ᑐᓴᕋᑦᓴᓕᕆᔩᑦ

ᓄᑖᑦ ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᐅᓚᑦᑎᔨᖏᑦ ᐅᓂᒃᑳᐅᑎᖃᕐᓂᐊᖅᑐᑦ ᖃᓂᓐᓂᖅᓴᐅᓂᖅ ᐃᓄᖕᓄᑦ ᑕᐅᓱᓐᓂᒃᑯᑦ

(ᐊᒃᑑᑉᐱᕆ 14, 2010 — ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖓᔪᖅᑳᕆᑲᐃᓐᓇᖅᑕᖓᑦ ᔭᐃᒻᔅ ᐃᑦᑐᓗᒃ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓᑦ ᓵᓕ ᐃᕙᓕᒃ, ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓᑦ ᔫᓯ ᑯᓱᒐᖅ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓᑦ ᐅᖃᓕᖅ ᐃᔨᑦᓯᐊᖅ ᐅᓂᒃᑳᕐᓂᐊᖅᑐᑦ ᐱᓪᓗᒍ ᖃᓂᓐᓂᖅᓴᐅᓂᖅ ᐃᓄᖕᓄᑦ ᐊᐅᓚᑦᑎᓂᕐᒧᑦ ᐃᓕᖓᔪᒥᑦ, ᐊᒃᑑᑉᐱᕆ 15, 2010 1:30 ᐅᓐᓄᒃᓴᒃᑯᑦ ᓰᐲᓰᒃᑯᑦ ᓈᓚᐅᑎᖏᑦᑎᒍᑦ ᑕᐅᓯᓂ ᑐᓴᖅᓴᐅᑎᓪᓗᒍ.

2006-ᒥ ᓄᓇᕗᑦ ᑐᙵᕕᒃ ᑎᒥᖓᑦ ᐊᒻᒪᓗ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᒋᐊᓚᐅᖅᓯᒪᖕᒪᑕ ᕿᒥᕐᕈᐃᓂᕐᒥᑦ ᐅᑯᐊ ᑎᒥᐅᔪᑦ ᐃᓕᖓᓂᖏᓐᓂᑦ ᐃᒪᓐᓇ ᐹᖅᑭᒃᓯᕙᓪᓕᖅᓯᓂᕐᒧᑦ ᐊᐅᓚᑦᑎᐊᕐᓂᖅᓴᐅᓗᑎᒃᓗ ᐊᒻᒪᓗ ᐃᖏᕐᕋᑦᑎᐊᕐᓂᖅᓴᐅᓗᑎᒃᓗ ᑕᒪᒃᑯᐊ ᑎᒥᖁᑎᕗᑦ ᑎᑭᐅᑎᔪᓐᓇᕐᓂᕐᒥᑦ ᐱᔭᒃᓴᒻᒪᕆᖏᓐᓂᑦ ᐃᒪᓐᓇᓗ ᓴᐳᔾᔨᓯᒪᓗᑎᒃ, ᐊᔭᐅᖅᑐᐃᓗᑎᒃ ᖁᒡᕙᖅᑎᑦᑎᕚᓪᓕᕐᓂᕐᒧᑦ ᐊᒻᒪᓗ ᐱᓯᐅᑎᑦᑎᕚᓪᓕᖅᓯᒪᓂᕐᒥᑦ ᐃᓱᒪᒋᔭᐅᔪᓂᑦ ᐃᓄᒻᒪᕆᖕᓄᑦ.

ᑕᐃᒪᖓᓂᑦ ᕿᒥᕐᕈᓂᖅ ᐱᒋᐊᓚᐅᖅᑎᓪᓗᒍ, ᐊᑉᓗᕆᐊᕈᑎᑦ ᓯᕗᒻᒧᑦ ᐱᒋᐊᖅᑕᐅᓯᒪᔪᑦ ᐃᒪᓐᓇ ᐋᖅᑭᒃᓯᕚᓪᓕᖅᓯᔪᒪᓂᕐᒧᑦ ᐅᑯᓂᖓ ᑎᒥᐅᔪᑦ ᐃᓕᖓᓂᖏᓐᓂᑦ. ᖃᓂᓐᓂᖅᓴᐅᓂᖅ ᐃᓄᖕᓄᑦ ᓱᓕ ᐊᑉᓗᕆᐊᕈᑕᐅᔪᖅ ᐅᓄᖅᓯᒋᐊᖅᓗᒋᑦ ᐊᐅᓚᑦᑎᐊᕐᓂᕐᒧᑦ ᒪᑯᐊ ᑎᒥᖁᑎᕗᑦ ᐱᔨᑦᑎᕐᓂᕆᔭᖏᑦ ᐃᓄᒻᒪᕆᖕᓄᑦ.

ᐊᒥᓱᐃᑦ ᐊᑐᓕᖁᔨᔾᔪᑎᑦ ᐱᔭᐅᖃᑦᑕᓚᐅᖅᑐᑦ ᓯᕗᓪᓕᕐᒥ ᐅᑭᐅᒥ ᐊᐅᓪᓗᔾᔨᔪᑦ ᐊᓯᔩᕐᓂᕐᒥᑦ ᐃᓗᐊᓂ ᓄᓇᕗᑦ ᑐᙵᕕᒃ ᑎᒥᖓᓐᓂᑦ, ᐃᓂᐅᔪᖅ ᐃᒪᓐᓇ ᑕᒪᕐᒥᒃ ᑎᒥᐅᔪᑦ ᐊᔾᔨᒌᒃᓂᖃᖅᑎᓪᓗᒋᑦ ᐃᓱᒪᒋᔭᖏᓐᓂᑦ ᖃᐃᓪᓗᑎᒃ ᑎᑭᐅᑎᓪᓗᑎᒃ ᑲᑎᓐᓂᒃᑯᑦ.

ᐃᓕᑦᑎᒃᑲᓐᓂᕈᒪᒍᕕᑦ ᐱᓪᓗᒋᑦ ᐊᓯᔾᔨᕈᑕᐅᔪᑦ ᐅᐸᒍᒃ ᐅᑯ ‘ᒫᓐᓇ ᐱᒋᐊᖅᑕᐅᓯᒪᔪᑦ’ ᐃᓕᖓᔪᑦ ᐃᑭᐊᕿᔾᔪᑎᖓᓐᓂ www.tunngavik.com ᐊᒻᒪᓗ ᓈᓚᒃᓗᑎᑦ ᑕᐅᓱᓐᓂᒃᑯᑦ ᐊᒃᑑᑉᐱᕆ 15, 2010 ᖃᐅᔨᓴᐅᑎ 1:30-ᖑᖅᐸᑦ ᐅᓐᓄᒃᓴᒃᑯᑦ.

-30-

ᓱᓕ ᑐᑭᓯᒋᐊᒃᑲᓐᓂᕈᒪᒍᕕᑦ:

ᕗᕌᓐᑯ ᐳᓯᐊᒥ
ᑐᑭᒧᐊᒃᑎᑦᑎᔨ ᑐᓴᐅᒪᖃᑦᑕᐅᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓᑦ
ᐅᖃᓘᑖ: (867) 975-4939 ᐊᑭᖃᖏᑦᑐᖅ: 1-888-646-0006