ᑐᓴᕋᑦᓴᓕᕆᔩᑦ

ᑐᓐᖓᕕᒃᑯᑦ ᐅᐱᒍᓱᑦᑐᑦ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑎᓂᒃ

(ᐆᑦᑑᕝᕙ 9, 2013ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃᑯᑦ ᐊᖏᔪᖅᑳᖓ ᑳᑎ ᑕᐅᑐᓐᖏ ᐅᓪᓗᒥ ᓇᓗᓇᐃᕐᓯᖅᑲᐅᔪᖅ ᐅᐱᒍᓱᓐᓂᕐᒥᓂᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐱᓕᕆᑦᓯᐊᑐᒻᒪᕆᐅᓚᐅᕐᒪᑕ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑎᒃᑯᑦ ᐱᓕᕆᐊᖏᓐᓂ ᐊᕐᕌᒍᓂᒃ ᐊᕐᕕᓂᓕᓐᓂᒃ.

 

ᑕᐅᑐᓐᖏ ᐅᖃᐅᓯᖃᓕᖅᑲᐅᔪᖅ ᕿᑭᖅᑕᓂᒃᑯᑦ ᓴᖅᑮᓚᐅᖅᑎᓪᓗᒋᑦ ᒪᕐᕉᓕᖅᑲᖓᔫᓐᓂᒃ ᐅᖃᓕᒫᒑᓐᓂᒃ ᐊᒻᒪᓗ ᑕᕐᕆᔮᑦᓴᒥᒃ ᑕᕝᕙᓃᖃᑕᐅᓪᓗᑎᒃ ᐊᑐᖃᑦᑕᕐᓯᒪᔭᖏᑦ ᐃᓘᓐᓇᑎᒃ 13 ᕿᑭᖅᑖᓗᒃ ᓄᓇᓖᑦ ᐊᒻᒪᓗ ᐅᓂᒃᑳᕆᔭᐅᖃᑕᐅᓪᓗᑎᒃ ᐃᓕᖅᑯᓯᖅᑖᑎᑦᓯᓇᓱᐊᕐᓂᖅ ᐊᓯᐊᓂᒃ, ᐃᓪᓗᓕᕆᓂᖅ, ᐃᓕᓐᓂᐊᕐᓂᖅ, ᐊᐅᓪᓚᑏᑦ ᕿᒻᒦᑦ, ᒪᑭᒪᔾᔪᑏᑦ, ᓄᒃᑕᕐᓂᖅ ᐊᒻᒪᓗ ᐃᖢᐊᕐᓴᐅᑏᑦ. ᕿᑭᖅᑕᓂᒃᑯᑦ ᓴᖅᑮᓚᐅᖅᑐᑦ ᑭᒡᓕᓯᓂᐊᖅᑎᓂᒃ 2007-ᒥ ᑎᑎᕋᖁᓪᓗᒋᑦ ᐅᓂᒃᑳᓂᒃ ᐊᑐᖃᑦᑕᕐᓯᒪᔭᖏᓐᓂᒃ ᕿᑭᖅᑖᓗᖕᒥ ᐃᓄᐃᑦ 1950-ᒥᒃ 1975-ᒧᑦ. ᐅᖃᓕᒫᒐᑦ ᑖᒃᑯᓇᓐᖔᕐᓯᒪᔪᑦ ᐅᓂᒃᑳᓯᐅᖅᑕᐅᓂᐅᖃᑦᑕᓚᐅᖅᑐᓂᒃ ᐊᒻᒪᓗ ᐊᑐᖅᑕᐅᓯᒪᔪᓂᒃ ᑎᑎᖅᑲᓂᒃ.

 

ᑐᕌᒐᓕᐊᖑᓯᒪᔪᖅ ᑖᑦᓱᒧᖓ ᐱᓕᕆᐊᒧᑦ ᐱᕚᓪᓕᕈᑎᒃᓴᐅᓗᓂ ᒪᒥᓴᕐᓂᕐᒧᑦ ᐊᒻᒪᓗ ᐃᓱᒪᒋᔪᓐᓇᐃᕐᕕᖃᕐᓂᕐᒧᑦ ᐃᓄᐃᑦ ᐊᑦᓱᕈᕐᓇᑐᒃᑰᖃᑦᑕᓚᐅᖅᑐᖅ ᐋᓐᓂᐊᓇᖅᑐᒃᑯᑦ ᒐᕙᒪᑦ ᐃᓱᒪᓕᐅᕈᑎᒋᔭᖏᓐᓂᒃ ᐊᑐᐊᒐᓕᐊᖏᓐᓂᓪᓗ, ᐊᒻᒪᓗ ᐋᖅᑭᒋᐊᕈᑕᐅᓇᓱᐊᕐᐸᓪᓕᐊᓗᓂ ᐱᓕᕆᖃᑎᒌᑉᐸᓪᓕᐊᓂᕐᒧᑦ ᐃᓚᓐᓇᕇᓪᓗᑎᒃ ᐃᓄᐃᑦ ᐊᒻᒪᓗ ᒐᕙᒪᓂ ᑲᑐᔾᔨᖃᑎᒌᖏᑦ.

 

“ᑐᓐᖓᕕᒃᑯᑦ ᑲᑎᒪᔨᖏᓐᓃᖔᕐᓗᖓ, ᐅᐱᒋᕙᕋ ᕿᑭᖅᑕᓂ ᐊᖓᔪᖅᑳᖓ ᐅᑲᓕᖅ ᐃᔨᑦᓯᐊᖅ, ᐊᒻᒪᓗ ᕿᑭᖅᑕᓂᒃᑯᑦ ᑲᑎᒪᔨᖏᑦ ᐃᖅᑲᓇᐃᔭᖅᑎᖏᓪᓗ ᑲᔪᓯᔪᓐᓇᑎᑦᓯᑦᓯᐊᓚᐅᕐᒪᑕ ᐊᖏᔪᕐᔪᖃᐊᕌᓗᖕᒥᒃ ᑖᑦᓱᒥᖓ. ᑖᒃᑯᐊ ᓴᖅᑭᑕᐅᓂᖓ ᓇᓕᖅᑯᑦᓯᓯᒪᑦᓯᐊᖅᑐᓂᒃ ᓴᖅᑮᔪᖃᕆᐅᖅᑐᖅ ᐃᓄᐃᑦ ᖃᓄᐃᑦᑐᒃᑰᖃᑦᑕᓚᐅᕐᓂᖏᓐᓂᒃ ᓴᖅᑭᔮᖅᑎᓯᓪᓚᑖᖅᑐᓂᒃ ᑕᐃᑦᓱᒪᓂ. ᑕᐃᒪᑐᖅ ᒪᒥᓴᕐᐸᓪᓕᐊᓕᖅᑕ ᑕᕝᕙᓐᖓᑦ ᐱᒋᐊᕐᓗᑕ ᐋᓐᓂᖅᑕᐅᓯᒪᓂᑦᑎᓐᓂᒃ ᐊᒻᒪᓗ ᓯᕗᒧᐊᒋᐊᖔᓕᕐᓗᑕ ᖃᓄᐃᓐᓇᖏᓐᓂᕐᓴᒧᑦ, ᖁᕕᐊᓇᕐᓂᓴᒃᑯᑦ ᑲᑐᔾᔨᖃᑎᖃᑦᓯᐊᓂᕐᒥᒃ ᒐᕙᒪᓂᒃ ᐊᒻᒪᓗ ᑎᒥᖁᑎᖏᓐᓂᒃ,” ᐅᖃᖅᑐᖅ ᑕᐅᑐᓐᖏ.

 

“ᑖᒃᑯᐊ ᐅᖃᓕᒫᒐᑦ ᐃᓚᓕᐅᔾᔭᐅᖁᔭᕋᓗᐊᒃᑲ ᑲᓇᑕᒥ ᐃᓕᓐᓂᐊᕐᓂᓕᕆᓂᖓᓄᑦ ᓄᑕᖅᑲᑦ ᑕᒫᓂ ᑲᓇᑕᒥ ᐃᓕᓐᓂᐊᕐᓂᖃᕈᓐᓇᕐᓂᐊᓕᕐᒪᑕ ᓇᓕᖅᑯᑦᓯᓯᒪᑦᓯᐊᑐᒥᒃ ᐊᑐᕐᓯᒪᔭᖏᓐᓂᒃ ᐃᓄᐃᑦ,” ᐅᖃᓚᐅᖅᑐᖅ ᑕᐅᑐᓐᖏ.

 

30-

ᖃᐅᔨᒋᐊᕐᕕᐅᖃᑦᑕᕐᓕ

 

ᑭᐅᕆ ᒪᒃᓕᔅᑭ

ᑐᓴᐅᒪᖃᑦᑕᐅᑎᓕᕆᓂᕐᒧᑦ ᑐᑭᒧᐊᒃᑎᑦᑎᔨ

ᐅᖄᓚᐅᑖ: (867) 979-4914 ᐊᑭᖃᓐᖏᑦᑐᖅ: 1-888-646-0006

ᐃᑉᐱᐊᔪᒻᒥᒐᖅ: (867) 222-2893

www.tunngavik.com