ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᑐᖏᓕᐊ ᐊᖓᔪᖅᑳᑉ ᔭᐃᒪᔅ ᐃᑦᑐᓗᒃ ᐅᖃᖅᑐᖅ ᐅᓪᓗᒥ ᑕᒪᒃᑯᐊ ᕿᒥᕐᕈᐃᓂᑦ ᒪᑯᓂ ᐊᐅᓚᑦᑎᓂᕐᒧᑦ ᑐᕌᖅᑕᐅᔪᑦ ᓇᓄᕐᓄᑦ ᐃᓱᒪᒋᔭᐅᔭᕆᐊᖃᕐᓂᖏᓐᓂᑦ ᐅᑯᓄᖓ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦᑕ ᑲᑎᒪᔨᖏᓐᓄᑦ.

ᒫᓐᓇ ᐊᐅᓚᑦᑎᓂᕐᒧᑦ ᐃᓕᖓᔪᑦ ᓇᓄᓕᕆᓂᕐᒧᑦ ᐱᒋᐊᓚᐅᖅᓯᒪᒧᑦ 1970-ᑎᑦ ᐊᑐᖅᑎᓪᓗᒋᑦ ᒪᑯᐊ ᑰᑕᐃᑦ ᓇᓐᓄᒍᑎᓄᑦ ᓯᕗᓪᓕᖅᐹᒥ ᓴᖅᑭᑎᑕᐅᓚᐅᖅᓯᒪᑎᓪᓗᒋᑦ. ᑕᐃᑦᓱᒪᓂ, ᓇᓄᐃᑦ ᐊᒥᓲᓂᖏᑦ ᓄᓇᕗᒥ ᓇᓚᐅᑦᑕᖅᑕᐅᓚᐅᖅᓯᒪᔪᑦ ᐊᑯᓐᓂᖏᓐᓂᑦ 7,000 – 8,000 ᓇᓄᐃᑦ. ᐅᑭᐅᑦ 1980-ᑎᑦ ᐊᑐᖅᑎᓪᓗᒋᑦ, ᑐᑭᖏᑦ ᒪᑯᐊ ᐊᑖᓂ ᐃᓚᖏᓐᓂᑦ ᐊᒥᓲᓂᖏᑦ ᓇᓄᐃᑦ ᓴᖅᑭᑎᑕᐅᓚᐅᖅᓯᒪᔪᑦ, ᐊᒻᒪᓗ ᐊᐅᓚᑦᑎᓂᕐᒧᑦ ᐸᕐᓇᐅᑎᑦ ᐊᖅᑭᒃᑕᐅᓪᓗᑎᒃ ᐅᓄᖅᓯᒋᐊᖅᑎᑕᐅᖁᓪᓗᒋᑦ ᓇᓄᐃᑦ ᐊᒥᓲᓂᖏᑦ.

“ᐃᓄᐃᑦ ᐊᐅᓚᑦᑎᖃᑦᑕᖅᓯᒪᔪᑦ ᐊᒻᒪᓗ ᐊᖑᓇᓱᐊᖅᐸᒃᖢᑎᒃ ᓇᓄᕐᓂᑦ ᓇᓗᓇᐃᖅᓯᒪᔪᑦ ᐊᐅᓚᑦᑎᓂᕐᒧᑦ ᑐᕌᖅᑕᐅᔪᑦ ᒪᓕᒃᖢᒋᑦ ᐅᓄᖅᓯᒋᐊᖁᔭᐅᓂᖏᑦ ᐊᒥᓲᓂᖏᑦᑕ ᐅᑭᐅᓄᑦ ᐊᒥᓱᓄᑦ. ᐊᐱᕆᓕᖅᑕᕗᑦ ᒫᓐᓇ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᕿᒥᕐᕈᖁᓪᓗᒋᑦ ᐊᐅᓚᑦᑎᓂᕐᒧᑦ ᑐᕌᖅᑕᐅᔪᓂᑦ ᐱᔾᔪᑎᒋᓪᓗᒍ ᐊᒥᓲᓂᖏᑦ ᐅᓄᖅᓯᓯᒪᓕᕐᒪᑕ ᓄᓇᕗᓕᒫᒥ ᐃᒪᓐᓇ 14, 000 – 16,000-ᓂᑦ ᓇᓄᐃᑦ,” ᐅᖃᖅᑐᖅ ᐃᑦᑐᓗᒃ.

ᓇᓄᖏᑦ ᐃᓗᐊᓂ ᐊᒥᓲᓂᖏᑦ. ᐅᖃᖅᑐᖅ ᑕᐅᑐᖅᑰᑕᖓᓐᓄᑦ ᐃᓱᒪᓇᖅᑐᖅ ᐊᒥᓲᓂᖏᑦᑕ ᐃᓕᖓᓂᖏᑦ ᓇᓄᕐᓄᑦ ᐊᐅᓚᑎᓂᐅᔪᑦ ᓄᓇᒥ ᐊᒥᓲᓂᖃᖅᑐᑦ 1,650. ᖃᐅᔨᒪᔨᕐᔪᐊᖑᓂᕋᑦᑕᑦ ᖃᐅᔨᓴᖅᓯᒪᔭᖏᑦ ᓇᓚᐅᖅᑕᖅᓯᒪᓪᓗᒋᑦ ᐃᒪᓐᓇ 2,300 ᓇᓄᐃᑦ ᑕᐅᕙᓂ Davis Strait-ᒥ.

” ᐅᓄᖅᓯᓯᒪᓂᖏᑦ ᓈᓴᐅᑎᖏᑦ ᓇᓄᕐᓄᑦ ᐃᓱᒫᓘᑎ ᐱᓪᓗᒍ ᐅᑯᐊ ᑭᒃᑯᓕᒫᑦ ᐃᓄᐃᑦ ᐊᑦᑕᓇᑐᒦᓐᓂᖏᓐᓂᑦ ᓄᓇᒥ, ᐊᒻᒪᓗ ᓱᓕ ᐊᒃᑐᖅᓯᖃᑦᑕᕐᓂᖏᓐᓂᑦ ᐊᓯᖏᓐᓂᑦ ᓂᕐᔪᑎᑦ ᐊᒻᒪᓗ ᓇᓕᒧᒐᔭᕋᓗᐊᕐᓂᖏᓐᓂᑦ ᐃᓕᖓᓂᖏᑦᑕ ᐊᕙᑎᒥ ᐃᓕᖓᔪᑦ.” ᐅᖃᖅᑐᖅ ᐃᑦᑐᓗᒃ.

ᑐᕌᖅᑕᐅᔪᑦ ᐅᑯᐊ ᐊᐅᓚᑦᑎᓂᕐᒧᑦ ᐃᓕᖓᔪᑦ ᐅᖃᖃᑎᒌᒍᑕᐅᓂᐊᖅᑐᑦ ᑭᒃᑯᓕᒫᓂ ᓈᓚᒃᑎᑦᑎᓂᖏᓐᓄᑦ ᐅᑯᐊ ᓄᓇᕗᒻᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐱᓕᕆᐊᖑᑎᓪᓗᒋᑦ ᐃᖃᓗᖕᓂ ᐱᓇᓱᐊᕈᓯᐊᓚᖓᔪᒥ, ᒪᐃ 16-17-ᒧᑦ.