ᑐᓴᕋᑦᓴᓕᕆᔩᑦ

ᓄᓇᕗᑦ ᑐᙵᕕᒃᑯᑦ ᓄᓇᕐᔪᐊᕐᒥ ᐳᕙᓪᓗᓇᕐᑐᒧᑦ ᐅᓪᓗᕆᑎᑕᐅᑎᓪᓗᒍ ᐃᒡᓗᖃᖅᑎᑦᑎᖁᔨᕗᑦ ᐃᓚᐃᓐᓈᖏᓪᓗᑎᒃ ᐊᑑᑎᑎᓪᓗᒍ ᓄᕙᒡᔪᐊᕐᓇᖅ−19 ᓄᓇᕐᔪᐊᒥᓕᒫᕐᒥ ᓯᐊᒻᒪᑎᓪᓗᒍ

(ᒪᑦᓯ 24, 2020 – ᐃᖃᓗᐃᑦ, ᓄᓇᕗᑦ) ᐅᓪᓗᒥ, ᓄᓇᕐᔪᐊᓕᒫᕐᒥ ᐳᕙᔾᓗᓇᕐᑐᒧᑦ ᐅᓪᓗᕆᑎᑕᐅᑎᓪᓗᒍ, ᓄᓇᕗᑦ ᑐᙵᕕᒃᑯᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐃᒪᓐᓇᐃᖁᔭᕗᑦ ᐊᒥᓱᓂᒃ ᑮᓇᐅᔭᖃᕈᑎᒃᓴᓂᒃ ᐱᓂᐊᕐᓂᖃᕈᑎᖃᖁᔨᕗᑦ ᐃᒡᓗᖃᖅᑎᑦᑎᒍᑕᐅᔪᓐᓇᕐᑐᓂᒃ ᐃᓚᐃᓐᓈᖏᓪᓗᑎᒃ ᓄᓇᕗᖕᒥ ᑲᒪᒋᐊᒍᑕᐅᖁᓪᓗᒍ ᐳᕙᑎᒍᑦ ᐋᓐᓂᐊᖃᓕᕈᑕᐅᓗᐊᕐᐸᒻᒪᑦ ᐃᒡᓗᑭᒃᓴᓗᐊᕐᓂᕐᒧᑦ ᓄᓇᕗᖕᒥ.

ᐊᒃᓱᕉᑕᐅᔪᑦ ᐱᑕᖃᕈᓐᓂᖅᑎᑕᐅᖁᓪᓗᒍ ᐳᕙᓪᓗᓇᖅ ᐱᕚᓪᓕᕈᑕᐅᓂᖃᕋᔭᕐᒪᑦ ᐃᓅᓯᕆᑦᑎᐊᕐᓂᖏᓐᓄᑦ ᓄᓇᕗᖕᒥᐅᑦ. ᑖᒃᑯᐊ ᐱᕚᓪᓕᕈᑕᐅᔪᓐᓇᕐᑐᑦ ᐃᑲᔪᓐᓂᖃᕈᓐᓇᓪᓚᕆᒻᓗᒪᑕ ᐃᓚᑦᑎᓐᓄᑦ ᐊᒻᒪ ᓄᓇᓕᖕᓄᑦ ᐳᕙᓪᓗᓇᕐᑐᖅᑕᖃᖁᓇᒍ ᐊᒻᒪ ᐊᓯᖏᓐᓂᒃ ᐋᓐᓂᐊᖃᕈᑕᐅᕙᒃᑐᓄᑦ, ᓲᕐᓗᖃᐃ ᓄᕙᒡᔪᐊᕐᓇᖅ−19. ᐃᒪᐃᒃᑑᓂᖓᓄᑦ ᐊᒻᒪ ᐋᓐᓂᐊᖃᓕᕈᑕᐅᕙᖕᒪᑦ ᐃᓄᒋᐊᓗᕐᑎᓪᓗᒋᑦ ᐃᒡᓗᒥᐅᖃᑎᒌᑦ, ᐃᒡᓗᑦ ᕿᖓᖃᖅᑎᓐᓇᒋᑦ ᐊᒻᒪ ᑎᒥᒧᑦ ᐱᐅᔪᓂᒃ ᓂᕿᒃᓴᖃᑦᑎᐊᙱᓗᐊᕐᐸᓐᓂᖏᓐᓄᑦ, ᐊᐃᑦᑐᐃᒍᑕᐅᓕᕈᓐᓇᕐᒪᑦ ᐳᕙᓪᓗᓇᕐᑐᒥᒃ ᐊᒻᒪ ᐊᒥᓲᒍᑎᒋᓗᐊᕐᓯᒪᒻᒪᒋᑦ ᐳᕙᓪᓗᐸᒃᑐᑦ ᐃᓄᐃᑦ ᓄᓇᓕᖕᓂ. ᑖᓐᓇᓴᐃᓐᓇᐅᕗᖅ ᐃᒪᐃᒃᑐᒦᓐᓂᑎᓐᓄᑦ ᐊᑦᑕᓐᓇᕈᑎᒋᒻᒪᒍ ᐅᓄᕐᓂᕐᓴᐅᔪᓐᓇᕐᒪᑕ ᓄᕙᒡᔪᐊᕐᓇᖅ−19-ᒥ ᐋᓐᓂᐊᑖᖅᑐᑦ ᐊᒻᒪᓗ ᐊᓯᖏᓐᓂᒃ ᐋᓐᓂᐊᓇᕐᑐᓂᒃ ᐊᐃᑦᑑᑕᐅᔪᓐᓇᕐᑐᓂᒃ.

“ᐅᑭᐅᒃ ᒪᕐᕉᓕᕐᐴᒃ ᐊᓂᒍᖅᑑᒃ, ᑲᓇᑕᐅᑉ ᒐᕙᒪᒃᑯᖏᑦ ᐱᓂᐊᕐᓂᖃᕈᑎᖃᓚᐅᕐᓯᒪᒻᒪᑕ ᓄᖑᑎᑕᐅᒍᑎᒃᓴᖓᓂᒃ ᐳᕙᓪᓗᓇᕐᑑ ᑕᒪᐃᓐᓂ ᐃᓄᐃᑦ ᓄᓇᖓᓐᓂ ᐅᑭᐅᖅ 2030-ᖑᓕᕐᐸᑦ. ᐱᒻᒪᕆᐅᕗᖅ, ᐊᔾᔨᐅᖏᑎᑕᐅᓗᓂ-ᐃᒡᓗᓕᕆᔾᔪᑎᒃᓴᓂᒃ ᐱᒋᐊᖅᑐᖃᕆᐊᖃᓐᓂᖓ ᑐᐊᕕᕐᓇᖅᐳᖅ ᒫᓐᓇᐅᔪᖅ ᐃᒪᓐᓇᐃᑐᒃᑰᑎᓪᓗᑕ.” − ᐊᓗᑭ ᑰᑦᑎᖅ, ᐊᖓᔪᖅᑳᖓᑦ ᓄᓇᕗᑦ ᑐᙵᕕᒃᑯᑦ.

“ᓄᕙᒡᔪᐊᕐᓇᖅ−19 ᐊᒻᒪ ᐳᕙᓪᓗᓇᕐᑐᖅ ᐋᓐᓂᐊᕐᓇᐅᔫᒃ ᐋᓐᓂᐊᓇᕐᑐᖅᑖᕆᔭᐅᓲᖑᒻᒪᑕ ᑎᒥᒥᒍᑦ ᓴᐳᒻᒥᔾᔪᑎᖃᑦᑎᐊᖏᓗᐊᕐᑐᓄᑦ. ᓄᓇᕗᖕᒥ ᐃᓄᒋᐊᓗᐊᖅᑐᐊᓘᓂᖏᓐᓄᒃ ᐃᒡᓗᒥᐅᖃᑎᒌᑦ, ᐊᔪᕐᓴᓗᐊᕐᑐᓪᓗ ᐊᒻᒪ ᓂᕿᒃᓴᖃᑦᑎᐊᙱᓗᐊᕐᑎᓪᓗᒋᑦ ᑕᒪᓐᓇ ᑐᐊᕕᐊᕆᔭᐅᓗᓂ ᑲᒪᒋᔭᐅᒋᐊᕆᐊᖃᓕᕋᓗᐊᕐᒪᑦ.”−ᑯᓄ ᑕᑦᑐᐃᓂ, ᐊᖓᔪᖅᑳᖓᑦ, ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᑕ.

“ᐃᓄᐃᑦ ᖃᐅᔨᒪᔪᑦ ᐊᒻᒪ ᑐᑭᓯᐊᑦᑎᐊᕐᑐᑎᒃ ᐋᓐᓂᐊᓯᐅᕐᑎᓂᒃ/ᓇᔭᙳᐊᓂᒃ, ᐃᓱᐊᕐᓴᐃᔨᓂ, ᐋᓐᓂᐊᕕᖕᒥᓗ ᑐᓵᔨᐅᔪᓂᒃ, ᐊᒻᒪ ᑐᐊᕕᕐᓇᕐᑐᕐᑕᖃᖅᑎᓪᓗᒍ ᑲᒪᔨᐅᓲᓂᒃ ᐊᒻᒪ ᐊᓯᖏᓐᓂᒃ ᑲᒪᑦᑎᐊᕐᑎᐅᓲᓂᒃ ᓄᓇᕗᖕᒥ. ᖁᔭᓐᓇᒦᖅᐸᑦᑎᒋᑦ ᐃᖅᑲᓇᐃᔭᐃᓐᓇᖃᑦᑕᕋᑦᓯ ᐊᑑᑎᑎᓪᓗᑕ ᑕᒪᑦᓱᒧᖓ ᓄᓇᕐᔪᐊᕐᒥ ᓯᐊᕐᒪᕐᓯᒪᔪᒥᒃ.” ᓯᑖᓐᓂᓕ ᐊᓇᑉᓚᒃ, ᐊᖓᔪᖅᑳᖓ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑕ.

“ᓄᓇᕐᔪᐊᕐᒥ ᐋᓐᓂᐊᖃᑦᑕᐃᓕᒪᓂᕐᒧᑦ ᑎᒥᐅᔪᑦ ᐊᑐᓕᕐᑎᑦᑎᓯᒪᕗᑦ ᐊᒥᓲᙱᓂᕐᓴᐅᖁᓪᓗᒋᑦ ᐳᕙᓪᓗᓇᕐᑐᑖᖅᑐᑦ, ᐅᓄᙱᓂᕐᓴᐅᓕᕈᓪᓗᒋᑦ ᐳᕙᓪᓗᓇᕐᑐᒥᒃ ᐋᓐᓂᐊᖃᖅᑐᑎᒃ ᐃᓅᔪᓐᓃᐸᒃᑐᑦ ᐊᒻᒪ ᐋᓐᓂᐊᕐᑖᖅᑕᐃᓕᒪᑎᑕᐅᖁᓪᓗᒋᑦ ᐃᓚᔭᕇᑦ ᕿᓚᒥᐊᓗᒃ ᐊᓯᔾᔩᔪᓐᓇᕐᓂᖓᓄᑦ ᐊᑭᑭᑦᑑᒐᓂᓗ ᐋᓐᓂᐊᓇᕐᑐᖅ. ᖃᓄᖅᑑᕆᐊᕈᑏᑦ ᐊᒻᒪ ᑮᓇᐅᔭᐃᕈᑕᐅᔪᑦ ᓇᓕᒨᒋᒋᐊᓖᒃ ᑎᑭᑕᐅᔪᒪᔪᓄᑦ.” − ᐱᔭᐃ ᐊᕿᐊᕈᖅ, ᐊᖓᔪᖅᑳᖓᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ.

ᐃᓄᖕᓂ ᐳᕙᓪᓗᓇᖅᑑᑉ ᓄᖑᓴᖅᑕᐅᓂᖓᓄᑦ ᐸᕐᓇᓯᒪᒍᑏᑦ (ᐳᕙᓪᓗᓇᕐᑐᒧᑦ ᐸᕐᓇᒍᑦ) ᓴᖅᑭᑕᐅᓚᐅᕐᓯᒪᔪᖅ ᑲᓇᑕᒥ ᐃᓄᐃᑦ ᑕᐱᕇᒃᑯᓐᓄᑦ ᑎᓯᑉᐱᕆ 2018-ᒥ. ᓄᓇᕗᑉᒥ ᐳᕙᓪᓗᓇᕐᑑᑉ ᓄᖑᓴᖅᑕᐅᓂᖓᓄᑦ ᐸᕐᓇᒍᑎᓕᐊᖑᓯᒪᔪᖅ, ᑎᑎᕋᖅᑕᐅᓯᒪᓕᖅᑐᖅ ᐋᖅᑭᒋᐊᕐᑐᔅᓴᒪᐅᓪᓗᓂ ᐱᓕᕆᖃᑎᒌᒍᑕᐅᓪᓗᓂ ᓯᕗᓕᖅᑎᒋᔭᐅᓪᓗᑎᒃ ᑐᙵᕕᒃᑯᑦ, ᐱᓕᕆᖃᑎᖃᖅᑐᑎᒃ ᓄᓇᕗᑦ ᒐᕙᒪᒃᑯᖏᓐᓂᒃ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᒃ, ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᒃ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᒃ, ᐃᓕᓴᖅᓯᕕᒃᑯᓐᓂᒃ, ᓄᓇᕗᖕᒥ ᐃᒡᓗᓕᕆᔨᕐᔪᐊᒃᑯᑦ ᑎᒥᖓᓂᒃ ᐊᒻᒪᓗ ᓯᕗᓕᕐᑐᑦ ᐳᕙᓪᓗᓇᖅᑐᑉ ᓄᖑᑎᕐᑕᐅᕙᓪᓕᐊᓂᖓᓄᑦ, ᐅᑯᓄᖓ ᒥᐊᓕ ᕿᓕᖅᑎ, ᒪᐃᔭᒋᔭᐅᓚᐅᕐᓯᒪᔪᖅ ᕿᑭᖅᑕᕐᔪᐊᕐᒥ. ᓄᕙᒡᔪᐊᕐᓇᖅ−19 ᓄᓇᕐᔪᐊᕐᒥ ᓯᐊᒻᒪᕐᓯᒪᔪᑦ ᐱᓪᓗᒍ ᑭᖑᕙᕆᐊᕈᑕᐅᓚᐅᕐᒪᑦ ᓴᖅᑭᑕᐅᓂᒃᓴᖓᓄᑦ ᖃᓄᖅᑑᕈᑎᒃᓴᐅᓪᓗᑎᒃ ᐸᕐᓇᒍᑎᓄᑦ.

ᒪᑦᓯ 2018, $27.5 ᒥᓕᐊᓐ ᓴᓂᕐᕙᕐᑕᐅᓚᐅᕐᐳᑦ ᐊᑐᕋᔭᕐᑐᑦ ᐅᑭᐅᓄᑦ ᑕᓪᓕᒪᓄᑦ ᐃᓄᖕᓂ ᐳᕙᓪᓗᓇᕐᑐᖅ ᓄᖑᑎᖅᑕᐅᕙᓪᓕᐊᒍᑎᒃᓴᖓ ᑕᒪᐃᓐᓂ ᐃᓄᐃᑦ ᓄᓈᓐᓂ. ᑖᒃᑯᓇᖔᖅᑐᑦ ᑮᓇᐅᔭᑦ , $13.1 ᒥᓕᐊᓐ ᓴᓂᕐᕙᕐᑕᐅᓯᒪᕗᑦ ᓄᓇᕗᖕᒧᑦ ᑲᒪᔾᔪᑎᒃᓴᐅᓪᓗᓂ 2018-ᒥᑦ 2023-ᒧᑦ, ᑕᕝᕙᖔᖅᑐᑦ ᐊᑑᑎᖃᖅᑎᑕᐅᔪᕗᑦ $2.5 ᒥᓕᐊᓐ ᑎᑭᕋᕐᔪᐊᕐᒧᑦ ᐊᒻᒪ ᑭᙵᕐᓂ ᖃᐅᔨᓴᐃᒍᑕᐅᓪᓗᓂ. ᐱᓕᕆᐊᖑᐃᓐᓇᖅᑐᖅ ᒪᓕᒃᑐᒍ ᐋᖅᑭᒋᐊᖅᑕᐅᔪᓐᓇᕐᑐ ᐸᕐᓇᒍᑎᓕᐊᖑᓯᒪᔪᖅ.
-30-

ᑐᑭᓯᒋᐊᒃᑲᓂᕐᕕᒋᔪᓐᓇᕐᐸᑦ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᒧᑦ ᐃᑲᔪᖅᑎ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ’

Download (PDF, 132KB)