ᐃᓕᓐᓂᐊᕕᔾᔪᐊᒥ ᐃᓕᓐᓂᐊᑎᓪᓗᖓ, ᐅᖃᓕᒫᕐᐸᓚᐅᖅᑐᖓ ᐅᓄᖅᑐᓂᒃ ᐅᖃᓕᒫᒐᑦᓴᓂᒃ ᐅᖃᓕᒫᒐᕐᓂᓪᓗ ᐃᓄᐃᑦ ᒥᑦᓵᓄᑦ. ᐊᐴᑎᒐᔪᖃᑦᑕᓚᐅᖅᑐᖓ ᓴᖅᑭᔮᖅᑎᑕᐅᓂᖏᓐᓄᑦ ᐃᓄᐃᑦ ᐊᕐᓇᐃᑦ ᒥᑭᓪᓕᑎᖅᑕᐅᓯᒪᓂᖏᓐᓂᒃ ᐊᖑᑎᓄᑦ.
ᑭᖑᓂᐊᒍᑦ, ᓂᖏᐅᕋ ᐳᓛᕆᐊᕐᓯᒪᓪᓗᒍ ᐊᐱᕆᓚᐅᖅᑕᖓ ᑭᓱᓕᕆᔨᐅᓂᖏᓐᓂᒃ ᐃᓄᐃᑦ ᐊᕐᓇᐃᑦ ᐊᒻᒪᓗ ᐊᖑᑏᑦ. ᖃᐅᔨᔪᒪᓚᐅᕋᒪ ᐃᓄᐃᑦ ᐊᕐᓇᐃᑦ ᐱᖕᒪᕆᐅᓐᖏᓂᕐᓴᐅᒻᒪᖔᑕ ᐊᖑᑎᓂᒃ. ᑕᐃᒪᐃᒃᑲᒥ, ᖁᖓᑦᑐᓂ ᐊᒻᒪᓗ ᓇᒡᓕᒍᓱᓐᓂᖓ ᖃᐅᒻᒪᐃᓪᓗᓂ ᐃᒧᓪᓗᕐᒥᒃ ᑮᓇᕐᒥᒃ ᓂᓪᓕᓚᐅᕋᓂ.
ᐊᓱᐃᓛᒃ ᐅᓂᒃᑳᕆᐊᓯᓚᐅᕐᐳᖅ ᑐᓴᕐᓂᑐᒻᒪᕆᐅᔪᒥᒃ ᐃᓗᒥᐅᑕᕇᓐᓇᑕᓐᓂᒃ. ᑎᖕᒥᐊᖅ ᒪᕐᕉᓐᓂᒃ ᐃᓴᕈᓕᒃ ᑎᖕᒥᒍᓐᓇᖁᓪᓗᒍ ᐊᒻᒪᓗ ᑎᖏᖃᑦᑕᕐᓗᓂ ᕿᓚᖕᒧᑦ. ᓇᓕᐊᑐᐃᓐᓇᐅᒐᓗᐊᕐᐸᑦ ᓴᐅᒥᐊ ᐃᓴᕈᖓ ᐅᕝᕙᓘᓐᓃᑦ ᑕᓕᕐᐱᐊ ᐃᓴᕈᖓ, ᐊᑐᓂᑦ ᐃᓴᕈᖏᑦ ᐃᑲᔪᖅᑎᒌᒋᐊᓖᒃ ᑲᑐᔾᔨᓗᑎᒃ ᐊᒻᒪᓗ ᐃᑲᔪᖅᑎᒌᓪᓗᑎᒃ ᖃᖓᑕᒍᓐᓇᖁᓪᓗᒋᑦ ᑎᖕᒥᓗᑎᓪᓗ. ᑕᐃᒫᑦᓴᐃᓐᓇᖅ, ᐃᓄᒃ ᐊᖕᓇᖅ ᓇᓕᒧᓕᒃ ᐱᖕᒪᕆᐅᑎᒋᓂᖓᓂᒃ ᐊᖑᑎᐅᑉ ᐃᓚᒌᓂ, ᐊᒻᒪᓗ ᐊᔾᔨᒌᓐᖏᒃᑲᓗᐊᖅᑐᑎᒃ ᐱᓇᓱᐊᒐᑦᓴᖏᑦ, ᐃᑲᔪᖅᑎᒌᒋᐊᓖᒃ ᐊᑕᐅᓯᐅᓗᑎᒃ ᐊᒻᒪᓗ ᑲᑐᔾᔨᓗᑎᒃ ᑲᔪᓯᑦᓯᐊᕈᓐᓇᖁᓪᓗᒋᒃ.
ᓂᖏᐅᕋ ᑕᒫᓃᖃᑎᒋᒍᓐᓃᕋᓗᐊᕐᓱᑎᒍ ᑎᒥᒃᑯᑦ, ᓇᒡᓕᓐᓂᖓ ᓱᓕ ᐆᒪᔪᖅ. ᐆᒪᑐᐃᓐᓇᖏᑦᑐᖅ ᑖᒃᑯᑎᒎᓇ ᐅᓄᖅᑐᐊᓗᒃᑎᒍᑦ ᐊᑎᖃᖅᑎᑕᐅᓂᕐᒥᒍᑦ ᑭᓯᐊᓂᓕᑦᑕᐅᖅ ᐃᖅᑲᓇᖅᑐᑎᒍᑦ ᐅᖃᐅᓯᕆᖃᑦᑕᓚᐅᖅᑕᖏᓐᓂᒃ. ᐊᑦᓱᕈᖃᑦᑕᕐᓯᒪᒐᓗᐊᖅᑐᓂ ᐃᓅᓯᕐᒥᓂ, ᓂᖏᐅᕋ ᐃᓅᓯᖃᓚᐅᖅᑐᖅ ᓇᒡᓕᓂᕐᒥᒃ ᑲᔪᓯᑦᓯᐊᕋᓱᐊᕐᓂᒥᓪᓗ. ᐅᓪᓗᒥᒧᑦ, ᐅᓂᒃᑳᕆᖃᑦᑕᓚᐅᖅᑕᖏᓐᓄᑦ ᓂᕈᒥᑦᓯᖃᑦᑕᕐᐳᖓ ᐊᒻᒪᓗ ᐃᖅᑲᐃᔾᔪᑎᒋᓪᓗᒍ ᐃᓅᓯᖃᕆᐊᖃᕐᓂᕐᒥᒃ ᓇᓪᓕᖕᓂᖃᕐᓂᕐᓴᐅᓗᖓ, ᑐᓐᖓᓇᕐᓂᕐᓴᐅᓗᖓ, ᑐᑭᓯᐊᒐᓱᐊᕐᓂᕐᓴᐅᓗᖓᓗ ᐊᒻᒪᓗ ᓇᓗᖅᑯᑎᓐᖏᓂᕐᓴᐅᓗᖓ.
ᐊᑏ ᐅᓂᒃᑳᖃᕆᑦ ᐱᖕᒪᕆᐅᔪᒥᒃ ᐃᓄᒻᒥᒃ ᐊᕐᓇᒥᒃ ᐃᓅᓯᓐᓃᑦᑐᒥᒃ! #ᖁᕕᐊᓲᑎᖃᕐᓂᖅ #ᐃᓄᐃᑦ ᐊᕐᓇᐃᑦ #Nunavut #ᓄᓇᕐᔪᐊᓕᒫᒥ ᐊᕐᓇᐃᑦ ᐅᓪᓗᖓ
