ᓄᓇᕗᑦ ᑐᓐᖓᕕᒃ ᑎᒥᖓᑕ ᐊᖏᔪᖅᑳᖓ ᑳᑎ ᑕᐅᑐᓐᖏ ᐅᓪᓗᒥ ᐅᖃᖅᑲᐅᔪᖅ ᖁᕕᐊᓱᓐᖏᓂᕐᒥᓂᒃ ᑲᓇᑕᐅᑉ ᒐᕙᒪᒃᑯᖏᑦ ᐊᔪᐃᓐᓇᕆᐊᕐᓂᖏᓐᓂᒃ ᐊᑐᖅᑕᐅᓚᐅᖅᓯᒪᓐᖏᑦᑐᒥᒃ ᐃᖅᑲᖅᑐᐃᕕᒃᑯᑦ ᐋᖅᑭᑦᓯᓂᐅᓚᐅᖅᑐᒧᑦ ᐊᐅᔭᖅ ᐱᒋᐊᓕᓵᐸᓗᑦᑎᓪᓗᒍ ᑖᒃᑯᓄᓐᖓᖓᔪᓂᒃ ᐃᖅᑲᖅᑐᐃᕕᒃᑯᑦ ᓵᑦᓯᒍᑕᐅᓯᒪᓚᐅᖅᑐᓄᑦ 2006-ᒥ ᒐᕙᒪᒃᑯᑦ ᐊᑐᓕᖅᑎᑦᓯᕙᓪᓕᐊᓂᖏᓐᓂᖏᓐᓄᑦ ᓄᓇᕗᒻᒥ  ᓄᓇᑖᕐᓂᕐᒧᑦ ᐊᖏᕈᑎᓂᒃ. ᑐᓐᖓᕕᒃᑯᑦ ᒪᓕᒐᕐᓂᐊᖅᑎᖓ ᖃᐅᔨᒃᑲᐃᔾᔪᑎᒥᒃ ᐊᔪᐃᓐᓇᕆᐊᕐᓂᕐᒧᑦ ᑐᓂᔭᐅᓚᐅᖅᑐᖅ ᐱᓇᓱᐊᕈᓯᕆᓚᐅᖅᑕᑎᓐᓂ.

“ᑕᒪᓐᓇ ᖁᕕᐊᓇᓐᖏᓚᑦᑖᖅᑐᖅ,” ᐅᖃᖅᑐᖅ ᑕᐅᑐᓐᖏ. “ᑕᒪᓐᓇᐅᒐᓗᐊᖅᑎᓪᓗᒍ ᔭᒐᐃᓂᐅᓚᐅᕐᓯᒪᔪᖅ ᐊᑕᐅᓯᕐᒥᒃ ᐊᔪᐃᓐᓇᕆᐊᒃᑲᓐᓂᕈᑎᒥᒃ ᐊᒻᒪᓗ ᓯᑕᒪᓂᒃ ᒪᓕᒐᖅᑎᒍᑦ ᐱᖁᔨᕗᖔᕈᑎᓂᒃ ᑐᓐᖓᕕᒃᑯᓐᓅᖓᔪᓂᒃ ᑐᓐᖓᕕᒃᑯᑦ ᐃᖅᑲᖅᑐᐃᕕᖕᒦᑎᑦᓯᒍᑎᖓᓄᑦ, ᑲᓇᑕᐅᑉ ᒐᕙᒪᖓ ᓱᓕ ᐊᑭᓕᖅᓱᐃᖏᓐᓇᑐᐃᓐᓇᖅᑐᖅ ᐃᑲᔫᑎᒃᓴᕆᓚᖓᓚᐅᖅᑕᕋᓗᐊᒥᓂᒃ ᐅᓇᑕᐅᑎᖃᑐᐃᓐᓇᓕᖅᑐᖅ ᑐᓐᖓᕕᒃᑯᓐᓂᒃ ᐃᖅᑲᖅᑐᐃᕕᖕᒥ ᑲᒪᒋᒋᐊᓕᒥᓂᒃ ᓵᓐᖓᑦᓯᖔᕋᓂ ᑲᔪᓯᑎᑦᓯᕙᓪᓕᐊᓂᕐᒥᒃ ᐊᖏᕈᑎᒋᓚᐅᖅᑕᒥᓂᒃ ᐅᑭᐅᕋᐃᑦ ᓈᓕᖅᑐᑦ ᑕᐅᖅᓰᖃᑎᖃᖅᑐᑎᒃ ᐃᓄᖕᓂᒃ, ᐃᓄᐃᑦ ᓴᒃᑯᐃᓂᕆᓚᐅᖅᑕᖓᓂᒃ ᓄᓇᖃᖅᑳᕐᓯᒪᓂᕐᒧᑦ ᓇᓗᓇᐃᒃᑯᑕᕆᓚᐅᖅᑕᒥᓂᒃ ᐅᑭᐅᖅᑕᖅᑐᒥ.”

ᔫᓂᒥ, ᐃᖅᑲᖅᑐᐃᔨᕐᔪᐊᖅ ᐆᕈ ᔮᓐᓴᓐ ᓄᓇᕗᒻᒥ ᐃᖅᑲᖅᑐᐃᕕᖓᓂ ᑐᓂᓯᓚᐅᖅᑐᖅ ᐱᔾᔪᑎᖃᖅᓯᐊᖅᑐᓂ ᐃᑲᔪᕐᓱᐃᓂᕐᒥᒃ ᑐᓐᖓᕕᒃᑯᓐᓂᒃ ᓯᕗᒧᐊᒃᑎᑦᓯᓚᐅᓐᖏᓐᓂᖏᓐᓂᒃ ᑲᓇᑕᐅᑉ ᒐᕙᒪᖓ ᓴᖅᑭᖅᑕᐅᔭᕆᐊᖃᖅᓯᒪᔪᓂᒃ ᓄᓇᕗᒻᒥ ᖃᐅᔨᒪᔭᐅᓇᓱᐊᕆᐊᖃᕐᓂᖏᓐᓄᑦ ᐸᕐᓇᐅᑎᓂᒃ ᐱᔭᕆᐊᖃᖅᑎᑕᐅᓯᒪᑎᓂᖓᒍᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᒃᑯᑦ. ᐃᓱᒪᓕᐅᕈᑎᒋᓚᐅᖅᑕᖓ ᐃᓚᐃᓐᓇᖓᓅᖓᔪᖅ ᐃᖅᑲᖅᑐᐃᕕᖕᒦᑎᑦᓯᒍᑎᐅᑉ. ᐊᓯᖏᑦ ᐃᖅᑲᖅᑐᐃᕕᖕᒦᑎᑦᓯᒍᑕᐅᔪᑦ, ᐃᓚᒋᔭᐅᓪᓗᑎᒃ ᒐᕙᒪᒃᑯᑦ ᓯᖁᒥᑦᓯᓯᒪᓂᖏᑦ ᐃᓄᐃᑦ ᐃᖅᑲᓇᐃᔮᖃᖅᑎᑕᐅᒋᐊᖃᕐᓂᖏᓐᓄᑦ (ᐃᓛᒃᑯᑦ 23) ᐊᒻᒪᓗ ᒐᕙᒪᒃᑯᑦ ᑳᓐᑐᓛᒃᓯᖃᑦᑕᕐᓂᖏᑦ (ᐃᓛᒃᑯᑦ 24), ᓯᕗᒧᐊᑉᐸᓪᓕᐊᖏᓐᓇᖅᑐᖅ.

ᐃᖅᑲᖅᑐᐃᕕᒃᑯᑦ ᐋᖅᑭᑦᑕᐅᔪᖅ ᐱᔾᔪᑎᒋᓚᐅᖅᑖᑦ ᑐᓐᖓᕕᒃᑯᑦ $14.8 ᒥᓕᔭᓂᒃ ᓱᕋᑦᑕᐅᓯᒪᓂᖏᓐᓄᑦ. ᓵᓚᒃᓴᓚᐅᖅᑎᓪᓗᒋᑦ ᐊᑐᖅᑕᐅᓚᐅᕐᓯᒪᓐᖏᑦᑐᒥᒃ ᐃᖅᑲᖅᑐᐃᕕᒃᑯᑦ ᓇᓗᓇᐃᕐᓯᕕᐅᖕᒪᑕ, ᑐᓐᖓᕕᒃᑯᑦ ᖁᕕᐊᒃᑯᔾᔨᔪᓄᑦ ᐅᖃᕐᕕᐅᖃᑦᑕᓕᓚᐅᖅᑐᑦ ᐅᓄᖅᑐᓂᒃ ᓄᓇᖃᖅᑳᕐᓯᒪᔪᑦ ᑲᑐᔾᔨᖃᑎᒌᖏᓐᓂᒃ ᑲᓇᑕᓕᒫᒥ.

“ᖁᔭᒋᕙᒃᑲ ᑕᐃᒃᑯᐊ ᑲᑐᔾᔨᖃᑎᒌᑦ ᐃᑲᔪᖅᓱᐃᖃᑦᑕᖅᑐᑦ ᐊᒻᒪᓗ ᑐᓐᖓᕕᖃᑦᓯᐊᕋᓱᐊᖃᑦᑕᖅᑐᑦ. ᐅᒡᒍᕐᓇᕋᓗᐊᖅᐳᖅ ᐅᓄᖅᑐᑦ ᓄᓇᖃᖅᑳᕐᓯᒪᔪᑦ ᐃᓄᖏᑦ ᑕᒪᒃᑯᑎᒎᓇ ᐊᖅᑯᓵᖅᑎᑕᐅᖃᑦᑕᕐᓂᖏᓐᓂᒃ ᐊᖅᑯᑕᐅᒌᕐᓯᒪᔪᒃᑯᑦ ᖁᕕᐊᓇᓐᖏᑐᒃᑯᑦ, ᐊᑐᓕᖅᑎᑦᓯᕙᓪᓕᐊᓇᓐᖏᑐᒃᑯᑦ ᐊᒻᒪᓗ ᐃᖅᑲᖅᑐᐃᕕᒃᑰᑎᑦᓯᖃᑦᑕᓂᒃᑯᑦ ᒐᕙᒪᑐᖃᒃᑯᑦ ᐅᐱᒍᓱᒍᓐᓇᕐᓯᖁᓪᓗᒋᑦ ᑖᒃᑯᓂᖓ ᑳᓐᑐᓛᒃᑯᑦ ᐱᓇᓱᐊᕆᐊᖃᕐᓯᒪᔭᒥᓂᒃ ᐊᖏᕈᑕᐅᕌᓂᒃᓯᒪᔪᓂᒃ.”

ᑕᐅᑐᓐᖏ ᐅᖃᖅᑐᖅ ᑐᓐᖓᕕᒃᑯᑦ ᓇᓕᖅᑯᑎᓐᖏᓪᓗᑎᒃ ᑲᔪᓯᑎᑦᓯᑐᐃᓐᓇᓂᐊᕐᓂᖏᓐᓂᒃ ᐃᖅᑲᖅᑐᐃᕕᒃᑰᑎᑦᓯᒍᑎᒋᓯᒪᔭᒥᓂᒃ ᐊᒻᒪᓗ ᐊᔪᐃᓐᓇᕆᐊᒃᑲᓐᓂᕈᑎᓂᒃ.