ᑐᓴᕋᑦᓴᓕᕆᔩᑦ

ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᖁᕕᐊᓱᑉᐳᑦ ᑎᒃᑯᐊᖅᑕᐅᓂᖏᓐᓂᒃ ᓄᓇᓕᓐᓄᑦ ᓯᐊᒻᒪᖅᑎᕆᕙᓪᓕᐊᓂᕐᒧᑦ ᐊᐅᓚᑦᑎᖃᑦᑕᓂᕐᒥᒃ ᐊᐃᕙᔨᓂᑦ

(ᒪᐃ 22, 2012 –ᑲᖏᖅᖠᓂᖅ, ᓄᓇᕗᑦ)  ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖏᔪᖅᑳᖓᑦ ᑳᑎ ᑕᐅᑐᙱ ᐅᓪᓗᒥ ᐅᖃᖅᑲᐅᒻᒪᑦ ᖁᕕᐊᓱᓐᓂᕋᖅᑐᓂ ᔮᓐ ᑕᓐᑲᓐ, ᒥᓂᔅᑕ ᓄᓇᖃᖅᑳᕐᓯᒪᔪᓕᕆᓂᕐᒧᑦ ᐅᑭᐅᖅᑕᖅᑐᒥᓗ ᐱᕙᓪᓕᐊᔪᓕᕆᓂᕐᒧᑦ ᑲᓇᑕᒥ, ᓇᓗᓇᐃᕐᓯᔪᒻᒪᑕ ᑕᓪᓕᕐᒥᐅᑎᓪᓗᒍ ᑎᒃᑯᐊᖅᑕᐅᓂᖓᓂᒃ ᑕᐃᔪᓪ ᑐᕋᐅᓐ ᒐᕙᒪᑐᖃᒃᑯᓐᓂ ᐊᐃᕙᔨᓪᓗᐊᑕᐅᓂᐊᕐᓂᖓᓂᒃ ᓄᓇᓕᓐᓄᑦ ᓯᐊᒻᒪᖅᑎᕆᕙᓪᓕᐊᓂᕐᒧᑦ ᐊᐅᓚᑦᑎᖃᑦᑕᓂᕐᒥᒃ.

“ᑐᙵᕕᒃᑯᑦ ᒐᕙᒪᑐᖃᒃᑯᓐᓂ ᐊᐃᕙᔨᖃᕈᒪᓯᒪᒻᒪᑕ ᑎᒃᑯᐊᖅᑕᐅᓗᓂ ᑕᐃᒪᙵᑦ ᐊᑎᓕᐅᖅᑕᐅᓚᐅᕐᓯᒪᒻᒪᑦ ᓄᓇᓕᓐᓄᑦ ᓯᐊᒻᒪᖅᑎᕆᕙᓪᓕᐊᓂᕐᒧᑦ ᐊᐅᓚᑦᑎᖃᑦᑕᓂᕐᒧᑦ ᐊᐅᓚᔾᔪᓯᕐᒧᑦ ᐊᖏᕈᑦ 2008ᒥ,” ᑕᐅᑐᙱ ᐅᖃᖅᑐᖅ. “ᖁᕕᐊᓱᑦᑐᖓ ᒥᓂᔅᑕ ᑕᓐᑲᓐ ᓯᕗᓪᓕᕐᐹᒥ ᑕᒪᑐᒥᖓ ᐱᕙᓪᓕᐊᔾᔪᑎᖃᕐᓂᖓᓂᒃ. ᐊᑑᑎᖃᓪᓚᕆᙳᓱᒻᒪᑦ ᓯᕗᓂᑦᑎᓐᓂ ᓄᓇᕗᒥ.”

ᐊᖏᔪᖅᑳᖅ ᑕᐅᑐᙱ ᖁᕕᐊᓱᒍᔾᔨᒻᒥᔪᖅ ᑕᐃᕕᑎ ᐊᕿᐊᕈᖅ ᓄᓇᕗᑦ ᒐᕙᒪᒃᑯᓐᓂ ᓯᕗᓕᖅᑎ ᓄᓇᓕᓐᓄᑦ ᓯᐊᒻᒪᖅᑎᕆᕙᓪᓕᐊᓂᕐᒧᑦ ᐊᐅᕙᔨᐅᓂᐊᖅᑐᓂ, ᓇᓗᓇᐃᖅᑕᐅᖅᑲᐅᔪᖅ ᐅᓪᓗᒥ ᓯᕗᓕᖅᑎᖓᓐᓄᑦ ᓄᓇᕗᒥ, ᐄᕙ ᐋᕆᐊᑉ.

“ᑕᐃᕕᑎ ᐱᔪᓐᓇᑎᐊᕐᖓᑦ, ᓇᓗᖅᑯᑎᙱᑎᐊᖅᑐᖓ ᓄᓇᕗᑦ ᐱᔪᒐᕆᓯᒪᔭᖏᑦ ᓴᐳᑎᔭᐅᓯᒪᓂᐊᕐᖓᑕ ᑕᒪᑐᒥᖓ ᐱᕙᓪᓕᐊᑎᓪᓗᒋᑦ. ᓂᕆᐅᑉᐳᒍᑦ ᑖᔅᓱᒥᖓ ᐃᖅᑲᓇᐃᔭᖃᑎᖃᖃᑦᑕᓂᐊᕐᓂᑎᓐᓂᒃ.” ᐊᖏᔪᖅᑳᖅ ᑕᐅᑐᙱ ᐅᖃᖅᑐᖅ.

“ᓄᓇᕗᑦ ᑐᙵᕕᒃᑯᑦ ᐃᓚᒋᔭᐅᓪᓚᕆᖃᑦᑕᕐᖓᑕ ᓯᐊᒻᒪᖅᑎᕆᕙᓪᓕᐊᓂᕐᒧᑦ ᐊᒻᒪᓗ ᓂᕆᐅᑦᑐᑎᒃ ᐊᔩᖃᑎᒌᒐᓱᓐᓂᐅᓂᐊᖅᑐᒥ ᐊᖏᖃᑎᒌᒍᑎᖃᓛᕆᐊᔅᓴᖏᓐᓂᒃ ᓄᓇᕗᑦ ᐱᖁᔭᖅᑐᒍᑦ ᒪᑭᒪᓇᓱᐊᕈᑎᑎᒍᑦ ᐱᔪᒐᕆᓂᐊᖅᑕᖓᓐᓂᒃ, ᐊᒻᒪᓗ ᑲᔪᓯᕙᓪᓕᐊᒍᑎᖃᐃᓐᓇᓂᐊᖅᑐᓂ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓂᑦ”, ᐅᖃᕆᐊᒃᑲᓂᖅᑐᖅ.