ᑐᓴᕋᑦᓴᓕᕆᔩᑦ

ᔫᓯ ᑯᓱᒐᖅ ᑐᓂᔭᐅᔪᖅ ᐃᓚᐃᔾᔭ ᒪᓂᕋᔭᒃ ᐃᓕᑕᕆᔭᐅᔾᔪᑎᒥᒃ
Jose, cbc award
jose, cbc award 2

(ᓄᕕᐱᕆ 22, 2010 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖏᔪᖅᑳᕆᑲᐃᓐᓇᖅᑕᖓ, ᔫᓯ ᑯᓱᒐᖅ ᑐᓂᔭᐅᖃᐅᔪᖅ ᐅᓪᓗᒥ ᐃᓚᐃᔾᔭ ᒪᓂᕋᔭᒃ ᐃᓕᑕᕆᔭᐅᔾᔪᑎᖓᓄᑦ ᓰᐲᓰᒃᑯᓐᓂ.

1980-ᒥ 1990-ᒧᑦ ᑯᓱᒐᖅ ᐊᕐᕌᒍᓄᑦ ᖁᓕᓄᑦ ᑭᕙᓪᓕᕐᒥ ᐊᖏᔪᖅᑳᖑᓚᐅᑐᖅ ᓰᐲᓰᒃᑯᓐᓄᑦ. ᑭᖑᓂᐊᒍᑦ ᓯᕗᓕᖅᑎᐅᓕᓚᐅᑐᖅ ᐊᖏᔪᖅᑳᖑᓪᓗᓂ ᓄᓇᕗᑦ ᑐᙵᕕᒃ ᑎᒥᖓᓐᓄᑦ, ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓄᑦ ᐊᒻᒪ ᒫᓐᓇ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ.

ᔫᓯ ᓯᕗᓕᖅᑎᑦᑎᐊᕙᐅᔪᖅ; ᐃᓄᓐᓄᑦ ᓯᕗᓕᖅᑎᑦᑎᐊᕙᐅᓯᒪᔪᖅ ᐅᖃᐅᓯᑦᑎᓄᓪᓗ. ᓰᐲᓰᒃᑯᓐᓃᒍᓐᓃᕋᒥ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᓐᓅᓚᐅᑐᖅ ᐊᒻᒪ ᐊᒥᓱᓂᒃ ᓄᑖᓂᒃ ᐃᓕᓐᓂᐊᕈᑎᒃᓴᓂᒃ ᐃᓄᑦᑎᑐᑦ ᓴᖅᑮᓪᓗᓂ. ᑕᑯᒃᓴᐅᑎᑦᑎᐊᓚᐅᑐᖅ ᐃᔾᔪᐊᒐᒃᓴᐅᓂᕐᒥᓂᒃ ᑕᑯᖃᑦᑕᕆᐊᖃᑦᑕᑎᒃᓐᓂᒃ ᐃᓄᑦᑎᑐᑦ ᐅᖃᐅᓯᕐᒧᑦ.” ᐅᖃᖅᑐᖅ ᐅᑲᓕᒃ ᐃᔨᑦᓯᐊᖅ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᖏᔪᖅᑳᖓ.

ᐃᓕᐃᔾᔭ ᒪᓂᕋᔭᒃ ᐃᓕᑕᕆᔭᐅᔾᔪᑎᖓ ᐊᑎᖃᖅᐳᖅ ᒪᓂᕋᔭᒃᒥᒃ ᑖᓐᓇ ᓯᕗᓪᓕᖅᐹᖑᓪᓗᓂ ᓈᓚᐅᑎᒃᑯᑦ ᐅᖃᐅᖅᑎᐅᓚᐅᖅᓯᒪᔪᖅ. ᒪᓂᕋᔭᒃ ᐅᒃᐱᕈᓱᓚᐅᕐᒪᑦ ᓴᐳᔾᔨᓂᕐᒥᒃ ᓴᖅᑭᔮᖅᑎᑦᓯᓂᕐᒥᓪᓗ ᐃᓄᐃᑦ ᐅᒃᐱᕆᔭᖏᓐᓂᒃ ᐅᖃᐅᓯᖓᓂᓪᓗ. ᒪᓂᕋᔭᒃ ᐃᑲᔪᖅᑐᐃᓚᐅᑐᖅ ᐃᓄᑦᑎᑐᑦ ᐊᓪᓚᑎᑐᓪᓗ ᐅᖃᐅᓯᕐᓂᒃ ᐊᑐᖃᑦᑕᓂᕐᒥᒃ ᓈᓚᐅᑎᒃᑯᑦ.

“ᔫᓯ ᖁᕕᐊᒋᔭᖃᒻᒪᕆᑦᑐᖅ ᐅᖃᐅᓯᕐᒥᓂᒃ. ᐃᖅᑲᐅᒪᔭᕋ ᐃᓄᐃᑦ ᑕᐱᕇᓴᒃᑯᓐᓃᑎᓪᓗᒍ ᓯᕗᓕᖅᑎᐅᓚᐅᕐᓂᖓ ᐊᑕᐅᓯᕐᒥᒃ ᐃᓄᒃᑎᑐᑦ ᑎᑎᕋᐅᓯᓕᐅᖅᐸᓪᓕᐊᑎᓪᓗᒍ. ᐃᓕᓐᓂᐊᖅᓯᒪᓂᖓ ᐊᒻᒪ ᐃᓄᑦᑎᑑᕈᓐᓇᑎᐊᕐᓂᖓ ᐊᑑᑎᖃᒻᒪᕆᒃᓯᒪᔪᑦ ᓄᓇᕗᒻᒥ ᓄᓇᑖᖅᐸᓪᓕᐊᓇᓱᐊᖅᑎᓪᓗᒋᑦ. ᐃᓄᐃᑦ ᑕᐱᕇᑦ ᑲᓇᑕᒦᑎᓪᓗᒍ ᒐᕙᒪᒃᑯᓐᓂ ᐱᓕᕆᖃᑎᖃᕈᓐᓇᓚᐅᑐᖅ ᖃᓪᓗᓈᑎᑐᑦ ᐊᒻᒪ ᓴᖅᑭᐸᓪᓕᐊᓪᓗᒍ ᐃᓄᒃᑎᑐᑦ ᓄᓇᑖᕐᓂᕐᒧᑦ ᐊᖏᕈᑎᐅᑉ ᐃᓗᓕᖏᑦ ᓄᓇᓕᖁᑎᑦᑎᓐᓄᑦ.” ᐅᖃᖅᑐᖅ ᓵᓕ ᐃᕙᓕᒃ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᖏᔪᖅᑳᖓ. “ᐅᓪᓗᒥ, ᐃᑲᔫᑎᖃᐃᓐᓇᖅᑐᖅ ᓄᓇᓕᖁᑎᒋᔭᑦᑎᓐᓄᑦ ᐃᓚᐅᖃᑦᑕᓂᒃᑯᑦ ᒐᕙᒪᓄᑦ ᖃᐅᔨᒪᑎᑦᓯᕙᒃᑐᓂ ᓄᓇᓕᐅᔪᓂᒃ ᐅᖃᐅᓯᕐᒥᓂᒃ ᐊᑐᕐᓂᖓ ᐱᒻᒪᕆᐅᔪᖅ, ᐃᓕᑕᕆᔭᐅᔭᕆᐊᖃᓪᓚᕆᑦᑐᖅ ᓰᐲᓰᒃᑯᑦ ᒪᓂᕋᔭᐅᑉ ᐃᓕᑕᕆᔭᐅᔾᔪᑎᖓᓄᑦ.” ᐅᖃᕇᖅᑐᖅ ᐃᕙᓕᒃ.