ᓄᓇᕗᑦ ᑐᓐᖓᕕᒃᑯᑦ ᐊᖏᔪᖅᑳᖓ ᑳᑎ ᑕᐅᑐᙱ ᐅᓪᓗᒥ ᖁᕕᐊᒃᑯᔾᔨᓪᓗᓂ ᓇᓗᓇᐃᕐᓯᖅᑲᐅᔪᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓᓂᒃ ᐅᑲᓕᖅ ᐃᔨᑦᓯᐊᒥᒃ ᐊᑎᓕᐅᖅᑕᐅᓂᖓᓄᑦ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᕐᓂᒧᓪᓗ ᐊᖏᕈᑎᓂᒃ ᓄᓘᔮᓐᓂ ᓴᕕᒃᓴᓂᐊᕐᓂᕐᒧᑦ ᐱᓕᕆᐊᖑᔪᒥᒃ. ᕿᑭᖅᑕᓂᒃᑯᑦ ᐋᔩᕋᖃᑎᖃᖃᑦᑕᕐᓯᒪᔪᑦ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᕐᓂᒧᓪᓗ ᐊᖏᕈᑎᓂᒃ ᐊᕐᕌᒍᕋᓴᒐᓚᓐᓂᒃ ᐊᑦᑕᕐᓇᐃᕐᓯᓯᒪᑦᓯᐊᕈᒪᓪᓗᑎᒃ ᐊᖏᕈᑕᐅᔪᑦ ᐃᑲᔫᓯᐊᓄᑦ ᐊᑑᑎᖃᑦᓯᐊᕈᓐᓇᓂᕐᐹᒃᑯᑦ ᐋᖅᑭᑦᓯᒪᖁᓪᓗᒋᑦ ᐃᓄᖕᓄᑦ ᕿᑭᖅᑖᓗᖕᒥᐅᓄᑦ ᓄᓇᕗᓕᒫᒧᓪᓗ.
ᐱᓇᓱᐊᕈᓯᑦᑕ ᐱᒋᐊᕐᓂᐸᓗᐊᓂ, ᕿᑭᖅᑕᓂᒃᑯᑦ ᓴᖅᑮᓚᐅᖅᑐᑦ ᐋᔩᕋᕈᑕᐅᓯᒪᔪᓂᒃ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᕐᓂᒧᓪᓗ ᐊᖏᕈᑎᓂᒃ ᐊᒻᒪᓗ ᑮᓇᐅᔭᓕᐅᕈᑎᒃᓴᑦ ᐊᑐᖅᑐᐊᓂᕐᒧᑦ ᐹᕕᓐᓛᓐ ᓴᕕᒃᓴᓂᒃ ᐅᔭᕋᓐᓂᐊᖅᑏᑦ ᑎᒥᖓᓄᑦ, ᑲᑎᒪᔨᖁᑎᖏᓐᓄᑦ ᕿᒥᕐᕈᓇᑦᑕᐅᖁᓪᓗᒋᑦ ᐊᒻᒪᓗ ᐊᖏᖅᑕᐅᓗᑎᒃ.
“ᐊᕐᕌᒍᓂ ᖁᓕᓂ, ᐱᓕᕆᐊᕆᔭᐅᓂᖓᓄᑦ ᐊᑐᕐᓯᒪᓕᖅᑐᖅ ᒥᓕᔭᖏᓐᓃᑦᑐᓂᒃ ᑮᓇᐅᔭᓂᒃ ᐱᖁᑎᓄᑦ ᐊᒻᒪᓗ ᐱᔨᑦᓯᕋᐅᑎᓄᑦ ᐃᓄᐃᑦ ᓇᖕᒥᓂᖁᑎᖏᓐᓂᒃ ᐊᒻᒪᓗ ᐱᓕᕆᖃᑎᒌᑦᑐᓂᒃ ᑮᓇᐅᔭᓕᐅᕋᓱᐊᖃᑎᒌᑦᑐᓂᒃ, ᐊᒻᒪᓗ ᒥᓕᔭᒃᑲᓂᕐᓃᑦᑐᓂᒃ ᐃᖅᑲᓇᐃᔭᖅᑎᑦᓯᓂᕐᒧᑦ ᐱᓕᒻᒪᒃᓴᖅᑎᑦᓯᓂᕐᒧᓪᓗ ᐃᓄᖕᓂᒃ ᐊᒻᒪᓗ ᐅᑭᐅᖅᑕᖅᑐᒥᐅᑕᓂᒃ,” ᐅᖃᓚᐅᖅᑐᖅ ᑕᐅᑐᓐᖏ. “ᐅᑉᐱᕈᓱᑦᑐᖓ ᒪᓕᒐᑦᓴᕆᔭᐅᔪᓂ ᑖᒃᑯᓇᓂ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᕐᓂᒧᓪᓗ ᐊᖏᕈᑎᓂᒃ ᐃᑲᔫᑎᖃᒃᑲᓂᕐᓂᐊᕐᓂᖏᓐᓂᒃ ᐃᑲᔫᓯᐊᒃᓴᓂᒃ ᐃᓄᐃᑦ ᑎᒍᓯᒃᑲᓂᕐᓂᐊᕐᓂᖏᓐᓂᒃ.”
ᑕᐅᑐᓐᖏᑦ ᖃᐅᔨᒃᑲᐃᒍᑎᒋᓚᐅᖅᑕᖓ ᐱᓕᕆᐊᖑᔪᖅ ᐃᓄᐃᑦ ᓄᓇᖁᑎᖓᓃᒻᒪᑦ, ᐊᒻᒪᓗ ᑐᓐᖓᕕᒃᑯᑦ ᑎᒍᒥᐊᖅᑎᐅᒻᒪᑕ ᓇᓗᓇᐃᖅᑕᐅᓯᒪᓂᖓᓂᒃ ᐅᔭᕋᓐᓂᐊᕋᑦᓴᓄᑦ, ᐃᓄᐃᑦ ᐱᔪᓐᓇᓂᐊᖅᑐᑦ ᐅᔾᔨᓇᖅᑐᒻᒪᕆᒻᒥᒃ ᐅᔭᕋᓐᓂᐊᓂᕐᒧᑦ ᓂᖏᖅᑕᐅᑎᓂᒃ ᓯᕗᓂᑦᑎᓐᓂ ᐊᕐᕌᒍᓂ.
“ᑖᓐᓇ ᑲᒪᒋᔭᐅᔪᖅ ᐱᖕᒪᕆᐅᖕᒪᑦ ᐃᓄᖕᓄᑦ. ᑮᓇᐅᔭᑎᒍᑦ ᓱᖏᖅᓲᑎᒋᒐᑦᑎᒍ ᓯᕗᓂᑦᑎᓐᓂ, ᐊᒻᒪᓗ ᒪᑭᑉᐸᓪᓕᐊᒍᑎᒃᓴᐅᔪᓐᓇᓯᐊᕐᒪᑦ ᐊᐅᓚᑕᐅᓂᖓ ᕿᑭᖅᑖᓗᖕᒥ ᓄᓇᓕᖏᓐᓄᑦ ᐊᕐᕌᒍᕋᓴᓐᓄᑦ. ᖁᕕᐊᒃᑯᑎᕙᒃᑲ ᕿᑭᖅᑕᓂᒃᑯᑦ,” ᐅᖃᖅᑐᖅ ᑕᐅᑐᓐᖏ. “ᓂᕆᐅᒋᑦᓯᐊᓕᕐᐸᕗᑦ ᑖᓐᓇ ᐱᓕᕆᐊᖑᔪᖅ ᐱᓕᕆᐊᖑᕙᓪᓕᐊᓂᐊᓕᕐᓂᖓᓂᒃ.”
