ᑐᓴᕋᑦᓴᓕᕆᔩᑦ

(English) NTI Board of Directors proposes new Board Structure

(ᐊᒡᒌᓯ 27, 2010 – ᐃᖃᓗᐃᑦ, ᓄᓇᕗᑦ)  ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖏᔪᖅᑳᕆᑲᐃᓐᓇᖅᑕᖓ ᔭᐃᒥᓯ ᐃᑦᑐᓗᒃ ᐅᓪᓗᒥ ᓇᓗᓇᐃᖅᓯᔪᖅ ᐃᓄᓐᓄᑦ ᖃᓪᓕᕙᓪᓕᐊᓂᕐᒧᑦ ᐋᖅᑭᒃᓯᒪᔪᒥᒃ.

ᐃᓄᓐᓄᑦ ᖃᓪᓕᕙᓪᓕᐊᓂᕐᒧᑦ ᐋᖅᑭᒃᓯᒪᔪᖅ ᐃᓚᖃᖅᑐᖅ ᐊᓯᔾᔨᖁᔭᐅᓂᖏᓐᓂᒃ ᓄᓇᕗᑦ ᑲᑎᒪᔨᖏᑦ ᐊᒻᒪ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ; ᐊᑐᖅᑕᐅᔪᓐᓃᕐᓗᑎᒃ ᓯᕗᓕᖅᑎᑦ ᑎᒍᒥᐊᖅᑕᖏᑕ ᐋᖅᑮᐅᒪᓂᖏᑦ; ᐱᕕᒃᓴᖃᕐᓂᖅᓴᐅᔪᓐᓇᖁᓪᓗᒋᑦ ᐃᓅᓯᓕᕆᓂᕐᒧᑦ ᐃᓕᖅᑯᓯᓕᕆᓂᕐᒨᖓᔪᓂᓪᓗ ᐅᑯᑎᒎᓇ ᓄᓇᕗᒻᒥ ᐃᓅᓯᓕᕆᓂᕐᒧᑦ ᐱᕙᓪᓕᐊᑎᑦᑎᔩᑦ ᑲᑎᒪᔨᖏᑦ; ᐊᒻᒪ ᐋᖅᑮᓗᑎᒃ ᐃᓄᐃᑦ ᐆᒪᔪᓕᕆᓂᕐᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᖏᓐᓂᒃ.

“2006-ᖑᑎᓪᓗᒍ ᕿᒥᕐᕈᕙᓪᓕᐊᓕᓚᐅᖅᑕᕗᑦ ᑎᒥᐅᑉ ᐋᖅᑭᒃᓯᒪᖏᑦ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᓄᑦ ᐊᒻᒪ ᓄᓇᕗᑦ ᑐᙵᕕᒃ ᑎᒥᖓᑦ ᐱᐅᓯᕚᓪᓕᖁᓪᓗᒋᑦ ᐱᐊᓚᔪᒥᒃ ᐱᕙᓪᓕᐊᓇᖅᑐᒥᓪᓗ ᑲᑐᔾᔨᖃᑎᒌᑦ ᑎᑭᖃᑦᑕᖁᓪᓗᒋᑦ ᐱᓕᕆᐊᒃᓴᕆᔭᖏᑦ ᓴᐳᔾᔨᓂᕐᒧᑦ, ᓴᖅᑭᔮᖅᑎᑦᑎᓂᕐᒧᑦ, ᐊᒻᒪ ᐱᕙᓪᓕᐊᑎᑦᑎᓂᕐᒧᑦ ᐃᓄᖕᓂᒃ. ᑕᐃᒪᙵᓂᒃ ᐱᕙᓪᓕᐊᓯᒪᔪᒍᑦ ᐱᐅᓯᑎᑦᓯᕙᓪᓕᐊᓂᕐᒧᑦ, ᐃᓄᖕᓄᑦ ᖃᓪᓕᕙᓪᓕᐊᓂᖅ ᐊᒡᓗᕈᑎᐅᖕᒪᑦ ᓱᕙᓪᓕᐊᓂᖓᓄᑦ ᑎᒥᖁᑎᒃᑕ ᐃᓄᖕᓂᒃ ᐱᔾᔪᔾᔨᓂᕐᒧᑦ.” ᐅᖃᖅᑐᖅ ᐃᑦᑐᓗᒃ.

“ᓄᑖᑦ ᑐᙵᕕᒃᑯᑦ ᓯᕗᓕᖅᑏᑦ ᑲᑎᒪᔨᕋᓛᖏᑦ ᐃᓚᖃᕐᓂᐊᖅᐳᑦ ᑐᙵᕕᒃᑯᑦ ᐊᖏᔪᖅᑳᖓ ᐊᒻᒪ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᑦ ᐊᖏᔪᖅᑳᖏᓐᓂᒃ. ᑕᐃᒫᒃ ᑐᙵᕕᒃᑯᑦ ᐊᒻᒪ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᓕᕆᖃᑎᒌᑦᑎᐊᓂᖅᓴᐅᓂᐊᖅᑐᑦ ᐊᒻᒪ ᐊᑐᑦᑎᐊᓂᖅᓴᐅᓗᒋᑦ ᐃᑲᔫᑎᒃᓴᕗᑦ ᖄᖁᖃᑦᑕᐅᑎᔪᓐᓃᕐᓗᑎᒃ ᐊᒻᒪ ᐸᕐᓇᐸᓪᓕᐊᓂᕐᒧᑦ ᐃᓱᒪᓕᐅᕈᓐᓇᓂᖅᓴᐅᓕᕐᓗᑕ.” ᐅᖃᖅᑐᖅ ᐃᑦᑐᓗᒃ. “ᐋᔩᖃᑎᒌᒐᓱᐊᖅᑎᓪᓗᑕ ᓯᕗᓕᖅᑏᑦ ᑎᒍᒥᐊᖅᐸᒃᑕᖏᑦ ᐱᓕᕆᐊᖑᔭᕆᐊᖃᓚᐅᕐᒪᑕ, ᑭᓯᐊᓂ ᐊᕐᕌᒍᓂ ᐊᓂᒍᖅᑐᓂ ᐱᓕᕆᔪᓐᓇᖅᓯᕚᓪᓕᖅᓯᒪᔪᒍᑦ ᑎᒥᐅᓪᓗᑕ ᑖᓐᓇ ᐋᖅᑭᒃᓯᒪᓂᕆᓚᐅᖅᑕᑦᑕ ᐅᖓᑖᓄᑦ ᐊᒻᒪ ᖃᐅᔨᓴᒪᓕᖅᖢᑕ ᐊᑐᐊᒐᕐᓂᒃ ᐊᐅᒪᑦᓯᓂᕐᒧᑦ ᐋᖅᑭᒃᓯᒪᓂᖅ ᐱᐅᓂᖅᓴᐅᒐᔭᕐᓂᖓᓂᒃ ᑎᒥᖁᑎᑦᑎᓐᓄᑦ ᒫᓐᓇᐅᔪᖅ.”

ᒫᓐᓇ, ᑐᙵᕕᒃᑯᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓂ ᐃᒃᓯᕚᖃᑦᑕᕐᒪᑕ ᒪᕐᕉᒃ ᐊᖏᔪᖅᑳᑉ ᑐᒡᓕᖏᒃ ᐊᒻᒪ ᐊᖏᔪᖅᑳᖅ ᑖᒃᑯᐊ ᓂᕈᐊᖅᑕᐅᓯᒪᕙᒃᖢᑎᒃ ᓄᓇᑖᖃᑕᐅᓯᒪᔪᓄᑦ. ᐊᑐᐊᒐᕐᓂᒃ ᐊᐅᓚᑦᓯᓂᕐᒧᑦ ᐋᖅᑭᒃᓯᒪᓕᖅᐸᑦ ᑲᑎᒪᔩᑦ ᐱᓕᕆᐊᒃᓴᖃᕐᓂᐊᖅᑐᑦ ᐋᖅᑭᒃᓯᒪᓂᕐᒧᑦ ᐊᑐᖅᑕᐅᔭᕆᐊᓕᖕᓂᒃ, ᐊᑐᐊᒐᕐᓂᒃ ᐊᒻᒪ ᐸᕐᓇᒍᑎᒃ ᑎᒥᐅᔪᒧᑦ; ᑎᓕᓯᕙᒡᓗᑎᒃ ᐱᓕᕆᐊᒃᓴᐅᔪᓄᑦ ᐊᒻᒪ ᐱᓕᕆᐊᖃᖅᑐᓄᑦ ᐋᖅᑭᒃᓯᒪᔾᔪᑎᐅᔪᓂᒃ, ᐊᑐᐊᒐᕐᓂᖅ ᐊᒻᒪ ᐸᕐᓇᐅᑎᓂᒃ; ᐊᒻᒪᓗ ᐊᐅᓚᑦᓯᔨᒻᒪᕆᒃ ᖃᐅᔨᒪᑦᓯᐊᖁᓪᓗᒍ ᐱᓕᕆᐊᕆᔭᐅᔭᕆᐊᓕᖕᓂᒃ.

“ᐃᓅᓯᓕᕆᓂᖅ ᐊᒻᒪ ᐃᓕᖅᑯᓯᓕᕆᓂᖅ ᐱᖕᒪᕆᐅᓂᖅᓴᐅᖃᑕᐅᒻᒪᑕ ᐃᓄᖕᓄᑦ. ᐃᓕᖅᑯᓯᕗᑦ ᐆᒻᒪᐅᑏᓐᓇᖅᑕᕗᑦ ᐊᒻᒪ ᐃᓄᐃᑦ ᓱᓕ ᐅᓪᓗᒥ ᐊᖑᓇᓱᖃᑦᑕᖅᑐᑦ/ᑲᑎᖃᑦᑕᖅᑐᑦ. ᑎᒥᖁᑎᑦᑕ ᐋᖅᑭᒃᓯᒪᓂᖓᓂᒃ ᐋᖅᑭᒋᐊᖅᓯᓪᓗᑕ ᓴᐳᑎᔪᓐᓇᓂᖅᓴᕆᓂᐊᖅᐸᕗᑦ ᓴᖅᑭᔮᖅᑎᓂᖅᓴᕆᓗᒍᓗ ᐃᓕᖅᑯᓯᕗᑦ, ᐅᖃᐅᓯᕗᑦ ᐊᒻᒪ ᐱᖅᑯᓯᕗᑦ.” ᐅᖃᖅᑐᖅ ᐃᑦᑐᓗᒃ.

ᑕᒪᕐᒥᒃ ᐊᖏᔪᖅᑳᑉ ᑐᒡᓕᖏᑦ ᓱᓕ ᓂᕈᐊᖅᑕᐅᖃᑦᑕᓂᐊᖅᑑᒃ ᐊᑎᖃᖃᑕᐅᔪᓄᑦ, ᐊᑕᐅᓯᖅ ᐊᖏᔪᖅᑳᑉ ᑐᒡᓕᐊ ᐃᒃᓯᕙᐅᑕᐅᖃᑦᑕᓂᐊᖅᑐᖅ ᓄᓇᕗᒻᒥ ᐃᓅᓯᓕᕆᓂᕐᒧᑦ ᑲᑎᒪᔨᓄᑦ ᐊᒻᒪ ᐊᐃᑉᐹ ᐃᒃᓯᕙᐅᑕᐅᓗᓂ ᓄᓇᕗᒻᒥ ᐆᒪᔪᓕᕆᔨᒃᑯᑦ ᑲᑎᒪᔨᖏᓐᓄᑦ.

“ᐊᒡᓗᕆᐊᕈᑎᒋᒃᑲᓂᕐᓂᐊᖅᑕᕗᑦ ᐊᕕᒃᑐᖅᓯᒪᔪᓂ ᐆᒪᔪᓕᕆᔩᑦ ᑲᑐᔾᔨᖃᑎᒌᖏᑦ ᐅᖃᖃᑎᒋᖃᑦᑕᕐᓗᒋᑦ ᐱᕙᓪᓕᐊᑎᑦᑎᑎᓪᓗᑕ ᓄᓇᓄᒻᒥ ᐆᒪᔪᓕᕆᓂᕐᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᖏᓐᓂᒃ.” ᐱᔭᕇᑐᖅ ᐃᑦᑐᓗᒃ.

-30-

ᑐᑭᓯᒋᐊᒃᑲᓐᓂᕈᒪᒍᕕᑦ:

ᕗᕋᖕᑯ ᐳᓴᒥ
ᑐᑭᒧᐊᑦᑎᑦᑎᔨ ᑐᓴᐅᒪᔪᓕᕆᔨᒃᑯᑦ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑎᖓ: (867) 975-4939 ᐊᑭᖃᙱᑦᑐᖅ: 1-888-646-0006
fbuscemi @ tunngavik.com