(ᒫᑦᓯ 26, 2013 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃᑯᑦ ᒪᑐᐃᕐᓯᓂᐊᖅᑐᑦ ᐱᓇᓱᐊᕈᒪᔪᓄᑦ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᖅᑎᓄᑦ ᐃᑲᔫᑎᓂᒃ ᐱᓇᓱᐊᕈᓯᐅᓂᐊᖅᑐᒥ, ᐄᑉᕈ 1, 2013.
ᑕᑕᑎᒐᑦᓴᑦ ᐊᑐᐃᓐᓇᐅᔪᑦ ᑐᓐᖓᕕᒃᑯᑦ ᐃᑭᐊᖅᑭᕕᖓᓂ, ᐊᒻᒪᓗ ᖃᐅᔨᒋᐊᒃᑲᓐᓂᕈᑎᒃᓴᑦ ᐊᐅᓪᓚᖅᑎᑕᐅᖃᑦᑕᓚᐅᖅᑐᑦ ᐃᓕᓐᓂᐊᕐᕕᓕᒫᓄᑦ, ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᖕᓄᑦ, ᕼᐊᒻᓚᑦ ᐊᓪᓚᕝᕕᖏᓐᓄᑦ ᐊᒻᒪᓗ ᓄᓇᓕᓐᓂ ᑐᖅᑲᑕᕐᕕᖕᓄᑦ.
ᐱᓇᓱᐊᖅᑐᑦ ᑎᑎᕋᕆᐊᓖᑦ 500−ᓂᒃ ᐅᖃᐅᓯᖅᑕᓕᖕᓂᒃ ᐅᓂᒃᑳᓂᒃ ᐅᖃᐅᓯᖃᑦᓯᐊᕐᓗᑎᒃ ᐊᑐᕐᓂᐊᓂᕐᒥᓂᒃ ᐃᓕᓐᓂᐊᖅᑕᒥᓂᒃ ᐱᕚᓪᓕᕈᑎᒃᓴᐅᑎᓪᓗᒍ ᐃᓄᐃᑦ ᐱᔪᓐᓇᐅᑎᖏᓐᓄᑦ, ᓇᑭᓐᖔᕐᓯᒪᓂᖏᓐᓄᑦ, ᐅᖃᐅᓯᕐᒧᑦ ᐃᓕᖅᑯᓯᕐᒧᓪᓗ. ᑕᒪᕐᒥᒃ ᐅᓂᒃᑳᑦ ᐃᖕᒥᓃᓐᖔᓪᓚᑦᑖᕆᐊᓖᑦ ᐊᒻᒪᓗ ᑎᑎᕋᕇᕐᓯᒪᔪᓂᒃ ᐃᔾᔪᐊᕐᓯᓯᒪᔭᕆᐊᖃᓐᖏᑦᑐᑦ ᑎᑎᕋᖅᑕᐅᖃᑦᑕᕐᓯᒪᔪᓂᒃ. ᐱᓇᓱᐊᖅᑐᑦ ᐃᓕᓐᓂᐊᕕᖕᒥ ᐃᓕᓐᓂᐊᕐᓂᖏᓐᓂᒃ ᑎᑎᕋᖅᑕᐅᓯᒪᑉᐸᑕ ᓈᖕᒪᒋᔭᐅᓂᕐᓴᐅᔪᖅ ᐅᕝᕙᓗᓐᓃᑦ ᐃᓄᐃᑦ ᐅᖃᐅᓯᖓᓂᒃ ᐃᓕᓐᓂᐊᕐᐸᑕ. ᐊᖏᖅᑕᐅᒍᓐᓇᕐᒥᔫᒐᓗᐊᑦ ᐱᓇᓱᐊᖅᑐᖅ ᑐᑭᓯᓇᕐᓯᑎᑦᓯᓯᒪᑦᓯᐊᑐᐊᕐᐸᑦ ᐃᓕᓐᓂᐊᕐᓂᖓ ᐊᒻᒪᓗ ᐃᖅᑲᓇᐃᔮᖓ ᐃᑲᔫᑎᖃᕐᓂᐊᕐᓂᖓᓂᒃ ᓯᕗᒧᐊᒃᑲᓐᓂᕈᑎᒃᓴᐅᓂᖓᓂᒃ ᐃᓄᐃᑦ ᐱᔪᓐᓇᐅᑎᖓᓄᑦ.
ᒪᕐᕉᒃ ᐃᓅᒃ ᐃᓕᓐᓂᐊᖅᑑᒃ ᑐᓂᔭᐅᓂᐊᖅᑑᒃ $5,000.00 ᐊᑐᓂᑦ ᐃᓕᓐᓂᐊᖅᑑᒃ ᐃᓕᓴᕆᔭᐅᓯᒪᔪᓂ ᐃᓕᓐᓂᐊᑲᓐᓂᕕᖕᓂ. ᑐᓐᖓᕕᒃᑯᓃᓐᖔᖅᑐᓂᒃ ᖃᐅᔨᓴᖅᑎᖃᕐᓂᐊᖅᑐᖅ ᕿᒥᕐᕈᓇᓐᓂᐊᖅᑐᓂᒃ ᐱᓇᓱᐊᕈᑎᓂᒃ ᐊᒻᒪᓗ ᓂᕈᐊᕐᓗᑎᒃ ᐃᓕᓐᓂᐊᖅᑎᓂᒃ ᐃᓕᓐᓂᐊᖅᑕᖏᑎᒍᑦ, ᐅᓂᒃᑳᓕᐅᕐᓗᓂ ᑎᑎᕋᕐᓯᒪᔪᓂᒃ ᐊᒻᒪᓗ ᖃᐅᔨᒋᐊᕐᕕᒃᓴᓂ ᓇᓗᓇᐃᕐᓯᓯᒪᓗᓂ.
ᐱᓇᓱᐊᕈᑏᑦ ᑐᓂᔭᐅᓯᒪᔭᕆᐊᓖᑦ ᔪᓚᐃ 9, 2013, ᓄᓇᕗᑦ ᐅᓪᓗᖓᓂ. ᐃᓕᓐᓂᐊᖅᑏᑦ ᐊᑎᖃᖃᑕᐅᔪᑦ ᐅᕝᕙᓘᓐᓃᑦ ᐊᑎᖃᖃᑕᐅᔪᓃᖃᑕᐅᒍᓐᓇᖅᑐᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ ᐱᓇᓱᐊᕈᓐᓇᖅᑐᑦ ᐃᓕᓐᓂᐊᖅᑐᒧᑦ ᐃᑲᔫᑎᒥᒃ.
-30-
ᖃᐅᔨᒋᐊᕐᕕᐅᖃᑦᑕᕐᓕ
ᑭᐅᕆ ᒪᒃᓕᔅᑭ
ᑐᓴᐅᒪᖃᑦᑕᐅᑎᓕᕆᓂᕐᒧᑦ ᑐᑭᒧᐊᒃᑎᑦᑎᔨ
ᓄᓇᕗᑦ ᑐᓐᖓᕕᒃ ᑎᒥᖓ
ᐅᖄᓚᐅᑖ: (867) 979-4914 ᐊᑭᖃᓐᖏᑦᑐᖅ: 1-888-646-0006
ᐃᑉᐱᐊᔪᒻᒥᒐᖅ: (867) 222-2893
www.tunngavik.com
