(ᒫᑦᓯ 22, 2022 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᑲᑦᓱᖓᐃᒍᑎᓖᑦ ᐊᕐᕕᓂᓕᒋᓕᖅᑕᖓᓂ ᓄᓇᕗᑦ ᒐᕙᒪᒃᑯᑦ ᐱᓂᐊᕐᓂᕋᐅᑎᖏᓐᓂᒃ, ᑲᑐᔾᔨᓗᑕ, ᐃᓚᒋᔭᐅᓪᓗᑎᒃ ᐱᕙᓪᓕᐊᑎᑦᓯᓂᖏᓐᓂᒃ ᓯᕗᓪᓕᐅᔾᔭᐅᔭᕆᐊᓕᓐᓂᓪᓗ.
“ᓯᕗᓪᓕᐹᑦᓯᐊᒥ ᐱᙳᖅᑎᑕᐅᓚᐅᖅᓯᒪᒻᒪᓂᒃ ᓄᓇᕗᑦ 23 ᐊᕐᕌᒍᑦ ᓈᓕᖅᑎᓪᓗᒋᑦ, ᑐᙵᕕᒃᑯᑦ ᑲᒪᖃᐅᑕᖏᓐᓇᖃᑦᑕᖅᓯᒪᔪᑦ ᐱᕙᓪᓕᐊᑎᑦᓯᓂᕐᒥᒃ ᓄᓇᕗᑦ ᒐᕙᒪᒃᑯᑦ ᐱᓂᐊᕐᓂᕋᐅᑎᖏᓐᓂᒃ ᐃᓚᒋᔭᐅᓪᓗᓂ ᑲᑎᒪᔪᓅᓚᐅᕐᓂᖏᓐᓂᒃ ᑲᑎᒪᔨᑐᐃᓐᓇᓕᒫᑦ ᑲᑎᒪᓂᖓᓂ ᑕᐃᑲᓂ ᐱᓂᐊᕐᓂᕋᐅᑏᑦ ᐋᔩᕋᕈᑕᐅᓚᐅᖅᑐᑦ. ᓄᓇᕗᑦ ᐱᙳᖅᑎᑕᐅᓚᐅᖅᑐᖅ ᐃᓄᓐᓄᑦ ᓄᓇᕗᑦ ᐊᖏᕈᑎᖏᑎᒍᑦ, ᓄᓇᑖᕐᓂᕐᒧᑦ ᐊᖏᖃᑎᒌᒍᑎᖏᓐᓂᒃ ᑯᐃᓐᒧᑦ, ᐊᒻᒪᓗ ᑲᒪᖃᑕᐅᓂᖏᓐᓂᒃ ᑎᓕᓯᔾᔪᑕᐅᔪᓄᑦ ᐱᕙᓪᓕᐊᑎᑦᓯᓂᕐᒥᒃ ᓇᓗᓇᐃᕈᑕᐅᔪᖅ ᓄᑖᒥᒃ ᓴᖅᑭᔮᑦᓯᐊᖅᑐᒥᒃ ᐱᔪᒐᕆᔭᖃᕐᓂᒥᓪᓗ ᑕᒃᑯᓇᙵᑦ ᒐᕙᒪᓂᒃ ᐃᖅᑲᓇᐃᔭᖃᑎᖃᕐᓂᕐᒥᒃ ᐃᓄᓐᓂᒃ ᐅᓄᕐᓂᖅᓴᐅᑎᓪᓗᒋᑦ,” ᐅᖃᖅᑐᖅ ᐊᓗᑭ ᑰᑦᑎᖅ, ᑐᙵᕕᒃᑯᑦ ᐊᖓᔪᖅᑳᖓ.
“ᑕᑯᓕᕇᖅᑐᒍᑦ ᐊᓯᔾᔨᓂᕐᒥᒃ ᐃᑉᐱᓇᕐᓂᖓᓂᒃ ᐃᖅᑲᓇᐃᔭᖃᑎᖃᕈᒪᓂᕐᒧᑦ ᐱᓇᓱᐊᖃᑎᒌᓪᓗᑎᒃ ᑐᕌᖓᔪᒥᒃ ᑕᑯᓐᓇᐅᔪᒥᒃ ᓄᓇᕗᒻᒥ. ᐃᓄᐃᑦ ᐃᓚᒋᔭᐅᔪᒪᔪᑦ ᐃᓱᒪᓕᐅᕈᑕᐅᔪᓄᑦ ᐅᕙᒍᑦ ᒥᑦᓵᓄᑦ, ᑲᔪᓯᑎᑦᓯᓂᕐᒥᒃ ᐃᓅᓯᑦᑎᓐᓂᒃ ᐊᒻᒪᓗ ᑮᓇᐅᔭᓕᐅᕋᓱᐊᕈᑎᓂᒃ, ᐃᓕᖅᑯᓯᕐᒧᑦ ᐃᓅᓯᕐᒧᓪᓗ ᖃᓄᐃᙱᑦᓯᐊᑲᓐᓂᕈᑎᒃᓴᖏᓐᓂᒃ ᐃᓄᐃᑦ,” ᐅᖃᖅᑐᖅ ᔭᐃᒥᓯ ᐃᑦᑐᓗᒃ, ᐊᖓᔪᖅᑳᑉ−ᑐᒡᓕᐊ ᑐᙵᕕᒃᑯᓐᓂ.
ᓴᐳᔾᔨᓯᒪᓂᖅ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐊᑕᖏᕐᓗᒋᑦ ᓈᖕᒪᑦᓯᐊᑐᒃᑯᓪᓗ ᐊᑐᓕᖅᑎᑦᑎᓂᕐᒥᒃ ᓄᓇᕗᑦ ᐊᖏᕈᑎᖏᓐᓂᒃ ᑐᙵᕕᓪᓗᐊᑕᐅᔪᖅ ᐱᓕᕆᐊᖏᓐᓄᑦ ᑐᙵᕕᒃᑯᑦ. ᑐᙵᕕᒃᑯᑦ ᑐᑭᒧᐊᒍᑎᒃᓴᖏᑦ ᓯᕗᓪᓕᐅᔾᔭᐅᔭᕆᐊᓕᖁᑎᖏᓐᓄᑦ ᐃᓚᒋᔭᐅᓪᓗᑎᒃ ᐱᕙᓪᓕᐊᑎᑦᓯᓂᒻᒪᕆᒻᒥᒃ ᐃᓄᐃᑦ ᐃᖅᑲᓇᐃᔮᖏᓐᓄᑦ, ᓴᖓᑎᑦᓯᒋᐊᕐᓂᕐᒥᒃ ᐃᓄᒃᑐᑦ ᐅᖃᐅᓯᕐᒥᒃ ᐃᓘᓐᓈᒍᑦ ᓄᓇᕗᒻᒥ ᐃᓅᓯᕐᒧᑦ, ᓴᖅᑮᓂᖅ ᐃᓕᓐᓂᐊᓂᕐᒧᑦ ᐊᐅᓚᑦᓯᔾᔪᑎᒃᓴᓂᒃ ᑖᒃᑯᓇᙶᖅᑐᓂᒃ ᐱᕚᓪᓕᕈᑎᒃᓴᓂᓪᓗ ᐃᓄᐃᑦ ᓯᕗᓪᓕᐅᔾᔭᐅᔭᕆᐊᓕᖁᑎᖏᓐᓂᒃ ᐃᓕᖅᑯᓯᖓᓂᓪᓗ, ᓴᖅᑮᓂᕐᒥᒃ ᐱᖁᑎᕐᔪᐊᓄᑦ ᐋᖅᑭᑦᓯᒪᒍᑕᐅᓂᐊᖅᑐᓂᒃ ᓄᓇᕗᒻᒥ ᑎᑭᐅᑎᓯᒪᔪᓂᒃ ᑲᓇᑕᓕᒫᒥ ᐊᑐᖅᑕᐅᖃᑦᑕᖅᑐᓄᑦ ᐊᒻᒪᓗ ᐃᓚᒋᔭᐅᑦᓯᐊᕐᓗᑎᒃ ᐃᓄᐃᑦ ᒐᕙᒪᒃᑯᑦ ᐊᑐᐊᒐᖏᓐᓂ ᐱᓕᕆᐊᒃᓴᓂᓗ ᐋᖅᑭᑦᓯᒪᓂᖏᓐᓂᒃ ᐱᕙᓪᓕᐊᑎᑦᓯᓂᕐᒧᓪᓗ.
-30-
ᑐᑭᓯᒋᐊᒃᑲᓂᕐᕕᒃᓴᖅ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᐅᓂᕐᒥᒃ ᑐᓴᐅᒪᔾᔪᑎᓕᕆᔨᒃᑯᓐᓂ ᐃᓕᓐᓂᐊᖅᑐᖅ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006
