ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦᑕ ᑐᒡᓕᐊ ᐊᖓᔪᖅᑳᑉ ᔭᐃᒻᔅ ᐃᑦᑐᓗᒃ ᐅᓪᓗᒥ ᑐᓐᖓᓱᒃᑎᑦᑎᔪᖅ ᐊᖏᕈᑕᐅᓂᖓᓂᒃ ᐱᖁᔭᒃᓴᖅ C-19, ᐃᓱᓕᑎᑦᓯᔪᖅ ᖁᑭᐅᑎᑯᑖᑦ ᑎᑎᖅᑕᐅᓯᒪᖃᖅᑕᕆᐊᖃᕐᓂᖏᓐᓄᑦ ᐱᖁᕐᒥᒃ, ᑲᓇᑕᐅᑉ ᒪᓕᒐᓕᐅᕐᕕᒡᔪᐊᖓᓂ.

“ᓄᓇᕗᑦ ᑐᓐᖓᕕᒃᑯᑦ ᐃᑲᔪᖅᓱᑦᓯᐊᖅᑐᑦ ᐊᑦᑕᕐᓇᖅᑐᖃᓐᖏᑦᑐᒥᒃ ᐊᑐᖅᑕᐅᒋᐊᖃᕐᓂᖏᓐᓂᒃ ᖁᑭᐅᑏᑦ ᑲᓇᑕᒥ, ᑭᓯᐊᓂ ᑖᓐᓇ ᖁᑭᐅᑎᓄᑦ ᐱᖁᔭᖅ ᐊᑐᓕᕋᑖᖅᑎᓪᓗᒋᑦ 1995, ᐊᒡᕕᐊᕈᑕᐅᓕᓚᐅᕐᒪᑦ ᐃᓄᐃᑦ ᐊᖑᓇᓱᒍᓐᓇᕐᓂᖏᓐᓄᑦ ᓂᕿᒃᓴᓂᒃ. ᑖᓐᓇ ᖁᑭᐅᑎᓄᑦ ᐱᖁᔭᖅ ᐃᓱᒪᒋᔭᖃᓚᐅᓐᖏᒻᒪᑦ ᖃᓄᖅ ᐃᓅᒐᓱᐊᒐᕆᐊᖃᕐᓂᕐᒥᒃ ᓄᓇᕗᒥ. ᖁᑭᐅᑏᑦ ᐱᑕᖃᕆᐊᖃᕐᒪᑕ ᐃᓄᖕᓄᑦ ᐊᑐᖅᑕᐅᓗᑎᒃ ᓂᕿᒃᓴᖅᓯᐅᕈᑕᐅᓗᑎᒃ ᖃᑕᓐᖑᑎᒥᓄᑦ.” ᐅᖃᓚᐅᖅᑐᖅ ᐃᑦᑐᓗᒃ.

ᒪᓕᒐᓕᐅᖅᑏᑦ ᓂᕈᐊᕈᑎᖃᓚᐅᖅᑐᑦ ᑖᑦᓱᒥᖓ ᐱᖁᔭᑦ C-19 ᐅᓐᓄᒃ ᑲᓇᑕᐅᑉ ᒪᓕᒐᓕᐅᕐᕕᒡᔪᐊᖓᓂ. ᑖᓐᓇ ᐱᖁᔭᒃᓴᖅ ᐊᖏᖅᑕᐅᒡᒐᐃᓐᓇᓚᐅᖅᑐᖅ ᐃᖏᖅᑐᑦ 159 ᐊᖏᓐᖏᑦᑐᑦ 130 ᐃᓱᓕᑎᑦᓯᓪᓗᓂ ᖁᑭᐅᑎᑯᑖᑦ ᑎᑎᖅᑕᐅᓯᒪᖃᑦᑕᕆᐊᖃᕐᓂᖏᓐᓂᒃ. ᑖᓐᓇ ᐱᖁᔭᖅ ᑖᒃᑯᑎᒎᕆᐊᖃᓕᕐᒥᔪᑦ ᐃᑦᑐᐃᑦ ᑲᑎᒪᔨᖏᑎᒍᑦ ᒪᓕᒐᕈᒻᒪᕆᓚᐅᓐᖏᓪᓗᓂ. ᐊᖏᕈᑕᐅᑦᓯᐊᖅᐸᑦ, ᖁᑭᐅᑎᖃᖅᑐᑦ ᑎᑎᖅᑕᐅᑎᑦᓯᒋᐊᖃᔾᔮᒍᓐᓃᖅᑐᑦ ᖁᑭᐅᑎᒥᓂᒃ. ᑭᓯᐊᓂ ᖁᑭᐅᑎᖃᖅᑐᑦ ᓱᓕ ᐱᔪᓐᓇᐅᑎᖃᕆᐊᖃᕐᓂᐊᖅᑐᑦ ᐱᓯᒪᒍᓐᓇᕐᓂᕐᒥᒃ ᐊᒻᒪ ᓂᐅᕕᕐᓂᕐᒧᑦ ᓚᐃᓴᓐᓯᒥᒃ.

“ᐅᓐᓅᓚᐅᖅᑐᖅ ᓂᕈᐊᕐᓂᖅ ᐊᕝᕙᑐᐃᓐᓇᕆᓚᐅᕐᒪᒍ ᐊᒃᓱᕉᑎᖓᑦᑕ ᓄᓇᕗᑦ ᑐᓐᖓᕕᒃᑯᑦ ᐱᔾᔪᑎᒋᓪᓗᒋᑦ ᖁᑭᐅᑎᓄᑦ ᐱᖁᔭᖅ. ᑖᒃᑯᐊ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑏᑦ ᓇᓗᓇᐃᖅᓯᒪᒐᓗᐊᕐᒪᑕ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᖑᓇᓱᒍᓐᓇᕐᓂᕐᒧᑦ ᓚᐃᓴᓐᓯᖃᓐᖏᓪᓗᑎᒃ, ᐱᔪᓐᓇᐅᑎᖃᓐᖏᓪᓗᑎᒡᓘᓐᓃᑦ. ᑕᐃᒪᓐᖓᓂᒃ ᔪᓚᐃ 2003, ᓄᖅᑲᖅᑎᑦᓯᒍᑕᐅᑲᐃᓐᓇᓚᐅᖅᑐᖅ ᓄᓇᕗᑦ ᐃᖅᑲᖅᑐᐃᕕᖏᑎᒍᑦ ᓄᖅᑲᖅᑎᑦᓯᓚᐅᕐᒪᑦ ᒪᓕᒃᑕᐅᒋᐊᖃᕐᓂᖏᓐᓂᒃ ᑎᑎᖅᓯᒪᑎᑦᓯᒋᐊᖃᕐᓂᖅ ᐊᒻᒪ ᓚᐃᓴᓐᓯᑖᕆᐊᖃᕐᓂᖅ ᒪᓕᒡᓗᒋᑦ ᖁᑭᐅᑎᓄᑦ ᐱᖁᔭᖅ ᓄᓇᕗᒥ ᐃᓄᖕᓄᑦ ᖁᑭᐅᑎᓂᒃ ᐊᑐᖅᐸᒃᑐᑦ ᐊᖑᓇᓱᒋᐊᕈᑎᒋᓪᓗᒋᑦ. ᓄᓇᕗᑦ ᑐᓐᖓᕕᒃᑯᑦ ᑲᔪᓯᓯᒪᐃᓐᓇᕐᓂᐊᖅᑐᑦ ᐱᓕᕆᖃᑎᒋᓗᒋᑦ ᒐᕙᒪᑐᖃᒃᑯᑦ ᐃᓕᑕᕆᔭᐅᖁᓪᓗᒋᑦ ᐃᓄᐃᑦ ᐱᔪᓐᓇᐅᑎᖏᑦ ᐊᑖᒍᑦ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓂ, ᓴᖅᑭᔮᖅᑎᓪᓗᒍᓗ ᐊᑦᑕᕐᓇᖏᑦᑐᒥᒃ ᐊᑐᕆᐊᖃᕐᓂᖅ ᐊᒻᒪ ᑐᖅᑯᖅᓯᓯᒪᑦᓯᐊᕆᐊᖃᕐᓂᖅ ᖁᑭᐅᑎᓂᒃ.” ᐅᖃᓚᐅᖅᑐᖅ ᐃᑦᑐᓗᑦ. “ᐱᐅᓂᖅᐹᖑᒐᔭᖅᑐᖅ ᖁᑭᐅᑎᓕᕆᔾᔪᑎᖃᕐᓂᖅ ᓄᓇᕗᒧᑦ ᑐᕌᖓᓗᒍ ᐋᖅᑭᒃᑕᐅᓯᒪᔪᑦ. ᖁᑭᐅᑎᓂᒃ ᐅᖃᐅᓯᖃᖅᑎᓪᓗᒋᑦ, ᐃᓘᓐᓇᖏᓐᓄᑦ ᓈᒻᒪᓕᕈᓐᓇᖏᒻᒪᑦ ᑲᓇᑕᒥ.”