(ᐅᑐᐱᕆ 20, 2022, ᑲᖏᖅᖠᓂᖅ, ᓄᓇᕗᑦ) ᓄᓇᕗᑦ ᑐᙵᕕᒃᑯᑦ ᐊᕐᕌᒍᑕᒫᖅᓯᐅᑎᒥᒃ ᑲᑎᒪᔨᖏᑦ ᐱᔭᕇᖅᓯᕗᑦ ᑲᖏᖅᖠᖅ, ᓄᓇᕗᒻᒥ ᐅᓪᓗᒥ ᐱᖓᓱᑦ ᐅᓪᓗᕐᓂᒃ ᑲᑎᒪᔾᔪᑎᖃᓚᐅᖅᖢᑎᒃ ᐊᔾᔨᒌᙱᑦᑐᕐᓂᒃ ᐱᒻᒪᕆᐅᑎᒋᔭᐅᔪᓂᒃ ᓄᓇᕗᒻᒥᐅᓄᑦ ᐃᓄᖕᓄᑦ.
ᓄᓇᕗᑦ ᑐᙵᕕᒃᑯᑦ ᑮᓇᐅᔭᓕᕆᔨᒻᒪᕆᖓᑦ ᑐᓴᖅᑎᑦᑎᓚᐅᖅᑐᖅ ᐊᕐᕌᒍᑕᒫᖅᓯᐅᑎᒥᒃ ᑲᑎᒪᔪᓄᑦ ᓄᓇᕗᑦ ᑐᙵᕕᒃᑯᑦ ᑎᒥᖓᑕ ᑮᓇᐅᔭᓕᕆᓂᖏᑦ ᐊᑲᐅᓯᕚᓪᓕᖅᓯᒪᓕᕐᓂᖏᓐᓂᒃ, ᐃᓚᒋᓪᓗᒋᑦ ᑮᓇᐅᔭᖅᑐᕐᓂᐅᓯᒪᔪᓂᒃ ᖃᐅᔨᓴᖅᑎ ᓈᒻᒪᒃᓴᑦᑎᐊᓚᐅᕐᒪᑦ 2021-2022 ᑐᕌᖓᔪᒧ. ᑮᓇᐅᔭᖅᑐᕐᓂᐅᓯᒪᔪᓂᒃ ᖃᐅᔨᓴᖅᑎ ᐅᔾᔨᕈᓱᓚᐅᖅᑐᖅ ᑐᙵᕕᒃᑯᑦ ᑮᓇᐅᔭᓂᒃ ᐊᐅᓚᔾᔨᒍᑎᖏᑦ ᐋᖅᑭᒃᓯᒪᓂᖏᑦ ᐊᑲᐅᓯᕚᓪᓕᖅᓯᒪᖕᒪᑕ. ᐊᕐᕌᒍᑦ ᑎᓴᒪᑦ ᖄᖏᖅᑐᓂ ᐱᖓᓱᒋᔭᖏᑦ ᓄᓇᕗᑦ ᑐᙵᕕᒃᑯᑦ ᑮᓇᐅᔭᓂᒃ ᐊᒥᐊᒃᑯᓂᖃᓚᐅᖅᑐᑦ ᑮᓇᐅᔭᖅᑖᕆᓯᒪᔭᖏᓐᓂᒃ ᓄᓇᕗᑦ ᐸᐸᑦᑎᔨᒃᑯᓐᓂᑦ ᑕᐅᑐᒃᖢᒋᑦ ᐊᓯᖏᑦ ᐊᕐᕌᒍᓂ ᖄᖏᖅᓯᒪᔪᓂᒃ ᐊᑮᑦᑐᖃᖃᑦᑕᓚᐅᕐᒪᑕ.
ᒐᕙᒪᑐᖃᒃᑯᓐᓂᑦ ᑲᓇᑕᒥ ᑮᓇᐅᔭᑦ ᐱᓯᒪᔪᑦ ᐱᔪᓐᓇᖅᑎᑦᑎᓯᒪᓚᐅᖅᑐᑦ ᓄᓇᕗᑦ ᑐᙵᕕᒃᑯᓐᓂᑦ ᐊᒻᒪᓗ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᒻᒪᕆᐅᔪᓂᒃ ᐱᔨᑦᑎᕋᕈᑎᓂᒃ ᐊᑐᐃᓐᓇᐅᑎᑦᑎᓪᓗᑎᒃ ᐃᓄᖕᓄᑦ. ᓄᕙᒡᔪᐊᕐᓂᕐᒧᑦ ᐊᒃᓱᕈᕐᓇᕋᓗᐊᖅᑎᓪᓗᒍ ᐊᐅᓚᑦᑎᓂᕐᒥᒃ, ᓄᓇᕗᑦ ᑐᙵᕕᒃᑯᑦ ᑲᔪᓯᑎᑦᑎᑦᑎᐊᕈᖕᓇᓚᐅᖅᑐᑦ ᐱᔭᒃᓴᓂᒃ ᐱᒻᒪᕆᐅᔪᓂᒃ ᐃᓄᐃᑦ ᖃᓄᐃᙱᑦᑎᐊᕋᓱᒍᑎᖏᓐᓄᑦ ᐃᓚᒋᓪᓗᒋᑦ ᓄᕙᒡᔪᐊᕐᓂᖅᑖᖅᑕᐃᓕᓂᖅ, ᐋᖓᔮᕐᓇᖅᑐᓂᒃ ᓄᖅᑲᕈᖕᓇᐃᓕᔪᓄᑦ ᒪᒥᓴᕈᑎᑦ, ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕆᐊᒃᑲᓐᓂᕐᓂᕐᒧᑦ ᐱᔭᒃᓴᑦ, ᐃᓅᓯᕐᒥᒃ ᑭᐱᓯᑦᑕᐃᓕᒪᓂᖅ, ᐳᕙᓪᓗᖕᓂᕐᒥᒃ ᓄᖑᑎᕆᓂᖅ ᐊᒻᒪᓗ ᐊᓯᖏᑦ ᐋᓐᓂᐊᖃᕐᓇᖏᑦᑐᓕᕆᓂᐅᔪᑦ.
ᖃᐃᔪᒥ ᐊᕐᕌᒍᒥ, ᓄᓇᕗᑦ ᑐᙵᕕᒃᑯᑦ ᑲᔪᓯᑎᑦᑎᓛᖅᑐᑦ ᐱᓕᕆᖃᑎᖃᕐᓗᑎᒃ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᓯᖏᓐᓂᒡᓗ ᐱᓕᕆᖃᑎᖃᕐᓗᑎᒃ ᐊᑐᓕᖅᑎᑦᑎᑎᓪᓗᒋᑦ ᑕᒪᒃᑯᓂᖓ ᐱᔭᒃᓴᓂᒃ, ᐊᑭᑐᔫᑎᓂᒃ ᓴᓇᔭᕆᐊᓕᕐᔪᐊᕐᓂᒃ ᑲᔪᓯᑎᑦᑎᓗᑎᒃ ᐊᒻᒪᓗ ᐃᓄᐃᑦ ᖃᓄᐃᑉᐱᑕ? ᖃᐅᓴᕐᓂᖅ.
ᐱᖁᔨᕗᖔᓂᒃ ᐊᕐᕌᒍᑕᒫᖅᓯᐅᑎᒥᒃ ᑲᑎᒪᔪᑦ ᐃᑳᖅᑎᑦᑎᓚᐅᕐᒥᔪᑦ:
- ᑎᓕᐅᕆᔪᑦ ᒐᕙᒪᑐᖃᒃᑯᓐᓂᑦ ᑲᓇᑕᒥ ᐊᒻᒪᓗ ᓄᓇᕗᑦ ᒐᕙᒪᖓᓂᑦ ᐊᒃᓱᕈᕆᐊᒃᑲᓐᓂᕐᓗᑎᒃ ᐃᓄᒃᑐᑦ ᐅᖃᐅᓯᕐᒥᒃ ᓴᙱᓕᖅᑎᑦᑎᓂᕐᒥᒃ.
- ᑎᓕᐅᕆᔪᑦ ᒐᕙᒪᑐᖃᒃᑯᓐᓂᑦ ᑲᓇᑕᒥ ᑲᔪᓯᓗᑎᒃ ᔪᐊᓇᓯ ᕆᕗᐊ ᑐᓂᔭᐅᓗᓂ ᑲᓇᑕᒧᑦ ᐃᖅᑲᖅᑐᖅᑕᐅᓂᐊᕐᒪᑦ, ᐊᒻᒪᓗ ᒐᕙᒪᒃᑯᑦ ᖃᐅᔨᓴᖅᑎᑦᑎᓗᑎᒃ ᐊᑐᖅᑕᐅᓯᒪᔪᓂᒃ ᐊᒻᒪᓗ ᐊᒃᑐᐃᓯᒪᓂᖏᓐᓂᒃ ᖁᓄᔪᖕᓂᐊᖅᓯᒪᓂᖏᑦ ᐅᒃᐱᖅᑑᖃᑎᒌᑦ ᑎᒥᖏᑦ ᐊᐅᓚᓕᖅᑎᑦᑎᓂᖏᓐᓂᒃ ᓄᓇᕗᒻᒥᐅᑦ ᐃᓄᖕᓂᒃ, ᐊᓯᖏᓐᓂᒡᓗ.
- ᓄᓇᕗᑦ ᑐᙵᕕᒃᑯᑦ ᐃᓚᒋᔭᐅᖃᑕᐅᓗᑎᒃ ᑐᕌᖓᔪᓂᒃ ᐊᔾᔨᐅᖏᑦᑑᓂᕐᒥ ᐋᖅᑮᖃᑎᒌᖕᓂᕐᒥᒃ ᓄᓇᖃᖅᑳᖅᓯᒪᔪᓅᖓᔪᒥᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒪᓕᒐᒃᓴᕐᒥᒃ ᐊᓯᔾᔩᓂᖃᕋᔭᖅᑐᒥᒃ ᐋᓐᓂᐊᖃᕐᓇᖏᑦᑎᓕᕆᓂᕐᒥᒃ ᐃᓄᖕᓄᑦ ᓈᒻᒪᑦᑎᐊᕋᔭᖅᑐᒥᒃ.
- ᐊᑲᐅᒃᓴᖏᓐᓂᖏᑦ ᓄᓇᕗᑦ ᒐᕙᒪᖓᑦ ᒪᓕᒐᒃᓴᖅ 55 – ᒪᓕᒐᖅ ᐋᖅᑭᒋᐊᕈᑎ ᓇᖕᒥᓂᖃᕐᓂᕐᒧᑦ ᖃᐅᔨᓴᖅᑕᐅᓂᖅ ᐊᒻᒪᓗ ᑖᒃᓰᔭᕈᑎ ᒪᓕᒐᕐᒥᒃ, ᓅᑦᑎᐊᒋᐊᕈᑕᐅᔪᖅ ᑖᒃᓰᔭᕆᐊᖃᕈᓐᓇᐅᑎ ᐅᔭᕋᖕᓂᐊᖅᑎᓄᑦ ᐃᓄᖕᓄᑦ.
- ᑎᓕᐅᕆᓂᖅ ᒐᕙᒪᑐᖃᒃᑯᓐᓄᑦ ᑲᓇᑕᒥ ᐊᒻᒪᓗ ᓄᓇᕗᑦ ᒐᕙᒪᖓᓄᑦ ᐱᓕᕆᖃᑎᖃᕐᓗᑎᒃ ᐃᓄᐃᑦ ᑎᒥᖁᑎᖏᓐᓂᒃ ᑐᑭᓯᒋᐊᒃᑲᓐᓂᕋᓱᒡᓗᒍ ᖃᓄᑎᒋᓗ ᐊᒃᑐᐃᓂᖃᕐᒪᖔᑦ ᐊᔪᖅᓴᓗᐊᖃᑦᑕᕐᓂᖅ ᓄᓇᕗᒻᒥᐅᓄᑦ ᐃᓄᖕᓄᑦ ᐊᒻᒪᓗ ᓴᙱᔪᒥᒃ ᐸᕐᓇᐅᑎᓕᐅᕐᓗᑎᒃ ᐊᔪᖅᓴᓗᐊᖃᑦᑕᕐᓂᕐᒥᒃ ᒥᑭᒡᓕᑎᑦᑎᕙᓪᓕᐊᓂᕐᒥᒃ.
- ᑎᓕᐅᕆᓂᖅ ᒐᕙᒪᑐᖃᕐᑯᓐᓄᑦ, ᐊᕕᒃᑐᖅᓯᒪᓂᕐᔪᐊᑦ ᒐᕙᒪᖏᓐᓄᑦ ᑕᒪᐃᓐᓄᑦ ᐊᑐᓕᖅᑎᑦᑎᒻᒪᕆᒡᓗᑎᑦ ᓱᓕᓂᖅᓯᐅᕐᓂᕐᒧᑦ ᐋᖅᑮᖃᑎᒌᖕᓂᕐᒧᓪᓗ ᑲᒥᓴᓐᑯᑦ ᑎᓕᐅᕆᓯᒪᓂᖓ ᓇᐃᓴᐅᑎ 63, ᐃᓕᓐᓂᐊᖅᑎᑦᑎᓂᖃᒃᑲᓐᓂᕐᓗᓂ ᓄᓇᖃᖅᑳᖅᓯᒪᔪᑦ ᐊᑐᖅᓯᒪᔭᖏᓐᓂᒃ ᐃᓕᖅᑯᓯᖏᓐᓂᒡᓗ ᐊᒻᒪᓗ ᐊᑐᖅᑕᐅᓯᒪᔪᓂᒃ ᐃᓕᓐᓂᐊᕆᐊᖃᑦᑕᓚᐅᖅᑐᓄᑦ, ᑕᒪᐃᓐᓂᒃ ᐃᓕᓴᕐᕕᖕᓂ ᖁᑦᑎᖕᓂᓕᒫᖏᓐᓄᑦ ᓇᓂᓕᒫᖅ ᑲᓇᑕᒥ.
ᑲᑎᒪᔨᑦ ᑐᓴᕈᖕᓇᓚᐅᕐᒥᔪᑦ ᖃᐃᖁᔭᐅᓯᔪᓂᒃ ᐃᓚᒋᓪᓗᒋᑦ ᓄᓇᕗᑦ ᒪᓕᒐᓕᐅᖅᑎᕐᔪᐊᖓᑦ, ᓗᐊᕆ ᐃᓪᓚᐅᑦ ᐊᒻᒪᓗ ᓄᓇᕗᑦ ᓯᕗᓕᖅᑎᖓ ᐸᐅᓗᓯ P.J. ᐊᕿᐊᕈᖅ.
ᐊᕐᕌᒍᑕᒫᖅᓯᐅᑎᒥ ᑲᑎᒪᓂᕐᒥ ᑲᑎᒪᑎᓪᓗᒋ ᖁᔭᓐᓇᒦᕐᓇᐅᓚᐅᖅᒥᔪᖅ ᔭᐃᒥᓯ ᐃᑦᑐᓗᖕᒥᒃ, ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓᑕ ᑐᒡᓕᐊ, ᐅᓄᖅᑐᓂᒃ ᐊᒃᓱᕉᑎᖃᖅᓯᒪᖕᒪᑦ ᐱᓕᕆᓪᓗᓂ ᐃᓄᐃᑦ ᒥᒃᓵᓄᑦ. ᐃᑦᑐᓗᒃ ᓂᕈᐊᒐᒃᓴᐅᑲᓐᓂᔾᔮᖏᑦᑐᖅ ᑎᓯᐱᕆ 2022−ᒥ ᐃᓱᓕᕝᕕᖃᕐᓗᓂ.
ᓄᓇᕗᑦ ᑐᙵᕕᒃᑯᑦ ᐊᕐᕌᒍᑕᒫᖅᓯᐅᑎᒥᖕᓂᒃ ᑲᑎᒪᔪᒫᖅᑐᑦ ᐃᖃᓗᒃᑑᑦᑎᐊᕐᒥ, ᐅᑐᐱᕆ 24-26, 2023-ᒥ.
-30-
ᑐᑭᓯᒋᐊᕐᕕᒋᓗᒍ:
ᑭᐊᕙᓐ ᖃᑉᓗᑦᑎᐊᖅ
ᑐᑭᒧᐊᒃᑎᑦᑎᔨ, ᑐᓴᐅᒪᖃᑦᑕᐅᑎᓕᕆᓂᖅ, ᓄᓇᕗᑦ ᑐᙵᕕᒃ ᑎᒥᖓᑦ
ᐅᖄᓚᐅᑦ: (867) 975-4900
ᐊᑭᖃᙱᑦᑐᖅ: 1-888-646-0006
