ᑐᓴᕋᑦᓴᓕᕆᔩᑦ

ᓄᓇᕗᑦ ᑐᙵᕕᒃᑯᑦ ᐅᐱᒍᓱᒃᐳᒃ ᓱᓕᔪᓂᒃ ᐊᒻᒪ ᓴᐃᒻᒪᖃᑎᒌᓐᓂᕐᒧᑦ ᑭᓪᓕᓯᓂᐊᕐᑏᑦ ᑭᖑᓪᓕᖅᐸᑦ ᐅᓂᒃᑲᓕᐊᕆᔭᖏᓐᓂᒃ

ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᑳᑎ ᑕᐅᑐᙱ ᐅᐱᒋᔭᖃᖅᑲᐅᕗᑦ ᓱᓕᔪᓂᒃ ᐊᒻᒪ ᓴᐃᒻᒪᖃᑎᒌᓐᓂᕐᒧᑦ ᑭᓪᓕᓯᓂᐊᕐᑎᒃᑯᑦ ᑭᖑᓪᓕᖅᐹᓂᒃ ᐅᓂᒃᑳᓕᐊᕆᔭᒥᓐᓂᒃ ᑐᓂᓯᑎᓪᓗᒋᑦ ᐅᑉᓗᒥ ᐊᑑᕚᒥ ᑭᓪᓕᓯᓂᐊᖅᑏᑦ ᐱᔭᕇᕈᑎᒋᔭᖏᓐᓂᒃ. ᐅᓂᒃᑳᓕᐊᕆᔭᖏᑦ ᑐᓂᔭᐅᔪᑦ ᐃᖅᑲᖅᑐᐃᑉ ᒨᕆ ᓯᓐᑭᓕᐅᑉ, ᐊᑯᓂᑲᓪᓚᒃ ᖃᐅᔨᓇᓱᒍᑎᐅᓯᒪᔪᑦ ᐊᒻᒪᓗ ᐊᐅᓪᓚᕐᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᔪᑦ ᐃᒃᐱᓇᕐᑐᒻᒪᕆᐅᓪᓗᑎᒃ ᐅᓂᒃᑳᕆᓯᒪᔭᖏᑦ ᓄᐊᑕᐅᓚᐅᕐᒪᑕ ᐅᑭᐅᓂ ᐊᕐᕕᓂᓕᓐᓂ. ᐃᓚᖃᕆᓪᓗᑎᒃ ᐊᑐᓕᖁᔭᓕᐊᓂᒃ ᖃᓄᖅ ᓴᐃᒻᒪᖃᑎᒌᒍᓐᓇᕈᑎᒃᓴᓂᒃ ᓄᓇᖃᖅᑳᖅᓯᒪᔪᓄᒃ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ.

 

“ᐊᒃᓱᒻᒪᕆᐊᓗᒃ ᐱᒻᒪᕆᐅᕗᖅ ᑖᑦᓱᒪ ᐃᖅᑲᖅᑐᐃᔨᑉ ᓯᓐᑭᓕᐅᑉ ᐅᓂᒃᑳᖏᑦ, ᓇᓗᓇᐃᔭᐃᓯᒪᑦᑎᐊᕐᒪᑕ ᑲᒪᓇᕐᑐᓂᒃ ᐊᑑᑎᔭᐅᕙᓐᓂᑯᓂᒃ ᐊᐅᓪᓚᕐᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᔪᓄᑦ, ᐅᖃᓪᓚᒍᓐᓇᕈᑕᐅᓕᕈᓐᓇᕐᐸᑕ ᑲᓇᑕᒥᐅᓄᑦ ᐅᕙᒍᒋᔭᒥᓐᓂ. ᑕᒪᕐᒥᒃ ᑲᓇᑕᒥᐅᑕ ᐃᒻᒥᒃᑯᑦ ᑲᒪᒋᔭᖃᕆᐊᖃᕐᒪᑕ ᖃᐅᔨᕚᓪᓕᕈᑎᒋᓗᒋᑦ ᑲᓇᑕᒥ ᖃᓄᐃᓕᐅᕈᑕᐅᕙᓐᓂᑯᓂᒃ ᑐᑭᓯᑦᑎᐊᕈᓐᓇᓂᐊᕐᒪᑕ ᐅᑭᐅᒐᓴᓐᓄᑦ ᐊᑦᑐᐃᓯᒪᓂᖓᓂᒃ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᔪᓄᑦ ᓱᓕ ᐅᑉᓗᒥ ᐊᑦᑐᐃᓯᒪᓂᖃᕐᒪᑦ ᐊᒥᓱᒻᒪᕆᓄᑦ ᑲᓇᑕᒥ ᓄᓇᖃᖅᑳᖅᓯᒪᔪᓄᑦ,” ᐅᖃᖅᑐᖅ ᐊᖓᔪᖅᑳᖅ ᑕᐅᑐᙱ. “ᓴᐃᒻᒪᖃᑎᒌᓐᓂᖅ ᐊᓪᓗᕆᐊᕈᑕᐅᓪᓚᕆᓐᓂᐊᕈᓂ ᓯᕗᒧᑦ, ᖃᓄᐃᓕᐅᕈᑕᐅᕙᓚᐅᕐᓯᒪᔪᓂᒃ ᖃᐅᔨᖅᑳᕆᐊᖃᕋᑦᑕ ᓱᓕᔪᓂᒃ ᖃᓄᐃᓕᐅᕐᑕᐅᖃᑦᑕᕈᑎᒋᓯᒪᔭᖏᓐᓂᒃ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᔪᑦ. ᐃᖅᑲᖅᑐᐃᔨ ᓯᓐᑭᓕᐅᑉ ᐅᓂᒃᑳᓕᐊᖏᑦ ᐱᖃᓯᐅᔾᔨᓯᒪᕗᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᕐᑐᑦ ᐅᓂᒃᑳᕆᓯᒪᔭᖏᓐᓂᒃ ᐋᓐᓂᓇᕐᒪᕆᒃᑐᓂᒃ ᐊᑐᖅᓯᒪᔭᒥᓂᒃ ᐋᓐᓂᑎᕐᑕᐅᕙᓚᐅᕐᓯᒪᓂᕐᒥᒃᓂ, ᐃᒃᖠᒎᖅᑕᐅᕙᓚᐅᕐᓂᕐᒥᓂᒃ ᐊᒻᒪ ᐃᓱᒪᒧᑦ ᐊᒃᓱᕈᓐᓇᑐᒃᑰᖅᓯᒪᓂᕐᒥᓂᒃ ᐱᑦᑎᐊᑕᐅᙱᒃᖢᑎᒃ. ᓱᓕ ᕿᒃᓵᓐᓂᖃᕆᐊᖃᖅᐳᒍᑦ ᐃᓅᓯᑦᑎᓐᓂ ᐊᒻᒪᓗ ᐃᓚᔮᕗᑦ ᐊᒻᒪᓗ ᓯᕗᓂᑦᑎᓐᓂ ᐊᑑᑎᔭᐅᓯᒪᔪᑦ, ᐊᒻᒪᓗ ᐱᓕᕇᓐᓇᕆᐊᖃᖅᐳᒍᑦ ᕿᓂᕐᓗᑕ ᓴᐃᒻᒪᕈᑕᐅᔪᓐᓇᕐᑐᓂᒃ ᐊᒻᒪ ᓯᕗᒧᒋᐊᕐᓗᑕ ᐊᑲᐅᓂᕐᓴᒥᒃ ᓯᕗᓂᕆᓂᐊᕐᑕᑎᓐᓂ,” ᑕᐃᒪᓐᓇ ᐅᖅᑲᖅᑐᖅ.

 

ᓄᓇᕗᑦ ᑐᙵᕕᒃ ᑎᒥᖓ, ᑭᒡᒐᑐᐃᒻᒪᑕ ᓄᓇᕘᒥ ᐃᓄᖕᓂᒃ, ᐃᖃᖅᑐᐃᕕᒃᑰᑎᑦᑎᖃᑕᐅᓚᐅᕐᓯᒪᒐᑦᑕ ᓴᖅᑭᓚᕿᒍᑕᐅᓚᐅᕐᓯᒪᔪᓂᒃ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᓚᐅᕐᓯᒪᔪᓄᑦ ᐊᖏᖃᑎᒌᒍᑎᑖᖅᑐᑕ 2007-ᖑᑎᓪᓗᒍ. ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᖅᑐᐃᕕᒃᑰᑎᑦᑎᖃᑕᐅᖕᒪᑕ ᑕᐃᒃᑯᐊ ᐃᓄᐃᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᔪᑦ ᐱᖃᓯᐅᔾᔭᐅᓚᐅᕐᓯᒪᒻᒪᑕ ᑮᓇᐅᔭᖅᑖᓂᒃᑯᑦ ᐊᖏᖃᑎᒌᒍᑎᑖᕐᑐᑎᒃ, ᐱᖃᓯᐅᔾᔨᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᔪᑦ ᐊᑭᓕᖅᑕᐅᒍᑎᖏᓐᓂᒃ ᐊᒻᒪᓗ ᐃᓕᓐᓂᐊᕈᑎᒃᓴᖏᓐᓂᒃ ᐱᔪᓐᓇᕐᑎᑕᐅᓪᓗᑎᒃ ᑮᓇᐅᔭᑎᒎᙱᑦᑑᒐᓗᐊᖅ, ᐃᓛᒃᑰᖅᖢᑎᒃ ᐱᓇᓱᐊᕈᑕᐅᒍᓐᓇᓂᒃᑰᖅᑐᑦ, ᐊᒻᒪᓗ ᓱᓕᔪᓂᒃ ᐊᒻᒪ ᓴᐃᒻᒪᖃᑎᒌᓐᓂᕐᒧᑦ ᑭᓪᓕᓯᓂᐊᕐᑏᑦ.

 

ᓄᓇᕗᑦ ᑐᙵᕕᒃ ᑎᒥᖓ ᑮᓇᐅᔭᖃᖅᑎᑦᑎᓚᐅᕐᐳᑦ ᐱᖃᑕᐅᔪᓐᓇᖁᓪᓗᒋᑦ ᐃᓄᐃᑦ ᐊᐅᓪᓚᕐᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᔪᑦ ᐊᑐᕚᒥᖃᑕᐅᒍᓐᓇᓂᐊᕐᒪᑕ ᑕᒪᓐᓇ ᐅᒃᑯᐊᖅᑕᐅᓕᖅᑎᓪᓗᒍ ᑭᓪᓕᓯᓂᐊᕐᓂᖅ. 3,000 ᐅᕝᕙᓗ 4,000 ᓄᓇᕗᖕᒥᐅᑦ ᐃᓄᐃᑦ ᐊᐅᓪᓚᖅᑎᑕᐅᕙᓚᐅᕐᒪᑕ ᐃᓕᓐᓂᐊᕆᐊᖅᑎᑕᐅᓪᓗᑎᒃ.

Report PDF (English – 13MB download)

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: