ᓄᓇᕗᑦ ᑐᓐᖓᕕᒃ ᑎᒥᖓᑕ ᐊᖏᔪᖅᑳᖓ ᑳᑎ ᑕᐅᑐᓐᖏ ᐅᓪᓗᒥ ᑐᓴᒐᑦᓴᓐᖑᖅᑎᑦᓯᖅᑲᐅᔪᖅ ᑐᓐᖓᕕᒃᑯᑦ ᓄᐊᑦᓯᓂᖏᓐᓂᒃ ᐃᓕᓐᓂᐊᖅᑎᐅᓚᐅᖅᑐᑦ ᐊᑎᖏᓐᓂᒃ ᑭᕙᓪᓕᖅ Hᐊᒥᐅᖑᓚᐅᖅᑐᑦ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᖅᑎᐅᓪᓗᑎᒃ ᑲᖏᕐᖠᓂᕐᒥ 1980-ᖏᓐᓂ.
ᑐᓐᖓᕕᒃᑯᑦ ᓄᐊᑦᓯᔪᑦ ᑐᓴᐅᒪᔾᔪᑎᒃᓴᓂᒃ ᐃᑲᔫᑎᒃᓴᓂᒃ ᐃᖅᑲᖅᑐᐃᕕᒃᑯᑦ ᓵᓐᖓᑦᓯᒍᑎᒃᓴᓂᒃ ᑲᑐᔾᔨᖃᑎᒌᑦ ᓄᐊᑉᐸᓪᓕᐊᔭᖏᓐᓂᒃ ᑭᕙᓪᓕᖅ Hᐊᓪ ᐃᓚᓕᐅᔾᔭᐅᖁᓪᓗᒍ ᐊᓪᓚᐃᑦ ᐃᓕᓐᓂᐊᕆᐊᖅᑎᑕᐅᖃᑦᑕᖅᑐᒥᓃᑦ ᐊᑭᓕᖅᑕᐅᔾᔪᑎᖏᓐᓄᑦ ᐊᖏᖃᑎᒌᒍᑎᒃᑯᑦ ᑎᑎᕋᖅᑕᐅᓯᒪᔪᓄᑦ ᐃᓕᓐᓂᐊᕕᖕᓄᑦ ᐃᓕᓐᓂᐊᖅᑎᒥᓃᑦ ᐱᖃᑕᐅᔪᓐᓇᖁᓪᓗᒋᑦ ᐊᑭᓕᐅᑕᐅᕙᑦᑐᒥᒃ ᐃᓕᓐᓂᐊᕆᐊᖅᑎᑕᐅᖃᑦᑕᖅᑐᒥᓂᕐᓄᑦ ᐊᒻᒪᓗ ᐃᓛᒃᑯᑦ ᐊᑭᓖᑎᑦᓯᓇᓱᐊᕈᑎᓄᑦ ᖃᐅᔨᓴᖅᑎᑦᓯᓂᒃᑯᑦ.
ᑐᓐᖓᕕᒃᑯᑦ ᐃᖅᑲᖅᑐᐃᕕᒃᑰᑎᑦᓯᒍᑎᒃᓴᓂᒃ ᑐᒃᓯᕋᐅᓯᐅᓚᐅᖅᑐᑦ ᑐᑭᒧᐊᒍᑎᒃᓴᓂᒃ ᓄᓇᕗᒻᒥ ᐃᖅᑲᖅᑐᐃᕕᒃᑯᓐᓂᒃ ᐅᑭᐊᑦᓵᖓᓂ 2011 ᐊᐱᖅᑯᑎᒃᓴᓂᒃ ᐃᖅᑲᖅᑐᐃᕕᖕᒧᑦ ᖃᐅᔨᓇᓱᐊᕈᑎᒃᓴᓂᒃ ᑭᕙᓪᓕᖅ Hᐊᓪ ᐃᓚᓕᐅᔾᔭᐅᔭᕆᐊᖃᕐᒪᖔᖅ ᑎᑎᕋᖅᑕᐅᓯᒪᔪᓄᑦ ᐃᓕᓐᓂᐊᕕᖕᓄᑦ. ᑭᕙᓪᓕᖅ Hᐊᓪ ᒫᓐᓇ ᑎᑎᕋᖅᑕᐅᓯᒪᖃᑕᐅᓐᖏᑦᑐᖅ, ᑐᑦᓯᕌᕆᔭᐅᖃᑦᑕᖅᓯᒪᒐᓗᐊᖅᑎᓪᓗᒍ ᐃᓕᓐᓂᐊᖅᑎᐅᖃᑦᑕᐅᓚᐅᖅᑐᓂᒃ ᐃᓚᓕᐅᔾᔭᐅᖁᔭᐅᓪᓗᓂ ᑎᑎᕋᖅᓯᒪᔪᓄᑦ. ᑐᓐᖓᕕᒃᑯᑦ ᐊᔪᐃᓐᓇᕆᐊᖅᑐᑦ ᐃᓱᒪᓕᐅᕈᑕᐅᓚᐅᖅᑐᖅ ᐊᓯᔾᔨᖅᑕᐅᖁᓪᓗᒍ ᐃᖅᑲᖅᑐᐃᕕᒃᑰᑎᑦᓯᒍᑎᒃᑯᑦ ᑐᒃᓯᕋᐅᑎᒥᒃ ᐃᓱᒪᓕᐅᕈᑕᐅᓯᒪᔪᒧᑦ ᐃᖅᑲᖅᑐᐃᕕᒃᑯᑦ.
ᐊᔪᐃᓐᓇᕆᐊᕈᑎᖓᒍᑦ ᐃᑲᔪᖅᓱᖅᑕᐅᖔᓕᕐᓗᑎᒃ ᑭᕙᓪᓕᖅ Hᐊᓪᒥ ᐃᓕᓐᓂᐊᕆᐊᖃᑦᑕᖅᑐᒥᓃᑦ, ᐱᔪᓐᓇᖅᓯᓇᔭᖅᑐᑦ ᐃᓕᓐᓂᐊᕆᐊᖅᑎᑕᐅᓚᐅᖅᓯᒪᔪᓄᑦ ᐊᑭᓕᐅᑕᐅᕙᑦᑐᒥᒃ ᐊᒻᒪᓗ ᐃᓛᒃᑯᑦ ᐊᑭᓖᑎᑦᓯᓇᓱᐊᕈᑎᓄᑦ ᖃᐅᔨᓴᖅᑎᑦᓯᓂᒃᑯᑦ. ᑭᓯᐊᓂᓕ, ᐊᔪᐃᓐᓇᕆᐊᒃᑲᓐᓂᕈᑎᖓᒍᑦ ᐃᑲᔪᖅᓱᖅᑕᐅᑉᐸᑕ ᑲᓇᑕᐅᑉ ᒐᕙᒪᒃᑯᖏᑦ, ᐃᓕᓐᓂᐊᖅᑎᐅᓚᐅᖅᑐᑦ ᐊᔪᖅᑎᑕᐅᓂᐊᖅᑐᑦ ᐃᓕᓐᓂᐊᕆᐊᖅᑎᑕᐅᓚᐅᖅᓯᒪᔪᓄᑦ ᐊᑭᓕᐅᑕᐅᕙᑦᑐᒥᒃ ᐊᒻᒪᓗ ᐃᓛᒃᑯᑦ ᐊᑭᓖᑎᑦᓯᓇᓱᐊᕈᑎᓄᑦ ᖃᐅᔨᓴᖅᑎᑦᓯᓂᒃᑯᑦ, ᒫᓐᓇᑐᑦ ᓱᕐᕋᖏᓪᓗᓂ.
ᖃᐅᔨᑎᓪᓗᒍ ᑐᓴᐅᒪᔾᔪᑎᒃᓴᑲᓐᓂᕐᓂᒃ.
