ᑐᓴᕋᑦᓴᓕᕆᔩᑦ

ᐃᖅᑲᐅᒪᔭᐅᔾᔪᑎᒃᓴᐃᑦ ᓴᖅᑭᑕᐅᓂᐊᓕᖅᑐᑦ ᖁᑦᑎᑦᑐᒥ

ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᕆᑲᐃᓐᓇᖅᑕᖓ ᔭᐃᒥᓯ ᐃᑦᑐᓗᒃ ᓇᓗᓇᐃᖅᓯᔪᖅ ᐅᓪᓗᒥ ᓴᖅᑭᑕᐅᓂᐊᕐᓂᖏᓐᓂᒃ ᐃᖅᑲᓇᐃᔭᐅᔾᔪᑎᒃᓴᐃᑦ ᐃᓄᓐᓄᑦ ᐊᐅᓪᓛᖅᑕᐅᓚᐅᖅᓯᒪᔪᓄᑦ ᖃᐅᓱᐃᑦᑐᒧᑦ ᐃᓄᔾᔪᐊᕐᒥᒃ 1950-ᖏᓐᓂ. ᐊᐃᑉᐹ ᐃᖅᑲᐅᒪᔭᐅᔾᔪᑎᒃᓴᖅ ᓴᖅᑭᑕᐅᓂᐊᑐᖅ ᐊᐅᓱᐃᑦᑐᒥ ᑕᓪᓕᒻᒥᖅ, ᓯᑎᐱᕆ 10-ᒥ.

“ᓴᖅᑭᑕᐅᓂᖏᒃ ᐃᖅᑲᐅᒪᔭᐅᔾᔪᑎᓵᒃ ᐱᒻᒪᕆᐅᕘᒃ ᐃᓄᓐᓄᑦ ᕿᒪᐃᕙᓪᓕᐊᓂᕐᒧᑦ ᒪᒥᓴᕐᓂᒧᓪᓗ ᑖᒃᑯᓂᖓ ᐱᐅᖏᑦᑐᒻᒪᕆᓐᓂ ᐊᑐᕆᐊᖃᓚᐅᖅᑕᖏᓐᓂ,” ᐅᖃᖅᑐᖅ ᐃᑦᑐᓗᒃ. “ᑖᒃᑯᐊ ᐃᑭᖏᑦ ᐃᑎᔫᒻᒪᑕ ᐊᒻᒪ ᐊᕐᕌᒍᒐᓚᐃᑦ ᐊᓂᒍᖅᓯᒪᓕᖅᖢᑎᒃ, ᑭᓯᐊᓂ ᒫᓐᓇ ᒪᒥᐊᓐᓂᖃᓚᐅᖅᑎᓪᓗᒋᑦ ᑲᓇᐅᑉ ᒐᕙᒪᒃᑯᖏᑦ, ᐊᒻᒪ ᐃᖅᑲᐅᒪᔭᐅᔾᔪᑎᒃᓴᐃᑦ ᐱᔭᕇᖅᓯᒪᓕᖅᑎᓪᓗᒋᑦ, ᐃᓄᓐᓂᒃ ᐱᕕᒃᓴᖃᖅᑎᑦᓯᓂᐊᖅᐳᖅ ᐃᖅᑲᐅᒪᔾᔪᑎᒃᓴᓂᒃ, ᑭᒃᓵᓂᕐᒧᑦ ᐊᒻᒪ ᒪᒥᓴᕐᓂᕐᒧᑦ, ᐅᖃᖅᑐᖅ.

ᐊᒡᒌᓯᐅᑎᓪᓗᒍ, ᐃᓄᓕᕆᔨᑐᖃᒃᑯᑦ ᒥᓂᔅᑕᖓ ᔮᓐ ᑕᓐᑲᓐ ᒪᒥᐊᓐᓂᖃᕆᐊᖅᑐᓚᐅᖅᑐᖅ ᒐᕙᒪᑐᖃᒃᑯᓐᓃᖔᖅᖢᓂ ᐃᓄᐃᑦ ᐊᐅᓪᓛᖅᑕᐅᓚᐅᖅᓯᒪᓂᖏᓐᓄᑦ, ᐊᒻᒪ ᑲᓇᑕᐅᑉ ᐊᖏᔪᖅᑳᖓ ᓯᑎᕚᓐ ᕼᐊᕐᐳᕐ ᓇᖕᒥᓂᖅ ᒪᒥᐊᓐᓂᖃᓚᐅᑐᖅ ᓱᓕ ᐃᓅᔪᓄᑦ ᐊᐅᓪᓛᖅᑕᐅᓂᑯᓄᑦ ᖃᐅᓱᐃᑦᑐᓕᐊᖅᓯᒪᑎᓪᓗᒍ ᒫᓐᓇᒫᖑᓚᐅᑐᖅ.

ᐊᒥᓱᑦ ᐊᖏᔪᖅᑲᐅᑏᑦ ᑲᑐᔾᔨᖃᑎᖃᖅᑐᑦ ᓄᓇᕗᑦ ᑐᙵᕕᒃᑯᓐᓂ ᐊᒻᒪ ᖃᐅᓱᐃᑦᑐᒥᐅᓂᒃ ᐊᐅᓱᐃᑦᑐᒥᐅᓂᓪᓗ ᑖᒃᓱᒧᖓ, ᐃᓚᒋᓪᓗᒋᑦ ᒥᓂᔅᑕ ᑕᓐᑲᓐ, ᓄᓇᕗᑦ ᓯᕗᓕᖅᑎᖓ ᐄᕙ ᐋᕆᐊᒃ ᐊᒻᒪᓗ ᐊᒥᓱᐃᑦ ᒥᓂᔅᑕᐅᑎᖁᑎᖏᑦ, ᐊᒻᒪᓗ ᒪᑭᕕᒃᑯᓐᓂ ᐊᖏᔪᖃᐅᑎᑦ.

ᓴᓇᓐᖑᐊᖅᑏ ᓯᒥᐅᓂ ᐊᒪᕈᐊᓕᒃ (ᖃᐅᓱᐃᑦᑐᖅ) ᐊᒻᒪ ᓘᑎ ᐱᔭᒥᓂ (ᐊᐅᓱᐃᑦᑐᖅ) ᓴᓇᓐᖑᐊᖅᑎᑕᐅᓚᐅᖅᑑᒃ ᐃᖅᑲᐅᒪᔭᐅᔾᔪᑎᒃᓴᓐᓂᒃ, ᓴᓇᓐᖑᐊᖅᑎ ᑖᓂ ᐊᔅᐳᐊᓐ (ᐃᖃᓗᐃᑦ) ᐃᑲᔪᓚᐅᕐᒥᔪᖅ.

ᒪᒥᓴᕐᓂᖅᑕᖃᕐᓂᐊᖅᑐᖅ ᑕᒪᒃᑮᓐᓂ ᓄᓇᓖᓐᓂ ᓴᖅᑭᑕᐅᓚᐅᖅᑎᓪᓗᒋᑦ ᐃᖅᑲᐅᒪᔭᐅᔾᔪᑎᒃᓵᒃ..

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: