ᓄᓇᕗᑦ ᑐᓐᖓᕕᒃᑯᑦ ᐊᖏᔪᖅᑳᖓ ᑳᑎ ᑕᐅᑐᙱ ᐅᓪᓗᒥ ᓴᖅᑮᖅᑲᐅᔪᖅ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ ᓴᖅᑭᐸᓪᓕᐊᓯᒪᓂᖏᓐᓂᒃ ᐅᓂᒃᑳᓕᐊᖑᕙᓪᓕᐊᔪᓂᒃ ᑐᓐᖓᕕᒃᑯᑦ ᐃᑭᐊᖅᑭᕕᖓᓂ. ᑕᕝᕙᓃᖃᑕᐅᔪᑦ ᐊᐱᖅᓱᕐᓂᐅᖃᑦᑕᕐᓯᒪᔪᑦ ᐊᐅᓚᑦᓯᖃᑕᐅᖃᑦᑕᕐᓯᒪᔪᓂᒃ ᐊᔾᔨᒌᓐᖏᑦᑐᓂᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ ᐋᔩᕋᕈᑕᐅᕙᓪᓕᐊᓯᒪᓂᖏᓐᓂᒃ ᐅᑭᐅᕋᓴᓐᓂᒃ, ᐊᒻᒪᓗ ᐊᔾᔨᓐᖑᐊᖃᐅᕐᒥᔪᖅ ᐅᕙᑦᓯᐊᕈᕐᓂᓴᕐᓂᑦᑕᐅᖅ.
“ᑖᓐᓇ ᐱᓕᕆᐊᖑᔪᖅ ᓴᖅᑮᓯᒪᔪᖅ ᐊᑐᕐᓂᓕᒻᒪᕆᓐᓂᒃ ᐊᓐᓂᓇᖅᑐᓂᒃ ᑭᓱᑐᐃᓐᓇᕐᓂᒃ ᐊᒻᒪᓗ ᓇᓗᓇᐃᖅᑐᕐᓯᒪᔪᓂᒃ ᑲᒪᖃᑕᐅᓪᓚᑖᕐᓯᒪᔪᓂᒃ ᑐᓴᐅᓯᑐᐃᓐᓇᐅᖏᑦᑐᓂᒃ ᐊᐅᓚᔾᔭᑦᑕᐅᓯᒪᔪᒥᒃ ᑲᓇᑕᒥ ᐊᓯᔾᔨᕈᑕᐅᓯᒪᓪᓗᓂ. ᐅᓂᒃᑳᕆᔭᐅᓂᖓ ᓄᓇᕗᑦ ᖃᓄᖅ ᐱᓐᖑᖅᑎᑕᐅᓐᓂᕐᒪᖔᖅ, ᐊᒻᒪᓗ ᐅᐱᒍᓲᑎᒐ ᓴᖅᑭᑕᕐᓂᒃ ᐅᓪᓗᒥ,” ᐅᖃᖅᑐᖅ ᑕᐅᑐᓐᖏ.
ᒫᓐᓇᕈᓘᓚᐅᖅᑐᖅ ᑭᓯᐊᓂ, ᐃᓄᐃᑦ ᖃᐅᔨᒪᓂᖏᑦ ᐊᑐᕐᓯᒪᔭᖏᓪᓗ ᐱᓯᒪᔭᐅᓕᑕᐃᓐᓇᓚᐅᖅᑐᑦ ᐅᓂᒃᑳᕆᔭᐅᕙᓪᓕᐊᓕᖅᑐᑎᓪᓗ ᑕᕝᕘᓇ ᑭᓯᐊᓂ ᐅᓂᒃᑳᕆᔭᐅᖃᑦᑕᓕᕐᒪᑦ ᐱᖅᑯᓯᕆᔭᐅᓯᒪᔪᓂᒃ.
ᓴᓐᖏᓂᖃᕋᓗᐊᖅᑎᓪᓗᒍ ᐊᐅᓚᑕᐅᕙᓪᓕᐊᓂᖓ ᐱᓕᕆᐊᕆᔭᐅᓂᖓᒍᑦ ᑎᒍᓯᔾᔪᑕᐅᕙᓪᓕᐊᔪᖅ ᐅᓂᒃᑳᓂᒃ ᖃᐅᔨᒪᓂᕆᔭᐅᔪᓂᒃ, ᐃᓚᐃᓐᓇᖓ ᐊᑐᖅᑕᐅᖃᑦᑕᕐᓯᒪᔪᓂᒃ ᑐᓴᕈᑎᓕᐊᖑᓯᒪᔪᑦ ᐃᓱᒪᑐᔪᒻᒪᕆᐅᔪᓂᓪᓗ ᓂᐱᓕᐅᖅᑕᐅᓯᒪᔪᑦ ᐅᓪᓗᒥᒧᑦ ᖃᑦᓰᓐᓇᑯᓗᐃᑦ.
ᑐᓐᖓᕕᒃᑯ ᑲᑎᒪᔨᖏᑦ ᑲᒪᒋᔭᐅᖁᔨᓕᓚᐅᖅᑐᑦ ᑖᑦᓱᒥᖓ ᐊᒻᒪᓗ ᑐᓂᓯᓪᓗᑎᒃ ᑮᓇᐅᔭᖅᑑᑎᒃᓴᓂᒃ ᐅᓂᒃᑳᓯᐅᖅᑕᐅᒍᑎᒃᓴᓂᒃ ᓂᐱᓕᐅᕐᓗᒋᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓄᑦ ᐋᔩᕋᖅᑎᒋᔭᐅᖃᑦᑕᕐᓯᒪᔪᑦ. ᑐᓐᖓᕕᒃᑯᑦ ᓄᓇᕗᑦ ᒐᕙᒪᒃᑯᖏᓐᓂᒃ ᑮᓇᐅᔭᖅᑑᑎᒃᓴᑲᓐᓂᕐᓂᒃ ᑖᑦᓱᒧᖓ ᑐᒃᓯᕋᓕᓚᐅᕐᒥᔪᑦ. ᑖᒃᑯᐊ ᑮᓇᐅᔭᖅᑑᑎᒃᓴᑦ ᐊᑐᐃᓐᓇᕈᖅᑕᐅᓚᐅᖅᑐᑦ ᐃᓄᖕᓄᑦ ᐊᒻᒪᓗ ᑲᑐᔾᔨᖃᑎᒌᓄᑦ ᓂᐱᓕᐅᕆᔾᔪᑎᒃᓴᑦ ᐊᒻᒪᓗ ᑎᑎᕋᖅᑕᐅᕙᓪᓕᐊᒍᑎᒃᓴᖏᓐᓄᑦ ᓂᐱᐅᓕᐅᒐᑦ ᐅᓂᒃᑳᓯᐅᖅᑕᐅᒍᑎᒥᓃᑦ ᐱᕙᓪᓕᐊᓯᒪᓂᖓᓂᒃ, ᐋᔩᕋᕈᑕᐅᓂᖓᓂ ᐊᒻᒪᓗ ᐱᓐᖑᖅᑎᑕᐅᓂᕆᓚᐅᖅᑕᖓᓂᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ.
ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ ᓴᖅᑭᐸᓪᓕᐊᓯᒪᓂᖏᓐᓂᒃ ᐅᓂᒃᑳᑦ ᐊᑐᐃᓐᓇᐅᔪᑦ ᐃᓄᒃᑎᑐᑦ, ᐃᓄᐃᓐᓇᑐᑦ ᐊᒻᒪᓗ ᖃᓪᓗᓈᑎᑐᑦ. ᑐᓐᖓᕕᒃᑯᑦ ᐸᕐᓇᒻᒥᔪᑦ ᓴᖅᑮᓵᓕᓛᕈᒪᓪᓗᑎᒃ ᐱᓕᕆᐊᒃᓴᒃᑯᑦ ᑕᕝᕙᓃᑦᑐᑦ ᐊᔾᔩᑦ ᑭᒃᑰᓂᖏᓐᓂᒃ ᓇᓗᓇᐃᖅᑐᐃᓂᕐᒧᑦ. ᑐᓐᖓᕕᒃᑯᑦ ᐸᕐᓇᐅᑎᒋᒻᒥᔭᖓ ᓴᖅᑭᑎᑦᓯᓛᕈᒪᓪᓗᑎᒃ ᓂᐱᓕᐅᒐᕐᓂᒃ ᓱᕐᕋᑦᓯᒪᓐᖏᓪᓗᒋᑦ ᐅᓂᒃᑳᕐᓯᐅᖅᑕᐅᖃᑦᑕᓚᐅᖅᑐᓂᒃ ᐊᐱᖅᓱᖅᑕᐅᓪᓗᑎᒃ ᑲᑎᖅᓱᖅᑕᐅᓚᐅᖅᑐᓂᒃ ᐃᖅᑲᓇᐃᔮᖑᑎᓪᓗᒋᑦ ᑖᒃᑯᐊ.
