᖃᐅᔨᓴᖅᑎᕐᔪᐊᖏᑦ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᑦ ᓄᓇᖏᑎᒍᑦ ᑐᑦᑐᖏᓐᓂᒃ,” ᐅᖃᖅᑐᖅ ᐃᑦᑐᓗᒃ.
ᓄᓇᕗᑦ ᒐᕙᒪᖓ ᐃᖃᓗᓐᓅᑎᑦᓯᓂᐊᖅᑐᑦ ᒪᕐᕉᓐᓂᒃ ᓄᓇᓕᖕᓂ ᐊᖑᓇᓱᑦᑐᓕᕆᔨᖏᓐᓂᒃ ᑭᒡᒐᖅᑐᐃᓂᐊᖅᑑᓐᓂᒃ ᓄᓇᒥᖕᓂᒃ ᐃᓕᓐᓂᐊᓂᕐᒥ. ᐃᓐᓇᐃᑦ ᐊᒻᒪᓗ ᐊᐅᓚᑦᓯᔨᐅᖃᑎᒌᑦᑐᓂᒃ ᐱᓯᒪᔪᑦ ᑲᑎᒪᔭᖅᑐᖃᑕᐅᓂᐊᕐᒥᔪᑦ. ᑐᓐᖓᕕᒃᑯᑦ ᐃᓄᖕᓂᒃ ᐅᖃᐅᔾᔨᖃᑦᑕᖁᔨᔪᑦ ᓄᓇᓕᖕᓂ ᐊᖑᓇᓱᑦᑐᓕᕆᔨᒥᓂᒃ ᐱᓇᓱᐊᕈᓯᑦᑎᓐᓂ ᓂᓪᓕᐊᒍᑎᖃᕆᐊᖅᑐᕐᓗᑎᒃ ᐃᓱᒫᓘᑎᒋᔭᒥᓂᒃ ᐊᒻᒪᓗ ᖃᐅᔨᒪᓂᕐᒥᓂᒃ ᐅᓂᒃᑳᕆᐊᖅᑐᕐᓗᑎᒃ ᓄᓇᒥᖕᓂ ᑐᑦᑐᖏᓐᓅᖓᔪᓂᒃ ᓄᓇᓕᖕᓂ ᐊᖑᓇᓱᑦᑐᓕᕆᔨᓂᒃ ᑭᒡᒐᖅᑐᐃᔪᑦ ᓄᓇᒥᖕᓂᒃ ᑭᒡᒐᑐᐃᑦᓯᐊᑲᓐᓂᕈᑎᒃᓴᖏᓐᓂᒃ ᐃᓕᓐᓂᐊᓂᕐᒥ.
“ᒫᓐᓇ ᑐᑦᑐᖏᑦ ᕿᑭᖅᑖᓗᖕᒥ ᐅᖃᐅᓯᐅᓯᒪᔪᑦ ᐃᓅᓴᓪᓕᓯᒪᓂᕋᖅᑕᐅᓪᓗᑎᒃ. ᐃᓄᐃᑦ ᑐᑭᓯᒪᔪᑦ ᑐᑦᑐᑦ ᑕᐃᒪᓐᖓᓕᒫᖅ ᐃᓕᖅᑯᓯᖓ ᐊᓯᔾᔨᑕᕐᓂᖏᓐᓂᒃ ᐅᓄᕐᓂᖏᑦ, ᑭᓯᐊᓂ ᐱᖕᒪᕆᐅᔪᖅ ᑖᒃᑯᐊᓕᒫᑦ ᐊᐅᓚᑦᓯᔨᐅᖃᑎᒌᑦᑐᑦ ᑲᑐᔾᔨᖃᑎᒌᑦ ᑲᑎᒪᔭᕆᐊᖃᕐᓂᖏᑦ ᐋᔩᕋᕈᑎᖃᕐᓗᑎᒃ ᖃᓄᐃᓕᖓᔪᒥᒃ ᐊᐅᓚᑦᓯᔾᔪᑎᓕᐅᕆᐊᖃᕐᓂᐊᕐᒪᖔᑕ ᐋᖅᑭᑦᓯᒪᒍᑎᒃᓴᒥᒃ ᒫᓐᓇᐅᓂᖓᓂ,” ᐅᖃᖅᑐᖅ ᐃᑦᑐᓗᒃ.
