ᓄᓇᕗᑦ) ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐊᖓᔪᖅᑳᑉ ᑐᖏᓕᐊ ᔭᐃᒻᔅ ᐃᑦᑐᓗᒃ ᐅᖃᖅᑐᖅ ᐱᓇᓱᐊᕈᓯᒥ ᑲᑎᒪᓂᐅᓚᐅᖅᑐᒥᑦ ᐃᓚᒋᓪᓗᒋᑦ ᐱᓕᕆᕝᕕᐊᑦ ᐃᖃᓗᓕᕆᓂᕐᒧᑦ ᐊᒻᒪᓗ ᐃᒪᕐᒥᐅᑕᓕᕆᔨᑦ ᐊᖏᕈᓯᐊᖏᓐᓂᑦ. ᑲᑎᒪᓂᖅ ᑐᒡᓕᕆᔭᖓ ᑲᒪᑎᒪᓂᐅᓚᐅᖅᑐᓂᑦ ᒪᕐᕈᐃᑦᑕᖅᖢᑎᒃ ᐸᕐᓇᒃᑕᐅᓯᒪᔪᒃᑯᑦ ᐃᓚᒋᓪᓗᒋᑦ ᑭᖑᕝᕕᕈᑎ ᐱᖁᔨᕗᖔᕈᑎᓕᐅᕐᓂᕐᒥᑦ ᐅᑯᓄᖓ ᒪᓕᒐᓕᕆᔨᒃᑯᑦ ᐱᒋᐊᕈᑎᒋᓯᒪᔭᖏᓐᓂᑦ ᐃᖅᑲᖅᑐᐃᕕᖕᒧᑦ ᓄᓇᕗᑦ ᑐᓐᖓᕕᒃ ᓴᖅᑭᑎᓚᐅᖅᓯᒪᔭᖓᓄᑦ ᐅᑯᓄᖓ ᐱᓕᕆᕝᕕᐊᑦ ᐃᖃᓗᓕᕆᓂᕐᒧᑦ ᐊᒻᒪᓗ ᐃᒪᕐᒥᐅᑕᓕᕆᔨᓄᑦ ᐅᑭᐅᖅ ᐊᑐᕆᐊᓕᖅᑎᓪᓗᒍ ᑭᖑᓂᐊᒍᑦ ᐱᓕᕆᕝᕕᐊᑦ ᐃᖃᓗᓕᕆᓂᕐᒧᑦ ᐊᒻᒪᓗ ᐃᒪᕐᒥᐅᑕᓕᕆᔨᑦ ᐃᓱᓕᕝᕕᓕᐅᓚᐅᖅᑎᓪᓗᒋᑦ ᓯᓚᕐᔪᐊᒧᑦ ᑕᐅᖅᓯᐅᑎᖃᑦᑕᕐᓂᕐᒥᑦ ᑑᒑᓖᑦ ᕿᓇᓗᐃᑦ ᑑᒑᖏᓐᓂᑦ ᐅᖃᖃᑎᖃᓚᐅᕋᑎᑦ ᐃᓄᖕᓂᑦ ᐃᓱᒪᓕᐊᕆᓚᐅᖅᑕᖏᓐᓂᑦ ᐃᓄᒻᒪᕆᖕᓂᑦ. ᓄᓇᕗᑦ ᑐᓐᖓᕕᒃ ᑎᒥᖓᑦ ᓄᖅᑲᖅᑎᑦᑎᓚᐅᖅᑐᑦ ᓴᑐᐃᓪᓗᑎᒃ ᒪᓕᒐᑎᒍᑦ ᐱᒋᐊᕈᑎᖏᓐᓂᑦ ᐃᖅᑲᖅᑐᐃᕕᖕᓄᑦ ᐃᓕᓯᓂᐅᔪᓂᑦ ᔫᓂ, 2011, ᑭᖑᓂᐊᒍᑦ ᐱᓕᕆᕝᕕᐊᑦ ᐃᖃᓗᓕᕆᓂᕐᒧᑦ ᐊᒻᒪᓗ ᐃᒪᕐᒥᐅᑕᓕᕆᔨᑦ ᐊᖏᖅᑎᓪᓗᒋᑦ ᐃᓚᐅᓂᕐᒥᑦ ᐅᖃᖃᑎᒌᒍᑎᓄᑦ ᐃᓚᒋᓗᒋᑦ ᐃᓄᒻᒪᕇᑦ ᐃᓱᒪᓕᐅᕈᑎᐅᔪᓂᑦ ᕿᓇᓗᒐᓄᑦ ᑑᒑᓕᖕᓄᑦ ᐊᖑᓇᓱᐊᖃᑦᑕᕐᓂᕐᒧᑦ ᐊᒻᒪᓗ ᑕᐅᖅᓯᐅᑎᖃᑦᑕᕐᓂᕐᒧᑦ.
ᐊᖓᔪᖃᐅᑎᐅᓂᖅᓴᑦ ᐅᑯᓇᖓ ᓄᓇᕗᑦ ᑐᓐᖓᕕᒃ ᑎᒥᖓᓐᓂᑦ ᓄᑖᖅᓯ ᓴᖅᑭᑎᑦᑎᓯᒪᓕᕐᒪᑕ ᐅᑯᓂᖓ ᐃᓄᐃᑦ ᐆᒪᔪᓕᕆᓂᕐᒧᑦ ᐊᒻᒪᓗ ᐊᕙᑎᓕᕆᓂᕐᒧᑦ ᖃᐅᔨᒪᔨᒃᑲᐃᔨᐅᔪᓂᑦ ᑲᑎᒪᔨᕋᓛᓂᑦ ᐃᓚᐅᓪᓚᐅᖅᑐᑦ ᑲᑎᒪᓂᐅᔪᓂᑦ ᐊᓯᖏᓐᓂᑦ ᑎᒥᐅᔪᓂᑦ ᕿᓇᓗᒐᐃᑦ ᑑᒑᓖᑦ ᑲᑐᔾᔨᓪᓗᑎᒃ-ᐊᐅᓚᑦᑎᔨᐅᔪᓂᑦ ᐃᓚᒋᓪᓗᒋᑦ, ᐅᑯᐊ ᐃᓚᐅᔪᑦ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ, ᓄᓇᕗᑦ ᒐᕙᒪᒃᑯᑦ ᐊᒻᒪᓗ ᐱᓕᕆᕝᕕᐊᑦ ᐃᖃᓗᓕᕆᓂᕐᒧᑦ ᐊᒻᒪᓗ ᐃᒪᕐᒥᐅᑕᓕᕆᔨᑦ. ᐃᓚᐅᔪᑦ ᑲᑎᒪᔪᓂ ᑲᔪᓯᔪᑦ ᐅᖃᖃᑎᒌᒍᑎᒋᓪᓗᒋᑦ ᕿᓇᓗᒐᐃᑦ ᑑᒑᓖᑦ ᒥᒃᓵᓄᑦ ᐊᐅᓚᑦᑎᓂᐅᔪᑦ.
ᐃᑦᑐᓗᒃ ᐅᖃᖅᑐᖅ ᑲᑎᒪᓂᖅ ᐱᒋᐊᖅᑐᖅ ᓄᑖᓂᑦ ᐊᒃᑐᐊᖃᑎᒌᒃᓂᕐᒥᑦ ᐱᓕᕆᓂᒃᑯᑦ ᐊᑯᓐᓂᖓᓐᓂ ᐃᓄᒻᒪᕇᑦ ᐊᒻᒪᓗ ᐱᓕᕆᕝᕕᐊᑦ ᐃᖃᓗᓕᕆᓂᕐᒧᑦ ᐊᒻᒪᓗ ᐃᒪᕐᒥᐅᑕᓕᕆᔨᑦ ᐃᒪᓐᓇ ᑲᑐᔾᔨᓗᑎᒃ-ᐱᓕᕆᖃᑎᒌᒃᓂᕐᒥᑦ ᓄᓇᕗᒥ ᐊᒻᒪᓗ ᐃᓱᒪᒋᓗᒋᑦ ᐊᓯᐊᒎᕐᕕᒃᓴᑦ ᐱᓇᓱᐊᕐᓂᕐᒥᑦ ᐊᐅᓚᑦᑎᓂᕐᒥᑦ ᕿᓇᓗᓂᑦ ᑑᒑᓕᖕᓂᑦ. “ᑕᑯᔪᒥᓇᕐᓂᐊᓕᖅᑐᖅ ᐅᑯᐊ ᐱᓕᕆᕝᕕᐊᑦ ᐃᖃᓗᓕᕆᓂᕐᒧᑦ ᐊᒻᒪᓗ ᐃᒪᕐᒥᐅᑕᓕᕆᔨᑦ ᐃᓚᐅᓂᖏᓐᓂᑦ ᑕᒪᒃᑯᓇᓂ ᑲᑎᒪᓂᐅᔪᓂᑦ ᐃᓄᒻᒪᕆᖕᓂᑦ. ᐱᓕᕆᕝᕕᒃ ᑲᔪᓯᔪᑦ ᑕᑯᒃᓴᐅᑎᑦᑎᓂᕐᒥᑦ ᓇᖕᒥᓂᖅ ᑐᓂᓯᒪᓪᓚᑦᑖᕐᓂᖏᓐᓂᑦ ᑭᒡᒐᖅᑐᐃᓗᑎᒃ ᐃᓄᐃᑦ ᐱᔪᓐᓇᐅᑎᖏᓐᓂᑦ ᐅᑯᓇᓂ ᐃᓕᖓᔪᑦ ᒪᓕᒃᖢᒋᑦ ᓄᓇᕗᒻᒥ ᓄᓇᑖᕈᑎᓄᑦ ᐊᖏᕈᑏᑦ,” ᐅᖅᑲᖅᑐᖅ ᐃᑦᑐᓗᒃ.
ᐱᓕᕆᕝᕕᐊᑦ ᐃᖃᓗᓕᕆᓂᕐᒧᑦ ᐊᒻᒪᓗ ᐃᒪᕐᒥᐅᑕᓕᕆᔨᑦ ᐅᓂᒃᑳᓂᑦ ᑐᓂᓯᓚᐅᖅᑐᖅ ᖃᐅᔨᒪᔨᕐᔪᐊᑦ ᐊᒻᒪᓗ ᐊᐅᓚᑦᑎᓂᕐᒧᑦ ᑐᑭᓯᒍᑎᒃᓴᓕᐊᖏᓐᓂᑦ ᐱᓪᓗᒋᑦ ᕿᓇᓗᒐᐃᑦ ᑑᒑᓖᑦ ᑕᐃᑲᓂ ᐃᓕᓐᓂᐊᖅᖢᑎᒃ ᑲᑎᒪᓂᐅᔪᒥ. ᐊᔾᔨᒌᖏᑦᑐᑦ ᐱᓕᕆᖃᑎᒌᒃᑐᑦ ᑲᑎᒪᔨᖏᑦ ᐋᖅᑭᒃᑕᐅᓚᐅᖅᑐᑦ, ᐊᒻᒪᓗ ᑲᑐᔾᔨᓪᓗᑎᒃ-ᐊᐅᓚᑦᑎᓂᕐᒧᑦ ᑲᑐᔾᔨᓂᐊᕐᓂᖏᑦ ᐊᖏᖃᑎᒌᒃᖢᑎᒃ ᐃᒪᓐᓇ ᕿᒥᕐᕈᓂᕐᒥᑦ ᓇᓪᓕᐊᓐᓂ ᐊᑐᕋᔭᕐᓂᖏᓐᓄᑦ ᐊᐅᓚᑦᑎᓂᕐᒥᑦ ᕿᓇᓗᒐᓂ ᑑᒑᓕᖕᓂᑦ ᒪᓕᒃᓗᒋᑦ ᐊᐅᔭᒃᑯᑦ ᐃᓂᒋᔭᐅᕙᒃᑐᑦ ᕿᓇᓗᒐᐃᑦ ᑑᒑᓖᑦ. ᑲᑐᔾᔨᔪᑦ ᐅᖃᖃᑎᒌᒍᑎᖃᓚᐅᕐᒥᔪᑦ ᐃᒻᒪᖄ ᐱᕕᒃᓴᐅᓇᔭᖅᑐᓂᑦ ᐅᖃᖃᑎᖃᕐᓂᕐᒥᑦ ᐊᒃᑐᖅᑕᐅᓯᒪᔪᓂᑦ ᓄᓇᓕᖕᓂ ᔮᓐᓄᐱᕆ ᐊᒻᒪᓗ ᕕᕝᕗᐃᕆ, 2012-ᒥ.
ᐃᓄᐃᑦ ᐆᒪᔪᓕᕆᓂᕐᒧᑦ ᐊᒻᒪᓗ ᐊᕙᑎᓕᕆᓂᕐᒧᑦ ᖃᐅᔨᒪᔨᒃᑲᐃᑦ ᑲᑎᒪᔨᕋᓛᖓᑦ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᑲᑎᒪᔨᕋᓛᖁᑎᐊᑦ ᐅᑯᐊᖑᓪᓗᑎᒃ ᐱᖓᓱᑦ ᐃᒃᓯᕙᐅᑕᐅᔪᑦ ᐊᒻᒪᓗ ᐱᖓᓱᑦ ᑐᖏᓕᐊᓂᑦ-ᐃᒃᓯᕙᐅᑕᐅᔪᑦ ᐅᓇᖓᑦ ᐊᕕᒃᑐᖅᓯᒪᔪᓂ ᐆᓚᔪᓕᕆᔨᕐᔪᐊᖏᑦᑕ ᑎᒥᖁᑎᖏᓐᓂᑦ, ᑭᒡᒐᖅᑐᐃᔪᑦ ᐅᑯᓇᖓᑦ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ, ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓᑦ ᐊᖓᔪᖅᑳᑉ-ᑐᖏᓕᐊᓂᑦ.
