ᑐᓴᕋᑦᓴᓕᕆᔩᑦ

ᑐᓐᖓᕕᒃᑯᑦ ᑲᑎᒪᔨᖏᑦ ᐃᖅᑲᓇᐃᔭᖅᑎᖏᓪᓗ ᐱᖃᑕᐅᓂᐊᖅᑐᑦ ᓴᐳᔾᔨᓯᒪᓇᓱᐊᕐᓂᕐᒥᒃ ᐃᓅᓯᕐᒥᒃ ᑭᐱᓯᓐᖏᑲᓐᓂᕈᑎᒃᓴᓄᑦ ᐃᑲᔫᑎᒃᓴᓂᒃ ᐃᓕᓐᓂᐊᓂᕐᒥᒃ

ᓄᓇᕗᑦ ᑐᓐᖓᕕᒃᑯᑦ ᐊᖏᔪᖅᑳᖓ ᑳᑎ ᑕᐅᑐᓐᖏ ᐅᓪᓗᒥ ᐅᖃᖅᑲᐅᔪᖅ ᑐᓐᖓᕕᒃᑯᑦ ᑲᑎᒪᔨᖏᑦ ᐃᖅᑲᓇᐃᔭᖅᑎᖏᓪᓗ ᑕᒪᐃᓐᓂ ᓯᑕᒪᓂ ᓄᓇᓕᖕᓂ ᐊᓪᓚᕝᕕᖃᕐᕕᖏᓐᓂ ᐱᕕᖃᖅᑎᑕᐅᓂᐊᕐᓂᖏᓐᓂᒃ ᐱᖃᑕᐅᒍᒪᑉᐸᑕ ᐃᓚᒋᔭᐅᔪᓐᓇᕐᓂᐊᕐᓂᖏᓐᓂ ᓴᐳᔾᔨᓯᒪᓇᓱᐊᕐᓂᕐᒥᒃ ᐃᓅᓯᕐᒥᓐᓂ ᑭᐱᓯᓐᖏᑲᓐᓂᕈᑎᒃᓴᓄᑦ ᐃᑲᔫᑎᒃᓴᓂᒃ ᐃᓕᓐᓂᐊᓂᕐᒥᒃ. ᑖᓐᓇ ᐅᓪᓘᓐᓃᑦ ᒪᕐᕉᓐᓂᒃ ᐃᓕᓐᓂᐊᕐᓂᐅᓂᐊᖅᑐᖅ ᐃᓅᓯᕐᒥᒃ ᑭᐱᓯᓐᖏᑲᓐᓂᕈᑎᒃᓴᓄᑦ ᐃᑲᔫᑎᒃᓴᓂᒃ ᐃᓕᓴᐃᔾᔪᑕᐅᖃᑦᑕᓲᖅ ᐃᓕᓴᖅᓯᒋᐅᖅᓴᓂᕐᒥᒃ ᐃᑲᔪᖅᑕᐅᒋᐊᓕᖕᓂᒃ ᐃᓅᓯᕐᒥᓐᓂᒃ ᑭᐱᓯᒍᒪᔪᓂᒃ, ᐅᖃᖃᑎᖃᕆᐅᖅᓴᓂᕐᒥᒃ ᐃᓅᓯᕐᒥᓐᓂᒃ ᑭᐱᓯᒍᒪᔪᒥᒃ, ᐊᒻᒪᓗ ᐊᐅᓚᓂᕆᔭᐅᒋᐊᓕᖕᓂᒃ ᑲᓱᖅᑎᑦᓯᓂᕐᒥᒃ ᐃᓅᓯᕐᒥᓂᒃ ᑭᐱᓯᒍᒪᔪᒥᒃ ᐃᑲᔪᖅᑕᐅᕕᒋᒋᐊᓕᖓᓄᑦ.

“ᐃᓄᓕᒫᑦᓯᐊᑦ ᓄᓇᕗᒻᒥ ᐊᒃᑐᖅᑕᐃᓐᓇᐅᓯᒪᕗᑦ ᐃᓅᓯᕐᒥᒃ ᑭᐱᓯᔪᓄᑦ. ᑕᒪᓐᓇ ᐊᑲᐅᓐᖏᓪᓕᐅᕈᑕᐅᔪᖅ ᐊᒃᑐᐃᓂᓕᒃ ᐅᕙᑦᑎᓐᓄᓕᒫᖅ. ᒪᓂᒪᑎᑕᐅᓂᖓ ᓴᐳᔾᔨᓯᒪᒋᐅᖅᓴᓂᕐᒥᒃ ᐃᓅᓯᕐᒥᒃ ᑭᐱᓯᓐᖏᑲᓐᓂᕈᑎᒃᓴᓄᑦ ᐃᑲᔫᑎᒃᓴᓂᒃ ᐃᓕᓐᓂᐊᖅᑎᑕᐅᓂᒃᑯᑦ ᑲᑎᒪᔨᖁᑎᑦᑎᓐᓄᑦ ᐃᖅᑲᓇᐃᔭᖅᑎᑎᓐᓄᓪᓗ, ᑐᓐᖓᕕᒃᑯᑦ ᑐᓴᖅᑎᑦᓯᒋᐊᓪᓚᒍᑎᒋᔭᖓ ᓂᐱᖅᑯᖅᑐᔫᔮᕈᑎᒋᕚᑦ ᑐᓂᓯᒪᑦᓯᐊᓂᑦᑎᓐᓂᒃ ᓴᐳᔾᔨᓯᒪᒋᐊᖃᑦᑕᓂᕐᒥᒃ ᐃᓅᓯᕐᒥᒃ ᑭᐱᓯᖃᑦᑕᖏᔾᔪᑎᒃᓴᓄᑦ ᐃᑲᔫᑎᒃᓴᓂᒃ ᓄᓇᕗᒻᒥ,” ᐅᖃᓚᐅᖅᑐᖅ ᑕᐅᑐᓐᖏ.

ᑕᐅᑐᓐᖏ ᑐᓴᖅᑕᐅᑎᑕᖓ ᓴᖅᑭᖅᑐᖅ ᐱᓇᓱᐊᕈᓯᒐᓚᑐᐃᓐᓇᐃᑦ ᑐᓐᖓᕕᒃᑯᑦ ᐊᒻᒪᓗ ᑲᑐᔾᔨᖃᑎᒋᔭᖏᑦ ᓴᖅᑮᓚᐅᖅᑎᓪᓗᒋᑦ ᓄᓇᕗᒻᒥ ᐃᓅᓯᕐᒥᒃ ᑭᐱᓯᖃᑦᑕᖏᔾᔪᑎᒃᓴᓄᑦ ᐅᖑᒪᑦᓯᔾᔪᑎᒃᓴᓄᑦ ᑐᑭᒧᐊᒍᑎᒃᓴᑦ ᐊᐅᓚᔾᔭᐃᒋᐊᕐᓂᕐᒧᑦ ᐸᕐᓇᐅᑎᓄᑦ. 2011-2014 ᐊᐅᓚᔾᔭᐃᒋᐊᕈᑎᒃᓴᑦ ᐸᕐᓇᐅᑏᑦ ᐸᕐᓇᐅᓯᐊᖑᓚᐅᖅᑐᑦ ᑲᑐᔾᔨᖃᑎᒌᒍᑕᐅᖏᓐᓇᑐᒃᑯᑦ ᑐᓐᖓᕕᒃᑯᓐᓂᒃ, ᓄᓇᕗᑦ ᒐᕙᒪᖓᓂᒃ, ᐃᓴᒃᓯᒪᒋᑦ ᐃᓅᓯᕐᒥᒃ ᑲᑎᒪᔨᖏᑦ, ᐊᒻᒪᓗ ᐸᓖᓯᒃᑯᓐᓂᒃ RCMP.

ᑕᐅᑐᓐᖏ ᐊᔪᐃᓐᓇᕆᐊᖅᑲᐅᔪᖅ ᓄᓇᕗᒻᒥ ᐃᓅᓯᕐᒥᒃ ᒥᐱᓯᖃᑦᑕᖏᔾᔪᑎᒃᓴᓄᑦ ᐅᖑᒪᑦᓯᔾᔪᑎᒃᓴᓄᑦ ᑐᑭᒧᐊᒍᑎᒃᓴᓄᑦ ᑲᑐᔾᔨᖃᑎᒌᑦᑐᓂᒃ ᒪᓂᒪᑎᑦᓯᖁᔨᓪᓗᓂ ᐃᑲᔪᕆᐊᕈᑎᒃᓴᒧᑦ ᐃᓕᓐᓂᐊᑎᑦᓯᖁᔨᓪᓗᓂ ᒐᕙᒪᓕᕆᔨᖁᑎᖏᓐᓂᒃ ᐊᒻᒪᓗ ᐃᖅᑲᓇᐃᔭᖅᑎᖏᓐᓂᒃ.

“ᐃᓅᓯᖅ ᐊᓐᓂᓇᕐᒪᑦ ᑭᓇᐅᒐᓗᐊᖅᐸᑦ ᑐᓐᓂᖅᑯᓯᐊᕆᓯᒪᒐᑦᑎᒍ. ᓄᓇᕗᒻᒥᐅᓕᒫᑦ ᓇᖕᒥᓂᖅ ᐊᒻᒪᓗ ᐊᔪᓐᖏᓂᕐᒥᒍᑦ ᐃᑲᔫᑎᒃᓴᖃᕐᒪᑦ ᐅᖑᒪᑦᓯᒋᐊᖃᑦᑕᓂᕐᒥᒃ ᐃᓅᓯᕐᒥᒃ ᑭᐱᓯᓐᖏᔾᔪᑎᒃᓴᑲᓐᓂᕐᓂᒃ. ᒫᓐᓇ ᐊᑐᖅᑕᕗᑦ ᐃᓅᓯᑦᑎᓐᓂ ᓈᖕᒪᓐᖏᓗᐊᕐᒪᑦ ᐊᒻᒪᓗ ᐃᑲᔪᕆᐊᕈᑦᑕ ᖁᕕᐊᓇᕐᓂᓴᒃᑰᕈᓐᓇᖅᑐᒍᑦ,” ᐅᖃᓚᐅᖅᑐᖅ ᑕᐅᑐᓐᖏ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: