(ᔮᓐᓄᐊᕆ 19, 2009) ᑭᒡᒐᖅᑐᐃᔪᑦ ᓄᓇᕗᑦ ᑐᓐᖓᕕᒃᑯᑦ ᑎᒥᖓᓐᓂᒃ ᑐᑭᓯᓇᑦᓯᐊᖅᑐᒥᒃ ᑐᓴᖅᑕᐅᑎᑦᓯᔪᕗᑦ ᐱᓇᓱᐊᕈᓯᐅᔪᔪᒥ ᑲᓇᑕᒥ ᓇᓄᐃᑦ ᒥᑦᓵᓄᑦ ᑲᑎᒪᓂᕐᒧᑦ: ᑲᒪᒋᓐᖏᓯᖅᑐᖅᑕᐃᓕᓯᐅᒃ ᑕᒻᒪᖅᓯᒪᓐᖏᓐᓂᕆᔭᖏᑦ ᐃᓄᐃᑦ ᖃᐅᔨᒪᓂᑐᖃᖏᑦᑕ ᐅᕝᕙᓗ ᐃᓄᐃᑦ ᖃᐅᔨᒪᔭᑐᖃᖏᑦ ᑲᒪᒋᔭᖃᓕᕋᒥᒃ ᐃᓱᒫᓘᑕᐅᔪᓂᒃ ᓇᓄᕐᓅᖓᔪᓂᒃ.
ᕋᐃᒪᓐ ᓂᖏᐅᑦᓯᐊᖅ, ᐊᐃᑉᐸᖓ ᐊᖓᔪᖅᑳᑉ ᑐᖏᓕᖓ, ᐊᒻᒪᓗ ᒐᐃᕗᕆᐅᓪ ᓂᕐᓗᖓᔪᖅ, ᐊᖓᔪᖅᑳᖅ ᐆᒪᔪᓕᕆᓂᕐᒧᑦ, ᐃᓚᒋᔭᐅᔪᔪᑦ ᐃᓄᓐᓂᒃ ᑭᒡᒐᖅᑐᐃᑦᓱᑎᒃ ᓄᓇᕗᑦ ᑐᓐᖓᕕᒃᑯᑦ ᑎᒥᖓᓐᓂᒃ ᑲᓱᐃᑦᓱᑎᒃ ᖃᐅᔨᓴᖅᑎᒻᒪᕆᓐᓂᒃ, ᐊᕙᑎᓕᕆᔨᓂᒃ ᐊᒻᒪᓗ ᒐᕙᒪᒃᑯᓐᓂ ᐊᖓᔪᖅᑲᐅᑎᓂᒃ, ᐱᖃᓯᐅᑎᑦᓱᓂ ᒐᕙᒪᑐᖃᒃᑯᑦ ᐊᕙᑎᓕᕆᓂᕐᒧᑦ ᒥᓂᔅᑕᖓᑦ ᔨᒻ ᐳᕋᓐᑕᔅ, ᐅᓪᓗᕐᒥ ᐊᑕᐅᓯᕐᒥᒃ ᑲᑎᒪᓂᖃᖅᓱᑎᒃ ᐅᐃᓂᐲᒥ.
“ᐅᐸᑦᓯᒪᔪᔪᒍᑦ ᑕᕝᕗᖓ ᑲᑎᒪᕐᓂᒧᑦ ᐊᐅᓚᓂᖃᖅᓱᓂ ᑲᑐᔾᔨᖃᑎᒌᓐᓂᕐᒥᒃ ᐊᒻᒪᓗ ᑕᐃᒫᑦᓴᐃᓐᓇᖅ ᑐᕌᒐᖃᑎᒌᑦᓱᑎᒃ ᖃᐅᔨᓴᑦᓯᐊᕐᓂᕐᒧᑦ ᖃᓄᐃᓐᖏᑦᓯᐊᕐᓂᖏᓐᓄᑦ ᓇᓄᐃᑦ ᓇᓄᖃᕐᕕᓐᓃᑦᑐᑦ,” ᐅᖃᓚᐅᖅᑐᖅ ᒥᔅᑕ ᓂᖏᐅᑦᓯᐊᖅ. “ᑐᓐᖓᕕᒋᑦᓱᒍ ᐃᓱᒪᒋᔭᐅᒐᔪᑦᑐᖅ, ᐃᓄᐃᑦ ᓈᓚᓲᖑᒻᒪᑕ ᖃᐅᔨᓴᖅᑎᒻᒪᕆᓐᓂᒃ ᐊᒻᒪᓗ ᐊᖏᖃᑎᖃᖅᓱᑎᒃ ᑐᑭᓯᓕᖅᑕᖏᓐᓂᒃ ᐊᒥᓱᓂᒃ. ᑭᓯᐊᓂᓕ, ᖃᐅᔨᒪᒻᒥᔪᒍᑦ ᓇᓄᕐᓂᒃ ᖃᐅᔨᓴᕐᓂᐅᔪᖅ ᓄᑖᖑᒻᒪᑦ ᐊᐳᖅᑕᕐᕕᖃᕐᓱᓂᓗ.”
ᐃᓄᐃᑦ ᐅᖃᕆᐊᖅᑐᖅᓯᒪᔪᑦ ᐊᑐᐃᓐᓇᐅᑎᑦᓯᔪᔪᑦ ᒥᓂᔅᑕᒧᑦ ᐆᑦᑑᑕᐅᔪᓂᒃ ᒫᓐᓇᖃᕐᒥᕐᓂᑕᕐᓂᒃ ᖃᐅᔨᓴᖅᑏᑦ ᒥᑦᓴᐅᓯᓐᖏᓗᐊᖅᓯᒪᔭᖏᓐᓂᒃ ᐊᒥᓲᓂᖏᓐᓂᒃ ᐆᒪᔪᐃᑦ, ᖃᐅᔨᓕᑕᐃᓐᓇᖅᓱᑎᒃ ᐅᕙᑦᓯᐊᕈᓐᖑᕐᒪᑦ ᐃᓄᐃᑦ ᐅᖃᐅᓯᕆᔭᖏᑦ ᐃᓄᐃᑦ ᖃᐅᔨᒪᔭᑐᖃᖏᑦᑎᒍᑦ ᑕᒻᒪᓐᖏᒋᐊᖏᑦ.
ᒫᓐᓇᐅᑎᓪᓗᒍ, ᐃᓄᐃᑦ ᐅᑉᐱᕈᓱᒻᒪᑕ ᓇᓄᖃᕐᕕᐅᔪᑦ ᖃᓄᐃᓐᖏᑦᓯᐊᕆᐊᖏᑦ, ᖃᐅᔨᓴᖅᑎᒻᒪᕇᑦ ᐊᐃᕙᒐᓗᐊᖅᑎᓪᓗᒋᑦ ᓇᓄᐃᑦ ᐃᓄᐃᓴᓪᓕᕙᓪᓕᐊᒋᐊᖏᑦ. ᑲᑎᒪᓂᕐᒥ, ᑲᑎᒪᔨᕋᓛᑦ ᖃᓄᐃᓕᖓᓂᖏᓐᓄᑦ ᐊᑦᑕᓇᖅᑐᒦᑦᑐᑦ ᐆᒪᔪᐃᑦ ᑲᓇᑕᒥ ᐊᖏᖃᑎᖃᔪᔪᑦ ᐃᓂᓐᓂᒃ ᐅᖃᖅᓱᑎᓪᓗ ᑲᓇᑕᒥ ᓇᓄᐃᑦ ᐅᓗᕆᐊᓇᖅᑐᒦᓐᖏᒋᐊᖏᑦ. ᐅᖃᖅᓯᒪᔪᑦ ᐊᒥᓱᓐᖑᐹᓪᓕᖅᓯᒪᒋᐊᖏᑦ 17%-ᒥᒃ ᑕᐃᒪᓐᖓᓂᑦ ᖃᐅᔨᓴᖅᑕᐅᖃᑦᑕᓯᓯᒪᒻᒪᑕᓂᑦ.
ᐃᓄᐃᑦ ᐊᓯᖏᓪᓗ ᑲᑎᒪᒋᐊᖅᓯᒪᔪᑦ ᐊᖏᖃᑎᒌᒍᑎᖃᓪᓚᕆᑦᑐᑦ ᐊᑕᐅᓯᕐᒥᒃ; ᓄᓇᕐᔪᐊᑉ ᓂᕈᒥᑦᓯᕙᓪᓕᐊᓂᖓ ᐃᓱᒫᓘᑎᓪᓚᕆᐅᔪᖅ ᐅᑭᐅᖅᑕᖅᑐᒥ ᐆᒪᔪᕐᓄᑦ. ᐱᖃᓯᐅᑎᑦᓱᑎᒃ ᓇᓄᐃᑦ. ᐃᓄᐃᑦ ᓯᕗᓕᖅᑏᑦ ᓂᕆᐅᓐᓂᖃᕈᒪᔪᑦ ᑕᒪᓐᓇ ᑰᑕᓂᒃ ᐊᖑᔭᐅᕙᑦᑐᓄᑦ ᒥᑭᓪᓕᒋᐊᕆᓂᐅᒍᒪᔪᒥᒃ ᓄᖅᑲᐅᒥᑎᑦᓯᓂᐊᕆᐊᖓ.
“ᐊᖑᓇᓱᓐᓂᖅ ᑐᑭᖃᓐᖏᑦᑐᖅ ᐊᐅᑉᐸᓪᓕᐊᑎᑦᓯᓂᕐᒥᒃ ᓯᑯᒥᒃ; ᐅᑭᐅᖅᑕᖅᑐᒥ ᓂᕈᒥᑦᓯᕙᓪᓕᐊᓂᖅ ᐱᔾᔪᑕᐅᓪᓗᑎᒃ ᐳᓪᓚᐃᑦ ᐊᓂᕐᓂᖃᕐᓇᖏᑦᑐᒨᖅᐸᑦᑐᑦ ᐊᐅᑎᕆᔪᑦ ᓯᑯᒥᒃ.” ᐅᖃᖅᑐᖅ ᒥᔅᑕ ᓂᕐᓗᖓᔪᖅ. “ᑲᓇᑕᒥᐅᑦ ᖃᐅᔨᒪᔪᑦ ᓇᑲᑎᕆᓂᖅ ᓇᓐᓄᑦᑕᐅᒍᓐᓇᖅᑐᓂᒃ ᓴᐳᔾᔨᒍᑕᐅᔾᔮᓐᖏᑦᑐᖅ ᓇᓄᕐᓂᒃ ᔭᒐᐃᓂᖏᓐᓄᑦ ᐃᓂᒋᕙᑦᑕᒥᓐᓂᒃ. ᑭᓯᐊᓂᓕ, ᓇᑲᑎᕆᓂᖅ ᓇᓐᓄᑦᑕᐅᒍᓐᓇᖅᑐᓂᒃ ᐊᑦᑐᐃᓂᕐᓗᓐᓂᖃᕐᓂᐊᖅᑐᖅ ᐃᓄᐃᑦ ᐱᖅᑯᓯᖓᓐᓂᒃ.”
ᐊᒥᓱᑦ ᑲᑎᒪᖃᑕᐅᔪᑦ ᐅᖃᓕᒪᔪᔪᑦ ᒥᓂᔅᑕᒧᑦ ᐊᐅᓚᔾᔭᒋᐊᓪᓚᕆᖁᑦᓱᒍ ᓇᑲᑎᕆᓂᕐᒧᑦ ᐳᓪᓚᓂᒃ ᐊᓂᕐᓂᖃᕐᓇᖏᑦᑐᓕᐊᖅᐸᑦᑐᓂᒃ. ᐊᒻᒪᓗ, ᐃᓄᐃᑦ ᐃᓱᒪᓕᐅᕆᔪᒻᒥᔪᑦ ᒐᕙᒪᑐᖃᒃᑯᓐᓄᑦ ᐃᓱᒪᑦᓴᖅᓯᐅᕈᑕᐅᖁᔨᑦᓱᑎᒃ ᐅᑯᓇᓐᖓᑦ:
- ᐊᐃᕙᔾᔪᑎᖃᕐᓗᑎᒃ ᑲᓇᑕ-ᑲᓛᖡᑦ ᐊᐅᓚᑦᓯᖃᑎᒌᓐᓂᕐᒧᑦ ᐊᖏᖃᑎᒌᒍᑎᒥᒃ ᐃᓄᐃᑦ ᐃᓚᐅᑎᓪᓗᒋᑦ, ᑲᑐᔾᔨᖃᑎᒌᓕᕈᓐᓇᖁᓪᓗᒋᑦ ᐊᖑᓇᓱᓐᓂᕆᕙᑦᑕᒥᓐᓄᑦ ᓄᓇᖃᖃᑎᒌᕝᕕᓐᓂᒃ;
- ᐊᐅᓚᑦᓯᓂᖅ ᓇᓄᕐᓂᒃ ᑐᓐᖓᕕᖃᕐᓗᑎᒃ ᖃᑦᓯᓪᓚᕆᐅᓂᖏᓐᓂᒃ ᑐᓐᖓᕕᖃᓐᖏᖔᕐᓗᑎᒃ ᓇᓚᐅᑦᓵᖅᑕᐅᓯᒪᑐᐃᓐᓇᖅᑐᓂᒃ;
- ᐋᖅᑭᑦᓱᐃᓂᖅ ᑐᕌᒐᕆᔭᐅᔪᓂᒃ ᑐᓐᖓᕕᖃᖅᑐᓂᒃ ᓇᓄᖃᕐᕖᑦ ᐊᓯᔾᔨᖅᑕᕐᓂᖏᓐᓂᒃ;
- ᐱᖃᓯᐅᔾᔨᓗᑎᒃ ᐃᓄᓐᓂᒃ ᐃᓘᓐᓇᖏᓐᓄᑦ ᐊᑦᑐᐊᔪᓄᑦ ᓇᓄᐃᑦ ᐊᐅᓚᑕᐅᓂᖏᓐᓄᑦ, ᐱᖃᓯᐅᑎᑦᓱᓂ ᖃᐅᔨᓴᕐᓂᖅ, ᐊᒻᒪᓗ
- ᐊᒥᓱᓐᖑᐹᓪᓕᑎᑦᓯᓗᑎᒃ ᓇᓄᕐᓄᑦ ᖃᐅᔨᓴᕐᓂᐅᔪᓄᑦ ᑮᓇᐅᔭᓂᒃ ᒐᕙᒪᒃᑯᖏᓐᓄᑦ ᓄᓇᕗᑦ.
ᐃᓄᐃᑦ ᓯᕗᓕᖅᑏᑦ ᐃᖅᑲᐃᑎᑕᐅᒻᒥᔪᑦ ᒥᓂᔅᑕᒧᑦ ᐊᑖᓂ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒻᒪᕆᐅᑉ, ᒐᕙᒪᒃᑯᑦ ᑲᓇᑕᒥ ᑲᔪᓯᒋᐊᖃᕐᒥᔪᑦ ᐃᓱᒪᓯᐅᕆᓗᑎᒃ ᐃᓄᓐᓂᒃ ᐃᓱᒪᑦᓴᖅᓯᐅᕈᑎᖃᓕᕈᑎᒃ ᐊᐅᓚᔾᔭᒋᐊᕈᑕᐅᓂᐊᖅᑎᓂᒃ ᐊᑦᑐᐃᓂᖃᕈᓐᓇᖅᑐᓂᒃ ᐱᔪᓐᓇᐅᑎᖏᓐᓂᒃ ᐊᖑᓇᓱᒍᓐᓇᕐᓂᕐᒧᑦ ᑕᐅᖅᓰᒍᓐᓇᕐᓂᕐᒧᓪᓗ ᓇᓄᕐᓂᒃ.
ᑐᑭᓯᒋᐊᒃᑲᓐᓂᕈᓐᓇᖅᑐᓯ ᐅᕗᖓ:
ᕗᕌ”ᖕᑯ ᕗᓴᒥ
ᑐᖏᓕᖓ ᐊᖓᔪᖅᑳᑉ ᑐᓴᐅᒪᔪᓕᕆᓂᕐᒧᑦ
ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ
ᐅᖄᓚᐅᑖ: (867) 975-4939
ᐊᑭᖃᓐᖏᑦᑐᖅ: 1-888-646-0006
