ᑐᓴᕋᑦᓴᓕᕆᔩᑦ

ᑐᙵᕕᒃᑯᑦ ᑐᓴᖅᑎᑦᓯᔪᑦ ᐃᓱᒪᒃᑯᑦ ᖃᓄᐃᙱᑲᓐᓂᕈᑎᒃᓴᓄᑦ ᑮᓇᐅᔭᓕᑕᐅᒍᑎᓂᒃ

 (ᑏᓰᒻᐱᕆ 1, 2020, ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᑐᓴᖅᑎᑦᓯᔪᖅ ᓄᑖᓂᒃ ᐃᑲᔫᑎᒃᓴᓂᒃ ᓱᐃᓛᕿᒍᑎᒃᓴᓄᑦ ᐊᖏᓪᓕᒋᐊᕈᑎᒥᒃ ᐃᓱᒪᒃᑯᑦ ᖃᓄᐃᙱᑦᓯᐊᕈᑎᒃᓴᓂᒃ ᐱᔨᑦᓯᕈᑎᓂᒃ ᐃᑲᔫᑎᓂᓪᓗ ᐃᓕᖅᑯᓯᒃᑯᑦ ᐊᑦᑕᓇᙱᑦᑐᒥᒃ ᐋᖅᑭᒋᐊᕈᑕᐅᔪᒥᒃ ᐃᓱᒪᒃᑯᑦ ᖃᓄᐃᙱᑦᓯᐊᑲᓐᓂᕈᑎᒃᓴᓄᑦ ᐱᔨᑦᓯᕈᑎᓂᒃ ᓄᕙᔾᔪᐊᕐᓇᖅ−19 ᖃᓄᐃᒍᑕᐅᓂᖓᓄᑦ.

ᓄᓇᓕᓐᓃᑦᑐᑦ ᖃᓄᐃᙱᑦᓯᐊᑲᓐᓂᕈᑎᒃᓴᓕᕆᕙᑦᑐᑦ ᐅᕝᕙᓘᓐᓃᑦ ᑮᓇᐅᔭᓕᐅᕋᓱᐊᖅᑎᐅᖏᑦᑐᑦ ᑲᑐᔾᔨᖃᑎᒌᑦ ᑐᑦᓯᕋᕈᓐᓇᖅᑐᑦ ᑮᓇᐅᔭᓂᒃ ᐱᓕᕆᒍᑎᒃᓴᓂᒃ ᒪᒥᓴᕐᓂᕐᒧᑦ ᖃᓄᐃᙱᑦᓯᐊᓂᕐᒧᓪᓗ ᐱᓇᓱᐊᒐᑦᓴᓂᒃ. ᐱᓇᓱᐊᖃᑕᐅᒍᒪᔪᑦ ᐊᐱᕆᔭᐅᓂᐊᖅᑐᑦ ᑐᓂᓯᖁᔭᐅᓗᑎᒃ 1-2 ᒪᑉᐱᒑᓐᓂᒃ ᓇᐃᓈᖅᓯᒪᔪᓂᒃ ᑐᒃᓯᕋᐅᑎᓂᒃ ᐱᓕᕆᐊᕆᒍᒪᓂᐊᖅᑕᒥᓂᒃ ᐊᒻᒪᓗ ᑮᓇᐅᔭᖅᑑᑎᒃᓴᓕᐊᖏᑕ ᐊᕕᑦᑐᖅᓯᒪᓂᖏᓐᓂᒃ ᐊᒻᒪᓗ ᒥᑦᓴᐅᓴᒍᑎᓂᒃ ᑎᑭᙱᓐᓂᖓᓂ ᑏᓰᒻᐱᕆ 11, 2020. ᑲᑎᓪᓗᒋᑦ ᐅᓄᕐᓂᖏᑦ ᑮᓇᐅᔭᓕᑕᐅᒍᑕᐅᓯᒪᔪᑦ ᐊᑐᐃᓐᓇᐃᑦ $550,000.

ᐃᓕᓴᖅᓯᓯᒪᓂᒃᑯᑦ ᕼᐊᒻᓚᐃᑦ ᓄᓇᕗᑦ ᓄᓇᓕᖏᓐᓂ ᖃᐅᔨᒪᑦᓯᐊᕐᒪᑕ ᓄᓇᓖᑦ ᐱᖁᑎᖏᓐᓂᒃ, ᐱᔭᕆᐊᓕᖏᓐᓂᒃ, ᐊᒻᒪᓗ ᐊᐳᖅᓯᒪᕕᐅᖃᑦᑕᖅᑐᓂᒃ ᒫᓐᓇ ᐊᑦᓱᕈᕐᓇᑐᒃᑰᑎᓪᓗᑕ, ᑐᙵᕕᒃᑯᑦ ᑐᓂᓯᓂᐊᖅᑐᑦ $50,000 ᐊᑐᓂᑦ ᕼᐊᒻᓚᓄᑦ ᐃᑲᔫᑎᒃᓴᓂᒃ ᐃᓱᒪᒃᑯᑦ ᖃᓄᐃᙱᑦᓯᐊᕈᑎᒃᓴᓄᑦ ᐱᓇᓱᐊᒐᑦᓴᓂᒃ ᓄᓇᒥᓐᓂ ᓄᓇᕗᓕᒫᒥ ᑲᑎᓪᓗᒋᑦ $1,250,000.

ᑮᓇᐅᔭᓕᑕᐅᒍᑕᐅᖃᑦᑕᕈᓐᓇᖅᑐᑦ ᐃᓚᒋᔭᐅᓪᓗᑎᒃ:

  • ᐊᐅᓚᑦᓯᓂᕐᒥᒃ ᐃᓕᖅᑯᓯᕐᒨᖓᔪᓂᒃ ᐱᓕᕆᐊᒃᓴᓂᒃ ᐱᔨᑦᓯᕈᑎᓂᓪᓗ ᐱᕚᓪᓕᕈᑎᒃᓴᓂᒃ ᐃᓄᐃᑦ ᖃᓄᐃᙱᑦᓯᐊᑲᓐᓂᕈᑎᒃᓴᖏᓐᓄᑦ ᐊᒻᒪᓗ ᐃᓕᖅᑯᓯᒃᑯᑦ ᐃᓕᓴᐃᖃᑦᑕᓂᕐᒥᒃ ᐊᒻᒪᓗ ᐃᓄᒃᑑᖃᑦᑕᓂᕐᒥᒃ;
  • ᓄᓇᓕᓐᓂ ᐃᓕᓴᐃᖃᑦᑕᕈᑎᒃᓴᑦ ᐅᔾᔨᖅᓱᑲᓐᓂᕈᑎᒃᓴᓪᓗ ᐃᓕᖅᑯᓯᖓᒍᑦ ᐃᓄᐃᑦ ᖃᓄᐃᙱᑦᓯᐊᕈᑎᖏᓐᓄᑦ;
  • ᐋᖅᑭᑦᓱᐃᓂᖅ ᐊᒻᒪᓗ/ᐅᕝᕙᓘᓐᓃᑦ ᓴᖅᑭᐅᒪᑎᑦᓯᓂᖅ ᐃᓕᖅᑯᓯᒃᑯᑦ ᐃᑉᐱᓐᓂᕈᑕᐅᓴᕋᐃᓲᓄᑦ ᐃᑲᔫᑎᒃᓴᓂᒃ;
  • ᐋᖅᑭᑦᓱᐃᓂᖅ ᐊᒻᒪᓗ/ᐅᕝᕙᓘᓐᓃᑦ ᑲᔪᓯᑎᑦᓯᓂᖅ ᓄᓇᓕᑦᑎᒍᑦ−ᐊᐅᓚᑕᐅᔪᓂᒃ ᐃᓅᓯᕐᒥ ᐱᕚᓪᓕᕈᑎᒃᓴᓄᑦ ᐸᕐᓇᐅᑎᓂᒃ ᐃᓄᐃᑦ ᓄᓇᓕᖏᓐᓂ;
  • ᐃᖅᑲᓇᐃᔭᖃᑎᒌᒍᑎᖃᕐᓂᖅ ᓄᓇᓕᓐᓂ ᐱᓕᕆᐊᒃᓴᓂᒃ ᐊᑐᕋᑦᓴᓂᓪᓗ;
  • ᐱᕚᓪᓕᕈᑎᒃᓴᒥᒃ ᑲᓲᒪᒍᑕᐅᕙᑦᑐᓂᒃ ᐊᑐᕋᑦᓴᓂᒃ ᓄᓇᓕᓐᓂ ᖃᓂᒋᔭᖏᓐᓂᓘᓐᓃᑦ; ᐊᒻᒪᓗ
  • ᓄᓇᓖᑦ ᐅᔾᔨᖅᓱᕆᐊᒃᑲᓐᓂᕈᑎᒃᓴᖏᓐᓂᒃ ᐊᒻᒪᓗ ᐃᓚᒌᓄᑦ ᐋᓐᓂᖅᑎᕆᐅᑎᖃᑦᑕᖅᑐᓄᑦ ᐅᖑᒪᑦᓯᔾᔪᑎᒃᓴᓂᒃ.

ᑐᑭᓯᒋᐊᒃᑲᓂᕐᕕᑦᓴᖅ ᐊᔪᙱᑎᑕᐅᔪᓄᑦ, ᑮᓇᐅᔭᖅᑑᑎᒃᓴᓂᒃ ᑐᒃᓯᕋᐅᑎᓂᒃ ᐊᒻᒪᓗ ᐃᑲᔪᖅᑕᐅᔪᒪᔪᓄᑦ, ᖃᐅᔨᒋᐊᕐᕕᒋᓗᒍ:

ᔫᓕᐊ ᓇᐅᔪᖅ

ᐋᓐᓂᐊᖅᑐᓕᕆᓂᕐᒧᑦ ᐊᐅᓚᑦᓯᔨ
867-222-4731

ᑐᙵᕕᒃᑯᑦ ᐊᒻᒪᓗ ᐊᕕᑦᑐᖅᓯᒪᓂᕐᓂ ᐃᓄᐃᑦ ᑲᑐᔾᔨᖃᑎᒌᑦ ᐃᖅᑲᓇᐃᔭᖃᑎᒌᑦᑐᑦ ᑎᑭᐅᑎᓯᒪᒍᑎᒃᓴᓂᒃ ᐱᔭᕆᐊᓕᖏᓐᓄᑦ ᓄᓇᕗᒻᒥ ᐃᓄᐃᑦ ᐃᓱᒪᒃᑯᑦ ᐃᓱᒪᒃᑯᑦ ᖃᓄᐃᙱᑲᓐᓂᕈᑎᒃᓴᓄᑦ ᑮᓇᐅᔭᓕᑕᐅᒍᑎᓂᒃ ᓄᓇᖃᖅᑳᖅᓯᒪᔪᓂᒃ ᐱᔨᑦᓯᕈᑎᓄᑦ ᑲᓇᑕᒥ. ᑐᙵᕕᒃᑯᑦ ᐊᖏᕈᑎᖃᖅᓯᒪᕗᑦ ᐱᓕᕆᓂᕐᒥᒃ ᐃᑲᔪᕈᑎᒃᓴᓂᒃ ᓄᓇᓕᑦᑎᒍᑦ ᖃᓄᐃᙱᑦᓯᐊᕈᑎᒃᓴᓄᑦ.

-30-

ᑐᑭᓯᒋᐊᒃᑲᓂᕐᕕᒃᓴᖅ:

ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᓂᕐᒧᑦ ᐃᓕᓐᓂᐊᖅᑐᖅ

ᓄᓇᕗᑦ ᑐᙵᕕᒃ ᑎᒥᖓ

ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006

www.tunngavik.com

 

ᐊᐅᓚᓂᕆᓯᒪᔭᖓ

ᑐᙵᕕᒃᑯᑦ ᑐᓂᔭᐅᓚᐅᖅᑐᑦ $6,012,000 ᐃᓱᒪᒃᑯᑦ ᖃᓄᐃᙱᑲᓐᓂᕈᑎᒃᓴᓄᑦ ᑮᓇᐅᔭᓕᑕᐅᒍᑎᓂᒃ ᐊᒻᒪᓗ ᐋᖅᑭᐅᒪᑦᓯᒍᑎᒃᓴᓂᒃ ᑮᓇᐅᔭᓕᑕᐅᒍᑎᓂᒃ ᑐᓂᐅᖅᑲᖅᑕᐅᓚᐅᖅᑐᓂᒃ ᑐᙵᕕᒃᑯᑦ ᑲᑎᒪᔨᖏᓐᓄᑦ ᐃᒪᐃᓕᖓᔪᓂᒃ ᐊᕕᑦᑐᖅᑕᐅᓪᓗᑎᒃ:

ᓄᓇᕗᑦ ᑐᙵᕕᒃ ᑎᒥᖓ            $1,803,600
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ       $1,839,763
ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ        $1,302,367
ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ       $1,066,270

ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᑦ ᓇᖕᒥᓂᖅ ᑐᓂᐅᖅᑲᐃᖃᑦᑕᖅᑐᑦ ᑐᓴᖅᑎᑦᓯᒍᑎᓂᓪᓗ.

ᐊᐅᒡᒍᓯ 25, 2020−ᒥ, ᒥᓂᔅᑕ ᒥᓚ ᑐᓴᖅᑎᑦᓯᓚᐅᖅᑐᖅ $82.5−ᒥᓕᔭᓂᒃ ᐃᓱᒪᒃᑯᑦ ᖃᓄᐃᙱᑲᓐᓂᕈᑎᒃᓴᓄᑦ ᑮᓇᐅᔭᓕᑕᐅᒍᑎᓂᒃ ᐊᒻᒪᓗ ᐋᖅᑭᐅᒪᑦᓯᒍᑎᒃᓴᓂᒃ ᒫᓐᓇ ᐃᓱᒪᒃᑯᑦ ᖃᓄᐃᙱᑦᓯᐊᓂᕐᒧᑦ ᐱᔨᑦᓯᕈᑎᓂᒃ ᐋᖅᑭᐅᒪᒍᑎᒃᓴᓂᒃ ᓄᕙᔾᔪᐊᕐᓇᖅ−19−ᒧᑦ ᐊᒃᑐᐊᔪᓂᒃ ᐃᓱᒪᒃᑯᑦ ᖃᓄᐃᙱᑦᓯᐊᓂᕐᒧᑦ ᐊᑐᕆᐊᓕᓐᓂᒃ ᐊᒻᒪᓗ ᐊᑦᓱᕉᓐᓂᖓᓇᖅᑐᒃᑰᕐᓂᖏᓐᓄᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓄᑦ. ᑮᓇᐅᔭᓕᑕᐅᒍᑏᑦ ᐊᑐᖅᑕᐅᕌᓂᒃᓯᒪᒋᐊᓖᑦ ᒫᑦᓯ 31, 2021-ᒥ.

2016-ᒥ ᑕᐃᔭᐅᔪᒥᒃᐊᑕᐅᓯᐅᖃᑎᒌᓐᓂᖅ ᐃᓅᓯᕐᒥ ᑲᑎᒪᓂᕐᔪᐊᖃᖅᑎᓪᓗᒋᑦ ᓇᓗᓇᐃᖅᑕᐅᓚᐅᖅᑐᖅ ᑲᑎᖃᑦᑕᓂᖅᓴᐅᖃᑦᑕᕆᐊᖃᕆᐊᖏᑦ ᐱᕕᒃᓴᓕᐅᕐᓗᑎᒃ ᒪᒥᓴᕐᓂᕐᒧᑦ ᑕᐃᒃᑯᓄᖓ ᐊᒃᑐᖅᑕᐅᓯᒪᔪᓄᑦ ᔭᒐᐃᓂᕐᒧᑦ ᓄᓇᒥᓐᓂ.

ᑭᒡᒍᑕᐅᓪᓗᓂ, ᑐᙵᕕᒃᑯᑦ ᐊᒻᒪᓗ ᐊᕕᑦᑐᖅᓯᒪᓂᕐᓂ ᐃᓄᐃᑦ ᑲᑐᔾᔨᖃᑎᒌᑦ, ᐃᑲᔪᖅᑕᐅᓪᓗᑎᒃ ᐃᓕᓴᖅᓯᕕᒃ ᓴᓴᐃᔭᑎᒃᑯᓐᒃᓂ ᐊᐅᓚᑦᓯᓚᐅᖅᑐᑦ ᓯᑕᒪᐃᖅᓱᖅᑐᑎᒃ ᐃᓄᓐᓅᖓᔪᓂᒃ ᐊᕕᑦᑐᖅᓯᒪᓂᕐᓂ ᒪᒥᓴᕐᓂᕐᒧᑦ ᑲᑎᓐᓂᐅᔪᓂᒃ: ᒪᕐᕉᒃ ᑲᖏᕐᖢᒑᐱᒡᒥ, ᐊᑕᐅᓯᖅ ᐊᕐᕕᐊᓂ, ᐊᒻᒪᓗ ᐊᑕᐅᓯᖅ ᑕᓗᕐᔪᐊᒥ 2017-ᒥᓂᒃ 2019-ᒧᓄᑦ.

ᐸᕐᓇᑎᓪᓗᒋᑦ ᐊᕕᑦᑐᖅᓯᒪᓂᕐᓂ ᒪᒥᓴᕐᓂᕐᒧᑦ ᑲᑎᓐᓂᐅᔪᓄᑦ, ᑐᙵᕕᒃᑯᑦ ᐊᒻᒪᓗ ᐊᕕᑦᑐᖅᓯᒪᓂᕐᓂ ᐃᓄᐃᑦ ᑲᑐᔾᔨᖃᑎᒌᑦ ᑕᓪᓕᒪᐅᓕᖅᑲᖓᔪᓂᒃ ᓇᓗᓇᐃᖅᓯᓚᐅᖅᑐᑦ ᑐᑭᒧᐊᒍᑎᒋᓂᐊᖅᑕᒥᓂᒃ ᐱᓕᕆᐊᑦᑎᓐᓄᑦ:

  1. ᐃᓄᐃᑦ ᓱᖏᐅᔾᔭᕐᓂᖏᑦ
  2. ᐱᓕᕆᓂᖅ ᖁᐊᖅᓵᓇᖅᑐᒃᑰᖅᓯᒪᓂᕐᒥᒃ
  3. ᐅᐃᕆᓯᒪᓂᕐᒧᑦ ᐊᔪᓕᕈᑕᐅᓯᒪᔪᑦ
  4. ᐅᑎᖅᑎᑦᓯᓂᖅ ᐃᓕᖅᑯᓯᑦᑎᒍᑦ ᑭᓇᒃᑰᓂᑦᑎᓐᓂᒃ
  5. ᓄᓇᓖᑦ ᒪᑭᑉᐸᓪᓕᐊᓂᖓ

ᐊᕕᑦᑐᖅᓯᒪᓂᕐᓂ ᑲᑎᓐᓂᐅᔪᑦ ᓄᓇᓕᑦᑎᒍᑦ, ᐃᓄᐃᑦ ᒪᒥᓴᕐᓂᕐᒧᑦ ᐱᓕᕆᐊᖏᑦ ᐃᓚᒋᔮ ᐃᓅᓯᕗᑦ ᐊᓐᓂᓇᖅᑐᖅ, 2017-2022 ᐊᐅᓚᔾᔭᐃᓂᕐᒧᑦ ᐸᕐᓇᐅᑎ ᓄᓇᕗᒻᒥ ᐃᓅᓯᕐᒥᒃ ᑭᐱᓯᑦᑕᐃᓕᓂᕐᒧᑦ ᐅᖑᒪᑦᓯᔾᔪᑎᒃᓴᒧᑦ ᑐᑭᒧᐊᒍᑎᒃᓴᖅ (NSPS) ᐱᓇᓱᐊᖃᑎᒌᑦᑐᑦ. ᐸᕐᓇᐅᑏᑦ ᐋᖅᑭᑦᓯᒪᒍᑕᐅᔪᑦ ᐊᐅᓚᔾᔭᐃᓂᐊᖅᑐᑦ ᐱᓇᓱᐊᖃᑎᒌᑦᑐᑦ ᑎᒍᖔᕐᓂᐊᖅᑕᖓᓂᒃ ᑕᓪᓕᒪᐅᓂᐊᖅᑐ ᐊᕐᕌᒍᓂ ᑲᔪᓯᑎᑦᓯᓗᑎᒃ ᓯᑕᒪᐅᔪᖅᑐᓂᒃ ᑐᑭᒧᐊᒍᑎᒃᓴᓂᒃ ᐊᖏᕈᑕᐅᓯᒪᔪᓂᒃ.

ᑐᙵᕕᒃᑯᑦ ᑐᕌᒐᖓ ᐃᓱᒪᒃᑯᑦ ᖃᓄᐃᙱᑦᓯᐊᑲᓐᓂᓂᕐᒧᑦ ᑮᓇᐅᔭᓕᑕᐅᒍᑎᓄᑦ, ᐱᓇᓱᐊᒐᖃᐃᓐᓇᕐᓂᖅ ᐃᑲᔪᖃᑦᑕᓂᕐᒥᒃ ᓄᓇᓕᑦᑎᒍᑦ ᖃᓄᐃᙱᑦᓯᐊᑲᓐᓂᕈᑎᒃᓴᓂᒃ ᐃᓄᓐᓄᑦ−ᓯᕗᓕᖅᑕᐅᔪᓂᒃ ᐊᒻᒪᓗ ᐃᓄᓐᓅᖓᔪᓂᒃ.

 

Download (PDF, 180KB)

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: