ᑐᓴᕋᑦᓴᓕᕆᔩᑦ

ᑐᙵᕕᒃᑯᑦ ᖁᕕᐊᒍᔾᔨᕗᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᓄᖅᑲᖓᑎᑦᓯᑲᐃᓐᓇᕈᓐᓇᕐᓂᖏᓐᓄᑦ

(ᐊᒡᒌᓯ 11, 2010 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᓯᕗᓪᓕᖅ ᐊᖏᔪᖅᑳᑉ ᑐᒡᓕᐊ ᔭᐃᒥᓯ ᐃᑦᑐᓗᒃ ᐅᓪᓗᒥ ᖁᕕᐊᒍᔾᔨᔪᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᑲᔪᓯᑦᑎᐊᕐᓂᖏᓐᓂᒃ ᓄᖅᑲᖓᑎᑦᓯᑲᐃᓐᓇᑎᑦᓯᒍᑎᒥᒃ ᓄᓇᒦᖓᖅᑐᑦ ᑮᓇᐅᔾᔭᒃᓴᒐᓱᐊᕈᑏᑦ ᑲᓇᑕᒦᒃᑯᑦ ᑲᓇᑕᐅᑉ ᖁᑦᑎᑦᑐᖓᓂ ᐳᓪᓚᒧᑦ ᖃᐅᔨᓴᕈᒪᓯᒪᓂᖏᓐᓂᒃ.

“ᓄᓇᕗᑦ ᑐᙵᕕᒃ ᑎᒥᖓ ᑐᙵᓱᑦᑎᑦᓯᕗᑦ ᐃᖅᑲᖅᑐᐃᕕᒃᑯᑦ ᐃᓱᒪᓕᐅᕈᑎᖓᓂᒃ. ᓵᓚᒃᓴᕈᔾᔨᕗᑦ ᓄᓇᕗᑦ ᐃᓄᓕᒫᖏᓐᓂᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ.” ᐅᖃᖅᑐᖅ ᐃᑦᑐᓗᒃ.

ᑐᙵᕕᒃᑯᑦ ᐱᓕᕆᖃᑎᖃᑦᑎᐊᖅᓯᒪᔪᑦ ᕿᑭᖅᑕᓂᒃᑯᓐᓂ ᓄᖅᑲᖓᑎᑦᓯᑲᐃᓐᓇᕈᑎᒃᓴᓄᑦ ᐊᒻᒪ ᐃᖅᑲᖅᑐᐃᕕᒃᑯᑦ ᐃᓱᒪᓕᐅᕈᑎᖓ ᓴᖅᑮᒻᒪᑦ ᐊᒥᓱᓂᒃ ᐃᓱᒫᓘᑎᐅᔪᓂᒃ ᐱᒻᒪᕆᐅᔪᓂᒃ ᐃᓄᓐᓄᑦ.

“ᐊᕕᒃᑐᖅᓯᒪᔪᓂ ᐊᒻᒪ ᒐᕙᒪᑐᖃᒃᑯᑦ ᒐᕙᒪᖏᑦ ᐱᖁᔭᕐᔪᐊᖃᖓᑕ ᐊᒻᒪ ᒪᓕᒐᖅᑕᖁᖅᑐᓂ ᖃᐅᔨᒋᐊᑦᓯᐊᕆᐊᖃᕐᓂᖏᓐᓄᑦ ᐃᓄᓐᓂᒃ ᐊᒻᒪ ᐃᒃᐱᒍᓱᑦᑎᐊᕐᓗᑎᒃ ᐃᓄᐃᑦ ᐃᓱᒫᓘᑎᖏᓐᓂᒃ ᓄᓇᕗᒻᒥ.” ᐅᖃᖅᑐᖅ ᐃᑦᑐᓗᒃ. “ᐃᓄᐃᑦ ᐱᔪᓐᓇᕐᓂᖏᑦ ᖃᐅᔨᒋᐊᕕᐅᓂᕐᒧᑦ ᐊᒻᒪ ᐃᒃᐱᒋᔭᐅᑦᓯᐊᕆᐊᖃᕐᖓᑕ.”

ᐃᓚᖓᑦ ᐊᐱᖅᑯᑎᐅᔪᖅ ᐱᔾᔪᑎᖃᖅᑐᖅ ᑕᑕᑎᕆᐊᓕᖕᒥᒃ ᐊᒻᒪ ᑯᐃᓐ ᑭᒡᒐᑐᖅᑎᖓᑕ ᐱᖁᔭᕐᔪᐊᖓ ᐊᒻᒪ ᒪᓕᒐᖅ ᖃᐅᔨᒋᐊᕐᓂᕐᒧᑦ ᐊᒻᒪ ᐃᒃᐱᒍᓱᑦᑎᐊᓂᕐᒧᑦ ᐃᓗᐊᓂ ᓄᓇᑖᕐᓂᕐᒧᑦ ᐊᖏᕈᑎᐅᑉ. ᐊᔾᔨᐸᓗᖏᑦ ᐃᓱᒫᓘᑏᑦ ᓴᖅᑭᑕᐅᖃᑦᑕᕋᑖᓚᐅᖅᑐᑦ ᑲᓇᑕᐅᑉ ᐃᖅᑲᖅᑐᐃᕕᕐᔪᐊᖓᑎᒍᑦ. ᑐᙵᕕᒃᑯᑦ ᐊᑲᐅᓂᖅᓴᑰᖅᑎᑦᑎᓇᓱᐊᖅᓯᒪᔪᑦ ᑭᒡᒐᑐᖅᖢᑎᒃ ᓄᓇᕗᑦ ᐃᓄᖏᓐᓂᒃ.

“ᒫᓐᓇ, ᑲᑎᒋᐊᖃᖅᐳᒍᑦ, ᒐᕙᒪᒃᑯᑦ ᐊᒻᒪ ᐃᓄᐃᑦ ᓇᓗᓇᐃᖅᓯᓗᑕ ᑐᑭᖃᑦᓯᐊᕐᓂᖓᓂ ᖃᐅᔨᒋᐊᕐᕕᖃᖅᓯᐊᕐᓂᐅᑉ ᐊᒻᒪ ᖃᓄᖅ ᑐᑭᖃᑦᓯᐊᖅᑐᒥᒃ ᖃᐅᔨᒋᐊᕐᓂᖃᖃᑦᑕᕆᐊᖃᕐᒪᖔᑕ.” ᐱᔭᕇᑐᖅ ᐃᑦᑐᓗᒃ.

-30-
ᑐᑭᓯᒋᐊᒃᑲᓂᕈᒪᒍᕕᑦ:

ᕗᕌᓐᑯ ᐳᓴᒥ
ᐊᐅᓚᑦᓯᔨ ᑐᓴᐅᒪᔪᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑎᖓ: (867) 975-4939 ᐊᑭᖃᙱᑦᑐᖅ: 1-888-646-0006
fbuscemi @ tunngavik.com