(ᒪᐃ 16, 2022, ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᑐᙵᓴᐃᔪᖅ ᐃᓱᒪᓕᐅᕈᑎᖓᓂᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔩᑦ (NIRB) ᐃᓱᒪᒃᓴᖅᓯᐅᑲᓐᓂᕈᑎᒧᑦ ᐅᓂᒃᑳᖏᓐᓂ ᐹᕕᓐᓛᓐ ᓴᕕᒃᓴᓂᒃ ᐅᔭᕋᓐᓂᐊᑎᒃᑯᑦ ᑯᐊᐳᕇᓴᓐ (ᐹᕕᓐᓛᓐ) ᑐᒃᓯᕋᐅᑎᖓᓄᑦ ᓄᓘᔮᓐᓂ ᐱᓕᕆᐊᖅ ᑲᒪᒋᔭᐅᓂᖓ 2-ᒧᑦ.
NIRB−ᑯᑦ ᐃᓱᓕᒍᑎᖃᓚᐅᖅᑐᑦ (ᒪᑉᐱᒐᖅ 252 ᐅᓂᒃᑳᓂ):
- ᑖᓐᓇ “ᐱᓕᕆᐊᖑᔪᒪᔪᒧᑦ 2 ᐱᕙᓪᓕᐊᓂᕐᒧᑦ ᑐᒃᓯᕋᐅᑦ ᓴᖅᑭᕈᑕᐅᒍᓐᓇᖅᑐᖅ ᐅᔾᔨᓇᖅᑐᒥᒃ ᓱᕋᐃᕙᓪᓕᐊᔪᓂᒃ ᐊᕙᑎᒥᒃ ᐊᒻᒪᓗ ᐃᓅᓯᕐᒥ−ᒪᑭᒪᔾᔪᑎᓂᒃ ᐊᒃᑐᐃᓗᓂ ᓄᓇᕗᒻᒥ ᐊᒻᒪᓗ ᐊᕙᖕᒧᑦ ᐊᒃᑐᐃᓂᖃᕈᓐᓇᕐᒥᔪᖅ ᑕᕆᐅᕐᒥᐅᑕᕐᓂᒃ ᐆᒪᔪᓂᒃ ᐃᖃᓗᓐᓂᓪᓗ ᐊᒻᒪᓗ ᑕᕆᐅᕐᒥᒃ ᓯᓚᑖᓂ ᓄᓇᕗᑦ ᓄᓇᖓᑕ ᓇᓗᓇᐃᖅᑕᐅᓯᒪᓂᖓᑕ”; ᐊᒻᒪᓗ
- ᑖᓐᓇ “ᐅᔾᔨᓇᕐᓂᖓ ᓱᕋᐃᒍᓐᓇᕐᓂᖓᓂᒃ ᓴᐳᔾᔭᐅᓯᒪᑦᓯᐊᕈᓐᓇᖏᑦᑐᑦ, ᐃᑯᓪᓚᐅᒥᑎᑕᐅᓗᓂ, ᐅᕝᕙᓘᓐᓃᑦ ᐋᖅᑭᒋᐊᖅᑕᐅᓗᓂ ᐊᐅᓚᑕᐅᓂᖓ, ᐊᒻᒪᓗ ᒥᐊᓂᖅᓯᔾᔪᑎᓅᖓᔪᓂᒃ.”
ᑕᕝᕙᙶᖅᑐᖅ, NIRB−ᑯᑦ ᓇᓗᓇᐃᕆᖃᑦᑕᖅᑐᑦ ᐊᒻᒪᓗ ᐊᑐᓕᖁᔨᔾᔪᑎᓕᐅᖅᑐᑎᒃ ᒥᓂᔅᑕ ᑖᓐ ᕙᐃᒃ, ᒥᓂᔅᑕ ᐅᑭᐅᖅᑕᖅᑐᓕᕆᓂᕐᒧᑦ, ᓄᓘᔮᒃ ᑲᒪᒋᔭᐅᓂᖓ 2 ᐱᕙᓪᓕᐊᑎᑦᓯᓂᕐᒧᑦ ᑐᒃᓯᕋᐅᑦ ᑲᔪᓯᙱᑎᑕᐅᑐᐃᓐᓇᕆᐊᓕᒃ.
ᑐᙵᕕᒃᑯᑦ ᐃᑲᔪᖅᓱᐃᔪᑦ NIRB−ᑯᑦ ᐱᓇᓱᐊᕐᓂᖓᓂᒃ, ᐊᒻᒪᓗ ᐊᔭᐅᖅᑐᐃᔪᑦ ᒥᓂᔅᑕ ᕚᓐᑎᐅᒥᒃ ᐊᖏᖁᓪᓗᒍ NIRB ᐱᓇᓱᐊᒻᒪᕆᓐᓂᖓᓂᒃ ᐊᒻᒪᓗ ᐃᓱᓕᒍᑎᓂᒃ.
“ᐅᔾᔨᓇᖅᑐᒥᒃ ᐊᒻᒪᓗ ᓈᖕᒪᖏᑦᑐᒥᒃ ᐊᒃᑐᐃᓂᖃᑐᐃᓐᓇᕆᐊᖃᕐᓂᖓᓄᑦ ᑕᕆᐅᕐᒥᐅᑕᓂᒃ ᐆᒪᔪᓂᒃ, ᑕᕆᐅᖅ, ᐃᖃᓗᐃᑦ, ᑐᑦᑐᑦ ᐊᒻᒪᓗ ᐊᓯᖏᑦ ᐱᓱᑦᑏᑦ ᓂᕐᔪᑏᑦ, ᐱᕈᖅᑐᐃᑦ ᐊᒻᒪᓗ ᐃᒪᑦᓯᐊᕙᒃ ᓈᖕᒪᑦᓯᐊᑐᒃᑯᑦ ᐃᑯᓪᓚᐅᒥᓯᑎᑦᓯᑎᒃᓴᖃᙱᑐᐃᓐᓇᕆᐊᓕᒃ ᐊᒻᒪᓗ ᓈᖕᒪᖏᑦᑐᒥᒃ ᐊᒃᑐᐃᓂᖃᕐᓗᓂ ᐃᓄᐃᑦ ᐊᖑᓇᓱᖃᑦᑕᕐᓂᖏᓐᓂᒃ, ᐱᖅᑯᓯᒃᑯᑦ ᐊᐅᓚᓂᐅᕙᑦᑐᓂᒃ ᐊᒻᒪᓗ ᓂᕆᔭᒃᓴᖃᑦᓯᐊᓂᕐᒥᒃ, ᐅᑉᐱᕆᔭᕗᑦ ᑖᓐᓇ ᐃᓱᒪᓕᐅᕈᑕᐅᔪᖅ ᑕᒻᒪᙱᒋᐊᖓ ᐃᓄᓐᓄᑦ ᐊᒻᒪᓗ ᑕᒻᒪᙱᒋᐊᖓ ᐃᓱᒪᓕᐅᕈᑦ ᐊᒃᑐᖅᑕᐅᓯᒪᔪᓄᑦ ᓄᓇᓕᓐᓄᑦ ᒫᓐᓇᐅᓂᖓᓂ,” ᐅᖃᖅᑐᖅ ᐊᖓᔪᖅᑳᖅ ᐊᓗᑭ ᑰᑦᑎᖅ.
“ᓂᕆᐅᒋᒐᓗᐊᖅᑐᑎᒍ ᐃᓱᒋᒋᐊᖓᓂᐅᒃ ᐱᓕᕆᐊᖑᒍᒪᔪᒧᑦ 2, ᐃᓱᓕᒍᑕᐅᒋᐊᖃᙱᑦᑐᖅ ᐊᖅᑯᓯᐅᕐᓂᕐᒧᑦ ᐹᕕᓐᓚᓐ ᐊᒻᒪᓗ ᓄᓘᔮᒃ ᐱᓕᕆᐊᖓᓄᑦ,” ᔭᐃᒥᓯ ᐃᑦᑐᓗᒃ, ᐊᖓᔪᖅᑳᑉ−ᑐᒡᓕᐊ ᑐᙵᕕᒃᑯᓐᓂ ᐅᖃᖅᑐᖅ, “ᐹᕕᓐᓛᓐ ᓱᓕ ᑎᒍᒥᐊᖅᑐᖅ ᐊᖏᖅᑕᐅᓯᒪᔪᒥᒃ ᐱᓕᕆᐊᒧᑦ ᓇᓗᓇᐃᒃᑯᑕᕐᒥᒃ ᓴᓇᒍᓐᓇᕈᑎᒥᒃ ᐊᑕᖏᖅᑐᒥᒃ ᐅᔭᕋᓐᓂᐊᕕᖕᒥᒃ ᐊᒻᒪᓗ ᑐᓂᓯᖃᑦᑕᓂᕐᒥᒃ ᐃᑲᔫᑎᔪᓂᒃ ᓈᖕᒪᑦᑐᒃᑯᑦ ᓄᓇᕗᑦ ᒪᑭᒪᔾᔪᑎᖏᓐᓄᑦ ᐃᓚᒋᔭᐅᓪᓗᑎᒃ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᓐᓄᑦ. ᒪᑐᐃᖓᔪᒍᑦ ᐊᒻᒪᓗ ᐊᖏᕈᑎᒋᓯᒪᔭᕗᑦ ᐃᖅᑲᓇᐃᔭᖃᑎᖃᕐᓂᖅ ᐹᕕᓐᓚᓐᒥᒃ ᐊᒻᒪᓗ ᐊᒃᑐᖅᑕᐅᓯᒪᔪᓂᒃ ᓄᓇᓕᓐᓂᒃ ᐋᖅᑭᑦᑕᐅᒪᐃᑦᑐᓄᑦ ᓄᓇᓕᓐᓂ ᐃᓱᒫᓘᑎᓄᑦ ᓲᕐᓗ ᐳᔪᕐᓗᒃ ᐊᒻᒪᓗ ᐊᒃᑐᐃᓯᒪᓂᖏᓐᓂᒃ ᐹᕕᓐᓛᓐ ᐅᒥᐊᕐᔪᐊᒃᑯᑦ ᐅᓯᖃᑦᑕᖅᑐᓂᒃ ᐊᐅᓚᑕᐅᔪᓂᒃ, ᐊᓯᖏᓐᓂᓗᑦᑕᐅᖅ, ᒪᓕᓪᓗᒋᑦ ᑐᙵᕕᒃᑯᑦ ᐊᑐᐊᒐᖏᑦ ᐃᑲᔪᖅᓱᐃᓂᕐᒧᑦ ᓇᓕᒧᒌᒥᒃ ᐊᒻᒪᓗ ᐱᓕᕆᐊᖃᕐᓂᕐᒥᒃ ᑮᓇᐅᔭᓕᐅᕈᑎᒃᓴᓂᒃ ᐱᕙᓪᓕᐊᑎᑦᓯᓂᕐᒥᒃ ᐱᑕᖃᖅᑎᓐᓇᒍ ᐅᔾᔨᓇᖅᑐᒥᒃ, ᓈᖕᒪᖏᑦᑐᒥᒃ ᐊᒻᒪᓗ ᐃᑯᓪᓚᐅᒥᑎᑦᓯᓯᒪᒍᑎᒃᓴᓂᒃ ᐊᒃᑐᐃᓯᒪᓂᐅᔪᒧᑦ ᓂᕐᔪᑎᓂᒃ ᐊᕙᑎᒥᓪᓗ.”
-30-
ᑐᑭᓯᒋᐊᒃᑲᓂᕐᕕᒃᓴᖅ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᐅᓂᕐᒥᒃ ᑐᓴᐅᒪᔾᔪᑎᓕᕆᔨᒃᑯᓐᓂ ᐃᓕᓐᓂᐊᖅᑐᖅ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006
