ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖏᔪᖅᑳᖓ ᑳᑎ ᑕᐅᑐᙱ ᓇᓗᓇᐃᖅᓯᔪᖅ ᐅᓪᓗᒥ ᐃᑲᔫᓯᐊᑑᓐᓂᒃ ᔫᓯ ᐊᒪᐅᔭᖅ ᑯᓱᒐᐅᑉ ᐃᖅᑲᐅᒪᔭᐅᓂᖓᓄᑦ ᐃᓕᓐᓂᐊᖅᑏᑦ ᐃᑲᔫᓯᐊᕈᓐᓇᐅᑎᖏᑦ. ᐄᒪᓕ ᔪᐊᓇᓯ ᐃᖃᓗᖕᒥᐅᖅ ᐊᒻᒪ ᒪᓂᑲ ᑭᒍᑦᑕᖅ ᐊᐅᓱᐃᑦᑐᕐᒥᐅᖅ ᐃᓚᒃᑯᑦ ᑐᓂᔭᐅᔫᒃ $5,000-ᓂᒃ ᐃᑲᔫᑕᐅᓂᐊᑐᑦ ᐃᓕᓐᓂᐊᕐᓂᖏᓐᓄᑦ. ᑕᒪᒃᑮᒃ ᐃᓕᓐᓂᐊᑑᑦ ᓄᓇᕗᒻᒥ ᐃᓕᓴᐃᔨᒃᓴᐅᓂᕐᒧᑦ ᓄᓇᕗᑦ ᓯᓚᑦᑐᓴᕐᕕᖓᓂ, ᔪᐊᓇᓯ ᐃᖃᓗᓐᓂ, ᑭᖑᑦᑕᖅ ᐃᖃᓗᒃᑑᑎᐊᕐᒥ.

“ᑯᕕᐊᓱᒃᐳᖓ ᐊᖏᔪᖅᑳᕆᔭᐅᓪᓗᖓ ᓄᓇᕗᑦ ᑐᙵᕕᒃᑯᓐᓂ ᑐᓂᓯᔪᓐᓇᕋᒪ ᒪᕐᕉᓄᑦ ᐃᓕᓐᓂᐊᖅᑏᓐᓄᑦ ᑮᓇᐅᔭᓂᒃ ᐃᑲᔫᑕᐅᓂᐊᖅᑐᓂᒃ ᐃᓕᓐᓂᐊᕐᓂᖏᓐᓄᑦ ᐃᓕᓴᐃᔨᒃᓴᐅᓂᕐᒧᑦ ᓄᓇᕗᒻᒥ,” ᐅᖃᖅᑐᖅ ᑕᐅᑐᙱ. “ᔫᓯ ᐅᐱᒍᓱᒐᔭᖅᑐᑦ ᒪᕐᕉᒃ ᐊᔪᖏᒻᒪᕆᑦᑑᑦ ᐃᓅᒃ ᐃᓕᓐᓂᐊᖅᑏᒃ ᑲᔪᓯᑎᑦᓯᕙᓪᓕᐊᒪᑎᒃ ᐊᒃᓱᕈᐊᕆᓯᒪᔭᖏᓐᓂᑦ ᓴᖅᑭᔮᖅᑎᑦᓯᓂᕐᒧᑦ ᓴᐳᔾᔨᓂᕐᒧᓪᓗ ᐃᓄᐃᑦ ᐅᖃᐅᓯᖓᓂᒃ ᐃᓕᖅᑯᓯᖓᓂᒡᓗ.”

ᑐᙵᕕᒃᑯᑦ ᑲᑎᑦᑐᒋᑦ 21-ᓂᒃ ᑐᒃᓯᕋᐅᑎᓕᐅᕐᕕᐅᓚᐅᑐᑦ ᐃᑲᔫᓯᐊᒃᓴᓄᑦ. ᓂᕈᐊᖅᑏᑦ ᐅᑯᐊᖑᓚᐅᖅᑐᑦ ᑐᙵᕕᒃᑯᑦ ᐃᖅᑲᓇᐃᔭᖅᑎᖏᑦ ᐊᒻᒪ ᔫᓯᐅᑉ ᐃᕐᓂᖓ ᐳᔾᔫᑦ ᕿᒥᕐᕈᓚᐅᖅᑐᑦ ᐃᑲᔫᓯᐊᖅᑖᕋᓱᐊᖅᑐᓂᒃ ᐊᒻᒪ ᓂᕈᐊᖅᖢᑎᑦ ᔪᐊᓇᓯ ᐊᒻᒪ ᑭᒍᑦᑕᕐᒥᒃ ᐱᔾᔪᑎᒋᓪᓗᒍ ᑕᒪᒃᑮᒃ ᐃᓕᓐᓂᐊᖅᑏᒃ ᓴᖅᑭᔮᖅᑎᑦᓯᑎᐊᓛᖑᓚᐅᕐᒪᑎᒃ ᖃᓄᖅ ᑲᔪᓯᑎᑦᓯᕙᓪᓕᐊᓂᐊᕐᓂᕐᒥᓂᒃ ᔫᓯᐅ ᐱᓕᕆᐊᕆᓯᒪᔭᖏᓐᓂᒃ ᐊᕐᕌᒍᒐᓵᓗᓐᓄ. ᑕᐅᑐᙱ ᐅᖃᖅᑲᐅᔪᖅ ᐱᔭᕆᐊᑐᓚᐅᕐᒪᑦ ᓂᕈᐊᕐᕕᒋᓇᓱᐊᖅᖢᒋᑦ ᑐᒃᓯᕋᐅᑏᑦ ᐱᐅᔪᒻᒪᕆᐅᓚᕐᖓᑕ.

“ᖃᑕᓐᖑᑎᒌᑦᑐᒍᑦ ᖁᔭᓐᓇᒦᕈᒪᕗᒍᑦ ᓄᓇᕗᑦ ᑐᙵᕕᒃᑯᓐᓂ ᐃᖅᑲᐅᒪᑦᓯᓂᖏᓐᓄᑦ ᐊᑖᑕᓐᓂᒃ, ᑖᒃᓱᒨᓇ ᐃᑲᔫᑎᒃᑯᑦ. ᐃᓄᐃᑦ ᑲᔪᓯᔪᓐᓇᐃᓇᕐᓂᐊᖅᐳᑦ ᐃᓄᒃᑎᑐᑦ ᐃᓕᓐᓂᐊᕐᓂᒃᑯᓪᓗ. ᖁᔭᓐᓇᒦᕆᐊᖃᖅᑕᕗᑦ ᑐᒃᓯᕋᐅᑎᓕᐅᓚᐅᖅᑐᓕᒫᑦ ᑎᑎᕋᓚᐅᕐᓂᖏᓐᓄᑦ ᐊᒻᒪ ᓴᖅᑭᔮᖅᑎᑦᓯᑎᑕᐅᓚᐅᕐᒪᑕ ᐊᒃᑐᑕᐅᓯᒪᓂᕐᒥᓂᒃ ᔫᓯᒧᑦ. ᐱᔭᕆᐊᑐᒻᒪᕆᓚᐅᑐᖅ ᓂᕈᐊᕋᓱᐊᖅᖢᓂ ᑐᒃᓯᕋᐅᑎᓕᐅᖅᓯᒪᔪᓂᒃ ᐊᒻᒪ ᖃᑕᓐᖑᑎᒌᑦᑐᑕ, ᖁᔭᒋᔪᒪᔭᕗᑦ ᐄᒪᓕ ᐊᒻᒪ ᒫᓂᑲ ᑎᑎᕋᑦᓯᐊᓚᐅᕐᓂᖏᓐᓄᑦ. ᖁᔭᓐᓇᒦᒃ ᑲᔪᓯᑎᐊᕐᓂᐊᖅᐳᓯᓗ ᐃᓕᓐᓂᐊᖅᑕᑦᓯᓐᓂᒃ. ᐊᑖᑕᒐ ᐅᐱᒍᓱᒻᒪᕆᒃᑲᔭᖅᑐᖅ ᖁᕕᐊᒋᔭᖃᕐᓂᓯ ᐃᓄᒃᑎᑐᑦ ᐊᒻᒪ ᐃᓕᓐᓂᐊᕐᓂᒃᓯᓐᓄᑦ,” ᐅᖃᖅᑐᖅ ᐳᔾᔫᑦ, ᑭᒡᒐᑐᖅᖢᓂ ᑯᓱᒐᖅ ᑲᑕᓐᖑᑎᒌᓂᒃ.

ᑭᖑᓪᓕᕐᒥ ᐃᓱᓕᒡᕕᒋᓂᐊᖅᑖ ᔫᓯ ᐊᒪᐅᔭᖅ ᑯᓱᒐᐅᑉ ᐃᖅᑲᐅᒪᔭᐅᓂᖓᓄᑦ ᐃᑲᔫᓯᐊᖅᑖᕋᓱᐊᕐᓂᖅ ᔪᓚᐃ 9, 2012. ᐃᓕᓐᓂᐊᖅᑏᑦ ᐊᑎᖃᖃᑕᐅᔪᖅ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᑎᒍᑦ ᑐᒃᓯᕋᖃᑕᐅᔪᓐᓇᖅᑐᑦ ᐃᑲᔫᓯᐊᓄᑦ. ᑕᑕᑎᕆᐊᓖᑦ ᐊᑐᐃᓐᓇᐅᔪᑦ ᓄᓇᕗᑦ ᑐᙵᕕᒃᑯᓐᓂ ᐊᒻᒪ ᖃᕆᑕᐅᔭᒃᑯᑦ.