(ᓅᕙᐃᒻᕙ 9, 2020, ᐃᖃᓗᐃᑦ) ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᑐᓴᖅᑎᑦᓯᒍᑎᖓ ᓄᑖᑦ ᐸᕐᓇᑕᐅᔪᑦ ᓴᐳᔾᔨᓯᒪᒍᑎᒃᓴᑦ ᐸᕐᓇᓯᒪᒍᑎᒃᓴᑦ ᑭᒡᒍᑎᒃᓴᓪᓗ ᓄᕙᔾᔪᐊᕐᓇᖅ ᖃᓂᒪᓐᓇᒧᑦ ᐊᑐᖅᑕᐅᓗᑎᒃ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓄᑦ ᐃᑲᔫᑎᒃᓴᑦ ᑮᓇᐅᔭᑦ.
“ᑭᒡᒐᑐᕐᓗᒋᑦ ᐃᓄᐃᑦ, ᖁᔭᓐᓇᒦᕈᒪᕙᕋ ᒥᓂᔅᑕ ᒫᒃ ᒥᓚ ᐃᓕᓴᖅᓯᓯᒪᓂᖓᓂᒃ ᐊᔾᔨᐅᖏᑦᑐᒥᒃ ᐱᔭᕆᐊᓕᖏᓐᓂᒃ ᐃᓄᐃᑦ ᓴᐳᔾᔨᓯᒪᒍᑎᒃᓴᒥᒃ, ᐸᕐᓇᓯᒪᓂᕐᒧᓪᓗ ᑭᒡᒍᑎᒃᓴᓄᓪᓗ ᓄᕙᔾᔪᐊᕐᓇᖅ ᐋᓐᓂᐊᒧᑦ,” ᐅᖃᖅᑐᖅ ᐊᖓᔪᖅᑳᒧᑦ ᑭᖑᕝᕕᐅᑎᓯᒪᔪᖅ ᔭᐃᒥᓯ ᐃᑦᑐᓗᒃ. “ᑲᓇᑕᓕᒫᒥ ᐊᒡᒐᒥᓂᒃ ᐅᐊᓴᖃᑦᑕᕈᓐᓇᑎᓪᓗᒋᑦ, ᐅᖓᓯᒌᖃᑦᑕᕐᓗᑎᒃ, ᐊᒻᒪᓗ ᒥᓕᒐᕐᓂᒃ ᑮᓇᕐᒧᑦ ᐊᑐᖃᑦᑕᓂᕐᒧᑦ ᐊᒻᒪᓗ ᐊᑐᐃᓐᓇᖃᑦᓯᐊᖅᑐᑎᒃ ᓈᖕᒪᑦᑐᒥᒃ ᐃᖢᐊᖅᓴᐃᔾᔪᑎᒥᒃ. ᐱᓕᕆᐊᕗᓪᓕ ᐃᒪᐃᒋᐊᖃᕐᒪᑦ ᐊᒻᒪᓗ ᐊᔾᔨᒌᙱᑕᒻᒪᕆᒻᒪᒍ ᓄᓇᕗᒻᒥ.”
ᑐᙵᕕᒃᑯᑦ ᐊᒻᒪᓗ ᐊᕕᑦᑐᖅᓯᒪᓂᕐᓂ ᐃᓄᐃᑦ ᑲᑐᔾᔨᖃᑎᒌᑦ (RIA) ᐱᓕᕆᖃᑎᒌᑦᑐᑦ ᑎᑭᐅᑎᒍᓐᓇᖁᓪᓗᒋᑦ ᐊᑐᕆᐊᓕᖏᓐᓄᑦ ᓄᓇᕗᒻᒥ ᐃᓄᐃᑦ ᓂᕆᐅᙱᓈᕈᔾᔭᐅᓯᒪᑎᓪᓗᑕ. ᐊᕕᑦᑐᖅᓯᒪᓂᕐᓂ ᐃᓄᐃᑦ ᑲᑐᔾᔨᖃᑎᒌᑦ ᐱᓇᓱᐊᒐᖃᖅᑐᑦ ᐱᓕᕆᐊᒃᓴᓂᒃ ᑭᒃᑯᑐᐃᓐᓇᕐᓄᑦ. ᑐᙵᕕᒃᑯᑦ ᐱᓇᓱᐊᒐᖓᑦ ᐊᐅᓚᓂᐅᔪᑦ ᐊᒻᒪᓗ ᐃᓚᒋᔭᐅᓪᓗᑎᒃ ᑖᒃᑯᓄᖓ ᓄᑖᑦ ᐱᓕᕆᐊᒃᓴᑦ:
- $1.69−ᒥᓕᔭᓐ ᐃᑲᔫᑎᒃᓴᑦ ᓄᑕᖅᑲᓄᑦ ᐃᓄᒃᑐᑦ ᐃᓕᓐᓂᐊᕈᑎᒃᓴᑎᒍᑦ ᑎᑎᖅᑭᕆᓂᕐᒨᖓᔪᓂᒃ ᓈᓴᐅᓯᕆᓂᕐᒧᓪᓗ;
- $1-ᒥᓕᔭᓐ ᐊᑐᖅᑕᐅᔪᓂᒃ ᐊᒻᒪᓗ ᓄᑖᓂᒃ ᐊᖏᕐᕋᖃᙱᑦᑐᓄᑦ, ᐊᖏᕐᕋᒥ ᐋᓐᓂᖅᑎᕆᖃᑦᑕᐅᑎᓂᕐᒧᑦ ᕿᒫᕕᒻᓂᒃ ᐊᒻᒪᓗ ᐊᖏᕐᕋᑖᖅᐸᓪᓕᐊᒐᓱᐊᖅᑐᑦ ᓇᔪᑲᐃᓐᓇᖃᑦᑕᓂᐊᖅᑕᖏᓐᓂᒃ ᐃᑲᔫᑎᓂᐊᖅᑐᒥᒃ ᖃᓂᒌᓗᐊᑦᑕᐃᓕᓂᕐᒧᑦ ᐅᖓᓯᒌᓐᓂᖅᓴᐅᒍᑎᒃᓴᒧᑦ;
- $500,000 ᐊᖏᓪᓕᒋᐊᕈᑎᒃᓴᖅ ᓄᓇᕗᒻᒥ ᖃᐅᔨᓴᕐᓂᕐᒧᑦ ᐊᐅᓚᑕᖏᓐᓂ, ᓲᕐᓗ ᐱᓕᖕᒪᒃᓴᐅᑏᑦ ᐃᓄᓐᓄᑦ;
- $500,000 ᐱᑕᖃᖁᓪᓗᒋᑦ ᓄᓇᕗᒻᒥ ᐃᓄᐃᑦ ᐊᖏᕐᕋᓕᒫᖏᑦ ᐆᑎᕐᓇᖅᑐᖃᕐᒪᖔᖅ ᖃᐅᔨᓴᕈᑎᒥᒃ;
- $500,000 ᓄᓇᕗᒻᒥ ᐃᓄᐃᑦ ᒥᖅᓱᖅᑏᑦ ᑮᓇᕐᒧᑦ ᒥᓕᒐᓕᐅᕈᑎᒃᓴᖏᓐᓂᒃ;
- $500,000 ᓂᕆᔭᑦᓴᓂᒃ, ᓴᓗᒻᒪᖅᓴᐃᑎᓂᒃ ᐊᒻᒪᓗ ᐃᓕᓐᓂᐊᕈᑎᒃᓴᓂᒃ ᑭᒃᑯᑐᐃᓐᓇᕐᓄᑦ ᓇᓗᓇᐃᖅᑕᓄᑦ ᓄᕙᔾᔪᐊᓇᖅᑐᖃᕆᐊᖓ, ᐃᓚᒋᔭᖏᓪᓗ, ᐃᑲᔫᑎᒃᓴᓂᒃ 14-ᓂᒃ ᐅᓪᓗᓂᒃ ᓇᒧᙵᔭᑦᑕᐃᓕᒋᐊᖃᖅᑎᓪᓗᒋᑦ;
- $250,000 ᐱᓕᕆᖃᑎᒌᒍᑎᒃᓴᖅ ᕼᐊᒻᓚᓂᒃ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓂᒃ ᐃᑲᔫᑎᒃᓴᒥᒃ ᐃᒪᖃᑦᓯᐊᓂᕐᒧᑦ ᑭᓈᓗᓕᕆᓂᕐᒧᓪᓗ ᐱᖁᑎᕐᔪᐊᓄᑦ; ᐊᒻᒪᓗ
- $200,000 ᐊᑭᓕᖅᓲᑎᒃᓴᑦ ᐃᑲᔫᑎᓄᑦ ᒥᑭᓂᖏᓐᓂ ᐃᓕᓐᓂᐊᖅᑎᓄᑦ ᐃᓕᓴᐃᔨᓄᑦ, ᐱᓇᓱᐊᖃᑕᐅᓪᓗᑎᒃ ᓄᓇᕗᑦ ᒐᕙᒪᖓ, 2020-ᒥ ᐊᓯᖅᑯᕝᕕᖃᙱᑦᑐᒥᒃ ᒪᑐᓯᒪᒋᐊᖃᖅᑎᓪᓗᒋᑦ.
-30-
ᑐᑭᓯᒋᐊᒃᑲᓂᕐᕕᒃᓴᖅ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006
www.tunngavik.com
ᐱᓕᕆᐊᖑᓯᒪᓂᖓ
ᑐᙵᕕᒃᑯᑦ ᑐᓂᔭᐅᓚᐅᖅᑐᑦ $33,817,500 ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓄᑦ ᐃᑲᔫᑎᒃᓴᓄᑦ ᑮᓇᐅᔭᓂᒃ, ᐊᑯᓐᓂᐊᓂ ᐱᓕᕆᐊᖅ 1 ᐊᒻᒪᓗ ᐱᓕᕆᐊᖅ 2. ᑖᒃᑯᐊ ᑮᓇᐅᔭᑦ ᑐᓂᐅᖅᑲᖅᑕᐅᓯᒪᔪᑦ ᑐᙵᕕᒃᑯᑦ ᑲᑎᒪᔨᖏᓐᓄᑦ ᐃᒪᐃᓕᖓᔪᑦ:
ᑐᙵᕕᒃᑯᑦ $7,702,874
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ $10,444,337
ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ $7,298,900
ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ $5,866,389
ᖃᓪᓗᓈᓂᒥᐅᑕᑦ ᐃᓄᐃᑦ $2,505,000
ᐃᓄᐃᑦ ᑲᑐᔾᔨᖃᑎᒌᑦ ᓇᖕᒥᓂᖅ ᑐᓂᐅᖅᑲᐃᖃᑦᑕᓂᐊᖅᑐᑦ ᐊᒻᒪᓗ ᑐᓴᕋᑦᓴᓕᐅᕐᓗᑎᒃ. ᓄᓇᕗᒻᒥ ᐃᓄᐃᑦ ᐊᖏᕐᕋᓖᑦ ᓄᓇᑖᖅᓯᒪᓂᐅᑉ ᓇᓗᓇᐃᖅᑕᐅᓯᒪᓂᖓᑕ ᓯᓚᑖᓂ ᐱᔨᑦᓯᕈᑎᑖᖅᑎᑕᐅᖃᑦᑕᓂᐊᖅᑐᑦ ᐊᕕᑦᑐᖅᓯᒪᓂᐅᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ (RIA) ᐊᕕᑦᑐᖅᓯᒪᓂᐅᔪᒦᙶᖅᓯᒪᕕᖏᓐᓂ.
ᓄᓇᕗᑦ ᑐᙵᕕᒃ ᑎᒥᖓᓂ ᐱᓕᕆᐊᒃᓴᑦ ᐱᔨᑦᓯᕈᑏᓪᓗ
ᐃᓕᓐᓂᐊᕈᑎᓄᑦ ᐃᑲᔫᑎᒃᓴᑦ $1,690,874
ᐃᓄᒃᑐᑦ ᐃᓕᓐᓂᐊᕈᑎᒃᓴᓄᑦ ᐃᑲᔫᑎᒃᓴᓕᐊᖑᔪᑦ ᐊᖏᕐᕋᒧᑦ ᐊᒻᒪᓗ ᐅᖓᓯᑦᑐᒥ ᐃᓕᓐᓂᐊᓂᕐᒧᑦ. ᑲᓇᑕᓕᒫᒥ, ᓄᕙᔾᔪᐊᕐᓇᖅ−19 ᓴᖅᑭᕈᑕᐅᖃᑦᑕᕐᒪᑦ ᐃᓕᓐᓂᐊᕐᕕᒃ ᒪᑐᒃᑲᓐᓂᖃᑦᑕᕐᓂᖏᓐᓄᑦ. ᓄᓇᕗᒻᒥ ᐃᓄᐃᑦ ᓄᑕᖅᑲᑦ ᓵᙵᔭᕆᐊᖃᖃᑦᑕᖅᑐᑦ ᐅᔾᔨᓇᖅᑐᒥᒃ ᐊᐳᖅᑕᕕᓐᓂᒃ ᐊᒃᑐᐃᓯᒪᔪᓂᓪᓗ ᐃᓕᓐᓂᐊᕐᓂᖏᓐᓂᒃ ᐊᓯᖅᑯᕝᕕᖃᙱᑦᑐᒥᒃ ᐃᓕᓐᓂᐊᕐᕕᒃ ᒪᑐᖃᑦᑕᕐᓂᖏᓐᓄᑦ. ᐱᓕᕆᐊᖑᕙᓪᓕᐊᓂᖏᑎᒍᑦ ᐸᕐᓇᑕᐅᓯᒪᔪᑦ ᐱᒋᐊᕈᑎᖃᕐᓂᐊᖅᑐᑦ ᑎᑎᖅᑭᕆᓂᕐᒧᑦ ᐃᑲᔫᑎᓂᒃ ᐃᓚᒌᓄᑦ ᓇᒧᙶᔭᑦᑕᐃᓕᒋᐊᖃᖅᑎᓪᓗᒋᑦ ᐊᒻᒪᓗ ᐃᑲᔫᑎᑕᖃᒃᑲᓂᖅᑐᓂ ᐊᑐᕋᑦᓴᓂᒃ ᐋᖅᑭᓱᖅᑕᐅᔪᓂᒃ ᑐᓂᐅᖅᑲᖅᑕᐅᔪᓂᓪᓗ.
ᐊᖏᕐᕋᖃᙱᑦᑐᓄᑦ $1,000,000
ᐊᕐᕌᒍᕋᓵᓗᐃᑦ, ᓄᓇᕗᑦ ᓵᙵᑦᓯᔭᕆᐊᖃᖃᑦᑕᖅᓯᒪᒻᒪᑦ ᐃᓪᓗᑭᑦᓴᓂᕐᒥᒃ ᐊᒻᒪᓗ ᐃᓄᒋᐊᓗᐊᖃᑦᑕᓂᕐᒥᒃ ᐸᖕᒥᐅᓂᕐᒧᑦ, ᑖᓐᓇ ᒥᓕᒐᕆᔭᐅᒋᐊᒃᑲᓂᖅᓯᒪᔪᖅ ᐊᖏᕐᕋᖃᙱᓐᓂᒋᐊᓪᓚᒻᒧᑦ ᐊᑲᐅᙱᓪᓕᐅᕈᑎᒥᒃ. ᐅᓗᕆᐊᓇᖅᑐᒦᒍᑕᐅᔪᖅ ᓄᓇᕗᒻᒥ ᐱᓗᖅᑯᑎᒻᒪᕆᐅᖃᑦᑕᖅᐳᖅ ᐃᓅᓯᕐᒧᑦ ᐊᒻᒪᓗ ᖃᓄᐃᙱᑦᓯᐊᕈᑎᒃᓴᖏᓐᓄᑦ ᐃᓄᐃᑦ, ᐊᖏᕐᕋᖃᙱᑦᑐᒃᑯᕕᖃᕐᓂᖅ ᐊᑐᖅᑕᐅᖏᓐᓇᕆᐊᖃᖅᑐᓂ ᐃᓅᓯᕐᒥ. ᓄᕙᔾᔪᐊᕐᓇᖅ−19 ᓄᓇᕐᔪᐊᕐᒥ ᓴᖅᑭᐅᒪᓕᖅᑎᓪᓗᒍ, ᐃᓱᒫᓗᓐᓇᕐᓂᖓ ᑕᒃᑯᓄᖓ ᐸᖕᒥᐅᓗᐊᖅᑐᒦᖃᑦᑕᖅᑐᓄᑦ ᐃᓄᒋᐊᓗᐊᖃᑦᑕᖅᓱᑎᒃ, ᐅᕝᕙᓘᓐᓃᑦ ᐱᑕᖃᒡᒐᐃᓇᖅᑎᓪᓗᒍ ᐱᕕᑭᓪᓕᐅᖃᑦᑕᕐᓂᖏᑦ ᑲᑎᒍᑕᐅᓯᒪᒧᖅ ᐊᖏᕐᕋᓕᐊᖑᓯᒪᔪᓂ ᐃᑎᔪᕈᒃᑲᓐᓂᑐᐃᓐᓇᖅᓯᒪᕗᖅ. ᑐᒃᓯᕋᐅᓯᐅᖁᔨᓂᖅ ᑐᓂᔭᐅᓂᐊᖅᑐᖅ.
ᖃᐅᔨᓴᕐᕕᒃ $500,000
ᐊᒥᓱᒐᓚᓐᓂ ᐊᕐᕌᒍᓂ, ᑐᙵᕕᒃᑯᑦ ᐋᖅᑭᑦᓱᐃᖃᑦᑕᖅᐳᑦ ᖃᐅᔨᓴᕐᕕᒻᒥᒃ ᐊᐅᓚᑦᓯᕕᐅᒍᓐᓇᖅᑐᒥᒃ ᖃᐅᔨᓴᕐᓂᕐᒧᑦ ᓂᕿᓂᒃ ᖁᐱᕐᕈᖃᙱᒃᑲᓗᐊᕐᒪᖔᑕ ᓄᓇᕗᒻᒥ. ᐱᕙᓪᓕᐊᑎᑦᓯᓂᖅ ᑖᑦᓱᒥᖓ ᖃᐅᔨᒪᓂᕐᔪᐊᒃᑯᑦ, ᑮᓇᐅᔭᓕᑕᐅᒍᑏᑦ ᐱᕈᖅᐸᓪᓕᐊᓂᐊᖅᑐᖅ ᓄᕙᔾᔪᐊᓇᒧᑦ ᖃᐅᔨᓴᕐᕕᒃᑖᕆᐊᖃᒃᑲᓂᕐᓂᕐᒧᑦ ᐊᒻᒪᓗ ᐃᓚᒋᔭᐅᒋᐊᖃᕐᓂᐊᑐᒃᓴᐅᔪᖅ ᓄᒃᑕᖅᑐᒥᒃ ᖃᐅᔨᓴᕈᑎᑖᕐᓂᖅ, ᐱᖁᑎᓂᒃ, ᐅᕝᕙᓘᓐᓃᑦ ᐱᓕᖕᒪᒃᓴᐅᑎᒃᓴᓂᒃ ᐃᓄᓐᓄᑦ.
ᐆᑎᕐᓇᕐᒪᖔᖅ ᖃᐅᔨᓴᕈᑏᑦ $500,000
ᑲᓇᑕᓕᒫᒥ, ᑭᒃᑯᑐᐃᓐᓇᐃᑦ ᐅᖄᓚᖃᑦᑕᖁᔭᐅᒻᒪᑕ ᐃᖢᐊᖅᓴᐃᔨᒥᓄᑦ ᒪᓗᓐᓇᖅᑐᒥᒃ ᖃᓄᐃᒍᑎᖃᕈᑎᒃ ᓄᕙᔾᔪᐊᕐᓇᖃᑐᐃᓐᓇᕆᐊᖃᕐᓂᕐᒧᑦ-19, ᐃᓚᒋᔭᐅᓪᓗᓂ ᐆᑎᕐᓇᕐᓂᖅ. ᓄᓇᕗᒻᒥ, ᐋᓐᓂᐊᔪᖅ ᐅᖄᓚᑉᐸᑦ ᐋᓐᓂᐊᕕᒻᒧᑦ ᐊᒻᒪᓗ ᑐᓂᓯᑉᐸᑦ ᐅᑎᕐᓇᕐᓂᕐᒥᓂᒃ, ᐋᓐᓂᐊᓯᐅᖅᑎᒧᑦ ᑎᑎᕋᖅᑕᐅᒋᐊᖃᓲᖑᒻᒪᑦ. ᐅᑎᕐᓇᕐᒪᖔᖅ ᖃᐅᔨᓴᕈᑏᑦ ᑐᓂᔭᐅᓂᐊᖅᑐᑦ ᐊᑐᓂᑦ ᓄᓇᕗᒻᒥ ᐃᓄᐃᑦ ᐊᖏᕐᕋᖏᓐᓄᑦ, ᐃᓄᒃᑎᑑᖅᑐᓂᒃ ᓄᕙᔾᔪᐊᕐᓇ−19 ᐊᑐᖅᑕᐅᓂᖓᓄᑦ ᑎᑎᕋᕐᕕᒃᓴᓂᒃ ᒪᓕᒐᑦᓴᓂᓪᓗ ᐃᓚᖃᕐᓗᓂ.
ᒥᓕᒐᐃᑦ $500,000
ᒥᖅᓱᖅᑏᑦ ᓄᓇᓕᓕᒫᓂ ᑮᓇᕐᓄᑦ ᒥᓕᒐᓕᐅᕈᓐᓇᖅᑎᑕᐅᓂᐊᖅᑐᑦ. ᑐᙵᕕᒃᑯᑦ ᐃᖅᑲᓇᐃᔭᖃᑎᓖᑦ ᓄᓇᕗᒻᒥ ᓂᐅᕕᕐᕕᓐᓂᒃ ᑐᓂᓯᒍᑎᒃᓴᖏᓐᓂᒃ ᐃᑲᔫᑎᒃᓴᓂᒃ ᓴᓇᔭᑦᓴᓂᒃ ᒪᓕᒐᖃᕐᓗᑎᒃ, ᐊᑭᖃᙱᑦᑐᓄᑦ ᒥᖅᓱᖅᑎᓄᑦ.
ᓇᒧᙵᔭᑦᑕᐃᓕᒋᐊᖃᕐᓂᕐᒧᑦ ᐃᑲᔫᑏᑦ $500,000
ᑭᒃᑯᑐᐃᓐᓪᓇᐃᑦ ᓄᕙᔾᔪᐊᕐᓇᖅ−19 ᒪᓗᓐᓇᖅᑐᖃᖅᐸᑕ, ᐊᒻᒪᓗ ᐃᓚᒋᔭᖏᑦ, ᓇᒧᙶᔭᒋᐊᖃᙱᑦᑐᑦ ᐊᒻᒪᓗ ᖃᐅᔨᓴᕐᓗᑎᒃ ᐋᓐᓂᐊᓂᕐᒥᓂᒃ 14−ᓂᒃ ᐅᓪᓗᓂᒃ. ᑐᙵᕕᒃᑯᑦ ᐃᖅᑲᓇᐃᔭᖃᑎᓖᑦ ᓂᐅᕕᕐᕕᓐᓂᒃ, ᓄᓇᓕᓐᓂ ᐊᖑᓇᓱᑦᑐᓕᕆᔨᒃᑯᑦ ᑲᑐᔾᔨᖃᑎᒌᖏᓐᓂᒃ, ᐊᒻᒪᓗ ᓄᓇᕗᒻᒥ ᐅᓇᓕᑦᓴᔭᓂᒃ ᐃᑲᔪᖁᓪᓗᒋᑦ ᑭᓇᑐᐃᓐᓇᕐᒥᒃ ᐃᓚᖏᓐᓂᓘᓐᓃᑦ ᓇᒧᙶᔭᑦᑕᐃᓕᑎᑦᓯᓂᕐᒧᑦ ᐊᖏᕐᕋᖅᓯᒪᐃᓐᓇᖁᓪᓗᒋᑦ. ᐊᑎᓕᐅᕋᑦᓴᑦ ᑕᑕᑎᕆᐊᓖᑦ ᐊᖏᕈᑏᑦ ᑐᓂᔭᐅᒍᓐᓇᖅᑐᑦ ᐋᓐᓂᐊᕕᓐᓂᒃ ᐊᒻᒪᓗ ᑐᐊᕕᕐᓇᖅᑐᓕᕆᔨᓂᒃ. ᑭᒃᑯᑐᐃᓐᓇᐃᑦ ᐱᔪᒪᒍᓐᓇᖅᑐᑦ ᑖᒃᑯᓂᖓ ᐃᑲᔫᑎᓂᒃ ᐊᒻᒪᓗ ᑐᓴᐅᒪᑎᑦᓯᒍᑎᒃᓴᓂᒃ, ᓲᕐᓗ ᖃᑦᓯᐅᒻᒪᖔᑕ ᐊᖏᕐᕋᒥᐅᑕᖏᑦ ᐊᒻᒪᓗ ᐃᓕᓐᓂᐊᕐᓂᖏᑕ ᖁᕝᕙᓯᓐᓂᖏᓐᓂᒃ ᓄᑕᖅᑲᑦ.
ᐃᒥᖅ ᑮᓇᓗᓪᓗ $250,000
ᑐᙵᕕᒃᑯᑦ ᐃᖅᑲᓇᐃᔭᖃᑎᓖᑦ ᕼᐊᒻᓚᓂᒃ ᐊᒻᒪᓗ ᓄᓇᕗᑦ ᒐᕙᒪᒃᑯᓐᓂᒃ ᐱᓕᕆᒍᑎᒃᓴᓂᒃ ᑐᐊᕕᕐᓇᓗᐊᙳᐊᖅᑐᓂᒃ ᐃᓱᒫᓘᑎᓂᒃ ᖃᐅᑕᒫᑦ ᐃᒥᖅᑕᖅᑕᐅᒋᐊᖃᕐᓂᕐᒧᑦ ᑭᓈᓗᑦᑕᖅᑕᐅᒋᐊᖃᕐᓂᒧᓪᓗ.
ᐸᐃᕆᕖᑦ $200,000
ᐱᓕᕆᖃᑎᖃᖅᑐᑎᒃ ᓄᓇᕗᑦ ᒐᕙᒪᖓᓂᒃ, ᐊᑭᓕᖅᓱᖅᑕᐅᒍᑎᓄᑦ ᐃᑲᔫᑏᑦ ᑐᓂᔭᐅᓚᐅᖅᑐᑦ ᓯᕗᓪᓕᖅᐹᓂ ᑕᓪᓕᒪᓂ ᐱᓇᓱᐊᕈᓯᕐᓂ ᐊᓯᖅᑯᕝᕕᖃᙱᑦᑐᒥᒃ ᒪᑐᓯᒪᒋᐊᖃᖅᑎᓪᓗᒋᑦ. ᑖᒃᑯᐊ ᐃᑲᔫᑏᑦ ᐃᓕᓴᖅᓯᒍᑏᑦ ᕿᑐᕐᖓᓖᑦ ᐃᓚᒋᔭᐅᒍᓐᓇᙱᓐᓂᖏᓐᓂᒃ ᐊᑭᓕᖅᓱᖅᑕᐅᓂᒃᑯᑦ ᒪᑭᒪᔾᔪᑎᒃᓴᓂᒃ ᐸᖅᑭᑦᓯᕕᑕᖃᖅᑎᓐᓇᒍ, ᐊᒻᒪᓗ ᓄᓇᕗᑦ ᐱᒋᐊᓪᓚᕝᕕᖃᙱᑦᑐᑦ ᔭᒐᐃᒍᑎᒃ ᐸᐃᕆᕕᖏᓐᓂᒃ.
ᐃᒥᕐᒧᑦ ᑭᓈᓗᒻᒧᓪᓗ ᐱᔨᑦᓯᖅᑕᐅᒍᑏᑦ ᕼᐊᒻᓚᑦᓄᑦ, $1,250,000, ᑐᓴᖅᑎᑦᓯᒍᑕᐅᓚᐅᖅᑐᖅ ᒫᑦᓯ 25, 2020.
ᓂᕆᔭᒃᓴᖃᑦᓯᐊᓂᕐᒧᑦ ᕼᐊᒻᓚᓄᑦ, $1,000,000, ᑐᓴᖅᑎᑦᓯᒍᑕᐅᓚᐅᖅᑐᖅ ᒫᑦᓯ 25, 2020.
ᐊᒥᐊᒃᑯᖏᑦ ᑮᓇᐅᔭᑦ ᐊᑭᓖᒍᑕᐅᓂᐊᖅᑐᑦ ᑎᑎᖅᑭᕆᔾᔪᑎᓄᑦ.
