(ᔭᓐᓄᐊᓕ 23, 2012 – ᑲᖏᕐᖠᓂᖅ, ᓄᓇᕗᑦ) ᓄᓇᕗᑦ ᑐᓐᖓᕕᒃ ᑎᒥᖓᑕ ᐊᖏᔪᖅᑳᖓ ᑳᑎ ᑕᐅᑐᓐᖏ ᐅᓪᓗᒥ ᖁᕕᐊᒃᑯᔾᔨᔪᖅ ᐊᑯᑭᑦᑐᑦ ᖃᖓᑕᓲᖏᑕ ᑐᓴᖅᑎᑦᓯᐅᑎᒋᖅᑲᐅᔭᖓᓄᑦ ᒪᑐᐃᖅᓯᓂᐊᕐᓂᕐᒥᒃ ᖃᖓᑕᓲᖅᑕᐅᖃᑦᑕᕐᓂᐊᓕᕐᓂᖏᓐᓂᒃ ᓅᒃ, ᐊᑯᑭᑦᑐᖅ ᐊᒻᒪᓗ ᐃᖃᓗᐃᑦ.

“ᐃᓄᐃᑦ ᐅᑭᐅᖅᑕᖅᑐᒦᒃᑑᒃ ᐊᑯᓂᐊᓗᒃ ᑲᓲᒻᒪᑎᒃᓴᒥᓂᒃ ᐱᔪᒪᖃᑦᑕᖅᓯᒪᒻᒪᑎᒃ ᖃᖓᑕᓲᒃᑯᑦ. ᐅᖃᐅᓯᐅᖅᑲᐅᔪᖅ ᖁᕕᐊᓲᑕᐅᒻᒪᕆᖅᑲᐅᔪᖅ ᑐᓴᖅᑎᑦᓯᔾᔪᑕᐅᒻᒪᑦ ᐅᓄᖅᑐᓄᑦ ᐃᓚᒌᓄᑦ ᓄᓇᕗᒥ, ᑕᐃᑲᓐᖓᓂᐊᓗᒃ ᑲᓲᒻᒪᑎᖃᑦᑕᖅᓯᒪᓂᑰᑎᓪᓗᒋᒃ ᐆᒪᔪᓂᒃ ᒪᓕᖃᑦᑕᕐᓂᖏᓐᓂ ᓯᕗᓕᕕᓂᖏᑦ,” ᐅᖃᖅᑲᐅᔪᖅ ᑕᐅᑐᓐᖏ. “ᐃᓄᐃᑦ ᖃᐅᔨᒃᑲᓐᓂᖃᑦᑕᕈᓐᓇᕐᓂᐊᓕᖅᑐᑦ, ᑲᓲᒪᐅᑎᕙᓪᓗᑎᒃ ᒥᓇᕋᐅᑎᓗᑎᒃ, ᐊᒻᒪᓗ ᐆᒻᒪᑎᑦᓯᒋᐊᒃᑲᓂᕐᓗᑎᒃ ᐃᓕᖅᑯᓯᖃᖃᑎᒌᐸᓗᓐᓂᕐᒥᒍᑦ, ᐊᒻᒪᓗ ᐱᕙᓪᓕᐊᑎᑦᓯᓗᑎᒃ ᐱᖅᑯᓯᕐᒥᒍᑦ ᐊᒻᒪᓗ ᐅᓪᓗᒥᓯᐅᑎᑎᒍᑦ ᒪᑭᒪᔾᔪᑎᓂᒃ.”

ᐊᑯᑭᑦᑐᑦ ᖃᖓᑕᓲᖏᑦ ᐸᕐᓇᓯᒪᔪᑦ ᖃᖓᑕᖃᑦᑕᓛᕐᓂᐊᓂᕐᒥᓂᒃ ᐃᖃᓗᐃᑦ ᐊᒻᒪᓗ ᓅᒃ ᐅᑎᖅᑕᕐᓗᑎᒃ ᓇᒡᒐᔾᔭᐅᑕᒫᑦ ᐊᒻᒪᓗ ᑕᓪᓕᕐᒥᑕᒫᑦ, ᔫᓂ 18-ᒥᒃ ᓯᑉᑎᒻᕙ 3-ᒧᓄᑦ.